Kabanata 0001

“Nakauwi na ba ang sir mo, Bea?” tanong ni Raquel sa katulong nang makasalubong niya ito. Kakauwi niya lang galing check-up dahil ilang araw ng masama ang kaniyang nararamdaman.

Napayuko ang katulong na tila ba ay iniiwasan niyang magtagpo ang kanilang mga tingin. “N-Nakauwi na po si sir N-Nicholas, Senyorita.”

Nag-abot ang mga kilay ni Raquel dahil sa ikinikilos ng katulong kaya napatayo siya nang tuwid. Alam niyang may nangyayari na naman at hindi na siya magugulat pa. 

Ilang taon na rin na ganito ang kaniyang nadadatnan sa pag-uwi. Kahit hindi sabihin sa kaniya ng katulong ay alam niyang may inuwi na namang babae ang kaniyang asawa. Iniisip pa lamang niya iyon ay parang tinutusok ang kaniyang puso.

“Sige na ako na ang bahala. Bumalik ka na sa trabaho mo, Bea.” Napatango na lang ang katulong kay Raquel at dali-dali itong umalis sa harapan niya. 

Nag-angat ng ulo si Raquel para tignan ang ikalawang palapag ng bahay. Simula nang ikasal siya kay Nicholas ay walang ginawa ang asawa niya kung hindi saktan ang damdamin niya. Sa kabila ng lahat ay nanatili pa rin si Raquel dahil mahal niya ang asawa at handa siyang maghintay hanggang sa matutunan siyang mahalin nito.

Mabigat ang mga hakbang na ginawa ni Raquel paakyat sa ikalawang palapag ng bahay. Alam niya kung nasaan ang asawa sa mga oras na ito. Hindi niya akalain na uuwi ito nang maaga. Sa loob ng kanilang pagsasama ay walang araw na hindi sila mag-away. 

Palaging pinamumukha ni Nicholas sa kaniya na kailanman ay hindi siya magugustuhan ng asawa. Halos araw-araw ring nalalaman ni Raquel na may kasama itong babae at hindi niya na mabilang ang ilang pagkakataon na nahuli niya ito pero binalewala niya ang lahat. Nagpaka-alipin siya kay Nicholas dahil mahal niya ito. Mahal na mahal niya ang asawa matagal na.

Paiyak na siya sa mga oras na ito habang naglalakad nang maalala niya ang kaniyang sinapit sa kamay ng asawa. Hindi niya na mabilang ang ilang ulit na pagdurog ni Nicholas sa kaniyang puso pero ito siya, nagpapa-alipin dahil lang sa pag-ibig at hindi niya alam kung hanggang kailan siya magiging ganito.

Ilang minuto ang nakalipas ay nakarating na rin siya sa wakas. Dumiretso na si Raquel sa opisina ng asawa dahil alam niyang dito ito tutungo. Nakakunot ang kaniyang mga noo nang mapansin na bukas ang pintuan. Hindi na siya kumatok pa at kaagad na binuksan ang pinto.

“Ano ang ibig sabihin nito?” tanong niya sa dalawang taong mahalaga sa buhay niya. Sabay-sabay namang tumulo ang mga luha sa mata ni Raquel dahil sa kaniyang nadatnan. 

Nahuli niya ang kaniyang asawa na si Nicholas at ang kaniyang malapit na kaibigan na si Isabella na ngayon ay magkatapong at walang mga saplot. Nanginginig ang kaniyang mga tuhod at tila ba anong oras ay mahihimatay na siya sa kaniyang nakita.

Kaagad namang bumangon si Isabella at isinuot ang kaniyang damit habang si Nicholas naman ay nagsuot lamang ng kaniyang pang-ilalim na damit.

“Raquel...” sambit ni Isabella na tila hindi alam ang gagawin. 

“Bakit, Isabella? Bakit mo nagawa sa akin ito?” naluluhang tanong niya. “Kaibigan kita pero bakit mo inahas ang asawa ko?”

Inaasahan ni Raquel na luluhod ang kaibigan at hihingi ng kapatawaran dahil sa ginawa niyang pagtataksil subalit ngumisi ito na tila ba masaya pa ito sa mga nangyari. 

“Stop it, Raquel. Hindi ako ang may kagustuhan nito kung hindi ang asawa mo. Kasalanan ko ba na nagsawa siya sa 'yo at sa akin niya hinahanap ang hindi niya makita mula sa 'yo?" 

Naikuyom ni Raquel ang kaniyang mga kamao sa narinig. Hindi niya napigilan ang sarili at sinugod si Isabella. Walang habas niya itong pinagsasampal at kung hindi siya pinigilan ni Nicholas ay malapit niya na makalbo ang kaibigan.

“Napaka-walang hiya mo! Kaibigan kita pero hindi ko inaasahan na gagawin mo sa akin ito. Tinuring kitang kapatid ko pero pinagtaksilan mo ako!?” sabi niya at akmang susugod na naman nang pumagita si Nicholas.

Napaiyak pa lalo si Raquel dahil hindi niya inaasahang ipagtatanggol ni Nicholas si Isabella na hindi niya naman karaniwang ginagawa sa lahat ng mga kalaguyo niya.

“That's enough, Raquel. Wala kang karapatan na saktan si Isabella nang ganito. Hindi kita kailangan sa buhay ko at sa tingin mo ba ay mahal kita?”

Pakiramdam ni Raquel ay wala nang mas sasakit pa sa mga binitawang salita ni Nicholas. Palaban siyang tao pero pagdating sa asawa niya ay parang nanghihina siya. Hindi niya alam kung ano ang gagawin sa mga oras na ito. Sobra siyang nasaktan sa ginawa nilang pagtataksil sa kaniya. 

“Kahit na anong mangyari ay asawa mo pa rin ako. Kaibigan ko ang ikinama mo, Nicholas. Matalik kong kaibigan. Hindi pa ba ako sapat? Binigay ko naman lahat sa 'yo para lang mahalin mo ako pero bakit? Bakit mo kailangan gawin ito?” naiiyak na tanong niya sa asawa.

Durog na durog na si Raquel sa mga oras na ito pero ang dalawang taong nagwasak sa puso niya ay walang mga pakialam.

Napailing si Nicholas. “You will never be enough. I don't love you and you're aware of that. If there's one thing I keep you in my life, it's because of your family's business. Stop fantasizing me, Raquel. I will never love you, not even a little.”

Hindi na napigilan ni Raquel ang paghagulgol. Lahat ng mga binitawang salita ni Nicholas ay parang karayom at paulit-ulit na tumusok sa puso niya. Gusto niyang magwala at pilitin itong sabihin na kahit papaano ay may nararamdaman ito sa kaniya. Nais niyang sabihin sa asawa na hindi siya naniniwala na wala itong pag-ibig sa kaniya kahit kaonti pero nanaig ang takot sa kaniyang puso. 

Ayaw niyang mas lalong magalit ito sa kaniya kaya kahit na masakit ay kailangan niyang lunukin ang lahat. Takot siya kay Nicholas. Takot siyang mawala sa buhay nito kaya nakahanda siyang kalimutan ang araw na ito at isiping walang nangyari.

Gamit ang kaniyang mga daliri ay pinunasan ni Raquel ang kaniyang mukha saka pinilit ngumiti sa asawa niya.

“Hindi mo na kailangan pa ipamukha sa akin na hindi mo ako mahal pero sana kahit sa isang pagkakataon ay bigyan mo naman ako ng pagkakataon. Buksan mo ang puso mo para sa akin, Nicholas.”

Wala na siyang pakialam pa kung magmukha siyang tanga dahil ang alam niya ay mahal niya ito. 

“I can't believe how desperate you are, Raquel.” Napapailing naman sa kabilang banda si Isabella nang sabihin niya iyon pero hindi siya pinansin ni Raquel dahil nakatuon ang kaniyang buong atensyon sa asawa. Tinitigan siya nang masama ni Nicholas at alam niyang galit na galit na ito sa kaniya.

Kahit pa saktan siya ni Nicholas ngayon ay mananatili siya hanggang sa kaniyang huling hininga dahil asawa siya nito at kahit magdala pa siya ng ilang babae ay hindi siya aalis.

“Hindi mo kayang turuan ang puso ko na mahalin ka. Hindi ang desperadang katulad mo ang mamahalin ko. Alam mo kung sino ang na sa puso ko at hindi mo iyon mapapalitan kahit kailan, kahit pa sa huli mong hininga, Raquel Montenegro.”

Napailing pa si Nicholas nang sabihin iyon at tuluyang iniwan si Raquel na ngayon ay humahagulgol nang iyak sa sama ng loob.