Chapter 6 part 1

Abala si Clavier sa pagbabasa ng report na binigay ni Rowena kanina lang at hindi hadlang ang kumatok upang matigil ang ginagawa niya.

"Come in!" sagot niya at binuklat ang sunod na pahina. Bumukas ang pinto at hindi man lang niya nilingon ang taong pumasok.

"Beb…"

Napahinto siya sa pagbabasa nang marinig ang boses ni Assy. Na-miss niya ito kahit na nagkakasabay sila mula sa condo papunta rito sa office. Hindi na siya nagsalita pa kanina dahil ayaw niyang makarinig ng negative words from her.

"May kailangan ka?" tanong niyang nanatili sa binabasa ang paningin. Pansin niyang lumapit ito sa mesa niya at naglapag ng plastic. “Ano iyan?” 

"Pagkain. Mag-lunch muna tayo," sagot nito.

Tumingin siya sa wristwatch at lampas na 12nn. Hindi niya napansin ang oras dahil sa kagustuhang tapusin muna ang binabasang report. 

Bumuntonghininga siya bago tiniklop ang white folder at pinasok sa drawer.

"Galit ka pa ba?" mahinang tanong ni Assy. “Sorry kanina,” dagdag nito.

Hindi agad siya sumagot at tinitigan lang ito. Mayamaya ay tumungo si Assy at tumalikod. Naglakad ito papunta sa pinto kaya nagmadali siyang tumayo at pinigilan ang braso nito saka humarang sa pintuan.

"Saan ka pupunta?" tanong niya.

"Sa labas. Ayaw mo akong kausapin eh," sagot nitong nasa pinto ang paningin.

“Hay nako, tinitigan lang kita, aalis ka na?” Inakbayan niya ito't inikot pabalik sa mesa. Kinuha niya ang plastic at dinala sa mahabang mesa. Dito siya kumakain minsan pero madalas ay sa canteen o kaya sa labas. Pero ngayong nandito si Assy, sa tingin niya'y mapapadalas silang kakain dito. Hinila niya ang silya para sa babae.

“Akala ko galit ka,” nahihiyang saad ni Assy nang makaupo. Pinagtulungan nilang dalawa na ilabas ang dalawang baonan.

“Hindi,” aniya't ngumiti.

Pagkatapos nilang kumain ay bumalik na sa kaniya-kaniyang trabaho. Pagkauwi naman sa hapon ay dinaanan nila sa Amarelia Garden ang sasakyan ni Assy saka pa lang hiwalay na umuwi. Umuwi sa mansiyon si Clavier habang si Assy naman ay sa bahay daw ng parents nito.

Masaya si Clavier dahil madalas niyang nakakasama si Assy sa loob ng halos tatlong linggo.

“Mel, si Assy nasaan?” tanong niya sa babaeng naabutan pagdating sa baba ng building.

Paglabas sa office ay nagtungo siya sa office ni Assy ngunit walang tao roon. Usapan pa naman nila na mag-coffee sa labas bago umuwi sa condo.

"Sir, ibinilin po ni Ma'am, sa akin na sabihin sa iyo, na mauna na raw siya," sagot nito.

“Saan daw siya pupunta?”

“Hindi po sinabi, eh.”

"Okay, salamat." Mag-isa siyang uuwi sa condo pero bago iyon ay dumaan siya saglit sa flower shop. Papasok siya nang makita si Ashley kasama ang ibang lalaki at may bitbit itong bulaklak na halatang galing sa lalaking iyon. Napailing siyang nagtago sa gilid at hinintay silang makaalis. Napangisi siya dahil magkahawak-kamay ang dalawa habang nakapilig ang ulo ni Ashley sa balikat ng lalaki.

Nang makatapos bumili ng bulaklak ay kaagad siyang umalis at nagtungo sa coffee shop na madalas nilang puntahan ni Assy noong college pa lang sila. Palapit na sana siya sa counter nang may tumawag sa pangalan niya.

“Clavier!”

Lumingon siya sa pinanggalingan ng boses na iyon at nakita niya si Troy kasama sina Winston, Micmac at Rey.

"Dude!" bulalas ni Winston sabay senyas sa kaniya na lumapit. 

"Bakit kayo nandito?" tanong niya't isa-isang tumingin sa tatlo maliban kay Troy.

"Inimbitahan kami ni Troy na magkape. . . at pakilala na rin s-sa girlfriend niya," sagot ni Rey na may ibig sabihin ang mga tingin sa kaniya maging si Micmac at Winston.

"Okay, maiwan ko na kayo. Nagmamadali kasi ako, eh." Tumalikod siya sa kanila at humarap sa gawi ng counter.

"Hindi mo ba hihintayin ang girlfriend ko Clav? Sandali lang 'yon sa restroom at para makilala mo rin siya," sabi ni Troy.

"Hindi na, next time na lang," sabi niya bago nagpatuloy sa counter at bumili ng tatlong coffee. Dire-diretso lang siya at walang lingon-lingon na lumabas ng coffee shop. Pumasok siya sa katabing shop nito at bumili ng dalawang karton ng Pizza bago bumiyahe pauwi sa condo.

Pagkababa sa sasakyan ay agad siyang nagtungo sa elevator pero hindi pa man siya nakalapit ay may tumawag sa pangalan niya.

"Clav!" boses babae.

Nilingon niya ito at naglakad papunta sa kaniya si Ashley. “Ang bilis naman nitong nakapunta rito?” mahina niyang tanong sa sarili.

"Wow! Para sa akin ba ang mga iyan? Thank you, ah! Super sweet mo talaga, babe!" Nakangiti ito at akmang kukunin ang dala niyang bulaklak at Pizza. Agad niyang inilayo sa babae ang mga iyon na ipinagtaka ng babae.

"Don't touch! This is not for you!” talagang diniinan niya bawat bigkas ng mga salita. 

“Oh come on, babe. Wala kang ibang pagbibigyan niyan dahil ako lang naman ang girlfriend mo.” Umikot ang mata nito at humalukipkip.

“Hindi naman talaga ito para sa iyo. This is for Assy!”

Tumaas ang kilay nito at kumunot ang noo. "Sinong Assy? May bago ka na pala? Kaya hindi mo na ako pinapansin?" Nagtatampo na may halong lambing na tanong nito. Ngumuso pa ito at nagmaktol, akala naman ay aapekto sa kaniya ang pag-iinarte nito.

"Stop fooling yourself, Ashley. Maiwan na kita dahil may pupuntahan pa ako." Pumasok siya sa elevator nang bumukas iyon. Sumunod si Ashley sa kaniya pero agad niya itong itinulak palabas ng elevator bago pa ito nagsara.

“Babe!” Masama ang tingin ng babae sa kaniya dahil muntikan na itong matisod sa suot na mahabang takong. Idagdag pa ang maikling palda na halos makita na ang panty at damit na halos lumuwa na ang mga dibdib. Dinaig pa nito ang mga babaeng bayaran na nakatambay sa kalye Ulap.

Itinaas-baba niya ang dalawang kilay at pumikit dahil sa malas na nakasalamuha ngayong hapon. Na-badtrip siya no'ng makita ang pagmumukha ni Troy doon sa coffee shop at dumagdag naman si Ashley na biglang sumulpot dito sa Condominium. Ayaw na ayaw niyang ipinagsiksikan ng babae ang sarili sa kaniya at higit sa lahat, ayaw na ayaw niyang niloloko at pagmumukhaing tanga. Alam niyang iba ang pakay ng babae sa kaniya kung kaya't pilit isinisiksik ang sarili.