KABANATA 7

Kitang-kita ni Clarisse kung paano nanlaki ang mga mata ni Drake nang marinig ang boses na iyon. Napalunok si Clarisse at napatitig din sa lalaking nakatayo ilang metro lang ang layo sa kanila. Si Callen.

Hindi niya alam kung nakita ba siya nito kasi natatabunan sila ng kahoy na nasa gilid ng gate. Nanliit ang mga mata ni Clarisse habang nakatitig kay Drake.

“Kuya….k-kailan ka pa nakauwi?” tila kinakabahang tanong nito sa lalaki.

Hindi gaanong nakita ni Clarisse ang naging reaksyon ni Callen pero halatang-halata kay Drake na kinakabahan ito. Nakita niya pa kung paano pasimpleng sumenyas si Drake sa maid nila para dumalo sa kanila. Agad namang tumalima ang maid.

“Bring them to the maid’s house. Sa likod kayo dumaan,” bulong pa nito. “Kuya,” sabi nito at tuluyan nang pumasok sa bukana ng mansyon para salubungin ang kapatid nito.

Binalingan sila ng maid na inutusan ni Drake. Ang sama pa ng tingin nito sa kanya kaya napayuko na lang si Clarisse.

“Tara na. Sundan niyo ako,” malamig na sabi pa nito at nauna nang maglakad. Walang choice si Clarisse kundi ang sumunod na rin dito dahil agad na pinasunod na sila ng mga bodyguard.

Kumakabog ang dibdib ni Clarisse habang papunta sila sa likod ng bahay.

“A-Ate…tara na… umalis na tayo rito…” bulong ni Luis sa kanya pero mariin niya itong tiningnan. Alam niyang nakikinig ang mga guard ni Drake. Mas iniyuko na lang ni Clarisse ang ulo habang yakap-yakap ang kapatid at anak niya.

“Oh, dito kayo,” tila mabigat sa loob na sabi pa ng maid na naghatid sa kanila. Doon lang nag-angat ng tingin si Clarisse at nakita niyang nasa likod na nga sila ng mansyion ng mga Giorado. “Hoy, huwag kayong aalis dito ha! Pag ako napagalitan dahil nakalabsas kayo, humanda kayo sa akin!” Pinanlakihan sila ng mga mata ng maid na naghatid sa kanila. Nag-iwas na lang ng tingin si Clarisse at hindi na ito pinatulan. “Huwag kayong aalis, ha! Sinasabi ko sa inyo. Pupuntahan kayo ni Sir Drake dito!” banta pa ng maid bago tuluyang umalis doon. Naiwang kasama ni Clarisse ang mga guard ni Drake.

Dahan-dahan siyang umupo sa may sementong bench na nasa harapan ng maid’s house. Ganoon pa rin ang ayos nito. May mga ilang nagbago pero iyong pinaka-main structure ay naroon pa rin naman. Ilang taon din naman kasi sila ni Drake at muntik pa nga silang magpakasal kaya ilang beses na rin siyang nakakapunta rito sa bahay nila. Iyon din ang dahilan kung bakit kilala nia si Callen.

Ibang-iba ito kay Drake at ito lang ang kinatatakutan ng huli. Kung tama ang kanyang hinala ay hindi pa nito alam ang pinaggagawa ni Drake. Hindi pa rin naman kasi niya sinabi ang buong nangyari. Mag-uusap pa dapat sila pero ito nga ang nangyari. Huminga siya nang malalim at mas niyakap ang anak. Kung sa bagay, puwede niyang gamitin ang pagkakataong ito para makausap na si Callen at malaman na nito ang pinaggagawa ng kapatid nito. Naikuyom niya ang mga kamay nang bumalik na naman sa kanyang isipan ang ginawa ng mga ito sa kanya. Tiningnan niya ang kanyang anak at hinalikan ito sa noo. Tumingala si Michael sa kanya.

“Mama…dito tayo titira na po?” inosenteng tanong pa nito sa kanya. Nginitian lang ni Clarisse ang kanyang anak at saka hinalikan ito sa noo.

Binalingan niya ang kapatid at parang pinipiga ang kanyang puso dahil hitsura nito. Ang dami niyang plano noong nalaman niyang makakalabas na siya ng kulungan. Ang akala niya ay maaayos na niya ang lahat sa buhay niya. Marami siyang pinaghandaan para sa kinabukasan ng anak niya at ni Luis. Sinabi niya sa sariling babawi siya sa kanyang kapatid dahil siya rin naman ang dahilan kung bakit hindi naging maganda ang kinabukasan nito.

Drop out kasi si Luis at high school lang ang tinapos nito. Nang ipinanganak siyang may sakit sa puso ay ang tanging nakitang paraan ng kanyang ina na makakaligtas sa kanya ay ang ipalit siya sa anak ng amo nito. Ayaw man nitong gawin, mas pinili nitong iligtas siya. Dahil sa guilt na naramdaman para kay Trina ay ito ang pinag-aral ng mga ito sa halip na si Luis. Naging mahirap ang buhay ni Trina pero ginawa naman ng pamilya ni Clarisse ang lahat ng kanilang makakaya para lang kay Trina.

Alam niya kung gaano kahirap kay Luis ang desisyong iyon ng mga magulang nila. Noong huli nga ay hindi na nito napigilang magtanong at magalit sa mga magulang nila kung bakit mas pinapaboran ng mga ito si Trina. Doon na sumabog ang lahat. Napilitan ang mga magulang nila na sabihin ang totoo. Ang hindi alam ng mga ito ay naroon si Trina at nakikinig. Nang araw na iyon din ay sumugod si Trina sa bahay ng mga Buenaventura at doon nito isiniwalat ang totoo.

Kung ano anong masasamang bagay ang sinabi ni Trina sa mga Buenaventura kaya galit na galit ang mga ito sa kanila. Hindi niya rin alam kung bakit ganoon na lang ang pagsisinungaling ni Trina at kung bakit ganoon na lang ang pagkamuhi nito sa totoong pamilya niya na wala namang ibang ginawa kundi ang ipadama rito ang kahit paano ay magandang buhay.

“Ano pang ginagawa niyo rito?! Pasok!”

Nabalik sa reyalidad si Clarisse nang marinig ang galit na boses ni Drake. Agad siyang napatayo at ganoon din ang ginawa ni Luis. Mas lalong nagsumiksik ang anak niya sa kanyam

“Huwag mo hawakan ang mama ko!” matinis na sabi nito na agad niyang sinaway.

Galit na galit na nakatingin si Drake sa kanya. Umiigting ang panga nito at pinanlilisikan sila ng mga mata.

“D-Drake…”

“Sinabi ng pasok!” Napaigting si Clarisse at takot na napatango na lang. Nanginginig na hinila niya ang anak at si Luis para sana makapasok na sila sa loob nang biglang tumakbo palayo si Michael.

“Papa? Papa!”

Nanlaki ang mga mata ni Clarisse at agad na napatingin sa direksyong tinakbuhan ng anak niya. Maging si Drake at ang mga bodyguard at natuod sa kinalalagyan nang makitang nakalapit na ang anak niya kay Callen na noon ay kunot na kunot ang noong nakatitig sa kanila.

“Papa!” ulit ni Michael na mas lalong ikinagulat nilang lahat. Mabilis pa sa alas kwatrong napatakbo si Clarisse papunta sa anak.

Kumakabog ang kanyang dibdib nang lumuhod si Callen para pantayan ang kanyang anak.

“Ilang taon ka na?” malalim ang boses na tanong nito. Mas lalong kinabahan si Clarisse.

Kilala niya si Callen. Hindi ito basta-bastang nagpapalapit at hindi rin ito basta-bastang namamansin. He was even known for being a ruthless and fearless businessman. Never niya pa itong nakitang naging malambot pero noong oras na iyon, pakiramdam niya ay may iba.

“Five po!”

Lumunok si Clarisse at mabilis na hinila palayo si Michael.

“Anak, hindi mo siya papa,” mahinang bulong niya at saka sila nagkatitigan ni Callen. Matalim ang tingin nito sa kanya.

“May dapat ba akong malaman? What in the world is happening here, Drake, Clarisse?”