Chapter 52: THE OLD DAYS

AUTHOR'S POV

FLASHBACK, 2017

Magkakapit-bahay lamang sina Cloud at ang mag-bestfriend na sina Carol at Vier kaya naman naging close ang tatlo sa isa't-isa. Mas matanda si Cloud nang dalawang taon sa dalawang babae kaya naman kuya ang turing nila sa kanya. Kung minsan ay pinangangaralan din sila ni Cloud sa tuwing may mga kalokohan silang nagagawa na lagi din naman nilang pinapakinggan.

Bukod pa doon ay si Cloud din ang nagsisilbing protektor, bodyguard at chaperon nila sa tuwing aabutin sila ng madaling-araw sa kung saang lugar kapag may mga dance contest silang sinasalihan. Hindi rin naman pulos ka-seryosohan lang itong si Cloud sa kanila. Paminsan-minsan ay kasama din nila ito sa kaharutan at kasama sa masasayang sandali ng kanilang kalokohan.

Ang hindi alam ni Vier ay nagsimula na palang makaramdam ng malalim na pagtingin sa kanya si Cloud. Ngunit dahil na rin sa kawalan niya ng self-confidence ay hinayaan na lang niya sa sarili ang damdaming iyon at pinagpapasalamat na lamang niya na kahit pa hindi man niya masabi sa dalaga ang kanyang pag-ibig rito, ay palagi pa rin naman niya itong nakakasama.

Hindi niya alam kung sadya bang hindi niya nakayanan ang itago ang pagmamahal niya kay Vier o sadyang magaling lang makaramdam ang bestfriend nito at pilit siyang pinaamin nito sa nararamdaman nang minsang magkasama sila ng wala si Vier.

Wala na siyang nagawa sa kakulitang taglay nito at napaamin na.

"H'wag mo na lang banggitin sa kanya ha," kabadong bilin niya kay Carol matapos niyang sabihin dito ang lahat-lahat. "Okay na ako sa ganito. Atleast, naaalagaan ko siya 'di ba?," nakangiti niya pang turan kahit na sa loob-loob ay gusto niya rin namang sabihin kay Vier na mahal niya ito. Iyon nga lang ay natatakot siya na baka lumayo lang sa kanya si Vier.

"Eh pa'no kung jumowa na si Vier ha, kakayanin mo bang makita siyang masaya sa piling ng ibang lalaki?," tanong sa kanya ni Carol na nakapagpa-isip sa kanya.

Nang mga sandaling iyon kasi ay masaya pa siya dahil nga malaya pa niyang nakakapiling ang minamahal niyang babae nang walang ibang iniisip kundi ang makasama lamang ito. Ngunit may punto nga naman ang tanong na iyon ni Carol. Paano na lang kung dumating na ang panahon na at maging ready na siya para pumasok sa isang relasyon? Kakayanin ba niya?

"Kung hindi mo kaya, eh di umamin ka na lang kuya. Wala namang mawawala sa 'yo. Saka susuportahan kita, kaya 'wag ka nang mag-alala" sabi pa ni Carol sabay kindat sa kanyang kuya habang kinikilig-kilig para sa dalawang tao na pinaka-close sa kanya.

At noon ngang ika-dalawampung kaarawan ni Vier ay napagdesisyunan na niyang sabihin dito ang pagtatangi niya sa kaibigan. Bahagya pa ngang natawa si Vier, pati na rin si Carol nang dumating siya sa bahay nito. Bagay na sa tingin niya ay dahil na rin sa hitsura niya nang dumating siya roon.

Sa simula pa lang kasi nang araw na iyon ay pilit na niyang kinakalma ang sarili para sa gagawing pag-amin sa kaibigan pero talagang hindi siya tinatantanan ng kaba. Ang ending tuloy ay namutla na siya sa kakaisip pa lang.

"Kuya Cloud, 'di ba may sasabihin ka sa ating celebrant?," pag-uudyok sa kanya ni Carol nang matagalan siya sa pagkatameme.

"Ano 'yun kuya? May problema ba?," tanong ni Vier na may labis na pag-aalala sa kanyang mukha.

"Ahh, sa labas na lang natin pag-usapan," pakiusap niya kay Vier na agad namang sumunod sa kanya papalayo sa mga bisita roon.

Malamig noon sa labas pero doon naging mas kampante si Cloud dahil walang ibang tao roon nang mga sandaling iyon.

"Kuya–?"

"Vier, naka-usap ko na sina nanay Ester at tatay Gaston….," panimula niya na sinundan na naman ng mahabang katahimikan sa pagitan nilang dalawa. Nahihirapan siyang umamin lalo pa't ang pagkakaibigan nila ang maaaring mawala kung saka-sakali.

Sa kabilang banda ay hindi naman maintindihan ni Vier kung ano ba ang nangyayari sa Kuya Cloud niya. Hindi siya sanay sa ganitong asta ng kanyang kuya. Isa pang bagay na ipinagtataka niya ay ang pakikipag-usap nito sa mga magulang niya. Nagsimula na tuloy siyang kabahan sa patutunguhan ng usapan nila.

"Vier," pagbanggit ni Cloud sa kanyang pangalan matapos nitong manatiling nakatungo lamang ng ilang sandali para isipin ang mga tamang salita para sabihin kay Vier.

"Ano ba 'yun kuya? Kinakabahan na 'ko ha. Saka, baka hinahanap na rin ako sa loob," saad ni Vier na hindi na matagalan ang kabang nararamdaman.

Nagulat na lang siya nang biglang hawakan ni Cloud ang mga kamay niya habang nakatingin ito sa kanyang mga mata. Gusto sana niyang bawiin ang mga kamay sa pagkakahawak ni Cloud pero may kung anong ligayang hatid sa kanya ang pagsasama ng kanilang mga palad kaya hinayaan na lamang niya iyon.

"Vier, I like you," sinserong saad ni Cloud sa kanya dahilan para matulala na lamang siya sa harap nito.

Ang totoo niyan ay matagal na siyang humahanga sa kanyang kuya Cloud. Ito nga ang kanyang basehan ng perfect man at kung magboboyfriend man siya, ang gusto niya sana ay isang katulad ni Cloud ang maging nobyo niya. Kaya parang napaka-imposible para sa kanya ang mga naririnig niya ngayon mula sa lalaki.

"Will you let me be your boyfriend?," dagdag pa nito dahilan ng pagbilis ng kabog ng kanyang dibdib. Malalakas at nakakabinging mga pagtibok.

Parang napilipit na rin ang kanyang dila ng mga sandaling iyon at hindi na niya nagawa pang makapagbigay ng kanyang sagot kay Cloud.

"Hindi naman ako nagmamadali. What I mean is, can I court you?," paglilinaw ni Cloud sa nauna niyang nasabi na maaaring ma-misinterpret ni Vier.

Ang hindi niya alam ay halos walang na ngang mapagsidlan ng kaligayahan ang babaing iinibig niya. Ang lahat kasi ng binibitiwan niyang mga salita ay tila dream come true na para kay Vier. Pakiramdam tuloy nito ay para na siyang mababaliw sa labis na kasiyahan.

Hindi siya makapaniwala na sinasabi nga ni Cloud sa kanya ang mga salitang hindi niya akalaing sasabihin nito sa kanya. Kaya upang makasigurado na gising nga siya at hindi nananaginip ng gising ay binawi niya mula sa pagkakahawak ni Cloud at buong-lakas na sinampal ang kanyang sarili.

"Aray!"

"Vier," ani Cloud na agad na inialalay kay Vier ang kanyang mga braso matapos ang inakto nito.

Lalo pang nagulantang si Cloud nang ngumiti ito nang pagkalawak-lawak at bigla na lang siyang niyakap ng mahigpit.

"Is it a yes?," naguguluhang tanong ni Cloud nang bumitaw na ito sa pagkakayakap sa kanya.

"Nagiging inglesero ka pala pag natetense?," biro ni Vier sa naging reaksyon niya pero hindi talaga natatawa si Cloud. Nanatili pa ring seryoso ang kanyang anyo habang hinihintay ang sagot ni Vier.

"Yes," mabilis na sagot ni Vier. Sa pagkakataong iyon ay si Cloud naman ang yumakap sa kanya ng pagkahigpit and Vier loved it a lot. Iyon na yata ang best birthday gift na natanggap niya sa buong buhay niya.

"Teka, para sa'n ba 'yung yes mo? Yes na girlfriend na kita o yes na pumapayag ka nang ligawan kita?," pagkaklaro ni Cloud sa kanilang estado.

Noon naman tila natauhan itong si Vier at kumalas sa kanilang yakapan, kahit na ang totoo ay gustong-gusto niya ang pakiramdam habng nakakulong siya sa mga bisig ni Cloud. Ayaw kasi niya na magbigay ng maling signal at akalain nito na easy to get siyang babae.

"Yes na pwede ka nang manligaw," pataray niyang tugon upang itago ang kilig na nararamdaman.

"I will be the best guy for you. Ipinapangako ko 'yan," masuyong wika sa kanya ni Cloud nang hindi pa rin inaalis ang tingin sa kanyang mukha.

"Gawin mo, 'wag puro pangako," sabi pa niya at agad nang tumalikod sa lalaki para bumalik sa loob ng bahay. Kailangan niya iyong gawin bago pa siya tuluyang mawalan ng kontrol at tuluyan niyang magawaran ng halik ang mapang-akit na labi ni Cloud.

Naging matamis at masaya ang kanilang naging relasyon. Ngunit sadya nga yatang naging mapaglaro ang tadhana para sa pag-iibigan nila na bagamat hinulma mula sa tunay at labis na pagmamahal ay humantong pa rin sa katapusan.

Ngayon na ang lahat ng kamalian mula sa nakaraan ay naibunyag na. Muli na nga bang maibabalik ng mga pusong nangungulila ang pagmamahalang natuldukan ng isang kasinungalingan? O ang pagmamahal ay tuluyan nang sisirain ng mga maling taong na kanilang nalasalamuha?

Abangan ang mga kasagutan sa ikalawang yugto ng pagmamahalan nina Cloud at Vier.