Chapter 14

Zander! Ang presko ng dating mo! Ano ang akala mo? Kaedad mo lang ang kausap mo? Palpak ka talaga kahit kaylan. 

Itinapon na ni Zander ang sigarilyo sa basurahan. Nadismaya man ito sa kanyang sinabi ngunit hindi nabawasan ang paghanga nito kay Ella.

Samantala, sinundan lang ng tingin ni Ella si Zander at hinintay makabalik. Matapos ay tinabihan nito ang dalaga at naupo rin si lapag.

"A---Ano kasi ate," nauutal na sabi nito. Gusto nitong ipaliwannag ang kanyang dahilan kung bakit n'ya 'yon na sabi.

Nakatingin lang si Ella sa binata. "Ayos lang, tutal may hika," sabi nito.

Napayuko ang binata ang kumamot ng ulo, bukod sa pagkadismaya ay nadagdagan pa ng hiya ang kanyang nararamdaman. Iniwas na lang ni Ella ang kanyang tingin kay Zander ng mapansin n'ya ito.

Hayan tuloy! Na badtrip pa yata sa akin si MIss Tan. Bida bida ka kasi.

Nabalot ng katahimikan ang dalawa, nakatitig lang si Ella sa langit, samantalang si Zander ay naktingin sa maliit na mukha ng katabi.

Kung wala lang akong Dennise siguro niligawan na kita Miss Tan. Hala! Ano ba 'tong naiisip ko? Bura bura bura. Siguro na intimidate lang ako at humahanga ng sobra kay Miss Tan kaya ganito. Tama! At saka s'ya halos ang kasama ko araw araw, maganda naman talaga si Miss Tan at hanggang paghanga lang. Tama, hanggang paghanga lang. Hindi naman siguro masama 'yon.

"Medyo nakakailang 'yang titig mo. May dumi ba ako sa mukha?" tanong nito.

"Ha! Ano kasi ate ano!" Hindi akalain ni Zander na napansin pala ni Ella ang kanyang pagtitig.

Biglang tumunog ang cellphone ni Ella. Kinuha n'ya ito sa kanyang busa at tinignan.

Mama calling....

Tinitigan lang ito ni Ella. "Tsss," ani nito.

Napansin ni Zander ang pagdaing ng kanyang katabi. Lumingon ito at sinipat kung ano ang tinititigan ni Ella. "Wala ka bang balak sagutin? Mama mo ang tumatawag," puna nito. Makailang beses na rin kasi ang tawag, pagka end call agad na tumatwag muli ang kanyang mama. Hindi pinansin ni Ella si Zander at tinititigan pa rin ang kanyang cellphone na walang humpay sa pagtunog.

"Wala ka bang balak sagutin? Ano ate baka emergency?" wika ni Zander.

Dito pa lang s'ya pinansin ni Ella. Hindi nito maiwasang maiyamot, hindi dahil kay Zander, kung hindi sa paulit-ilit na pgtawag ng kanyang mama. "Wala," agad na sagot ni Ella.

"Ah, okay," 'yon na lang ang nasabi ni Zander at nanahimik na lang sa isang tabi.

Habang tumatagal ay gumugulo na naman ang isipan ni Ella. Bukod sa pag-alis ni Junel sa kanyang bahay ay ngayon pa talaga ito nangyari. Kung kaylan kaylangan n'ya ng taong makaka-usap at iintindi sa kanya ay ngayon pa s'ya nawalan ng kasama.

Magkahalong galak at inis ang kanyang nararamdaman sa bawat pagtawag ng kanyang mama. Galak, dahil sa kulang isang bwan na wala ang kanyang mama ay sa wakas, naisipan din n'yang kamustahin si Ella. Ngunit sa kabilang banda ay inis dahil alam nitong may pabor lang itong hihilingin kaya ito tumatawag. Kabisado n'ya ang kanyang ina, kilala lang s'ya nito kung ito'y nagigipit o may kaylangan. 

Bumuntong hininga si Ella, gusto na lang nitong umuwi at magpakalunod sa alak. Ngunit paano n'ya gagawin 'yon ng hindi mag-aalala kay Zander. "Sinubukan mo na bang tawagan ang parents mo?" tanong ni Ella.

"Ha! Ano ate hindi pa," sagot ni Zander.

"Tawagan mo na ang parents mo, may pangtawag naman ako," utos ng dalaga. Inibot na nito ang cellphone kay Zander.

"S---Sige po." Kinuha ni Zander ang cellphone at tinawagan ang kanyang mama.

Wala na I'm dead! Minsan kasi Zander ang kadaldalan talaga naman. Wala na paano ka n'yan bukas? Nainis na talaga siguro si Miss Tan sa akin kaya gusto na n'yang malaman kung na saan sina papa. 

"Ma, si Zander po ito," wika ni Zander ng sagutin ng kanyang mama ang tawag. "Ha! Mama naman, nagpaalam po ako sa inyo hindi ba? Anong natutulog? Ay nako naman, e paano 'yan? Wala kayong sinabi na ngayon kayo aalis. Sabi n'yo sa weekend pa." Napapangirit na lang si Zander habang nakikipag-usap sa kabilang linya. 

Nakamasid lang si Ella sa tabi ni Zander.

"Ma, alam mo namang hindi ako nakikitulog kayna Dennise pagwala s'ya. Ano sa labas n'yo ako patutulugin?" bulyaw nito sa kanyang mama. "Sige na po, opo. Sorry, may pasok po kasi ako bukas. Tapos wala akong dalang cellphone, naiwan ko sa kwarto. Opo sige na po. Ako na pong bahala, bukas n'yo na po paluwasin si papa pabalik. Ingat na lang po kayo d'yan. Hihintayin ko na lang po si papa bukas," sambit ni Zander at tinapos na ang tawag. Bumaling na ito ng tingin kay Ella. "Heto na, salamat ate," malungkot nitong sabi.

"Anong oras daw sila uuwi?" tanong ni Ella sa binata.

Bumuntong hininga si Zander. Bakas din ang pagkaiyamot nito, ngunit wala naman s'yang magagawa. Nangyari na ang lahat at mukhang katabi n'ya ang kanyang aso ngayon gabi sa patulog. "Bukas pa ng tanghali si papa makakauwi. Sinundo raw sila ng tita ko sa Cavite para pumuntang Laguna. At nasa byahe na sila ngayon, sabi ko bukas na lang umiwi si papa masyado na rin s'yang gagabihin kung babalik pa s'ya rito," saad ni Zander.

Ayaw ko ng mag-isip. Bahala na, gusto ko lang na may makasama ngayong gabi. Kahit ngayong gabi lang. Ayaw kong malunod ako sa lungkot, baka mamaya magpatiwakal na lang ako bigla kung mag-isa lang ako.

"Tara," aya ni Ella. Tumayo ito at pinagpag ang kayang likuran.

"Ha?" tanong ni Zander habang nakatinga sa dalaga.

"Sabi ko tara," muling aya ni Ella at tinignan si Zander sa mata.

Namula si Zander. "Saan?" muling tanong ni Zander.

"Sa bahay," maiksing sagot nito at lumkad na palapit sa kanyang motor.

"S----Sa S----Sa bahay?" Napatulala si Zander sa kanyang narinig. 

Pinaandar na ni Ella ang kanyang motor. "Zander Alvarez!" hiyaw ni Ella.

Taranta na ang binata, dali-dali itong tumayo at lumapit kay Ella. "Ate hindi na, ano," nauutal na naman nitong sabi. Sobra sobra na ang abalang kanyang ginawa kay Ella. Bukod sa pagsama sa kanya sa labas ng bahay ay masyado s'yang naging madaldal mula kanina. Iniisip nitong naperwisyo na n'ya masyado si Ella ngayong gabi.

"Sabi mo hindi ka nikikitulog sa bahay ng girlfriend mo kapag wala s'ya. Ako ang huling kasama mo, konsensya ko pa kung anong mangyari sa'yo kung iiwan kita rito. Ano sa kalsada ka matutulog?" dirediretsong sabi ni Ella.

Napalunok na lang si Zander. "Ano, mag-rent na lang ako sa apartel sa may bayan, kasi ano---." Napahinto si Zander ng nakita ang pagkadismaya ni Ella dahil sa kanyang pagtanggi.

Ano ba 'yan! Ang hirap naman nito. Pero kung sa bagay, nagmamagandang loob lang naman si Miss Tan sa akin. Ay bahala na!

"Sige," wika nito at sumakay na lang sa motor ng dalaga.

"Junel!" tawag ni Baron. "Bakit may problema ba?" tanong nito sa kaibigan.

Nagkita ang magkaibigan sa kanto hindi kalayuan sa tinitirahan ni Baron. 

"Tara, shot?" aya ni Junel.

Nanlaki ang mga mata ni Baron sa kanyang narinig. Suntok sa bwan kapag si Junel ang nag-aya ng inuman. Bukod sa mahina ito uminom ay kuripot ito pagdating sa alak. 

"Seryoso?" balik na tanong ni Baron.

"Huwag na nga lang ako na lang!" inis na sabi ni Junel at mabilis na nilayasan si Baron.

"Oy! Sandali lang hindi ka naman mabiro! Hoy!" Hinabol ni Baron si Junel. Para silang magkasintahang nasa isang eksena at naghahabulan dahil nagtampo ang isa sa kanila. "Hoy! Junel Soriano, hintay!"

Habang naghahabulan ang dalawa, may dumaang motor sa harapan ni Junel. Muntik na itong mahagip, mabuti na lang at nakaiwas ito kaagad. Subalit imbis na magalit at habulin ang motor ay napahinto na lang si Junel at sinundan ito ng tingin. Pagkalagpas ng motor kay Junel ay bumagal bahagya ang takbo nito hanggang sa mawala na sa tanaw ni Junel ang motor.

Nasaksihan ni Baron ang nangari kay Junel. Agad n'ya nilapitan ang kanyang kaibigan. 

"Mukhang alam ko na kung bakit. Tara sa bahay, doon na lang tayo," aya ni Baron at inakay ang kaibigan.

"Anong gusto mo?" tanong ni Ella. "Kumuha ka na lang d'yan."

Nasa harapan sila ng mga estante ng alak.

"Ito na lang ate," sagot ni Zander. 

Matapos ay pumunta sila sa counter. 

"Ako na," sabi ni Ella.

Maglalabas na kasi dapat ng wallet ang binata, ngunit inunahan na ito ni Ella.

"Ako na lang sa chicha. May alam akong masarap na ihawan," pagmamalaki ni Zander.

Hindi lang umimik ang dalaga. Diretso lang ito sa pagbabayad at kinuha ang mga pinamili pagkatapos.

"Ako na ate ang magbibitbit," sabi ni Zander at pilit na kinuha ang plastic. "Dapat ang babae hindi pinagbibitbit," dagdag pa nito.

Hindi lang ito pinansin ni Ella at diretso lang sa paglalakad.

Makaraan ay itinuro na ni Zander kung saan sila bibili.

"Te!" tawag nito sa mag-iihaw. "'Yung tulad ng dati," sabi nito na may malaking ngiti.

"Oy!" gulat na sabi ng mag-iihaw. "Ngayon ka na lang nagawi rito. Ano kamusta?" bati nito sa binata. Nabaling din ang tingin nito kay Ella na kasalukuyang nakatayo lang sa gilid at tinitignan ang nakahilerang paninda. "Bago?" pabulong na tanong ng tindera.

Napakamot si Zander. "Hindi! Ate talaga issue! Good boy na ako. 'Yung order ko muna!" bulyaw ni Zander.

"Ito naman, na-miss lang kita. Sige pakihintay lang sandali," sabi ng tindera sa binata.

Ang dami! Bakit ang tagal ko na rito, ngayon ko lang nalaman ang ihawang 'to! At may pwet pa ng manok! OMG, grabe, bukas babalik ako rito para bumili.

Nilapitan ni Zander si Ella na kasalukuyng nalilibang sa mga nakahilerang hilaw na pagkain.

"Ate, gusto mo ba n'yan?" tanong ng binata.

Tumango si Ella na parang bata. "Ito!" kinuha nito ang pwet ng manok. "Gusto ko nito," ngiting ngiting sabi ni Ella. 

Namangha si Zander sa itsura ni Ella. Ang ngiti at kislap ng kanyang mga mata, ang tono ng kanyang pagsasalita na para bang nasasabik. Ngunit mabilis na binawi ni Ella ang kanyang mga ngiti ng maalala nitong si Zander ang kanyang kaharap. Umatras ito bahagya at tumayo ng maayos.

"Ano, o---oo ito sana," muling wika ni Ella at inabot kay Zander pwet ng manok na nakatuhog sa stick.

Ngumiti si Zander ng ubod ng tamis. "Sige 'te pili ka lang dyan. Akong bahala," sabi nito sabay kindat sa dalaga.

"S---Sige," tugon ni Ella.

Kung kanina ay si Zander ang nauutal sa pagsasalita, ngayon naman ay nabaliktad na.

Ella ano? Tuwang tuwa?

Natatawa nito sabi sa kanyang sarili.