CHAPTER 1

Pumunta si Lenie sa condominium ng kanyang boyfriend na si Dexter dahil first anniversary nila. Gusto niya itong i-surprise kahit pa sinabihan na siya ng nobyo na huwag na.

Dahil alam naman niya ang password ng pinto ng condominium ni Dexter ay pumasok na agad siya.

“Hi baby! Surprise-“ hindi na natapos ang sasabihin ni Lenie dahil nakita niyang naghahalikan sina Dexter at Via.

Agad namang napansin ni Dexter si Lenie kaya tumakbo siya papalapit dito.

“Baby, let me explain. It’s not what you think it is. Hinihipan ko lang ang mata ni Via, napuwing kasi siya. Iyon lang iyon,” paliwanag ni Dexter.

“At sa tingin mo ay maniniwala ako sa ‘yo? Napuwing siya? Ano iyon? Napuwing habang hubad?” pinipilit ni Lenie na hindi umiyak.

Lumapit naman si Via kina Dexter at Lenie. Para bang proud na proud pa ito na nahuli sila. Noong mga oras na iyon ay gusto na talagang sabunutan ni Lenie si Via pero dahil ayaw niya ng eskandalo ay pilit niyang pinigilan ang sarili.

“Ano, Lenie? Masakit ba? Akala mo, lahat na ng bagay sa mundo ay makukuha mo? I’m sorry, pero nasa akin na ang pinakamamahal mo,” sabi ni Via.

“Via, bakit mo nagawa sa akin ito? Dahil ba ito roon sa promotion na ako ang nakakuha at hindi ikaw? Inakit mo na lang ang boyfriend ko para makaganti ka sa akin?” tanong ni Lenie, naluluha na siya.

“Hindi lang dahil doon! Marami pang bagay, Lenie. Kung pwede nga lang, mas masakit pa rito ang gawin ko sa iyo ay gagawin ko, eh. Hayaan mo, sa susunod ay mas masakit na rito ang ipaparamdam ko sa ‘yo,” sabi ni Via.

Dahil sa sinabi ni Via ay hindi na napigilan ni Lenie ang kanyang sarili. Wala na siyang paki kung may mga taong makarinig sa kanila. Sinampal niya si Via pagkatapos ay sinampal din siya nito.

Sa galit ni Lenie ay hinila niya ang buhok ni Via palabas ng condominium ni Dexter. Awat-awat naman sila ni Dexter pero dahil galit na galit si Lenie ay hindi niya mapigilan ito.

“Aray ko, Lenie! Tama na! Tigilan mo na ‘to! Hindi na ako manggugulo pa sa inyo ni Dexter!” sigaw ni Via.

“Hindi! Gusto mo ‘to, ‘di ba? Ibibigay ko lang sa ‘yo ang gusto mo. Hindi naman kasi ako kasing sama mo. Saka, madali naman akong kausap, eh.”

“Lenie, tigilan mo na ito. Kung gusto mo, tayo na lang ulit. Basta, huwag mo lang sasaktan si Via, please?” pagmamakaawa naman ni Dexter sa kanya.

Hawak-hawak pa rin ni Lenie ang buhok ni Via kahit nasa elevator na sila. Pagbukas ng pintuan ng elevator ay maraming tao ang nakakita sa kanila. Ang iba ay gustong tulungan si Via at ang iba naman ay nakiki-chismis lang.

“Hello, everyone! Gusto ko lang sabihin na mag-ingat kayo sa babaeng ito! Isa siyang ahas! Inagaw niya ang boyfriend ko! Sige, picture-ran niyo na ang babaeng ito at baka kabit din siya ng mga boyfriend o asawa niyo!”

Iyon naman ang ginawa ng mga tao. Ang iba ay nag-live pa nga sa kanilang social media account. Dahil doon ay hiyang-hiya sina Dexter at Via. Sinubukan pa siyang habulin ni Dexter para humingi ng tawad sa kanya pero lakas-loob siyang umalis na ng building na iyon.

Makalipas ang isang linggo ay nakipagkita si Lenie sa kaibigan niyang si Alice. Dahil heartbroken nga si Lenie sa kanyang ex-boyfriend na si Dexter ay nagpatulong siya sa kaibigan na maghanap ng bagong trabaho para maka-move on. Kailangan niya ng bagong environment para sa kanyang sarili.

“Ano? Nakita mo silang naghahalikan? Aba, bwisit na lalaki ‘yon! Puro pangako pa siya na hindi ka niya lolokohin tapos ganoon ang gagawin niya? Hay, naku! Tiwala pa naman ako sa kanya!” inis na sabi ni Alice.

“Kaya nga nakipagkita ako sa iyo. Baka pwede mo naman akong tulungan na mabigyan ng bagong trabaho. Hindi ko na sila kayang makita. Nandidiri na ako tuwing nakakasalubong ko sila sa trabaho!” sagot naman ni Lenie, kita pa rin ang lungkot sa mga mata niya.

“Ah, oo naman. Tutulungan kita. Sakto, may job hiring sa office. Saka, pogi rin ang boss namin. Babaero nga lang. Gusto mo ipasa ko sa kanila ang resume mo?” sagot ni Alice, napangiti naman si Lenie dahil sa sinabi ng kaibigan.

“Ikaw talaga, trabaho ang gusto ko hindi bagong sakit ng ulo. Buti at dala ko ang resume ko. Teka, kukunin ko lang sa bag ko,” sagot ni Lenie pagkatapos ay kinuha na sa bag ang kanyang resume.

Nang mabigay na niya ang resume ay nagkwentuhan pa silang magkaibigan. Ang hindi alam ni Lenie ay may anak na noon si Alice at balak nito na iwan ang bata sa kanya.

“Saang kompanya ka nga pala nagtatrabaho?” tanong ni Lenie.

“Ah, sa Ramirez Group of Companies. Okay naman, malaki ang sahod. Kaya lang, panay dalaga lang ang hina-hire nila. Wala pa naman kayong anak ni Dexter, ‘di ba?” pagkaklaro ni Alice.

“Aba, oo naman. Wala talaga akong anak sa lalaking iyon. Bwisit siya!” ramdam ang inis sa boses ni Lenie nang sabihin niya iyon.

“Ah, mabuti. Kung ganoon ay makakapasok ka talaga sa RCG. Sige, sasabihan na lang kita kapag naipasa ko na ang resume mo sa kanila, ha? Una na ako, may gagawin pa ako, eh,” sagot naman ni Alice.

Bago umalis si Alice ay nagpasalamat si Lenie sa kanya. Sobrang saya niya na sa wakas ay may sagot na siya sa kanyang problema. Kahit paano ay gumaan ang sakit na kanyang nadarama.