Chapter 3: News

Kabanata 3

News

Pagdating ko sa bahay ay nakita ko si Mama at Papa nakaupo sa sofa habang nanood ng balita. Hindi gaano kalawak ang bahay namin dahil pagpasok mo sa loob makikita mo agad ang sala at ang kusina nito sa bandang kaliwa. Kulay puti at asul ang nakapintura sa loob. Nang makalapit ako sa kanila ay agad akong nagmano.

"Oh, anak, bakit ngayon ka lang?" si Mama.

Napabaling na rin si Papa sa akin nang makita ako.

"Ah, natagalan po natapos ang pinuntahan namin ni Bianca kaya nagabihan po ako."

Hindi ko na inamin ang nangyari sa akin kanina dahil ayokong mag-alala pa sila. Tumingin ako kay Papa. Hindi naman galit ang mukha niya. Hindi naman siya strikto kapag alam niyang si Bianca ang kasama ko.

"Hija, sa susunod i-text mo ako o tawagan man lang kung nasaan kayo para nasusundo ko kayo. Delikado kapag gabi na. Baka ano pa ang mangyari at mapahamak pa kayo. Walang ligtas na lugar ngayon," seryosong sinabi ni Papa.

Hindi ko alam pero parang may gusto pa siyang iparating.

"Opo, Pa."

Nang matapos ang commercial sa T.V ay ibinalik ulit nila ang pansin sa panonood ng balita. Aakyat na sana ako sa itaas para magpalit na ng damit nang biglang marinig ko ang pag-uusap nila kaya napahinto ako sa pag-akyat.

"Hindi pa ba nahuhuli ang mga suspect? Nakakatakot. May mga bago na naman silang nabibiktima," baling ni Mama kay Papa. Ramdam ko pa ang pangamba sa boses niya.

Suspect? Bakit? Anong nangyayari? Dahil sa kuryusidad ay napatingin rin tuloy ako sa T.V namin na kasalukuyang may binabalita ang isang reporter ngayon.

"Isang nakakagulat na balita ang ating matutunghayan kung saan ngayong gabi ay isang bagong krimen na naman ng pagkidnap ang naganap. At hanggang ngayon ay tinutugis pa rin ng mga pulis ang mga salarin upang mailigtas ang mga nabitktima nito. Ngunit may ekspekulasyon ang mga pulis na ang mga suspect na ito ay may kinalaman sa pagpatay sa pamilyang Villafuerte labing apat na taon na ang nakakalipas."

Kidnapping? Uso pa rin pala iyan ngayon? Ano ba ang nangyayari sa ibang mga tao ngayon at nagagawa nila ang pagkidnap? Wala ba silang konsensya? Kawawa iyong mga inosenteng taong binibiktima nila. Ano ba ang motibo nila at nagagawa nila ang ganiyang ilegal na gawain? Kahirapan ba? Kawalan ng pera? Jusko! Ang daming paraan! Labag sa batas ang pinagagawa nila!

Nang matapos ang balitang iyon ay nakita ko pang napatayo si Papa. May katawagan na rin siya ngayon sa cellphone niya. Pinatay na rin ni Mama ang T.V at napatayo na rin siya nang mapansing pa-paalis na si papa.

"Sige. Papunta na ako diyan ngayon. Pag-usapan natin iyan pagdating ko."

Aalis nga si Papa dahil base sa sinabi niya sa kabilang linya. Bakit kaya? Baka tungkol ito sa binalita kanina ng reporter? Nakita ko pang sinusuot ngayon ni Papa ang leather jacket niya. Parang nagmamadali pa siyang umalis. Importanteng bagay yata ang sinabi sa kaniya na may kinalaman sa kasong hinahawakan nila.

"Alora, aalis ako ngayon. Bukas pa ako uuwi. Buong gabi ang trabaho ko ngayon. May mahalaga lang kaming aasikasuhin sa station.”

"Hindi ba bukas pa ang duty mo? Gabi na Alfredo puweding ipabukas mo nalang iyan."

Nasa may hagdan pa rin ako nakatayo kaya rinig ko pa rin ang pag-uusap nila. Hindi aalis si Papa ngayon kung hindi importante ang pinagusapan nila. Naiintindihan ko naman si Mama kung bakit ganito na lamang siya mag-alala kay Papa. Ganoon din naman ako. Hindi ko rin maiwasan mag-alala dahil sa trabaho niya pero naiintindihan ko dahil isang pulis siya. May mga bagay siyang dapat gawin at paglingkuran sa bansa.

"Hindi puwedeng ipabukas Alora. Kailangan ako sa station ngayon. May nahanap na silang isang matibay na ebidensya upang mapabilis ang paghahanap sa mga suspect."

Sa huli ay walang nagawa si Mama kundi hayaan na lamang umalis si Papa. Umakyat na rin ako sa itaas para pumunta sa aking kuwarto pero bago iyon dumaan muna ako sa kuwarto ni Sky. Dahan-dahan kong binuksan ang pinto ng kuwarto niya. Nang makapasok na nga ako sa loob ay nakita kong natutulog na siya ng mahimbing. Napangiti ako pa ako habang pinagmamasdan siya. Inayos ko rin ang kumot niya nang makitang pababa na ito sa parteng dibdib niya.

"Good night, Sky." Hinalikan ko ang noo niya bago lumabas.

Pagdating ko sa aking kuwarto ay nagpalit muna ako ng damit. Hindi na ako nakapag half bath dahil sa pagod ngayong araw. Diritso agad ako sa paghiga sa aking kama. Nakadapa ang posisyon ko ngayon. Ganito ako kapag pagod. At ilang sandali lamang ay walang pasubaling napapikit ang mga mata ko at tuluyan na ngang nakatulog.

"ANAK, saan ka pupunta?" tanong ni Mama nang makitang nakabihis ako.

Nakasuot ako ngayon ng plain brown t-shirt at dark blue jeans pang-ibaba. May bibilhin lang naman ako ngayon na kailangan ko para sa project. "May bibilhin lang ako, Ma."

Pansin ko ang pagtango ni Mama habang abala sa kusina.

"A-Ate MM, sama po ako.”

Nang magsalita si Sky ay napabaling ako sa kaniya. Ang apat na taong gulang kong kapatid na ngayon ay hawak-hawak ang isang kamay ko. Gusto yata niyang sumama.

"No. Dito ka lang Sky. Okay?" Yumuko pa ako at sabay kinurot ang mataba niyang pisngi.

Agad naman lumungkot ang kaniyang mukha sa sinabi ko. Kaya napatawa na lamang ako. Ang cute talaga ng kapatid ko kapag nagtatampo.

"O, sige, ganito nalang. Anong pasalubong ang gusto mo mula kay ate?" Ngumiti pa ako sa harapan niya. Lumiwanag naman kaagad ang mukha niya. Sabi ko na e, pasalubong lang katapat nito.

"Chuckie! Chuckie!" masigla nga niyang sinabi

"Alright. Ate will buy it for you," sabi ko at sabay ginulo pa ang kulot niyang buhok.

"Yehey!"

Kasalukuyag naglalakad ako sa gilid ng kalsada nang biglang napahinto ako nang makitang kuwarenta pesos nalang pala ang laman ng pitaka ko. Medyo malayo na ako sa amin. Bakit hindi ko ito napansin kanina? Saktong pambili ko nalang ito ng Chuckie ni Sky at pamasahe pauwi.

Ang malas ko naman ngayon!

Ibabalik ko na sana sa bag ang pitaka ko subalit napatigil ako nang may napansin akong isang lalaki tumatakbo papalapit sa akin. Parang may tinatakasan yata siya dahil sa sobrang bilis nito sa pagtakbo. Nagulat lang ako nang huminto ito sa harapan ko. Hinawakan pa nito ang kaliwang braso ko kung kaya’t dumagdag ang kaba sa aking sistema.

Sino siya? Anong kailangan niya sa akin?

Pilit ko pang inaalis ang kamay niyang nakahawak sa braso ko subalit sadyang mahigpit ang pagkakahawak niya kaya hindi ko ito maalis.

"Miss, makinig ka." Hingal na hingal pa nga siya habang tumititig sa akin ng seryoso.

Halos maramdaman ko na nga ang hininga nito dahil sa sobrang lapit ng mukha niya sa akin. Hindi ko alam pero bigla nalang ako kinabahan sa sinabi niya. Napansin ko lang na halos itim lahat ang suot nito mula sa t-shirt, leather jacket, pantalon, sapatos. At nakasuot din ito ng kulay itim na kalo at itim na mouth mask sa bibig.

Nang tinatanggal niya nga ang kaniyang mouth mask ay parang nagkaroon pa ng slow motion. Laglag panga pa ako nang mapatingin sa kaniya. Parang umatras bigla ang bibig ko sa pagsasalita nang makita ang kabuuan ng mukha niya. Nakakahipnotismo ang itsura-

"May pera ka ba?"

P-Pera? Hindi kaya, isa siyang magnanakaw? Naalala ko bigla na ang mga binabalita ngayon ay puro krimen. At ang nangungunang krimen ngayon sa bansa ay kidnapping at magnanakaw.

Ito na ba ang sinasabi ni Papa kagabi na walang ligtas na lugar ngayon? At ngayong araw talaga mangyayari ito sa akin? Mas nadagdagan ang paghihinala ko nang hinawakan niya pa ng mahigpit ang isang braso ko bago nagsalita ulit.

"Miss, may pera ka ba?”