01

Kagat labi akong dumaan sa room nila Sammuel, pagdaan ko ay sumulyap ako sa loob ng room at nakita ko siyang pinapalibutan ng mga naka jersey na mga lalaki. Kinakausap siguro tungkol sa nalalapit na inter-high.

Ngumuso ako at nagpamaywang. Kanina pa ako daan nang daan dito sa room nila para mapansin niya ako pero kahit anong gawin ko hindi siya lumilingon sa akin.

Sa huli napabuntong hininga na lang ako at umakyat na sa ikalawang palapag. Ano bang kailangang gawin para mapansin ako ni Sammuel?

Hindi ko talaga alam kung bakit ba ako nagkagusto sa lalaking 'yon. Aside sa subrang gwapo niya, study first din siya. Talagang may bright future siya at kung maging kami man ang swerte ko siguro sa kanya.

Pumasok ako sa room, umupo ako sa upuan ko at nagpangalumbaba na lang.

Dahil na bored ako ay kinuha ko ang cellphone ko at nagfacebook.

Habang nagscroll aa f******k, naalala ko na lang bigla ang si Sammuel. Ngumisi ako at kagat labing ni-research ang pangalan niya.

Sammuel Lazarus Sandoval

Madaming lumabas na Sammuel at pareho ring pangalan sa kanya pero hindi naman siya ang nasa profile. Kahit ilang ulit kong ni-research ang pangalan ni Sammuel ay hindi ko nakita ang account niya. Mga arabo naman o kaya indian ang nakikita ko.

Sa huli napabuntong hininga ulit ako at naisipang magpost.

"Ang lowkey mo naman crush..."

Hindi ko na nagamit ang cellphone dahil pumasok na ang teacher namin sa last subject.

Wala ba siyang f******k? Ang tanong gumagamit ba ng social media si Sammuel? Naiwan na ata siya ng panahon eh.

Bakit ngayon ko lang ba siya napansin? Ang gano'ng kagwapong lalaki dapat napapansin ko 'yan. Hindi nakakatakas sa akin ang mga gano'n ka gwapong lalaki kaya nagtataka ako kung bakit hindi ko man lang siya napansin.

Mabilis akong nagligpit ng gamit at nagmadaling lumabas sa room. Halos takbuhin ko na ang hagdanan pababa para lang makapunta kaagad sa room nila Vien at Sammuel.

"Hoy! Hindi ako makakasabay ngayon sa pag-uwi kasi kailangan namin gawin ngayon 'yong-teka lang, nakikinig ka ba?"

Niyugyug ni Vien ang katawan ko, lumingon ako sa kanya. Nakakunot ang noo niya at tumingin sa loob ng room nila.

"Sino ba sadya mo? Si Sammuel o ako? Nagseselos na ako, April ha..."

Inirapan ko na lang si Vien, napanguso na lang ako dahil hindi ko siya makita. Wala na siya sa room niya, ibang estudayante na naman ang naglilinis ngayon.

"Wala siya kasi ma practice sila ngayon sa volleyball-"

"Saan sila nagpapractice?" Putol ko sa sasabihin ni Vien.

Ngumiwi lang siya pero kalaunan ay sinagot ako. "Ewan ko, basta sinundo siya ng mga ka-teammates niya kanina."

Ngumuso ako. Tinapik lang ni Vien ang balikat ko.

"Mauna na kayong umuwi, mamaya pa kasi ako."

Tumango ako at nagpaalam na kay Vien na pupuntahan na ang sina Clouie at Maika. Naghintay pa ako sa labas ng room ni Maika dahil cleaners niya pala ngayon, dumating naman si Clouie kaya kaming dalawa ang naghihintay kay Maika.

Pagkatapos maglinis ni Maika ay naglakad na kami paalis sa eskwelahan, bumili ulit kami ng mga pagkaing binibenta sa rotary at umuwi kaagad.

"Sinabi ni Vien sa amin na ma crush ka na raw," ngumisi si Clouie.

Naglalakad na kami ngayon papasok sa village kung saan kami nakatira.

Tinusok ni Maika ang tagiliran ko at ngumisi, "sino 'yan ah? Sabihin mo na! Akala ko ba ayaw mo sa crush crush na 'yan?" Tumawa si Maika.

"Kilala niyo ba si Sammuel Lazarus Sandoval?" Tanong ko sa kanila at lumingon.

Nagkatinginan silang dalawa bago tumingin sa akin at sabay na tumango.

"Oo, alam na alam namin kung sino si Sammuel Lazarus Sandoval. May issue siya dati, hindi ko lang alam kung totoo ba o gawa gawa lang." Si Clouie.

Inirapan ko sila at ngumuso, "bakit kayo kilala niyo siya? Samantalang ako kahapon ko pa lang siya nakilala!"

"Akala ko ba ayaw mo sa crush crush na 'yan? Bakit lumalandi ka na ngayon?" Tinaasan ako ng kilay ni Maika at tinusok ulit ang tagiliran ko.

Lumayo ako kay Maika at inirapan ulit siya.

"Hindi muna ako self love ngayon, tingin ko kaming dalawa talaga para sa isa't isa ni Sammuel-"

"Luh?! Ang assumera nito!" Humaglpak silang dalawa.

Inirapan ko sila ulit, "oo! Totoo 'yon! Nararamdaman ko na kaming dalawa ang para sa isa't isa!"

"Paanong naramdaman, ha?" Si Clouie na ngumisi.

"Nafe-feel ko lang! Basta feeling ko kaming dalawa para sa isa't isa! Wala na dapat lalandi sa kanya kasi ako lang dapat!"

Umiling lang silang dalawa at nagpaalam na dahil nasa kanilang bahay na sila. Magkatabi lang kasi ang bahay ni Clouie at Maika dahil magpinsan lang din sila habang ang bahay namin ay nasa pinakalikod ng bahay ng tita ko.

Pagdating ko sa bahay ay nagbihis kaagad ako, at kumain. Nakakagutom talaga mag-aral.

Ginawa ko muna ang ilan sa mga dapat iresearch para wala na akong problemahin kapag pupunta ako sa bahay ng kagrupo ko. Para na rin hindi na gano'n ka dami ang gagawin ko.

Pagkatapos magresearch ay pumasok na ako sa kwarto ko at humiga sa kama. F******k kaagad ang inatupag ko at habang nags-scroll sa f******k ay may nakita akong post.

Si A ay para ay S

Halos kuminang ang mata ko sa nabasang post. Dati hindi ako naniniwala dito pero ngayon pani-paniwala na ako.

Hindi naman siguro masamang mag assume 'no? Ako naman ang masasaktan kong mag a-assume ako kaya pake ko sa iba kong sabihin nilang assumera ako? Ako 'yong masasaktan at hindi sila.

Dahil sa surbang saya na nararamdaman ko ay shinare ko ang post.

Sabi ko na nga ba eh! Sabi ko na na si April Hregen Atienza ay para lang kay Sammuel Larazus Sandoval!

Nafefeel ko talaga na kami ni Sammuel ang magkakatuluyan. Nararamdaman ko na siya! BWAHAHA!

No'ng tumingin siya sa akin nang araw na 'yon alam kung pareho ang tinitibok ng puso namin. Noong nagtama ang mga mata naming dalawa bigla na lang kumalabog ang puso ko at alam kong gano'n din ang nararamdaman niya.

Pumasok kaming apat ng maaga pero syempre hindi pa ako pumunta sa room namin dahil tumambay muna ako sa room nila Vien, nagpapanggam na si Vien ang sadya pero ang totoo si Sammuel talaga pero malapit ng magsimula ang klase wala pa rin si Sammuel.

"Wala naman si Sammuel dito eh..."

Napabaling ako sa mga babaeng nagtutulakan sa pituan. Kumunot ang noo ko at pinanood lang sila.

Bumaba ang tingin ko sa hawak ng babae, isang papel? Love letter? Para kanino? Kay Sammuel?!

Aba! May kaagaw pala ako sa crush ko!

"Mamaya mo na ang ibigay kapag nand'yan siya," rinig kong sabi ng isa niyang kasama.

"Kapag binigay mo 'yan sa kaklase niya baka pagtawanan ka lang nila." Nagsitanguan silang lahat at sa huli ay umalis sila.

Bibigyan ng babaeng 'yon ng love letter si Sammuel?!

Tumakbo ako palabas sa room nila Vien para tignan ang mga babaeng pumunta kanina at nakita ko silang sabay na pumasok sa isang room.

Sumingkit ang mata ko.

Hindi pwede! Hindi maaari! Hindi pwedeng maunahan ako!

Tinakbo ko ang distansya papunta sa room namin, agad kong nilabas ang papel at ball ko at nagsimulang magsulat.

Dear, Sharo-este Sammuel.

Noong una kitang nakita alam kong ikaw na ang para sa akin at ako ay para sa'yo. Pinana ako ni Kupido at nahulog sayo ehe...

Tumigil ako sa pagsusulat at binasa ng paulit ulit ang nasulat ko. Ngumiwi ako at pinunit ang papel. Hindi ko gusto, ang OA.

Nagsimula ulit akong magsulat. Wala akong pake sa mga kaklase ko kung maingay ba sila basta tutok na tutok ako sa sinusulat ko ngayon. Dapat maganda rin ang sulatkamay ko para masabi niyang maganda ang nagsulat nito kasi maganda rin ang handwriting. HAHAH!

Sammuel,

Alam mo ba? Sinong nagsabi? Na crush kita? 'Di ko sinabi? Alam mo ba? Ang aking feeling? Alam mo bang sa'yo lang ako kakampag! Crush na crush na crush kita! 'Di mo ba na darama?

Napunit ko ulit ang papel, hindi ko na talaga alam kung ano ang magsinusulat ko, wala akong maisip na sasabihin sa kanya.

Sammuel,

Mahal kong Sammuel nais kong sabihin sa'yo na ikaw ang palaging laman ng puso't isipan ko. Nais ko ring malaman mo na ikaw lang ang iibigin ko aking irog, ikaw ang aking hinahanap sa araw araw-

Nilukot ko ang papel. Para naman akong nasa kapanahonan ni Rizal.

Nagpangalumbaba ako, wala akong maisip na sasabihin sa kanya! Bakit ba kasi hindi gumagama ang utak ko ngayon?! Bakit ang corny ng mga sinusulat ko?

Pinatunog ko ang ballpen ko, nag-iisip ng magandang sasabihin sa kanya. Advance lang ang valentines sa akin, kahit july pa lang papakiligin ko na siya!

Tumitig ako sandali sa blankong papel, bigla na lang may pumasok sa utak ko. Ngumisi ako at sinulat lahat ng mga naisip kong sabihin. Hehehe, kililigin siya sa mga sasabihin ko. Mamayang gabi, papanaginipan na niya ako. BWAHAHA!

Gumawa pa ako ng sariling subre para lalagyan sa sinulat ko, nilagyan ko pa ito ng heart na design.

"Luh! Si April, umiibig na!" Ang pakealamero kung kaklase na si Roger.

"Tumahimik ka! Maglinis ka na d'yan!" Inirapan ko siya.

"Sino 'yan ah? Pabasa nga-"

"Lumayo ka sa akin o bugbugin kita! Alam mo bang malayong kamag anak ako ni Pacquiao?!" Sabay pakita ko sa maliit kong kamao, ngumuso lang si Roger at umalis na sa harapan ko.

Bumalik ang atensyon ko sa sulat ko. Ngumisi ako ng napakalapad at nagmamadaling bumaba sa hagdan.

Hawak hawak ko ang subre ay sumilip ako sa room nila Vien, may kanya kanya silang ginagawa at may napapatingin sa akin pero hindi naman nila ako pinagtuonan ng pansin.

Tsaka hindi ko rin nakita si Sammuel sa loob ng room nila, nasaan kaya 'yon? Baka nagpractice ng volleyball kaya wala siya?

Pumasok ulit ako sa room nila Vien at nilapitan siya.

"Nasaan ang bag ni Sammuel?" Bulong ko kay Vien.

Kumunot ang noo ni Vien at lumingon sa akin, "bakit?"

"Wala lang, basta ituro mo na kung nasaan ang bag niya. Hindi naman ako magnanakaw, eh."

Pinakatitigan ako ng matagal ni Vien na parang may ginagawa akong masama. Ngumuso ako at hinintay na ituro niya ang bag ni Sammuel.

"'Yan ang bag niya. Siguradohin mo lang na wala kang nanakawin!"

"Hindi nga ako magnanakaw! Siya 'yong magnanakaw kasi ninakaw niya ang puso ko!" Ngumisi ako pero ngumiwi lang si Vien.

"Ang landi mo na, April! Saan mo natutunang lumandi?!" Pabulong niyang sigaw at halos hilain na ang buhok ko.

"Malamang kanino pa ba? Edi sa inyong tatlo! Ang lalandi niyo kasi-aray!" Sinapak ako ni Vien.

"Malandi na nga kami! Pero 'wag mo namang ipagsigawan! Secret ang paglalandi natin baka kapag nalaman ng mga boys na malandi tayo matu-turn off sila! Ikaw talaga!" Halos sabunutan na ako ni Vien, tinawanan ko na lang siya at dahan dahang naglakad papunta sa bag ni Sammuel.

Tumaas ang kilay ko habang tinitigan ang bag niya, hindi gano'n kalaki ang bag niya at mahilig rin siya sa mga keychain dahil may nakasabit na keychain sa bag niya.

Kanino kaya galing 'yang mga keychain? Baka sa mga babaeng nagpapacute sa kanya tapos binibigyan siya ng keychain tapos tinatanggap naman niya?

Tss. Wala akong pake kung binibigyan siya ng keychain ng mga babaeng nagkakagusto sa kanya, baka bilhan ko siya d'yan ng mas malaki pa d'yan eh.

Ngumisi ako at dahan dahang binuksan ang bag niya at sinilid doon ang subre na may lamang love letter na ginawa ko.

Tumalikod na ako at aalis na sana pero hinarangan ako ni Vien.

"Ano 'yong nilagay mo sa bag ni Sammuel?" Mahinang tanong ni Vien.

Ngumiti ako, "subre na may lamang solicitation letter baka kasi bibigyan niya ako ng one thousand!"

Tumawa ako at lumabas na sa room nila at bumalik sa room namin. Buong klase ay nakangiti lang ako, naaalala ko palagi ang letter na binigay ko kay Sammuel. Sana mabasa niya 'yon, alam kong kapag nabasa niya 'yon ay kililigin siya ng subra at magkakagusto sa akin! Tapos magiging kami! Bwahaha!

Dahil cleaners ko ay kasali ako sa naglinis pagkahapon. Hindi ko gustong naglilinis pero ngayon ganadong ganado akong maglinis dahil inspired na inspired kay crush!

Sa mga oras na ito ay alam kong nabasa na niya ang letter ko. Ano kaya ang reaksyon niya habang binasa ang letter ko?

"Sa likod niyo itapon ang mga basura," sabi ng adviser namin.

"Roger, samahan mo na si April na magtapon ng basura sa likod." Dagdag ni Ma'am.

Ang laki ng ngisi ni Roger sa akin, lumalabas talaga pagi gilagid! Bungisngis!

"Ang saya saya mo ah! Ang laki ng ngiti mo, April! Anong nangyari ah? Naibigay mo ba sa crush mo ang love letter na sinulat mo?" Nagtaas baba ang kilay ni Roger at nakangisi pa rin.

"Oo! Naibigay ko na! Manahimik ka na d'yan ang tsismoso mo talaga!" Sinapak ko siya at pinadala ko na sa kanya ang basurahan.

"Paano kapag may ibang gusto ang crush mo?"

Sinamaan ko ng tingin si Roger, kanina pa talaga ako naiinis sa lalaking 'to.

"Oh? Paano kung hindi ka rin gusto ng crush mo dahil ang crush mo ay may boyfriend na ah?" Balik ko sa kanya.

Ngumuso lang siya at tinapon na ang basura. May basurahan kasi sa likod ng grade 8 building at dito tinatapon lahat ng mga basura pero syempre na-segregate na ang mga basurang tinapon namin.

"Si Sammuel..."

Napabaling ako sa mga babae, sila 'yong mga babaeng nakita ko kanina na magbibigay ng love letter.

Sumingkit ang mga mata ko at sinundan ang tinignan nila at nakita ko na lang si Sammuel na may hawak na mga papel na nakaharap sa sinusunog na mga lantang dahon.

"Anong hawak niya?" Narinig ko ang mga pinag-uusapan nila.

Bumaling ulit ako sa kanila pagkatapos ay tumingin ulit kay Sammuel na seryosong seryoso ang mukha at tinapon na lang bigla ang mga papel na hawak na nakikitang kong may nga desenyo pang puso at kung anu-ano pa.

Narinig ko ang pagsinghap nila, "s-sinunog niya ang lahat ng mga love letter..."

Love letter? Sinunog lahat ni Sammuel ang love letter?

Natulala na lang ako kay Sammuel, tumalikod siya pagkatapos niyang itapon ang mga love letter na 'yon sa apoy.

Akala ko aalis na siya pero huminto siya at bumaling sa banda ko. Gano'n pa rin siya, nagmukha siyang galit dahil sa kilay niyang nagkadugtong na at sa noo niyang nakakunot.

"Tara na, April," tawag ni Roger sa akin sabay hawak sa kamay ko at hinila na palayo doon.

Naiwan ang mga titig ko kay Sammuel, hindi na siya nakatingin sa akin. Nakatuon ang atensyon niya sa kalangitan.

Wala sa sariling bumaba ang tingin ko sa nasusunog na mga lantang dahon. Habang hinihila ako ni Roger palayo at nakatitig sa apoy ay doon lang pumasok sa utak ko na ang nakita kong may pusong desenyo kanina ay ang subre ko at pati 'yon ay tinapon niya sa apoy...