Ghost Writer

Chapter Two

Ghost Writer

"MAMA! MAY MAGNANAKAW!"

Dahil sa isinigaw ni Eros ay nataranta ang babaeng pangahas na pumasok sa kuwarto niya. Nanlaki ang mga mata nito habang kukurap kurap na tinuturo niya ang sarili niya.

"Ha? Teka? Nakikita mo ko?" reaksyon nito pero hindi nito pinansin ni Eros hanggang sa dumating na nga ang ina nito sa tabi niya.

"Oh? Nasaan ang magnanakaw?" kaagad na lumabas sa bibig ng ina niya. Bitbit-bitbit na nito ang sandata niyang walis tambo na handang handa na niyang ihampas sa mga kampon ng kadiliman.

Kaagad tinuro ni Eros ang babaeng may pakpak. "Ayan Ma! Nasa harapan lang natin!" Masamang tinignan nito ang babae. "Hoy ikaw! Ano pang tinutunganga mo d'yan?! Lumabas ka na diyan sa kwarto k—!" Napatigil si Eros sa pagsinghal sa babae nang malakas siyang hinampas ng walis tambo ng kaniyang ina. Gulat na gulat naman itong napalingon sa ina niya dahil sa ginawa nito.

"Ma! Bakit ka nanghahampas?!"

"Siraulo kang bata ka!" galit na singhal sa kaniya ng ina. "Walanghiya ka! Para akong tanga na nagbitbit pa ng walis tambo tapos lolokohin mo lang pala ako!"

Nanlaki ang mata ni Eros at napanganga. "Ha?! Ano?!" Hindi na magawang dagdagan ni Eros ang sasabihin niya dahil kaagad nagmartsa na paalis ang kaniyang ina na badtrip na badtrip sa panloloko ng kaniyang anak.

Nanlalaki ang mata niyang binalik ang tingin sa babae. Kasabay no'n ay ang biglang pagtaas ng balahibo sa batok niya habang paulit ulit niyang tinatanong sa isip niya kung bakit hindi siya nakita ng ina niya kanina eh obvious namang nasa harapan lang niya ang babae.

Sinuri nito muli ang itsura ng babae. Nakasuot ito ng puting dress. Pero ang nakakapagtaka at nakakaagaw atensyon rito ay ang pakpak nito na kulay pink. Mas lalong hindi na maipinta ang mukha ni Eros dahil sobrang weirdo ng kaganapan ngayon. Maraming tanong ang sumulpot sa isipan niya kaya hindi niya na namalayan na ilang segundo ang lumipas nang matagal niyang pagkakatitig sa babae.

"Uh...Hello?" kinaway kaway ng babae ang kamay niya sa harapan ni Eros. "Owmayji! Nakikita niya nga ako!" bulong nito sa sarili niya. Tumikhim siya atsaka niya inayos ang tindig niya sa harap ni Eros na nagla-lag pa rin ang isip. Nagloloko pa kasi ang connection ng mga mata niya sa utak niya. Taray! Ginawang wifi yung utak.

"Alam kong maganda ako pero hindi ka naman siguro tatagal ng five minutes kakatitig lang sa a...kin." Bigla siyang nagdalawang isip sa pagmamahangin niya.

Nanlalaki pa rin ang mga mata ni Eros habang nanginginig ang isa niyang kamay na kinapa ang seradura ng pinto. Pagkatapos ay saka niya dahan dahang sinara ang pinto. Napuno naman ng pagtataka ang babae dahil sa ginawa ni Eros.

Nagpalipas muna ng ilang segundo si Eros atsaka niya naisipang dahan dahang buksan na ang pinto. Nang tuluyan na niyang nabuksan muli ang pinto ay nandoon pa rin ang babaeng nakatingin pa rin sa kaniya nang may pagtataka pa rin sa kaniyang mukha.

"Tangina..." wala sa sariling mura niya. "Putangina..." muli niyang mura. Maya't maya ay tuluyan nang naging connected successfully ang kaniyang mga senses sa kaniyang brain kaya marahas niyang sinara muli ang pinto ng kaniyang kwarto.

Umiling iling si Eros. "Hindi. Imposible..." mariin niyang bulong sa kaniyang sarili. "Kailangan kong patunayan na mali 'tong iniisip ko."

Marahas niya muling binuksan ang pinto at dire-diretsong naglakad sa babaeng binibigyan pa rin siya ng nagtatakang tingin.

Habang papalapit nang papalapit si Eros sa kinaroroonan niya ay hindi naging maganda ang kutob niya. "Teka! Anong binabalak mong gawin?" Nanlaki naman ang mata niya nang marahas na hinawakan ni Eros ang pulsuhan niya.

Gulat na gulat ang babae habang pinapasadahan ng tingin ang kamay ni Eros na walang kahirap-hirap na nahawakan ang pulsuhan niya. Dahil sa gulat ay kaagad siyang nagpumiglas dahilan para mabitawan din siya kaagad nito.

Napatakip siya sa bibig niya atsaka napaatras habang gulat na gulat na nakatingin kay Eros na nabigla rin sa naging reaksyon niya. "Humaygad!" reaksyon nito. "Paano mo ako nahawakan?!"

Hindi tinugunan ni Eros ang reaksyon nito at muling hinawakan ang pulsuhan nito at walang pag-aatubiling kinaladkad ito palabas ng kwarto.

"Hoy teka! Bitawan mo ko!" sigaw ng babae. Pero walang reaksyon lang si Eros habang hinihila niya ang babae patungo sa sala. Pinipilit namang tanggalin ng babae ang pagkakahawak ni Eros sa pulsuhan niya pero mas lalo lang hinihigpitan ni Eros ang pagkakahawak niya kaya napapa-aray na lang siya. Sinubukan niya ring gamitin ang isa niyang kamay para tuluyang makabitaw sa pagkakahawak ni Eros pero hindi siya nagtagumpay gaya nung una.

Nang makarating na sila sa sala ay muling tinawag ni Eros ang kaniyang ina na busy sa pagwawalis. Galit naman siyang binalingan ng ina.

"Bakit na naman ba?!" inis na sabi nito. Maya't maya napakunot noo ito nang mapatingin ito sa tabi ni Eros. Lumiwanag ang mukha ni Eros dahil sa tingin niya ay nakita na ng kaniyang ina ang babaeng nasa kwarto niya kanina.

"Bakit nakataas 'yang kamao mo?! Ano?! Susuntukin mo ba ako?!" Kaagad nataranta si Eros at napaatras nang inangat ng ina niya ang walis tambo.

"Teka Ma!" sabi niya. "Syempre hindi! Bakit mo naman iniisip 'yan?!"

Bumalik muli ito sa paglilinis. "Tsu! Tsupe ka nga do'n! Isa pang beses na guguluhin mo ko sa paglilinis ko patay ka talaga sa 'kin!"

"Sabi ko nga, aakyat na po ako," tanging nasabi na lang ni Eros at muling kinaladkad ang babae paakyat sa taas. Pero hindi pa nga sila tuluyang nakakahakbang sa unang baitang ng hagdanan nang biglang kinagat ng babae ang braso niya dahilan para mapasigaw siya sa sakit.

"ARAAAAYY!" Tuluyan na niyang nabitawan ang pulsuhan ng babae at mabilis itong tumakbo palabas ng kanilang bahay. Nataranta naman ang ina ni Eros kaya kaagad itong lumapit sa anak niya.

"Hoy! Anong nangyare sa 'yo?" akmang hahawakan nito ang braso ni Eros na kinagat ng babae pero agad iniwas iyon ni Eros sa kaniya at tumakbo palabas rin ng bahay.

"HOY!" tawag ni Venus sa anak niya. "Ano bang nangyayare sa batang 'to?" kamot-ulong bulong niya sa sarili niya.

Nang tuluyang makalabas na si Eros sa bahay nila ay nagpalinga-linga siya sa paligid. Pero kahit anong linga niya ay wala na siyang nakitang bakas o anino ng misteryosong babaeng may pakpak.

"Ah!" mahinang daing niya ng biglang kumirot ang parte ng braso niya na kung saan bumaon ang ngipin ng mga babae. Hinawakan niya naman ito para maibsan ang kirot. "Bwisit na babaeng maligno na 'yon!" inis na bulong nito. "Ugh!"

~*~

Isang panaginip.

Para kay Eros ay isa lamang panaginip ang mga weirdong kaganapan kanina. Sabi nga nila, wala namang panaginip na hindi weird. May panaginip nga na biglang tatalon ang isda mula sa aquarium tapos pagkabagsak sa lupa ay biglang magsha-shapeshift bilang aso. Minsan may isa pa ngang panaginip na bigla na lang nagiging buntis ang lalaki.

Pero hindi ba't karaniwan sa mga panaginip ay nakakalimutan mo ang iilang mga detalye? Pero si Eros ay naalala pa niya ang bawat detalye na mga naganap kahapon. Pero nagawa niya ring kunbinsihin ang sarili niya na isa nga 'yong panaginip. Isang anghel magkakainteres sa laptop niya? Tapos ano pa, kakagatin siya sa braso niya?

Tinawanan na lang ni Eros ang sarili atsaka siya unti-unting bumangon pagkatapos niyang maisuot ang salamin niya para salubungin ang umaga pero maya't maya ay napatigil siya nang makita niya ang marka sa braso niya.

Unti-unting nanlaki ang mata niya nang mapansin niya na ang itsura nio ay para bang may dalawang matulis na bagay na bumaon rito.

"Kagat ng lamok," sambit niya sa sarili at isinawalang bahala niya na lang iyon. Kahit imposible na ganung kalaking marka ang magagawa ng isang kagat ng lamok. Sa sobrang skeptic niya sa pangyayare ay wala nang sense ang mga lumalabas sa bibig niya.

Unti-unti na niyang inilapag ang dalawang paa niya sa sahig at sinuot ang tsinelas niya pero maya't maya ay muli na naman siyang napatigil nang may maalala siya.

"Ay shete ka!" Napasabunot siya sa buhok niya. "Kailangan na pala ang laptop ko ngayon para sa thesis! Anak ng—!" Sa pangatlong pagkakataon, muli na naman siyang napatigil nang may makita siyang isang bagay na prenteng nakapatong lang sa kaniyang lamesa.

Bigla itong tinamaan ng sinag ng araw na parang isang reward sa isang gameshow.

Imbis na magtatalon siya sa tuwa at yakapin na ang laptop na matagal na nawalay sa kaniya ay tuliro niya lang pinagmamasdan ito. Kasabay no'n ay ang pagbabalik-tanaw niya sa mga nangyareng hindi kapani-paniwala kahapon.

Napanganga siya at muling napahawak sa ulo niya. Ibig sabihin, totoong nangyare ang mga iyon? Ngunit ayaw pa rin niyang maniwala sa binubulong ng utak niya.

"Good morning!" Napatayo siya bigla ng may marinig siyang boses babae sa likod niya. Nanlalaki ang mga mata niyang hinarap niya ito.

Muling nagpakita ang babaeng may pakpak sa kaniya. Matamis itong nakangiti sa kaniya habang komportableng komportable na naka-indian seat sa kama niya.

Nanginginig ang labi ni Eros. "Ikaw—!" Muli ay hindi na naman siya naniwala. Baka naman ay muli na naman siyang nasa ilalim ng isang panaginip. Posible namang managinip ka sa isang panaginip kaya isang katangahan man para sa kaniya ang ginagawa niya pero bahala na.

Sinipa niya ng malakas ang haligi ng kama. Impit na napadaing na lang siya at napatalon talon ng makaramdam siya ng matinding sakit. Hindi na siya pwedeng mag-deny. Totoo nga talagang nakikita niya ang misteryosong babae sa harapan niya.

"Hoy! Ayos ka lang? Ano ba—Ano bang ginagawa mo?" akmang lalapitan siya ng babae pero sinamaan niya ng tingin ang babae habang tumatalon pa rin dahil sa sakit.

"Ikaw! Ano ka ba talaga?!" singhal niya sa babae. "Anghel ka ba?!" Pinasadahan niya ng tingin ang babae atsaka na siya umayos ng tindig. Maya't maya ay napatawa siya ng mahina. "Imposible namang lapitan ako ng isang anghel eh ang sama sama ng ugali ko!" Maya't maya napakunot noo siya nang marealize niya ang kulay ng pakpak ng babae. Biglang may ideyang sumulpot sa isip niya. "Huwag mong sabihing isa kang kupido?! Anak ng—!"

Samantalang natutuwang pinagmamasdan naman siya ng babae. Lalong lumawak ang ngiti nito.

Muling napaatras naman si Eros nang umabante ang babae pinagsususpetyahan niyang isang kupido. Isinayad nito ang kaniyang mga paa sa sahig habang prenteng nakaupo pa rin sa kama ni Eros.

"Hindi ba't dapat ikaw ang tanungin ko n'yan? Eros ang pangalan mo 'di ba? Ikaw ba si Kupido?"

Sarkastikong napatawa si Eros dahil sa sinaad nito sa kaniya. "Paano mo naman nalaman ang pangalan ko?"

"Secret!" mapang-asar na wika nito sa kaniya. Napataas naman ang kilay ni Eros dahil do'n. "Magpapakilala na ako, Shawna ang pangalan ko at hindi ako isang kupido." Mahinang tumawa muna ito bago itinuloy ang pagpapakilala niya. "Pagkatapos kong mamatay, nagising na lang ako na ganito ang ayos ko. Who knows kung bakit ganito ang get-up ko as a ghost. Pero ayos lang, atleast maganda naman ang itsura ko at hindi nakakatakot."

"M...Multo...ka?" hindi makapaniwalang tanong ni Eros.

Muling tumawa si Shawna. "Bakit? Ayaw mo pa ding maniwala? Hindi ako nakita ng mama mo 'di ba?"

"Hindi ko alam na kaya ko palang makakita ng multo," sabi niya habang naniningkit ang mga mata. "Paano nangyare 'yon?"

Kumibit-balikat si Shawna. "Ewan ko, kahit nga ako nagulat din ako na nakikita mo pala ako. Nahahawakan mo pa nga ako eh." Bigla naman siyang tumawa at dinagdagan ang sinabi niya. "At nagagawa pa kitang kagatin," sabi niya sabay hagalpak ng tawa.

Napasimangot naman si Eros dahil sa pagtawa nito. Nang magawa na nitong tigilan ang pagtawa ay saka naman nagsalita na si Eros.

"Oh? Ano ngayon ang ginagawa mo pala ngayon dito?" Nagawa nang maging kalmado ni Eros habang nasa paligid niya si Shawna. Sa tingin niya naman ay hindi naman mapanganib ang multong kausap niya. "Dahil nakikita kita, kukulitin mo na ba ako na tulungan kitang makamit ang hustisya na hinahanap mo?"

Umiling iling lang si Shawna habang nakangiti atsaka siya tumayo. Dire-diretsong naglakad ito patungo sa laptop niya at mahinang tinapik-tapik ang laptop nito.

"May tanong ako, isa kang aspiring writer 'di ba?"

"Huh?" Hindi agad nakapag-react si Eros sa sinabi nito.

Kumurba ang labi ni Shawna at pinagdikit ang dalawang palad nito habang nakangiti ng malawak. "May favor ako sa 'yo."

"Ayoko," mabilis na tanggi ni Eros. "Umalis ka na rito at huwag mo na akong guguluhin." Binigyan niya muli ng isang matalim na tingin si Shawna. "At HUWAG NA HUWAG mo nang susubukang nakawin ang laptop ko." Naglakad na siya patungo sa pintuan pero mabilis na iniharang ni Shawna ang sarili niya sa pinto dahilan para mapahinto si Eros.

"Pataposin mo nga muna ako," sabi ni Shawna sa kaniya. "Madali lang naman ang favor na hinihingi ko sa 'yo."

"Madali man 'yan o hindi, wala akong pakielam. Kaya umalis ka na at may pasok pa ako ngayong umaga."

Umiling iling si Shawna. "Hindi ako aalis dito hangga't hindi ko nasasabi sa 'yo ang favor na hinihingi ko."

Napahalukipkip na lang si Eros at napabuntong hininga. Nag-u-umpisa nang maubos ang pasensya niya sa babaeng kausap niya.

"Sige, sabihin mo na kung anong gusto mong sabihin habang napipigilan ko pa ang sarili kong kaladkarin ka paalis diyan sa pinto," nakasimangot na sabi ni Eros dahilan para mapangiti ng malawak naman si Shawna.

"Gusto ko sana na ikaw ang magsulat ng novel na sinulat ko noon pero unfortunately ay hindi ko natapos dahil...you know?" Nag-aksyon si Shawna na parang hiniwa ang leeg niya. "Pakiramdam ko kasi ay yun lang ang susi para maging malaya na ako sa pagiging multo dahil 'yon lang ang piece of memory ko na naalala ko ngayon."

Unti unting kumunot ang noo ni Eros. Maya't maya ay lumabas ang isang mahinang tawa mula sa bibig niya. "Niloloko mo ba ako? Madali? 'Yan ba ang sinasabi mong madali? Akala mo ba madali lang makatapos ng isang nobela?"

"Okay! Alam ko naman na mahirap makatapos ng isang story. Pero ako naman ang utak dito, okay? Parang mag-co-collab lang tayo. Ikaw magsusulat. Ako naman ang mag-iisip. Deal?"

"Bakit naman?" Hindi pa rin nawawala ang pagkunot ng noo ni Eros. "Bakit hindi na lang ikaw magsulat? Kuwento mo naman 'yan, papahirapan mo pa ako."

"Kasi! Hindi ako makasave sa laptop mo ng word document. Hindi ko alam kung epekto ba 'yon ng pagiging ghost ko pero napupunta lang sa wala ang 1k words na nasusulat ko. Nakakafrustate kaya 'yon!"

"Ah..." bored na sagot ni Eros sa kaniya. "Ang bilis talaga ng karma."

Naiilang na napangiti na lang si Shawna sa sinabi ni Eros. "Okay, sorry na sa pagnakaw ko ng laptop mo. Alam ko naman na mali 'yon."

"Paano mo nalaman ang passcode ko?" pag-iibang topic ni Eros. Naging seryoso na ngayon ang aura niya.

"Ah..." Sandaling inalala ni Shawna kung paano niya nadiscover ang passcode ng laptop ni Eros. "Uhm...Kinuha ko yung unang apat na numbers ng ISBN ng isang libro na nakahiwalay sa mga libro sa shelf mo." Ngumiti ng alanganin si Shawna saka tinuro ang librong kasalukuyang tinatapos ni Eros basahin ngayon kaya nakahiwalay iyon sa mga libro niya.

Napasimangot na lang si Eros atsaka napamura sa isip niya. Hindi siya makapaniwala na talagang nalaman ni Shawna kung saan niya kinuha ang passcode ng laptop niya. Ngayon mukhang kailangan niya siguro magpalit na ng passcode.

Pero joke lang, huwag na lang daw pala. Pinagisipan niya nang mabuti ang passcode ng laptop niya tapos papalitan niya ng ganun-ganun na lang. Atsaka mahirap na baka makalimutan niya lang ang bagong passcode niya at hindi na naman niya magamit ang laptop niya.

"So, ano pumapayag ka na ba?" nakangiting tanong sa kaniya ni Shawna. "Dali na! Pumayag ka na para makakilos ka na! Sige ka! Baka malate ka sa pasok mo ngayon!"

"Atsaka!" Pinagdikit muli ni Shawna ang dalawang palad niya habang makikita pa rin ang pagkasabik sa mukha niya. "Nabasa ko yung mga sinusulat mo sa laptop mo. Ang galing mo kaya!"

"Hindi mo ako madadaan sa ganiyan." Umangat ang isang kilay ni Eros habang makikita sa mukha niya ang pagkaumay sa usapan nilang dalawa. "Hindi ako magaling. 'Yang mga sinusulat ko puro mga hindi tapos ang mga 'yon. Wala pa akong natatapos sa mga sinusulat ko kaya—!"

Pinutol ni Shawna ang sasabihin niya. "Teka! Malay mo! Ito ang kauna-unahang nobela na matatapos mo! Oh 'di ba!"

Napabuntong hininga na lang muli si Eros. Mas lalong tumindi ang lukot sa mukha niya. Umagang-umaga stress na stress siya sa presensya ng babaeng nasa harap niya.

"Ano bang genre 'yang kuwento mo ha?" bigla niyang naisipang itanong.

"Romance," kaagad na sagot ni Shawna.

Mahinang napatawa naman si Eros sa sagot niya na para bang nang-iinsulto ito. "Ano?" sabi niya sa pagitan ng pagtawa niya. "Hindi mo ako mapapasusulat ng ganiyang klaseng kwento." May pandidiri sa tono ng boses nito. "Lumayas ka na d'yan sa harap ko."

"Huh? Bakit?"

Tuluyan nang naubos ang pasensya ni Eros kaya marahas niya nang hinila si Shawna palayo sa pintuan. Pagkatapos ay dire-diretso na itong naglakad palabas.

"Hoy!" tawag nito sa kaniya pero wala na itong natanggap na tugon mula kay Eros.

Pero imbis na malungkot ay lumitaw ang isang mapaglarong ngiti sa labi ni Shawna.

"Pasensiya ka, pero hindi talaga ako tumatanggap ng rejection," usal nito. "Sa huli, mapapapayag rin kita sa gusto ko." Mahinang tumawa ito pagkatapos habang isa-isa namang sumulpot ang mga ideya sa isip nito kung papaano niya guguluhin ang matahimik na buhay ni Eros.