The Encounter of Two Lovers

Chapter Five

The Encounter of Two Lovers

Paano nga ba uumpisahan ang isang lovestory? Kung sabagay, obvious naman ang sagot. Malamang nag-uumpisa lang naman ang lovelife ng isang tao kapag nagkita na silang dalawa ng kaniyang magiging ka-couple niya sa future. Pero ang tanong? Sa anong paraan pagkikitain ang dalawa?

Ito ang problemang kinakaharap nina Shawna at Eros kaya hindi pa nila nauumpisahan ang nobela nilang dalawa. Dahil panay reklamo ang isa na ang cheesy o ang corny daw at kung ano-ano pang mga ibang term na palaging ginagamit ni Eros pang-insulto sa mga romantic scenes na palagi niyang pinandidirihan.

Ngayon ay sumapit na ang fourteen, ang araw kung saan gaganapin na ang activity nila sa Creative Writing na kailangan gayahin nila ang paborito nilang fictional character. Hindi rin nakatakas ang paandar na ito sa reklamadong utak ni Eros. Pakiramdam niya kasi ay parang ginagawa lang silang elementary sa activity nila. Mabuti na lang ay mayro'n siyang ekstrang salamin na medyo kalakihan ang lenses na magkatulad na magkatulad sa isa sa mga paborito niyang fictional characters. Ayaw niyang masyadong mag-effort sa activity na ito kaya 'yon na lang ang susuotin lang niya. Total obvious naman na makikilala kaagad kung sino ang ginagaya niya.

Speaking of fourteen pala, hanggang ngayon ay wala pa ring ideya si Eros kung bakit iyon ang napiling title ni Shawna. Hindi pa rin nawawala ang pagtataka sa kaniya dahil wala siyang nakikitang koneksyon sa plot ni Shawna sa naisip nitong title. Pero 'di bale na nga, ang importante kailangan na niyang matapos kaagad ang nobela para lubayan na siya kaagad ni Shawna.

Pero gaya ng sabi niya nung nakaraan, hindi nga pala madali makapagtapos sa isang nobela. Lalo na sa isang katulad niya na wala pa talagang natatapos. Napabuga na lang siya ng hangin dahil sa naisip niya. Mukhang matagal tagal pa niyang pagtitiisan ang babaeng iyon.

Pumasok na sa classroom si Eros habang suot-suot ang signature glasses ng kaniyang ginagayang character. Nabaling naman sa kaniya ang tingin ng ibang mga kaklase niya na nakaayos na rin para sa activity nila.

"Pottah!" nakangiting tawag sa kaniya ng kaklase niyang babae na malapit sa direksyon niya. Napakunot-noo naman si Eros pero 'di na lang niya ito pinagtuunan ng pansin at nilampasan na lang ang babaeng tumawag sa kaniya sa pa-trying hard na british accent.

"Woah! The boy who lived!" sabi naman ng isa niyang kaklaseng lalaki na nadaanan niya. Nadagdagan naman ang pagkakunot-noo ni Eros dahil dito. Pinagsasabi ng mga ito?

"Eksklabadu!" pang-aasar naman sa kaniya ng isa pa niyang kaklase na nadaanan niya at itinutok sa kaniya ang hawak nitong ballpen. Tinawanan naman siya ng katabi niya. "Tanga pre! Expelliarmus 'yon!" sabay tawa pa nito ng mas intense kaysa sa nauna.

Ngayon ay nagsalubong na ang kilay ni Eros. Mukhang nagets na niya kung bakit gano'n ang mga kaklase niya ngayon sa kaniya. At ang tanging may sala lang naman ay ang isinuot niyang salamin.

Tangina niyo! Ako si Detective Conan! sigaw nito sa isip niya habang mas lalong nadadagdagan nang nadadagdagan ang mga nang-aasar sa kaniya.

~*~

Para kay Eros ito lang naman ang mga common clichés ng unang pagkikita ng dalawang lead na kinalakihan niya na hanggang ngayon ay pumapatok pa din. Kahit hindi naman siya fond sa mga movies or novels or anything na may romance genre. Aware naman siya sa mga ito dahil siguro ay isa rin sa mga nag-e-enjoy sa mga ganito ay ang pamilya niya. Pero kahit papaano, kahit siya ang naiiba ang taste sa kanila hindi pa naman niya iniisip na baka ampon lang siya or isang sanggol na napagpalit dahil sa pagkakamali ng nurse. Malinaw na malinaw naman na manang-mana ang mukha niya sa kaniyang ama kaya imposibleng ampon siya or whatever.

Umpisahan natin sa accident. Kadalasan, nagkikita ang dalawang lead ng romance drama dahil sa isang aksidente. Hindi aksidente na as in yung severe na yung nasa alanganin na yung buhay nilang dalawa. E 'di tragic ending na agad 'yon! Kawawa naman! Accident like nagkabungguan tapos ayo'n natalsikan ng juice or ng kape. Pwede ring nagkabungguan tapos nahulog yung madaming mga libro. Natalisod or napilay yung isa kaya sa 'di ineexpect na moment ay biglang nagkapatong na sila tas magkalapit na ang mukha ng isa't isa.

Pangalawa naman, Aym a hero! Yung tipong nasa kapahamakan yung girl like may mga pangit na nilalang na pagtritripan siya tapos ayo'n biglang bugbog sarado kay boy. Then, magtatama ang tingin nilang dalawa. Para bonggacious ang moment may pasabay pang patugtog ng ost nila tapos ayo'n. THE END! Ayo'n na ang end ng episode.

Pangatlo, yung nagkakilala sa nakakahiyang sitwasyon. Halimbawa, nahalikan nang hindi sinasadya. Nahubaran nang 'di sinasadya. Nabosohan nang 'di sinasadya. Nasampal nang 'di sinasadya basta kung ano-ano pang mga pwedeng idagdag na nakakahiya.

Pang-apat, napagtripan or binully. Dito nag-uumpisa ang love-hate relationship ng dalawang bida. From enemies, frenemies, friends to lovers. Mga gano'n!

At ang panglima naman ay ang love at first sight. Medyo hindi problematic ang encounter ng dalawa sa ganito pero masyadong ideal dahil mahirap sa karamihang mga tao ang maniwala sa ganito.

Marami pang bagay na gustong i-mention si Eros kay Shawna pero hanggang lima lang ang nasabi niya kay Shawna dahil pinatigil siya kaagad nito sa pagsasalita bago niya sunod sabihin ang rant—este ang isa niya pang opinyon.

"Oo alam ko! Alam kong cliché ang mga 'yon pero wala namang masama sa cliché 'di ba? Kahit sino namang writer ay gumagamit rin ng mga tropes na gano'n basta nagagawa naman nila ng tama," ang sabi naman sa kaniya ni Shawna. Gabi na at kasalukuyang nasa kwarto silang dalawa ngayon.

Samantalang si Eros, bored lang siyang tinignan nito. "Pero pwede ba mag-isip ka naman ng iba? Yung..." bigla siyang natigil at napabuntong hininga. "Yung hindi naman masyadong...basta! Ang awkward ng mga ito! Hindi mo ako masusulat nang mga ganiyan," saad nito. "Kung ako siguro ang character ng isang libro at ganitong eksena ang gustong mangyare sa akin ng writer baka masapak ko siya."

Bumuga muna ng hangin si Eros bago magsalita. "Una, kung may makabunggo ako or may mangyare mang katangahan sa akin. Hindi ko magagawang titigan pa ng matagal o magkaroon pa ng conversation sa isang taong nakasaksi ng katangahan ko!"

"Pangalawa..." Tumawa muna ng bahagya si Eros bago niya inayos ang salamin niya. "Kung mayro'n man akong ililigtas... Joke lang! Malabo pala 'yon!" Agad niyang binawi ang sinabi niya. "Sino namang matinong tao ang ipapahamak ang sarili niya para sa taong 'di naman niya kakilala?" natatawang turan nito.

"Atsaka pangatlo..." dagdag pa nito na may kasamang pag-taas ng isa niyang kilay. "Hindi ko hahayaan na magkaroon pa ako ng koneksyon sa taong naka-witness naman ng kahihiyan ko. Yung memory nga gustong gusto mo nang kalimutan kaagad-agad yung talagang mapapahiling ka na lang na sana magka-amnesia ka na agad-agad. Eh yung tao pa kaya? Syempre kung ikaw rin 'yon talagang gagawa ka ng paraan para mapalayo sa taong 'yon."

"Yung pang-apat naman, oo may mga bully na nagbabago naman. Pero taeng 'yan! Sino namang papayag na magiging mag-on sila ng taong araw-araw sumisira ng araw niya? Sa taong walang ibang ginawa sayo kundi apihin ka?'

"At jusmeyo marimar! Lalong sakit naman sa ulo ang pang-lima. Dahil lang bumilis ang tibok ng puso sa unang pagkikita mahal na agad? Paranoid lang 'yon!"

Samantalang si Shawna, imbis na mainis sa rant ni Eros. Pinagtawanan lang siya nito dahilan para magtaka na naman sa kaniya si Eros pero medyo nasasanay na rin siya na hindi gano'n kadaling mainis si Shawna sa mga masasamang salitang lumalabas sa bibig niya.

"Hoy! Kumalma ka nga d'yan! Hindi naman ikaw ang bida!" natatawang sabi nito at sinundan pa niya ng mas malakas na pagtawa kaysa nung una atsaka hinampas ang balikat ni Eros dahilan para kunot-noo siyang tinignan ni Eros at dahan-dahang mapausod palayo sa kaniya.

"Alam mo ikaw?" sabi ni Shawna nang makarecover na siya sa pagtawa. "Bitter ka lang kasi wala kang lovelife!"

"Kahit kailan hindi ko naman hiniling na magkaroon ng sinasabi mo!" nakasimangot na sagot sa kaniya ni Eros habang binibigyan siya ng matalas na tingin. "Nakakasuka kaya!"

Natawa na naman muli si Shawna. "Grabe naman 'to makapagsalita!" hindi makapaniwalang komento nito. "Baka naman jowa kasi kaagad ang pumapasok sa isip mo! Wala ka bang crush o ano? Ang daming magaganda at matatalino sa school niyo imposibleng wala!"

"Wala nga," nakasimangot na sagot sa kaniya ni Eros habang diretso lang na nakatingin sa kaniya.

"Ano?" 'di makapaniwalang reaksyon ni Shawna habang natatawa.

"Ano-ano ka d'yan? Bakit required ba 'yon?" Muling nagsalita na naman si Eros habang hindi pa rin nawawala ang masamang tingin nito kay Shawna. Medyo naiinsulto kasi ito sa pagtawa niya.

Unti-unting huminto si Shawna sa pagtawa at sinalubong na ang masamang tingin ni Eros sa kaniya sabay tanong ng, "Bakit?"

Tuluyan nang napikon si Eros dahil sa mga binabatong tanong ni Shawna na wala namang kwenta para sa kaniya kaya padabog na niyang sinara ang notebook niya at muling dinapuan ng matalim na tingin si Shawna. "Wala na kong ganang makipag-usap sa 'yo. Ayoko sa usapan na wala namang kwenta."

"Hoy! Grabe naman! Ang pikon mo!" natatawang komento sa kaniya ni Shawna atsaka pinigilan si Eros sa pagtayo kaya wala ring nagawa si Eros kundi bagot na lang na muling umupo sa harap niya.

"Sabi ko naman sa 'yo, maling tao ang pinilit mo na tulungan ka. Hindi ko forte 'yang gusto mong ipasulat sa akin," inis na sabi sa kaniya ni Eros.

Mahinang tumawa si Shawna. "Tanong ko lang naman ay bakit?" Kitang kita sa mga mata ni Shawna ang kuryosdidad sa pagkatao ni Eros. "Gusto ko lang naman malaman kung bakit hindi nagkakagusto at bitter si kupido?" nakangising tanong nito kay Eros habang matamang nakatitig dito.

Masama muna siyang tinignan ni Eros atsaka niya hinablot ang notebook niya at tumayo na mula sa pagkakaupo sa sahig. Hindi na siya nagawang pigilan ni Shawna sa braso dahil sa bilis ng pagkilos nito.

"Ang corny mo," komento muna nito habang nakabaling ang tingin sa lamesa.

"Bukod rin sa bitter ka pala," takang sabi ni Shawna. "Sa tingin ko, wala ka rin sigurong kaibigan kahit isa 'no?"

"Bakit may nakikita ka ba?" sarkastikong sabi ni Eros.

Namilog ang mga mata ni Shawna. "So, wala?" hindi makapaniwalang sabi ni Shawna. Ineexpect niya kasi na mali ang judgement niya kay Eros. "As in wala talaga?! Bukod sa akin?"

Napakunot-noo naman si Eros dahil sa sinabi niya. Bukod sa pagkakunot-noo nito ay kasabay rin ang panliliit ng kaniyang mga mata. "Pinagsasabi mo? Hindi rin kita kaibigan 'no!"

Pabirong napahawak si Shawna sa dibdib niya at pinalobo ang magkabila niyang pisngi. "Ah gano'n! So, ako lang pala ang nag-a-assume!" natatawang sabi nito. "Key payn! Kung ayaw mo e 'di h'wag!"

Hindi na umimik si Eros sa sinabi niya at nagtungo naman siya sa kama niya upang isaayos na ang higaan niya para sa kaniyang pagtulog.

"So, gano'n," muling sabat na naman ni Shawna. "Wala kang social life, wala ka ring lovelife. So ano ka? Allergic sa mga tao ganun?" muli na naman itong natawa dahil sa sinabi niya. "Sabagay, mukha nga," sabay sagot rin nito sa sariling tanong niya at muli na namang dinaldal si Eros pero naunahan siya nito sa pagsasalita.

"Ayoko sa mga tao," saad ni Eros habang nakabaling pa rin sa ibang direksyon ang tingin nito. Nakayuko ito kaya bahagyang natatakpan ang mga mata nito. "Kung magtatanong ka na naman ng walang katapusang 'bakit'. Ayan na yung hinahanap mong sagot."

"Ayaw mo sa mga tao?" ulit ni Shawna sa sinabi ni Eros. "Why naman?" Hindi na niya sinabi ang word na 'bakit' at baka mas lalong maubos ang pasensya ni Eros sa kaniya. "Wala naman sigurong ginagawang masama ang lahat ng mga tao sa 'yo. Ba't naman galit na galit ka sa kanila?"

"Hindi naman ako galit sa kanila." Kalmado na ang tono ng boses ni Eros kaya sa tingin ni Shawna ang bibigyan naman ito ng reasonable na sagot. "Sadyang bwisit lang talaga silang lahat." Pero hindi rin pala.

Dissapointed na napabuntong hininga na lang si Shawna. "So, nabwibwisit ka rin sa pamilya mo kasi tao din sila?"

Humiga na si Eros habang nakatingala sa kisame. "O sige, bobohan mo pa ang pagtatanong."

"Okay!" nakangusong sabi ni Shawna na medyo may halong inis ang tono ng kaniyang boses. "Exempted naman siguro syempre ang family mo." Maya't maya ay lumitaw ang malawak na ngiti sa labi ni Shawna at may kasama pang pagningning ng kaniyang mga mata. "So ibig sabihin ba n'yan, exempted rin ako kasi hindi naman ako tao?" natutuwang sabi nito.

Kumurba naman ang labi ni Eros dahil sa sinabi ni Shawna. Maya't maya ay lumitaw rin ang mga ngipin ni Eros dahil sa bahagyang pagngiti niya. "Ano ka, mas lalo ka na." Pagkatapos ay binaling na nito sa kanan ang paghiga niya dahilan para magmukhang nakatalikod ito sa direksyon ni Shawna.

"Ano?" pabirong ngumuso uli si Shawna. "Okay, sabi ko nga." Pabirong naglungkot-lungkotan ito kahit hindi naman ito masyadong naapektuhan sa sinabi ni Eros. Ang totoo nga niya'n ay mas lalo pa tuloy siyang naengganyo sa pagkatao ng binata.

Lumitaw ang mahinang tawa mula kay Eros dahilan para mapatigil naman si Shawna sa lungkot-lungkutan session niya. Akala niya ay babanat si Eros ng 'joke lang!'. Pero hindi naman pala.

"Goodnight," ani Eros sa kalmadong tono habang nakatalikod pa rin kay Shawna. Nadissapoint na naman si Shawna dahil hindi iyon ang inaasahan niyang pahabol na sasabihin ni Eros.

Gayunpaman, kahit sabihin pa ni Eros kay Shawna na pareho lang siya sa mga taong kinaiinisan niya. Naiiba pa rin ito sa lahat dahil ito ang kauna-unahang nakatanggap ng matamis na 'goodnight' mula kay Eros.

~*~

Umagang-umaga pa lang pero tirik na tirik na ang araw. Parang mga langgam na nagsidausan sa quadrangle ang mga estudyante habang maya't maya ay papikit pikit ang mata upang iwasan ang nakakasilaw na sinag ng araw. Flag ceremony kasi ngayon kaya kaniya kaniyang tungo ang mga estudyante sa kani-kanilang mga pila.

Bigla tuloy pinagsisihan ni Eros ang pagpasok niya ng maaga ngayong araw. Dapat pala ay nagpa-late na lang siya sa first subject. Mas kaya niyang tiisin ang pagtinginan ng mga kaklase niya sa classroom kaysa sa matagal na pagtayo sa tapat ng sikat ng araw.

Napapikit na lang ng mariin si Eros nang padami na ng padami ang mga taong nakikita niya sa paligid. Parang ang sarap magwala at mag-headbang sa lupa. Mga gano'ng feels. Pero syempre sa loob-loob lang niya iyon. Sanay naman na siya na may ganoon siyang nararamdaman sa tuwing napapaligiran na siya ng mga presensya ng mga nagdadamihang mga tao.

Napatigil bigla sa pagmumura si Eros sa isip niya nang bigla siyang may mapansin sa gilid niya. Nginitian naman siya ni Shawna habang tinatakpan ng pakpak niya ang sinag ng araw sa pwesto ni Eros. Medyo naamaze siya dahil posible pala mangyare ang bagay na iyon.

"Ayan tinulungan na kita ah! Baka naman pasok na ako para maging exempted sa hatred mo sa mga tao," tinaas-baba pa niya ng dalawang beses ang mga kilay niya para asarin si Eros. Samantalang si Eros ay pasimpleng natawa na lang ng mahina dahil sa inaakto ni Shawna kahit sa totoo lang hindi niya rin alam kung ano nga bang nakakatawa sa ginawa ni Shawna. Siguro dahil hindi lang siya makapaniwala na sineryoso masyado ni Shawna ang mga sinabi niya kagabi. Pero kunsabagay, totoo naman ang mga sinabi niya.

Lumipas ang ilang mga minuto na parang akala mo ay dalawang oras na ang lumipas. Inumpisahan na ang prayer hymn. Umakyat naman sa stage ang isang pamilyar na babae na suot-suot na naman ang pink na headband.

"Oy! Si Clarisse pala ang mag-le-lead ng prayer!" saad ng isang babae na kaklase ni Eros.

"Oo nga eh! Grabe 'di uso haggard sa kaniya 'no? Pinabilad na sa araw lahat-lahat! Ang ganda pa din!" Kaagad pinatahimik naman ng adviser nila ang dalawa niyang kaklase na maagang nagtsi-tsismisan.

"Eros!" tawag ni Shawna kay Eros dahilan para mapalingon ito kaagad sa kaniya. Pero kaagad din nito napagtanto na wala naman palang ibang nakakakita kay Shawna kaya umiwas siya kaagad ng tingin para hindi siya magmukhang tanga.

Gumawa naman ng paraan si Shawna para mas mapalapit niya ang sarili niya sa tabi ni Eros. Pagkatapos ay saka niya dahan-dahang pinakita ang limang daliri niya sa harap nito.

"Pili ka dito," utos niya. Napakunot-noo naman si Eros dahil dito.

"Sige na! Pumili ka na kahit isa!" pagpupumilit nito. Naguguluhang binalingan niya ng tingin si Shawna.

"Sige na!" pagpupumilit ulit ni Shawna. "Ito naman! Pipili ka lang naman eh!"

Ang tanging nagawa na lang ni Eros ay samaan siya ng tingin. Pagkatapos ay inangat naman ang salamin niya gamit ang gitnang daliri nito.

Nung una pa ay akala ni Shawna ay minumura siya ni Eros pero maya't maya ay napagtanto rin niya na ang pangatlong choice niya ang napili ni Eros. Lumitaw naman ang mapaglarong ngiti sa labi ni Shawna.

Maya't maya ay natapos na rin ang pangtu-tusta sa mga estudyante—este ang flag ceremony. Parang mga langgam na nagkalat ang mga tao dahil nagkaniya-kaniyang balik na sila sa kanilang mga classroom. Wala namang choice si Eros kundi makisama rin sa mga nagkalat na mga estudyante.

"Oy Eros!" Muling naisahan na naman ni Shawna si Eros at muling napalingon sa kaniya ito. Naging mabilis ang mga pangyayare. Sa isang ilap, ay nasa kamay na ni Shawna ang salamin ni Eros at mabilis na tumakbo palayo sa kaniya.

"Hoy!" sigaw ni Eros habang nanliliit ang mga mata dahil sa panlalabo ng paningin. Napatingin naman sa kaniya ang mga estudyanteng nasa paligid niya pero hindi na lang niya pinagtuunan ng pansin ang mga ito at kaagad hinabol si Shawna.

Bukod sa mukha siyang tanga sa paningin ng mga tao sa paligid niya dahil naghahabol siya ng wala. Hindi rin naging madali ang paghahabol niya kay Shawna dahil wala ang suot niyang salamin dahilan para mahirapan siyang maaninag ang iilang mga tao kaya may mga iilan siyang nakakabangga pero ni isang 'sorry' ay wala silang natanggap mula kay Eros.

Maya't maya ay biglang huminto si Shawna at humarap sa kaniya. Mapaglarong iwinagayway nito ang salamin kay Eros na pansamantalang siya lang muna ang nakakakita nito ngayon. Samantalang, napakagat na lang sa labi si Eros dahil sa inis atsaka siya tumakbo palapit sa kinaroroonan ni Shawna.

Nang tuluyan na siyang makalapit kay Shawna ay kaagad niyang inangat ang kamay niya upang mahablot ang salamin niya kay Shawna.

Pero naging mabilis uli ang mga pangyayare.

Mabilis na nakaiwas kaagad si Shawna sa kamay ni Eros kaya ang nahablot ni Eros ay ang mukha ng isang babae na nasa likod lang kanina ni Shawna. At ang babae lang naman iyon ay walang iba kundi si Clarisse Bonifacio. Ang babaeng palaging may suot na pink headband at ang babae na kinikilala ng lahat ng mga estudyante sa school nila.

Naging tahimik bigla ang buong paligid. Ito na yata ang pinaka-awkward na naganap kay Eros sa buong tanang buhay niya.