Chapter 2: Faceless Husband

Kasabay ng pagbabago ng kaniyang mukha ang pagbabago ng takbo ng buhay niya. Maingat na bumaba sa private plane si Shaniya Desiderio na ngayon ay si Adeline Pascua na. Mamayang gabi ay nakatakda siyang ikasal sa isang mayamang lalaki na aisang taon nang nakaratay at nababalot ng bandage ang buong mukha at katawan.

Tinanggap ni Adeline ang kaniyang kapalaran kapalit ng pangakong paghihiganti sa dati niyang asawa, stepsister at madrasta. Limang taon na ang nakalipas mula noong gabing iyon. Hanggang ngayon ay sariwa pa rin sa alaala niya ang sakit. Ang pagkamatay ng kaniyang ama. Ang katotohanan tungkol sa anak niya. Ang pagsagasa sa kaniya ni Diana at pagbuhos nito ng asido sa kaniyang mukha. Maging ang pagtulak nito sa kaniya sa bangin habang naroon rin si Aries, ang dati niyang asawa. Hindi niya makakalimutan ang gabing iyon. Nakaukit iyon sa kaniyang isipan at kailanman ay hindi na mabubura.

“Miss Adeline, naghihintay na sa inyo si Don Alvaro Velasquez.”

Marahang inalis ni Adeline ang sunglasses na suot at nilingon ang assistant ni Don Alvaro Velasquez, ang lolo ng lalaking mapapangasawa niya. Si Drake Vincent Velasquez ay isang business heir na naaksidente isang taon na ang nakalilipas bago pa man maipasa dito ang pagiging CEO ng kompanya. Pinsan ito ni Aries Velasquez na dati niyang asawa. Coincidence? Hindi. Alam niyang may dahilan si Don Alvaro kung bakit siya iniligtas nito at binigyan ng bagong buhay.

Lulan ng magarang sasakyan ay nakarating si Adeline sa malaking mansyon ng mga Velasquez. Hindi niya maipaliwanag ang nararamdaman nang tumapak sa sahig ng mansyon. Una siyang tumuntong dito nang ikasal siya kay Aries Velasquez at ngayon ay ikakasal na siya sa pinsan nito. Nakakatawa pero mas nakakagalit.

Napatigil sa paghakbang si Adeline nang mamataan ang dalawang taong pababa ng hagdan. Magkayakap at nagtatawanan. Inaasahan ni Adeline na makakaramdam ng kirot sa kaniyang puso ngunit wala. Tanging poot lang ang nararamdaman niya para sa dalawang taong kaharap.

“Barron, sino iyan?” Kunot-noong tanong ni Aries sa assistant ni Don Alvaro na nasa likuran ni Adeline.

Taas-noong pinagmasdan ni Adeline si Aries at Diana. Mukhang masayang-masaya ang dalawa sa pagkawala niya.

Bahagyang yumuko si Barron sa dalawa, “Sir Aries, siya si Miss Adeline Pascua. Ang mapapangasawa ni Sir Drake.”

Agad na nangunot ang noo ni Aries at tiningnan siya mula ulo hanggang paa. Gustong matawa ni Adeline. Imposibleng makilala siya nito dahil iba na ang mukha niya ngunit kahit ganoon ay ramdam niyang apektado ito sa presensya niya.

“Mapapangasawa?”

Muling yumukod si Barron at hindi na sumagot pa. Nauna na itong naglakad papunta sa ikalawang palapag ng mansyon at naiwan si Adeline sa harap ng dalawa. Matalim ang tingin sa kaniya ni Aries at kunot naman ang noo ni Diana.

“Kung isa ka sa mga yaman lang ang habol sa pinsan ko, mabuti pang umatras ka na ngayon palang. Hindi ka nababagay sa pamilya Velasquez.”

Mahinang natawa si Adeline at marahang hinawi ang kaniyang buhok. “Sa tingin ko ay mas dapat mong sabihin iyan kay Don Alvaro.”

“Bitch! Sino ka sa akala mo? Mukha namang nanggaling ka lang sa putik. Saan ka ba pinulot ni grandpa?” Mataray na turan ni Diana.

“Miss Adeline…” tawag ni Barron nang mapansing hindi siya sumunod rito.

Pinagmasdan ni Adeline ang mga mukhang kinasusuklaman niya. Marahang pinagpag ni Adeline ang kaniyang mga palad at nginisihan ang dalawang nasa harapan niya, “Excuse me. Grandpa must be so excited to see me.”

Namula ang mukha ni Diana habang nandilim naman ang ekspresyon ni Aries. Nilagpasan niya ang dalawa at tuloy-tuloy na sumunod kay Barron. Wala siyang pakialam sa kung anong papasukin niya makapaghiganti lang. Malaki ang kasalanan sa kaniya ni Aries, Diana at stepmother niyang si Zandra. Marami siyang sisingilin kasama na roon ang buhay ng kaniyang anak at ama.

Idinaos ang seremonyas ng kasal na nag-iisa si Adeline sa harap ng mga kamag-anak ni Drake Velasquez. Walang sinuman ang nagsatinig ng pagtutol sa kasalan at mas napatunayan ni Adeline na tama ang desisyon niyang tanggapin ang tulong ni Don Alvaro. Ang matanda ang isa sa pinakamakapangyarihang negosyante sa buong lalawigan.

Pinasadahan ni Adeline ng tingin ang bawat miyembro ng pamilya ng Velasquez at hindi nakatakas sa kaniyang paningin ang pasimpleng pag-irap ni Diana at pagkalukot ng mukha ni Aries.

Hindi nagsayang ng pagkakataon si Adeline. Matapos ang seremonyas ay agad siyang pumanhik at pumasok sa silid niya ng kaniyang bagong asawa. Inihatid siya ng mayordoma ng mansyon at binigyan ng pares ng damit na pamalit. Mrahang humakbang si Adeline at tuluyang pumasok sa silid. Sa likod ng divider ay may dalawang magkatabing kama, ang isa ay may nakaratay na isang lalaking nababalot ng benda ang buong katawan at mukha.

Dahan-dahang naglakas palapit si Adeline. Ito ang kaniyang asawa. Marahan siyang naupo sa gilid ng kama at pinakatitigan ang asawa. Hindi niya makita ang mukha nito dahil sa benda pero hindi walang kaso iyon sa kaniya.

Sa bedside table ay ipinatong niya ang pares ng singsing na suot niya saka muling tiningnan ang asawa.

“Drake,” masuyong sambit niya sa pangalan ng lalaking walang malay. “Ako si Adeline Pascua. Ako ang asawa mo. 35 years old na ako. Divorced.”

Bumaba ang tingin ni Adeline sa kamay ng asawa na hindi naabot ng benda. Hindi niya alam kung bakit natukso siyang hawakan ang kamay ng lalaki ngunit hindi na niya pinigilan ang sarili. Umawang ang kaniyang labi nang maramdaman ang mainit na palad ng lalaki. Nilingon niya muli ang mukha nito bago dahan-dahang dinikit ang likod ng palad nito sa kaniyang pisngi. Namangha siya nang makita ang isang tattoo doon. Sa unang tingin ay hindi ito maintindihan ni Adeline hanggang sa mapagtanto niya ang hitsura nito. Isang maliit na wolf.

Kuryosong hinaplos ni Adeline ang tattoo, marahang pinaraan ang daliri sa guhit ng tinta sa balat ng kaniyang asawa hanggang sa mapansin niya ang biglaang paggalaw ng talukap ng mata ng asawa dahilan ng pagtalon niya sa gulat at mabilis na paglayo dito habang nanlalaki ang mga mata.

Gumalaw ba talaga ang talukap ng mata ng kaniyang asawa?