Chapter 3: Mysterious CEO

Tinitigan ni Adeline ang asawang nakaratay. Malinaw sa kaniyang paningin na hindi na muling gumalaw ang talukap ng mga mata ni Drake. Naguguluhan siya. Alam niya sa sarili niya na hindi siya namamalikmata. Talagang nakita niyang gumalaw ang mga mata nito.

Unti-unti siyang lumapit muli sa kama at sinundot ang braso ng asawa. Nadismaya siya nang hindi na muling gumalaw ang lalaki. Napakurap-kurap si Adeline saka humugot ng malalim na buntong-hininga. Naupo siyang muli sa tabi ng asawa hanggang sa magvibrate ang kaniyang telepono.

Nang makita kung sino ang tumatawag ay tumayo siya at agad itong sinagot, “Hello, Matias? Anong balita?”

Si Matias ang kaniyang personal bodyguard na siya ring inuutusan niya upang manmanan si Aries. Hindi ito basta-bastang tumatawag kaya alam niya ngayon na may ginawang hakbang si Aries.

[Ma’am, nasa Paralux Hotel si Sir Aries ngayon. Ayon sa source ko, imemeet niya ang Presidente ng nasabing hotel para makipagdeal dito.]

Agad na nangunot ang noo ni Adeline. “Makipagdeal?”

Nagtaas ng noo si Adeline. Mukhang alam na niya ang mangyayari. Nahuhulaan na niya ngayon kung bakit siya tinulungan ni Don Alvaro. Dahil nakaratay ang tagapagmana nito ay sinusubukan nitong isecure ang posisyon ni Drake sa pamamagitan niya. Kasal na siya kay Drake ngayon at nangangahulugan iyon na may karapatan siyang humawak ng posisyon sa AL.VZ Empire kaya kumikilos na si Aries para palakasin ang sarili niya sa pamamagitan ng pakikipagdeal sa Presidente ng Paralux Hotel Chains. Kapag nagtagumpay siyang mapapayag ang Presidente ng hotel ay magkakaroon siya ng suporta mula sa mga board members na pamahalaan ang Empire.

Natawa si Adeline. Matalino talaga si Aries pero hindi siya papayag na magtagumpay ito.

“Bumalik ka sa mansyon, Matias. Kailangan ko ang tulong mo para malabas sa Casa Velasquez. Ngayon din.”

[Masusunod, ma’am] Tapat sa kaniya ang personal bodyguard kaya hindi siya nangangambang mahuli sa gagawin niya.

Matapos ang tawag ay agad na nilingon ni Adeline ang asawa saka naglakad palapit sa pinto ng kwarto. Inilock niya ito bago lumapit sa malaking bintana sa kwarto nila ng kaniyang asawa. Muli niyang nilingon ang nakaratay na lalaki bago siya tumingin sa ibaba upang hintayin si Matias.

Ilang sandali lamang ay dumating ang lalaki na may dalang hagdan. Mabilis siyang nakababa at nakaalis ng mansyon. Mabilis siyang nakarating sa Paralux Hotel. Kitang-kita niya nang pumasok si Aries sa elevator. Pinasundan niya ito kay Matias upang malaman kung saang unit ito pupunta saka pa lamang siya umakyat nang makabalik ang personal bodyguard.

“Room 216, ma’am. 15th floor.”

Agad na tumango si Adeline at pumasok sa elevator. Kailangan niyang maunahan si Aries o kung hindi naman ay kailangan niyang makumbinsi ang Presidente ng hotel na h’wag makipagtulungan kay Aries. Hindi siya papayag na mas lumaki ang koneksyon ng lalaki dahil mas mahihirapan siyang parusahan ito.

Nang makarating sa unit 216 ay idinikit ni Adeline ang tainga sa pinto upang pakinggan ang nangayayri sa loob ngunit ganoon nalang ang gulat niya nang bumukas ang pinto at nasubsob siya sa dibdib ng lalaking lumabas.

Napasinghap si Adeline at agad na umatras. Halos mapaso siya nang mag-angat ng tingin at salubungin ng mga matang sing-itim ng gabi at sing-lalim ng dagat. Umawang ang kaniyang mga labi. Nakasuot ng itim na mask ang lalaking lumabas at kunot-noong nakatingin sa kaniya.

“Who are you?” Maaligasgas ang boses nito at puno ng lamig, halatang hindi gusto ang inabutang ginagawa niya.

Sandaling naparalisa ang utak ni Adeline. Hindi siya kaagad nakasagot dahil kinailangan niya pang gumagap ng hangin at hanapin ang sandaling nawalang dila. Napakalakas ng dating ng lalaki. Nakakapanghina.

Tumayo ng tuwid si Adeline at sumilip sa loob ng unit. Namilog ang kaniyang mga mata nang mamataan si Aries na nakahiga sa sofa at walang malay bago sumara ang pinto.

Nilingon niya muli ang lalaking kaharap. “Ikaw ang…President ng Paralux Hotel? Ikaw si Vincent Ryu?”

Tinitigan siya ng lalaki bago dahan-dahang hinubaad ang suot na mask. Kumabog ng malakas ang dibdib ni Adeline nang makita ang kabuohan ng mukha nito. Pakiramdam niya’y kakapusin siya ng hangin dahil sa lalaki.

“What is it to you?” Humakbang ito dahilan ng pag-atras niya. Napasinghap si Adeline nang tumama ang kaniyang likod sa pader. 

Lumunok siya habang sinasalubong ang tingin ng lalaki. Nagtiim-bagang ito habang nakatitig sa kaniya.

“K-Kailangan kitang makausap,” Aniya sa nanginginig na boses. Hindi niya maintindihan ang sarili. Natetensyon siya sa presensya ng lalaki.

Tumaas ang sulok ng mga labi nito, “And you think I’m interested in talking? Look what happened to him. You’re not afraid to end up like him.”

Tinapangan ni Adeline ang sarili. Ginagawa niya ito para sa kaniyang sarili kaya hindi siya magpapatinag. Gagawin niya ang lahat makapaghiganti lang sa mga taong nanakit sa kaniya. Lahat ng pagkakataon ay hindi niya palalampasin.

“Alam ko namang humihinga pa siya ngayon kaya bakit ako matatakot? Kailangan lang kitang makausap tungkol sa inilapit sayo ni Aries Velasquez. Gusto kong tanggihan mo ang alok niyang mag-invest sa AL.VZ Empire. Hindi mo siya tutulungang maging CEO ng kompanyang iyon.”

Kumawala ang mahinang tawa sa labi ng lalaki. Napalunok muli si Adeline. Tila musika sa kaniyang pandinig ang tawa nito. Nakahahalina. Nakakaadik. Bakit? Bakit ganito ang nararamdaman niya sa lalaki?

“And what do I get in return?” Tila nanghahamon ang tono nito. May kakaibang kislap sa mga mata ng lalaki sa kabila ng lamig at lalim nito.

Pakiramdam niya ay sinusubukan siya ng lalaki. Nagtaas ng noo si Adeline, “Name your price.”

Ngumisi ang lalaki at tiningnan siya mula ulo hanggang paa, “Are you sure you can give me what I want, Miss?”

“Oo. Sisikapin kong maibigay,” matapang na sagot ni Adeline.

Hinapit ni Vincent Ryu ang baywang ni Adeline na naging sanhi ng pagdaloy ng kuryente sa kaniyang katawan na nagpatindig ng kaniyang balahibo. May kakaibang init na dala ang haplos nito. Makapal ang suot niyang damit ngunit ramdam niya ang init na nagmumula sa palad ito. Pakiramdam niya ay kakapusin siya ng hininga sa simpleng haplos na iyon.

“Let’s see,” bulong ni Vincent Ryu saka inilapit ang labi sa kaniyang tainga upang bumulong dahilan ng muling pagtindig ng balahibo ni Adeline. “Let’s see, Adeline Velasquez.”