Chapter 2

"Tiyo Tunying, kumusta na po?!" magiliw na bati ni Alyanna Marie sa kapatid ng kanyang ina ng salubungin siya nito sa daan.

"Bakit narito ka na naman, Yanna? Alam ba ng ama mo na nagpunta ka dito?" seryosong tanong ni Tunying sa pamangkin, pagkatapos makapagmano ni Yanna sa kanya.

"Tiyo naman, parang ayaw mong narito ako!" may himig tampong saad ng dalaga.

Napabuntong hininga naman si Tunying at inagaw sa pamangkin ang dala nitong maliit na maleta.

"Ako ng magdadala nito."

Hinayaan ni Yanna ang Tiyo Tunying niya na bitbitin ang gamit niya. Nauna itong maglakad pauwi ng bahay at sumunod naman siya.

Hindi madaling makapasok sa bakuran ng Tiyo Tunying ni Yanna dahil sa napapaligiran ito ng mga malalaking aso. Malayo pa nga sila sa bahay ay dinig na ng dalaga ang pagtahol ng mga alaga ng tiyo niya.

"Ilang beses na akong nagpabalik-balik dito at nakitira, hindi pa rin ako kilala ng mga alaga mo, Tiyo Tunying." aning wikang may pagtataka ni Yanna.

Nasa labas na sila ng tarangkahan ng bahay ng patigilin ng tiyuhin ni Yanna sa pagtahol ang mga aso at itinali muna lahat.

"Bagong panganak si Witty, kaya sensitive."

Isa sa mga asong alaga ng tiyuhin ni Yanna si Witty.

"Kaya pala!" bigkas ni Yanna at pumasok na rin sa loob ng bakuran.

"Napapansin ko na napapadalas ka na dito sa probinsiya. Pangatlong beses mo na itong bisita sa akin ngayong taon. Hindi mo naman ginagawa ang ganito noon. Nag away na naman ba kayo ng ama mo?"

Napakamot sa ulo niya si Yanna ng mahulaan ng Tiyo Tunying niya ang tunay na dahilan ng pagbalik niya sa bahay nito.

"Hindi ko po talaga makasundo ang bagong asawa ni Dad, Tiyo. Ayoko namang makipagtalo palagi sa kanila, kaya ako na ang umiiwas. Isa pa, parang wala naman ng pakialam sa akin si Daddy. Magmula ng maging asawa niya si Tita Amanda, nawalan na ng panahon sa akin si Dad. Hindi na kami tulad ng dati." malungkot na wika ng dalaga.

Napailing ng ulo niya si Antonio sa sinabi ng nag iisang pamangkin. Ulila na sa ina si Yanna at matagal din namang panahon na hindi nag asawa ang ama ng dalaga at kahit na paano ay nauunawaan ni Tunying ang bayaw niyang si Rodrigo. Dahil siya rin ay balo na at nag iisa na sa buhay ng mag asawa ang mga anak niya.

"Ilang linggo ka naman rito, mamalagi?" tanong sa pamangkin ni Tunying.

"Isang buwan po, Tiyo."

"Ang haba naman ng araw ng pag stay mo rito. Dati naman ay isa o dalawang linggo lang ah!"

"Tiyo, dito ko gustong manatili kase tahimik. Bukod sa malayo ako kina Dad, makakapagsulat ako ng maayos at walang iistorbo sa akin." paliwanag ni Yanna.

"Parang gusto mo naman akong itaboy Tiyo. Sige ka, kapag ako nakadalaw sa puntod ng kapatid mo, ipapanalangin ko na sana ay multuhin ka niya."

"Kalokohan mo, Yanna! Hindi ako natatakot sa multo." reaksyong wika muli ni Tunying sa sinabi ng pamangkin.

"Joke lang! Ang seryoso mo naman kase, Tiyo." natatawang turan ng dalaga na ikinangiti na rin ng Tiyuhin niya.

Naupo si Tunying sa kahoy na upuan na nasa labas ng bahay at naupo rin sa tabi nito si Yanna.

"Kahit na tahimik ang lugar na ito Yanna, ay delikado pa rin para sa iyo. Nasa gitna ng bukid itong bahay ko, kaya hindi rin ako komportable na naririto ka. Nangangamba ako na baka mamaya ay matipuhan ka ng mga kalalakihan dito. Ang Mommy mo nga ay hindi dito pinalaki ng mga magulang namin dahil delikado. May mga rebelde kaseng minsan ay napapadaan dito. Ang pamilya ko nga rin ay sa bayan ko pinatira noon para sa kapanatagan din ng aking loob. Sina Dencio at Rita lang ang naglakas loob na manatili dito sa bukid dahil wala silang pagpipilian. Hindi ko naman maiwan ang lupang ito dahil pamana ng lolo at lola mo sa akin." paliwanag ni Tunying kay Yanna.

"Ang tagal mo ng nakatira rito Tiyo, wala naman nangyayaring masama sa inyo nila Manang Rita at Mang Dencio."

"Dahil lalaki ako at si Dencio. Ang Manang Rita mo ay may edad naman na. Hindi kami ginagawan ng masama ng mga rebelde kase binibigay namin ang kailangan nila at pinapakain namin sila kapag napapadaan dito sa bukid." pagpapaintindi pa ni Tunying sa pamangkin.

"Ganito na lang tiyo, magkukulong na lang muna ako sa silid habang narito ako. Hindi ako maglalabas ng bahay o lalayo dito tulad ng dati. Bago naman makalapit ang mga rebeldeng sinasabi mo ay makakapagtago na ako sa basement. Sa pagtahol lang ng mga aso mo Tiyo, malalaman ng may papalapit na ibang tao." saad na suhestiyon ng dalaga.

"Paano mo nalamang mayroong basement ang bahay?" takang tanong ng tiyo ni Yanna.

"Kay Manang Rita, isinama niya ako sa basement kaya napasok ko na yun bago ako bumalik ng Manila nung huling punta ko dito." pagtatapat ng dalaga.

Hindi na nakatanggi ang tiyuhin ni Yanna na manatili siya sa bahay nito.

"Ipaaalam ko sa ama mo na nariro ka para hindi siya mag alala." sambit ni Tunying.

"Ikaw ang bahala, Tiyo. Kapag inutos niya sa iyo na pauwiin mo na ako, ang sabihin mo sa kanya ay hindi ako uuwi kung naroon pa rin sa bahay namin ang malditang anak ng bago niyang asawa." saad ng dalaga na ikinailing uli ng ulo ni Tunying.

"Hindi mo ba talaga matanggap na may asawa ng iba ang Daddy mo? Mukha namang mabait si Amanda ah," seryosong tanong na naman ng tiyuhin ni Yanna.

"Mukha lang! hindi naman si Tita Amanda ang pinakaproblema ko ngayon. Alam kong hindi niya ako kayang saktan, subukan lang niya! Si Chelsea ang kinaiinisan ko dahil kung makaasta sa bahay ay parang siya ang tunay na anak ni Dad. Masyado siyang epal! Ang Daddy ko naman ay nauuto ng babaeng yun," naiinis na turan ng dalaga.

"Hahayaan mo na lang na mapalapit ang step-sister mo sa Daddy mo?"

"Bahala si Dad, basta hindi ako papayag na magreyna-reynahan ang mag inang 'yon sa bahay kung saan ako ipinanganak at lumaki na kasama ang Mommy ko. Marami kaming magagandang memories ni Daddy sa bahay na iyon na kasama pa namin si Mommy. Sa akin dapat mapunta ang bahay at hindi kay Tita Amanda."

"Bakit hindi mo sabihin sa ama mo na itira sa ibang bahay ang asawa niya?"

"Sinabi ko na sa kanya 'yon, pero ang sabi ni Dad ay gusto niya raw na makasama pa rin ako sa bahay."

"Oh ayun naman pala eh! ibig sabihin importante ka pa rin hanggang ngayon sa Daddy mo."

"Hindi iyon ang tunay na rason kung bakit ayaw ng lumipat ni Dad sa ibang bahay. Narinig kong nag usap silang dalawa ni Tita Amanda noon. Nag suggest si Dad na bumili ng bagong bahay para doon sana sila tumira. Hindi sumang ayon si Tita Amanda sa plano ni Dad. Malaki naman daw ang bahay at iilan lang ang nakatira. Kung lilipat daw sila ni Dad ay mapapabayaan ang bahay. Palagay ko, gustong kunin sa akin ni Tita Amanda ang mga bagay na para sa akin."

"Baka naman mali ang hinala mo, Yanna? Mayaman din ang pamilya ng step-mother mo di ba?"

"Tiyo, kinakampihan mo ba sila?!" napipikong tanong ni Yanna.

"Hindi, baka lang kase tulad ka lang din ng ibang daddy's girl, na nagseselos sa kanilang madrasta. Alam mo ang ibig kong sabihin, Yanna." saad ni Tunying na ikinangisi naman ng dalaga.

"Aminado naman po ako na nagseselos ako o may tampo ako kay Daddy. Pero dun sa sinabi mong hinala ko, ay naku Tiyo Tunying! hindi ka pala updated. Hindi mo ba alam na sa panahon ngayon ay mas marami pang gold digger na nakakaangat sa buhay. Kahit na ipinanganak na mayaman ay naghahanap pa rin ng magiging cash cow nila. Mga mayayamang takot na maghirap sa buhay, mga gahaman sa kayamanan. Iyon ang tingin ko sa mag inang Amanda at Chelsea," wika ni Yanna na ikinapalatak ng tiyo niya.