KABANATA 4

Namamanhid ang buo niyang katawan. Pinipigilan lang ni Seraphim ang muling pag-iyak dahil alam niya na hindi ito makakabuti sa kaniyang dinadala.

Hindi niya inaakala na ang isang beses na nagpadala siya sa init ng katawan dahil lamang sa mabait at maalaga ang lalaki ay magbubunga agad.

Alam niya na hindi nito sinasadya na mabuntis siya pero mas hindi niya alam na pagkatapos pala nito makuha ang kaniyang pagkababae ay babalik ito sa una nitong minahal kaya ngayon ay nagdurugo ang kaniyang pusong muling sumubok sa pag-ibig.

Kasalukuyan niyang inilalabas ang malaking maleta at kinukuha ang mga lumang damit na dala niya galing sa kanila. Iniwan ni Seraphim ang mga bagay na bigay sa kaniya ni Philip. Wala siyang dadalhin na makapagpapaalala dito kundi ang kaniyang anghel lamang.

Kahit takot siyang iwan ang nga kapatid at putulin din ang koneksiyon sa mga ito ay wala siyang magagawa. Sapat na siguro ang naipadala niyang pera para gawin ni Althea ang mga dapat gawin. Sana lamang ay nakabukod na ang dalawa sa mga magulang. Kaya na ng mga ito tustusan ang pag-aaral dahil ibinibigay niya ang lahat ng allowance na ibinibigay sa kaniya ni Philip sa mga ito.

Nasa limampung milyon na rin iyon.

Ito pala ang kapalit ng pagiging mabait at responsable nitong asawa. Ito pala ang kapalit kung bakit hindi siya nito pinagbubuhatan ng masama.

Ang sakit-sakit! Dahil alam niya kung sino ang pipiliin nito sa araw-araw. Masakit lumaban sa unang pag-ibig dahil alam ni Seraphim sa kaniyang sarili na hindi pa nga nagsisimula ay talo na siya kaya siya na mismo ang susuko at ibibigay ang kalayaan na gusto nito.

Sa gitna ng kaniyang pag-eempake ay ang pagtunog ng doorbell sa kanilang pinto. Nagtataka man ay nilapitan niya ito at binuksan.

Gayon na lamang ang gulat niya ng mabungaran ang pinatanda at pinaghalong bersiyon ng kaniyang asawa. Walang iba kundi si Contessa at Frederick Callari.

Kita ang gulat sa mukha ni Seraphim at wala pa nga siyang sinasabi ay pumasok na ang mga ito sa loob.

“Ano po ang kailanga nila?” Tanong niya sa mga ito na tinaasan lang ng kilay ni Contessa.

“You won't offer us a seat or a drink?” Mataray ang bukas ng mukha nito samantala si Frederick ay dumiretso lang ng upo sa sofa.

Hindi niya alam kung bakit napabisita ang dalawa sa kaniya. Wala siyang kaide-ideya dahil ito pa lamang ang unang pagkikita nila ng mga magulang ng kaniyang asawa.

Natataranta siya, hindi niya na alam ang gagawin kung iiwan niya ba ang mga ito o haharapin sa kabila ng nararamdaman.

“A-ano po ang gusto niyo? Upo p-po kayo,” utal-utal na siya at hinawak pa niya ang ginang para alalayang umupo pero winisik lang nito ang kamay niya at bumunot ng alcohol pad sa dala nitong bag at pinunasan ang kamay.

Sa gawi pa lang nito ay alam niya na ang pakay ng mga magulang ni Philip. Mas lalong gumapang ang lamig sa kaniyang likod at tumayo ang kaniyang mga balahibo sa nerbyos.

“Wala nga talagang class ang piniling pakasalan ni Philip. Sure ka na ba, honey, na legal ang mga papel na iyon?” Tanong nito sa asawa na hindi na siya tinapunan ng tingin.

“Oo, I had my lawyer check it twice and it's legal,” sagot ni Frederick kay Contessa.

“Oh my,” parang naghihina pa itong napaupo sa tabi ng asawa at inilapag ang bag sa tabi bago bumunot ng makakapal na lilibuhin.

“Ten, twenty, thirty, hmmm is this enough? Should I add more?” Mataray nitong ani habang iniisa-isa ang bungkos ng mga libong pera.

“Make it a hundred, honey, siguradong hindi na ‘yan babalik pa,” dugtong naman ni Frederick.

Naguguluhan na siya kaya nagtanong siya sa mga ito.

“Mawalang galang na ho pero para saan po ang mga pera na iyan?” Tanong niya na pinagpapawisan ang mga palad sa kaba.

Hindi siya pinansin ng mga ito at itinapon lang ang sampung bungkos ng pera sa kaniya.

“That’s one hundred million pesos, layuan mo ang anak namin. Wala kang dulot sa kaniya. Pucho-pucho nga lang ang kumpanya ng mga magulang mo pero hindi ko alam sa anak ko kung bakit ka pa niya pinatulan. Hindi nga kita kayang ipagmalaki sa mga amiga ko.” Mahabang salaysay ng babae.

“And what? Bachelor of Secondary Education major in Science lang ang tinapusan mo? Hah! Not even a classy course for rich people like us.” Tumayo na ang mga ito at nilagpasan siya.

“Next time we came here, make sure na wala ng dumi ang bahay na ‘to.”

Hindi niya na nagawa pang sumagot at lumaban. Gano’n na lang ba siya kababa para sa lalaki? Ayaw na nga ng tadhana na magsama sila, pati ba naman ang pamilya nito?

Hindi na naman niya mapigilan ang umiyak. Lagi na lang siyang umiiyak kahit hindi niya gustuhin! Napakahina niya na hindi niya makuhang ipaglaban ang sarili.

Kahit masakit sa pride niya, pinulot niya ang mga pera. Alam niyang sa pag-alis niya ay wala na siyang mapupuntahan at malalapitang iba kaya malaking tulong na rin ang perang iyon para sa kaniya at kaniyang anak.

Pagkatapos niya magligpit ng mga dadalhin ay nilingon niya muna sa huling pagkakataon ang nagsilbing tahanan niya sa loob ng tatlong buwan.

Sa pagtalikod niya ay tuluyang pagbitaw na rin sa mga alaalang pinagsaluhan nila ng asawa.

Pinapangako niya sa sarili na hinding-hindi siya lalapit at hihingi ng tulong dito.