Episode 23: Her Sufferings

Millow's POV

Hindi ako makapaniwala nang pihitin ko ang pinto ng kwarto ni Lake. Sarado ito. Pagod na'ko sa maghapong pagtatrabaho sa loob ng bahay. Dahil nga iilan na lang ang katulong dito, obligado akong tumulong pero ang problema, wala akong sweldo dahil asawa na'ko ng lalake.

"L-Lake?" tawag ko kasabay ng pagkatok.

Nakailang ulit pa'ko ng katok bago tuluyang bumukas ang pinto. Napaawang ang labi ko sa babaeng nagbukas nito, si Sophia. Nang umalis kami ni Selene sa bukid, hindi umuwi ng dalawang araw si Lake. Hindi ko rin alam kung sa'n ito natulog.

"Ano'ng ginagawa mo rito?" pagalit kong sita sa babae pero tinaasan niya lang ako ng kilay. Kandahaba ang leeg ko sa pagsilip sa loob ng kwarto at sakto namang nakita ko ang hinahanap ko. "Lake!" Hindi ako makapaniwala dahil kalalabas lang nito sa banyo na nakatapis lang ng tuwalya mula bewang pababa. "Paalisin mo ang babaeng ito, sa'n ka ba nanggaling? Dalawang araw kang hindi umuwi." Tinabig ko si Sophia nang pumasok ako sa loob.