Chapter 28

NANG MAKARATING SILA sa may tulay kung saan nakaparada ang mga yate, nauuna ng sumakay roon sina Benjamin at Sofie, kasunod ng pagsakay ni Georgia, pinauna ni Evie si Steve na natatakot naman.

"Go on Steve! Jump!" utos pa ni Evie sa aso ngunit nagaalangan talaga ito kaya nauna na siyang sumakay bago ito tinawag. "Come on, baby!" ngunit ayaw pa rin ni Steve na tumalon sa yate. Napapaiyak naman na ang aso dahil mukhang natatakot tumalon.

"Go on, Steve! Go to mommy!" saad pa ni Silver ngunit imbes sundin siya ng aso ay lumapit ito sa kanya at dumamba. Kaya biglang binuhat na ito ni Silver na parang bata kahit pa napakalaki nitong aso saka siya sumakay ng yate.

Hindi man aminin ni Evie, natuwa naman siya sa ginawa ni Silver sa aso.

"Thanks." saad niya rito saka inalalayang makababa si Steve.

"Mabigat pa si Steve sayo ah?" biro pa ni Silver rito habang pinapagpagan ng damit niyang black fitted long sleeves din ngunit nakatupi ito hanggang siko. Pinagsalubungan naman siya ni Evie ng kilay.

Dumiretso silang upper deck at si Silver naman ay nasa control bridge.

Tila natutuwa naman ang aso na palakad-lakad at tingin sa mga dulo dahil nako-conscious ito ng umandar ang yate.

"Steve, sit lang." saad ni Evie at automatic na naupo nga si Steve sa tabi niya.

Napapamangha pa rin si Benjamin dahil rito.

"Pina-train mo ba siya o ikaw lang?"

"Ako lang. Matalino talaga si Steve." paghimas pa ni Evie sa katabing aso.

"Buti pa yung aso noh? Kapag sinabing stay, nagsi-stay talaga." sabat ni Georgia na tila pasaring kay Evie.

"Oo nga eh. Kapag sinabing lumayas na, lalayas na. Hindi gaya ng hipon." ganting pasaring din ni Evie na nakapagpasimangot kay Georgia.

In your face!

Habang umaandar ang yate, naging tahimik lamang sila at ninanamnam ang napakalamig na simoy ng hangin. Hindi nagtagal ang byahe dahil masyadong madilim ang karagatan kaya huminto na rin sila.

Saka naman bumaba muli si Evie sa lower deck para kuhanin ang mga pagkain nilang nailuto na, sinundan naman siya ni Benjamin para tulungan.

Nakasalubong pa nila si Silver na palabas ng control room, kaya tumulong ito sa pagbubuhat na.

Pinagtulungan nilang tatlo ang paghahanda ng pagkain nila. Sina Silver at Benjamin ang nagtulong sa paglatag ng sapin nila at paglapag ng mga basket ng pagkain nila. Si Evie naman naglabas ng mga food containers at sinalansan. Nilapitan kaagad ni Steve yun at inamoy, sinuway naman niya kaagad ito.

"Steve, don't!" at tumigil naman ang aso sabay lapit sa kanya at nagpapalambing. Hinimas naman niya ang ulo nito at hinalikan.

Tinawag naman ni Sofie si Benjamin kaya kahit parang napipilitan, lumapit siya sa mga ito. Nagpapakuha lang pala ng picture ang mga ito. Mukhang feel na feel ng dalawang hitad mag-picture sa yate ni Silver. Halatang first timer.

Nakaupo naman si Evie sa sapin na nilatag nila, nasa likuran niya si Steve na nakahiga. Lumapit naman si Silver sa tabi ni Evie na naka-bend ang legs para makababa. Naramdaman na siya ni Evie ngunit hindi siya tinabunan ng pansin.

"Hindi mo ba talaga ako kikibuin?" tila may paglalambing sa boses ni Silver.

Hindi pa rin siya pinapansin ni Evie na nakatingin kina Benjamin.

"Sungit ng mommy mo, Steve oh?"

"I said, stop calling me that."

"Mommy."

"Baka marinig ng fiancé mo."

"Sinabi ko ng hindi ko siya --"

"Liar."

"Hindi ako liar. Siya ang liar." pagturo pa ni Silver kay Georgia.

"Kaya pala.."

"Look, kaya hindi ako nakatanggi kanina dahil nandoon sina Benjamin. Gusto mo bang maamin ko yung totoo sa harap nila?" seryoso na ang tinig nito.

Napalingon naman na si Evie sa kanya ngunit matalim ang mga tingin nito.

"Pwede ko namang sabihin sa harapan nila ngayon na hindi ko talaga fiancé si Georgia dahil ikaw ang gusto ko pa ring mapangasawa." saad pa ni Silver sabay akmang tatayo.

Kaagad naman hinawakan ni Evie ang pulsuhan nito para pigilan. "Sira ulo ka ba? Bakit kailangan mo pang sabihin ang tungkol sa atin?" irita naman ng tanong pa ni Evie. "Kung hindi totoo ang sinasabi ng Georgia mo, eh di sana sinabi mo lang na hindi."

Natulala naman si Silver rito. "Ayoko rin sana siyang ipahiya kaya pinapaalis ko na lang."

"Kaya mas pinili mong ipagkalat niya na fiancé mo siya? Baka totoo nga? Ikaw lang ang ayaw pang umamin?"

"Hindi nga sabi eh. Nahiya lang din ako kina Benjamin kung makikita nilang tinataboy ko siya. Kung ikaw lang nandoon kanina, talagang tinaboy ko na siya."

Binitawan naman ito ni Evie na patulak kaya napadausdos itong upo na. Lumingon ulit si Evie sa kawalan.

"Baka naman talagang pumayag ka ng magpakasal sa kanya, kaso nagkita pa tayo kaya bigla kang umaatras." pasaring pa ni Evie na bakas pa rin sa tono ang inis.

"Hindi noh! --"

"Silver! Tara dito!" sigaw naman ni Sofie at senyas na lumapit siya kaya napatingin sila roon.

Hindi naman ito pinansin ni Silver at balik ng tingin kay Evie.

"Never akong pumayag pakasalan yan! Hindi ako tanga para magpakasal sa kanya!" pagpupumilit pa ni Silver.

"Pero tanga ka noong nangiwan ka." pasaring pa ni Evie rito.

"Oo na."

"Silver!" pagsigaw muli ni Sofie kaya napatingin sila doon.

Nakita ni Evie na masama ang tingin sa kanya ni Georgia at iniirapan siya nito.

Dukutin ko talaga mata neto!

"Pinatatawag ka na ng fiancé mo!" in-emphasise pa ni Evie ang salitang fiancé.

"Ano bang pinaguusapan ng dalawang yun? Baka naman about sa bagong trabaho na ni Evie?!" hinala pa ni Sofie dahil kanina pa niya tinatawag si Silver ngunit tinitingnan lang siya nito. Sinadya niyang paringgan si Benjamin.

Naalala naman ni Benjamin na pinabulaanan sa kanya ni Silver ang tungkol sa pagporma nito kay Evie at sa fiancé daw nitong si Georgia. Tila nabubuo na talaga sa isip niya ring baka tama ang sinasabi ni Sofie.

"What do you mean bago niyang trabaho?" na-curious namang tanong pa ni Georgia.

"Di ba secretary siya ni Benjamin? Baka gusto ni Silver agawin siya at gawing sekretarya niya." paliwanag naman ni Sofie.

Tila napapaisip rin si Georgia. Dahil ang alam niya, nagkabalikan na sina Silver at Evie. Ngunit, noong sinabi niyang siya ang fiancé ni Silver, ni hindi man lang kumontra ang mga ito kaya nasakyan niya kaagad na hindi pa alam ng mga ito ang totoo, kaya tinuloy-tuloy niya ang pagpapanggap. Hindi rin kasi kinontra ni Silver ang sinabi niya, at gayun din ni Evie na tila sinakyan din siya at nagpanggap na hindi siya kilala.

Dahil sa nangyari, sinamantala na ni Georgia ang pagiging malapit kay Silver gayun na rin sa mga kaibigan nito. Marahil tama nga ang hinala niyang lihim pa ang relasyon ng dalawa kaya nagkaroon siya ng pagkakataon ipaalam sa lahat na siya talaga ang pakakasalan na ni Silver. She seems caught Silver off guard and make Evie jealous and annoyed. Hitting two birds in one stone though.

Sumenyas lang si Silver pabalik kay Sofie at hindi pa rin ito nilapitan. Tila napapahiya naman si Sofie at Georgia. Tumatalim naman din ang tingin ni Benjamin sa kanila dahil sa nabubuong hinala.

"Hmm?"

ALAS dyis na ng gabi kaya pinuwesto na nila Silver at Benjamin ang mga fountain sa paligid ng upper deck, nakapwesto na rin sa likod ng lower deck ang mga mini fireworks. Pinagdugtong-dugtong ni Silver ang mitsa nito para isahang pagsindi na lang ang gagawin nila, gayun din ang nasa fountain.

"Nagamit mo talaga pagiging engineer mo dito ah?" puri pa ni Benjamin dahil natutuwa siya sa ginawa ni Silver.

"Para isang sindihan na lang. Yung mga lusis na lang ang hahawakan natin." pati kasi ang mga kwitis ay tinali na ni Silver sa railings at dugtong-dugtong ang mitsa. Eto ang pinagkakaabalahan niya kanina, tila plano niyang pailawin ang yate niya sa gitna ng dagat.

PALABAS ng lavatory si Evie na tila nagkagulatan sila ni Georgia dahil papasok sana ito.

"Gosh!" napasapo pa nito ang dibdib ng makita si Evie. Wala namang reaksyon ito sa kanya.

Napairap na lamang si Evie at lalagpasan si Georgia sa paglalakad ng hawakan nito ang braso niya at pinaharap sa kanya. Sinamaan lamang din niya ito ng tingin.

"Ikaw pala ah? Ang Evie na kinalolokohan ng fiancé ko?"

"Fiancé? Ugh?" gusto namang matawa ni Evie sa sinabi nito. "May Fiancé bang tinatanggi at hindi inimbitahan ng fiancé niya sa party?" sarcastic naman nitong tugon.

Nagngitngit naman si Georgia sa sinabi ni Evie.

"As I said over the phone, may fiancé bang hindi man lang naka-save ang number sa phone?"

"Malandi ka! Sinong matinong babae ang nasa condo ng lalaki, ha?!" singhal pa ni Georgia.

"Mas malandi ka! Sinong matinong babae ang ino-offer ang virginity niya makuha lang ang lalaki?!" ganting singhal din ni Evie rito.

"Argh!"

Sa galit ni Georgia, sasampalin niya si Evie ngunit nasalo nito ang kamay niyang ipangsasampal. Pero hindi ito nagpasindak kaya sasampalin niya ulit ito gamit ng isa pa niyang kamay ngunit muling nasalo ni Evie. Magka-crossed arms sila ngayon na hawak ni Evie ang mga pulsuhan niya. Pumapalag naman si Georgia ngunit mahigpit siyang hawal ni Evie.

"Let go of me!"

"Bakit ba napakadesperada mo? Alam mo kung bakit ayaw na ayaw sayo ni Silver? Bukod sa hipon ka, ang kitid pa ng utak mo! Hindi ka makaintindi na ayaw sayo!" mariing singhal ni Evie saka ito binitiwan ng patulak.

Naatras naman si Georgia at tumama ang likuran sa pader.

"Ang kapal mo!"

"Mas makapal ka! Ang kapal ng makeup mo!"

Pareho silang hinihingal sa galit ngunit si Evie ay mas pinapakalma ang sarili. Nilagpasan na niya si Georgia ngunit bigla siyang hinawakan nito sa ulo kaya halos mapaliyad siya ngunit hindi siya pumalag.

"Hindi pa tayo tapos, Evie!" singhal nito.

"Bitawan mo ko hangga't kalmado pa ko." kalmado ngang saad nito ngunit may diin.

"Ayoko!" pagmamatigas nito at nakahawak pa rin ang dalawang kamay sa nakatali ang kalahati na buhok ni Evie.

"Kung gayun --where can your hair take you?" kalmadong tanong pa ni Evie na pinagtaka ni Georgia sa kanya.

Biglang umikot si Evie at inabot rin ang ulo ni Georgia sabay mahigpit na kumapit sa mga buhok nitong nakalugay.

"Ahh!"

Sigawan na nilang dalawa dahil nagkasabunutan na sila sa makitid na hallway papuntang lavatory.

Nasasaktan si Evie sa pagkakasabunot ni Georgia ngunit alam niyang mas nasasaktan niya ito dahil kinakalog-kalog niya pa ang ulo nito.

Bigla siyang tinulak ni Georgia kaya napaumpog ang mukha siya sa pader.

"Argh!"

Sinipa naman ni Evie ang pader kaya napwersa niyang napaatras ang sarili at naipit naman sa likuran niya si Georgia na tumama sa pader.

"Aargh!"

Panay kalabog na sa parteng iyon ng yate dahil sa rambulan ng dalawang eba. Tila napansin ni Benjamin ang ingay ngunit hindi siya sigurado sa kalabog kaya pinagsawalang bahala na lamang niya iyon at pinagpatuloy ang pagtulong kay Silver sa paglagay ng mga fountain.

Napabitaw naman si Georgia sa buhok ni Evie kaya binitawan na rin niya ito. Kaagad na nasampal ni Evie si Georgia ngunit nakaganti rin ng sampal ito. Tinulak pa ni Georgia si Evie kaya napatumba ito at nakapahiga sa sahig, dadambahin pa sana siya ni Georgia ngunit nasipa niya ito sa tiyan kaya si Georgia naman ang napadausdos paatras ngunit dahil makitid ang hallway, napakapit si Georgia sa magkabilang pader kaya hindi siya tuluyang natumba.

Mabilis tumayo si Evie at saktong makatayo rin si Georgia ng maayos, sinalubong niya ito ng suntok.

"Ahh!"

Napabaling si Georgia sa gawing kanan niya at naihampas ang sarili sa pader.

Hinihingal naman si Evie at nanggagalaiti rito.

"Akala mo -- aatrasan -- kita?!" hinihingal na saad pa ni Evie rito na napakapit na rin sa pader dahil sa pagod.

Hawak-hawak naman ni Georgia ang kaliwang pisngi dahil sinapak siya ni Evie roon. Hindi niya malaman kung maiiyak na siya sa sakit o sa galit.

"How dare you?!" malakas na sigaw nito at sinugod muli si Evie.

Nahawakan nito si Evie sa balikat at tinulak ng malakas. Napaatras na lamang din si Evie habang nakahawak kay Georgia hanggang sa nakalabas na sila ng makitid na pasilyo ng patungong lavatory.

Nasa gilid na sila ng upper deck at tumama si Evie railings kaya halos mapaliyad siya doon. Mabuti na lamangnat mahigpit rin ang kapit niya kay Georgia kundi ay babalikatad na siya at mahuhulog sa yate.

"Walangyah ka! Mangaagaw!" nanggagalaiting tili ni Georgia habang pilit na tinutulak si Evie para malaglag ito.

"Wala akong inagaw! Ambisyosa!" sigaw rin ni Evie na mas kumakapit kay Georgia dahil nakalabas na sa railings ang kalahati ng katawan niya at kapag nabitawan niya ito ay wala na siyang balanse, tuluyan siyang mahuhulog sa tubig.

Pareho silang nakakapit na sa leeg ng isa't isa, at dahil na kay Evie ang lahat ng bagsak ng pwersa, ginamit pa niya ang natitirang lakas upang maibaling at tulak si Georgia sa gawing kaliwa niya. Pareho ngayon silang nakapatagilid na liyad sa railings ng yate ngunit walang may gustong bumitaw.

"Sa akin -- lang si -- Silver!" pilit pang sigaw ni Georgia.

"Sayo na! Pero -- alam mong ako -- ang mahal niya!"

"Aarrggh!!!" matinding sigaw ni Georgia na parang hindi nauubusan ng lakas kakasigaw.

NASA huling pagkakabit na nila ng mga natira pang kwitis sina Silver at Benjamin.

"Ako magsisindi ng mga kwitis na toh ah?" tila excited pang saad ni Benjamin.

"Oo ba, ako na dun sa mga fountain sa harap at top deck."

"Aaarrggghh!!!!"

Tila natigilan sila at nagkatinginan. Alam nilang narinig iyon ng isa't isa ngunit hindi sila sigurado.

Sabay silang napatingin sa likuran nila at nakita na sa upper deck ang dalawang babaeng tila nagpapakatihulog sa railings. Nanlaki ang mga mata nila at biglang nataranta.

"EVIE!"

Sabay rin nilang sigaw at naguunahang tumakbo paakyat ng upper deck.

Halos madapa-dapa silang dalawa sa pagtakbo paakyat ng upper deck para makalapit kina Evie at Georgia na nagsasabong.

"Evie!"

"Georgia!"

Naabutan nilang nagsasakalan ang mga ito at nakapatagilid na patihulog sa railings ng yate.

Sabay lumapit sina Silver at Benjamin kay Evie at hinatak ang mga ito upang hindi tuluyang mahulog. Pinaghiwalay nila ang mga kamay sa leeg ng bawat isa.

"What's going on?!" nawiwindang at nagaalalang paggitna ni Silver sa dalawang babae. Nakapaawat ang mga kamay siya sa mga ito upang hindi na maglapit pa.

"That -- bitch!!!" nanggagalit pa ring sigaw ni Georgia sabay turo kay Evie habang hinihingal rin ito. Nakaharang naman ang braso ni Silver sa kanya kaya hindi siya makakalapit kay Evie.

"You bitch!" sigaw rin ni Evie ngunit hindi ito sumusugod. Prenteng nakatayo na ito at inaayos ang sarili kahit pa hinihingal rin, mas kalmado na siya kaysa kay Georgia.

Parehong mukhang pugad ng lawin na ang mga buhok nila, halata na kaagad ang bangas sa mukha ni Georgia, gayun din ang mga kalmot nila ni Evie sa leeg.

Nakaalalay naman si Benjamin kay Evie na alam niyang kalmado naman na.

"Pwede ba?! Tumigil na kayo!" singhal naman ni Silver.

"Yang babaeng yan! -- Ang kapal ng mukhang -- agawin --"

"Enough Georgia!"

"But Silv --"

"I said enough!" malakas pang pagsigaw ni Silver kay Georgia na nakapagpatigil naman sa kanya. Hingal na hingal ito ngunit nanguusok pa rin ang galit na baka anumang oras ay sugurin ulit si Evie.

"Okay ka lang ba, Evz? What happened?" pagaalala pa ni Benjamin sa sekretarya.

"I'm fine Benj." napatingin naman siya ng masama kay Georgia na nanlilisik pa rin ang mga mata sa kanya. "Pakikadenahan yang feeling fiancé mo!" saad pa ni Evie na sinasamaan rin ng tingin si Silver. Labis namang nagaalala si Silver sa kanya.

Mariing hinawi ni Evie ang kamay ni Silver na nasa harap niya at naglakad palayo sa mga ito. Sinundanan na lamang siya ng tingin ni Silver. Sumunod na lamang din si Benjamin kay Evie.

Napahilamos naman ng mukha niya si Silver sabay mabigat na bumuntong hininga sa sobrang pagkayamot. Naiwan sila ni Georgia sa parte na yun ng yate.

"Sinabi ko na -- talagang magkakagulo kapag --"

"Tumahimik ka!" sigaw naman ni Silver.

"Bakit ba kasi kailangan mo pang makipagbalikan sa kanya?! Nandito naman ako eh!" pagsusumamo bigla ni Georgia na hindi na napigilang bumuhos ang mga luha. "Mahal na mahal kita Silver, una palang! Ikaw lang ang lalaking minahal ko ng --"

"Tumigil ka na Georgia, pwede ba? Hindi kita mahal! Ni hindi kita gusto! Magkababata tayo kaya may respeto ako sayo, pati na rin sa pamilya mo pero please? Hanggang doon na lang yun dahil kahit ikaw pa ang nauna, hindi kita minahal!"

Yumakap namang bigla si Georgia kay Silver at nasusumamo.

"I'm sorry na. Magso-sorry ako kay Evie kung gusto mo. Huwag mo lang akong iwan."

"Hindi naman ako naging sayo. Ikaw lang nagpupumilit sa sarili mo!" malakas na inilayo ni Silver si Georgia at ngayo'y hawak niya ito sa magkabilang balikat.

"Wala kang karapatang saktan si Evie. At kapag kinanti mo kahit dulo ng buhok niya, ako talaga ang makakalaban mo. Tandaan mo yan!" sabay bitiw nito kay Georgia at umalis.

Naiwan naman si Georgia doon na nagiiyak. Napaupo na ito at doon humagulgol ng iyak mag-isa.

"What hap --" nagmamadaling paglapit pa sana ni Sofie kay Evie ngunit natigilan siya dahil nagulat siya sa itsura nitong para talagang nakipagsabong.

Kasunod naman ni Evie si Benjamin kaya ito na lamang ang hinarang ni Sofie sa paghawak sa braso nito.

"What happened? I've heard screaming? Nasa room kasi ako at nagre-retouch." curious pa ring tanong ni Sofie.

"Evie and Georgia has a fight." sagot naman din ni Benjamin.

"Oh?" nagulat si Sofie dahil hindi niya iyon inaasahan ngunit gusto ring matawa dahil hindi siya makapaniwala. "Ahm, why? Nagselos si Georgia kay Evie? Eh kasi namang Evie na yan eh? Lagi rin nakaduldol kay Silver kaya siguro napuno na si Georgia at --"

"Enough, Sofie. We don't really know what happened."

"What else could be the reason di ba? Fiancé siya ni Silver, natural magalit at magselos siya sa lahat ng babaeng mapapalapit sa fiancé niya! Kahit naman ako ganun ang gagawin ko noh!" pagiinarte pa nito.

Napabuntong hininga naman si Benjamin at napatanaw na lang kay Evie na umakyat sa top deck ng yate, nakasunod naman ang aso nitong si Steve sa kanya.

"Huwag na lang tayo makialam, okay? Hindi intensyon ni Evie yun. Nakita mo rin naman kanina, si Silver ang ayaw umalis sa tabi niya." saad pa ni Benjamin.

Sasagot pa sana si Sofie ngunit nakita niya si Silver na nagmamadali ring naglalakad. Madilim ang mukha nito at mukhang galit. Nilampasan sila nito at umakyat din sa top deck. Akmang susunod pa sana si Benjamin ngunit mahigpit siyang hinawakan ulit ni Sofie sa braso.

"Sabi mo, huwag na tayong makialam?"

Wala na lamang din nagawa si Benjamin kahit pa sobra ang pagaalala niya kay Evie, kailangan nito ng karamay. Naalala niya noong pinagseselosan din si Evie ng mga exes niya ngunit hindi naman humantong sa sakitan.

PAGKAAKYAT ni Silver sa top deck, nakita niyang nakaupo sa sahig roon bandang gitna si Evie, nakapayukong yakap ito sa asong nakaupo sa tabi na hindi talaga gumagalaw. Hindi niya malaman kung maaawa siya rito ngunit labis siyang nagaalala.

Unti-unti siyang lumapit at naupo sa tabi nito. Hinawi niya ang napakagulong buhok nito ngunit ni hindi natinag si Evie.

Inaamoy at dinidilaan ng aso ang ulo at braso niya, inilalapit rin nito ang ulo kay Evie na parang niyayakap rin. Hinimas naman ni Silver ang ulo ni Steve.

"I'm -- I'm really sorry."

Hindi naman siya kinibo ni Evie. Patuloy niyang hinimas ang likuran nito at naramdaman niyang mahina itong humihikbi kaya hinayaan na lamang niya.

"Tahan na mommy. -- alam ko hindi ko mapapawi yung sakit, pero hayaan mong samahan kita." saad lang ni Silver at natahimik na lamang din siya at minamasdan si Evie na hindi gumagalaw sa pagkakasubsob ng yakap sa aso nito.

Ilang sandali pang nakaganoong pwesto si Evie na pilit tinatago ang mukha sa pagkakayakap sa aso niya. Alam niyang nasa tabi niya si Silver ngunit mas lalo siyang nakakaramdam ng sakit.

Bakit kailangan kong maranasan pa ang ito? Umiiwas na nga lang ako sa komplikasyon eh. Umiiwas na lang ako kay Silver dahil alam ko, sakit lang ang kalakip nun.

Nasasaktan siya dahil bakit kailangan niya pang pagdaanan ang ganitong sitwasyon. Na hindi pa ba sapat ang noo'y paghihirap niyang mabalewala at iwanan? Bakit ngayon ay hindi pa man tuluyang tinatanggap niya, may hadlang kaagad?

Hindi naman na niya napigilang humagulgol na ng iyak na kanina niya pa pinipigilan. Muli, nangiyak siya sa harap ni Silver na pinaka ayaw niya sanang mangyari dahil pakiramdam niya, nakikita nito kung gaano siya kahina. Na kahit anong pilit niyang hindi magpaapekto sa harapan nito, hindi na iyon maitatanggi ng sistema niya.

Tila humahalam na rin ang mga luha sa mata ni Silver. Nasasaktan siya dahil nasasaktan na naman si Evie ng dahil na naman sa kanya. Pinagsisisihan niyang hindi pa niya pinabulaanan kanina ang mga sinabi ni Georgia sa harap nila Benjamin at Sofie. Hindi siguro hahantong sa ganito na masasaktan si Evie ng pisikalan.

"Hindi ko na rin siguro -- mapapatawad ang sarili ko sa -- sa sakit na dinulot ko sayo." halos mabasag ang tinig ni Silver.  "Nauunawaan ko kung bakit hindi mo ko mapatawad -- kung bakit ayaw mo na akong mahalin."

"Sobrang nasasaktan din ako dahil -- totoong sobra kitang mahal, ngunit -- sobra na rin pala kitang nasasaktan." hindi naman na napigilan ni Silver pumatak ang mga luha niya kasabay ng mga malalakas na hagulgol at hikbi ni Evie.

Nais niya itong yakapin, nais niyang ipadama rito ang pagmamahal na hindi niya naipadama at pakita noon. Nais niyang ipagsigawan na sa mundo kung gaano niya ito kamahal. Pero alam niyang hindi pa nahihilom ang mga sugat ng kahapon, ngunit nadaragdagan na naman ngayon.