Chapter 149 - I Don't Know How To Play

"Hindi ako interesado, humanap nalang kayo ng iba." tugon ni Luke habang may blangkong ekspresyon lang sa mukha. Ni hindi man lang siya nag-abalang tingnan si Andrie habang sinasabi iyon.

Hinawi ni Andrie ang estudyanteng nakaupo sa unahan nina Luke. Hindi naman ito nakaangal nang makitang si Andrie iyon kaya agad silang nagsialisan. Lumuhod pa si Andrie sa mismong upuan kaya nagtaka na lamang ang mga nakakakita rito.

Alam nilang isang pilyo si Andrie at ang katotohanang anak ito ng pang-apat na pinakamayamang pamilya sa kanilang syudad ay nagbibigay sa kanila ng katanungan kung bakit lumuluhod ito sa isang katulad lang ni Luke. Kung sila ang nasa posisyon ni Andrie ay bakit hindi nalang nila pilitin si Luke? Bukod pa rito ay kasama pa nila si Isaac na alam nilang miyembro ng Undying Society.

"Please, Luke, kalaban namin sina Oliver at hindi lang basta grado ang nakasalalay rito, kung hindi ay malaking halaga ng pera. Nakipagpustahan ako sa kanya ng isang daang libong piso."

Namilog ang mata ng mga estudyanteng nakikinig lang sa kanila. Isang daang libong piso ang pustahan nila sa volleyball?

Hindi man nagbago ang ekspresyon ng mukha ni Luke ay naintriga siya sa sinabi ni Andrie na maglalaro si Oliver. Martial artist si Oliver kaya paniguradong magaling din ito maglaro ng volleyball lalo na kung nagsanay pa ito sa larong iyon.

Nakaraang linggo pa lumipat sa paaralang iyon si Oliver, syempe sa parehong dahilan ni Darwin. Plano rin nitong manligaw kay Kina. Samantalang si Darwin naman ay hindi na pumasok sumunod na araw simula nang may nangyari sa restaurant kung saan nakipag-asaran ito kay Alona. Nabalitaan niya ang nangyari mula kay Cleo sa kung anong nangyari kay Darwin. Hindi niya na rin ikinagulat nang malamang natalo ni Lance si Cleo sa mano-manong laban kahit pa si Cleo ang nangungunang fighter ng Blazing Pheonix Gang.

Naghihintay lang ng tugon si Andrie sa nananahimik na si Luke. Makalipas ng ilang saglit ay muli na naman itong humirit. "Please, ayokong magmukhang talunan sa young master ng pamilya Martinez." Saglit itong huminto at nag-isip ng maipangkukumbinsi kay Luke. "Tig fifty-fifty tayo sa mapapanalunan, pero kapag natalo tayo ay ako lang ang magbabayad, okay ba sa'yo 'yon?"

Muli, hindi nag-abalang tumugon si Luke. Kahit isang milyon pa ang ipangako sa kanya nito ay hindi siya nito mapapapayag. Ang gusto niya lang ngayon ay tantanan na siya nito dahil ramdam niyang pinagtitinginan na sila ng mga estudyanteng dapat sana ay nanonood ng basketball. Maging ang ilang manlalaro ng basketball ay hindi na rin nakakapag-focus sa kanilang paglalaro.

Sa buong dalawang linggo ay naging peste na ang grupo nina Andrie sa kanya. Hindi niya maintindihan, daig pa nila ang mga ipis na nag evolve na sa modernong panahon at hindi na natatablan pa ng insecticide. Kahit anong gawin niya ay hindi siya nilulubayan ng mga ito. Gustong-gusto nilang gawin siya bilang pinuno ng kanilang munting grupo.

"Sa'yo na ang buong isang daang libong piso! Basta tulungan mo lang kaming manalo. Ano, deal?"

Napaawang na ang bibig ng mga nakakarinig sa kanila. Seryoso ba si Andrie sa kanyang inaalok? Siya ang makikipagpustahan pero mapupunta lahat ng mapapanalunan kay Luke? Sino itong maswerteng lalaking ito?

Pinagmasdan nila si Luke. Marahil kaya ito ganito pakiusapan ni Andrie ay dahil sa mahusay itong maglaro ng volleyball at nakakasiguro si Andrie sa pagkapanalo nila kapag isinali nila ito. Pero mukha lang ordinaryo si Luke na hindi interesado sa paglalaro lalo na ng volleyball. Bukod pa roon ay kung totoong mahusay nga ito sa paglalaro niyon ay hindi ba dapat kilala nila ito? O kabilang man lang ito sa varsity players?

"Hindi ako marunong maglaro ng volleyball. Iba nalang ang isali n'yo."

Pare-parehas na nalaglag ang balikat nila dahil sa sinabi ni Luke. Nagmakaawa si Andrie sa isang estudyanteng wala naman palang alam sa volleyball? Nasisiraan na ba ng bait si Andrie?

"S-seryoso ka?" gitlang tanong ni Andrie. Higit pa sa lahat ang pagbagsak ng balikat nito.

Inakala ni Andrie na dahil nagmula si Luke sa pinakamakapangyarihang pamilya ay mahusay rin si Luke sa iba't-ibang klase ng sports at basic na lang dito ang paglalaro ng volleyball. Hindi kaya nagisisinungaling lang ito dahil sa ayaw lang nitong maglaro?

Gusto pa sana ni Andrie magpumilit pero nakikita nitong hindi talaga interesado si Luke sa kanyang inaalok. Pare-parehas na nanlulumong umalis ang tatlo. May ilang estudyanteng nagprisinta na sila nalang ang isali ni Andrie pero hindi nag-abala si Andrie na pansinin man lang ang mga ito.

Sinundot ni Alona si Luke sa tagiliran. "Talaga bang ang Young Master ng pamilya Cruise ay hindi marunong maglaro ng volleyball?" bulong na panunudyo nito.

Hindi ito pinansin ni Luke. Sinabi niya lang iyon upang lubayan siya nina Andrie. Napakadali lang matutunan ng volleyball kaya kahit hindi man siya marunong ay madali lang sa kanyang maka-adapt kung ito man ang unang araw na maglalaro siya.

Ang totoo ay noong isang beses na naglaro siya noong highschool pa siya ay siya ang naging mvp sa kanilang pangkat at nagawa lang naman niyang ipanalo ang dalawang set ng laro na siya lang ang nagsi-serve. Wala ni sinumang nakakasalo ng malakas na bulusok ng bola dahil sa kanyang pagserve. Ngayon pa kayang biyente anyos na siya?

"Pero ayaw mo ba talagang pumunta roon? Nandoon sina Kina at Jackielyn, nanonood ng badminton."

Tila umakyat lahat ng dugo ni Luke sa walang kabuhay-buhay niyang mukha. Saglit niyang tiningnan si Alona at kinukumpirma sa pamamagitan ng tingin kung nagsasabi ba ito ng totoo.

"I swear," Iniangat pa ni Alona ang kanan nitong kamay sa nanunumpang paraan. "Kaya nga kita hinahanap upang ayain ka sanang pumunta roon."

Walang pagdadalawang-isip, patalon na tumayo si Luke at nilundagan ang isang hilera ng upuan sa unahan. Hinabol niya sina Andrie.