Chapter 1: Shotgun Marriage

Chapter 1: Shotgun Marriage

Mahinang umungol ang kapatid ni Claire sa sakit habang nasa ospital. Halos mag-iisang buwan na siyang naka-confine pero wala pa ring pinagbabago ang kalagayan niya. Ang sabi ng ilang doktor, kakailanganin daw ng operasyon bago tuluyang gumaling si Bryan. Walang ibang magawa si Claire kundi magdasal habang naghahanap ng iba’t-ibang pagkakakitaan. 

“Ate, hindi ko na yata kaya...” mahinang turan ni Bryan. 

Hinaplos lang ni Claire ang mukha ng kapatid habang pinupunasan ang mga luha nito. Gustuhin niya mang kunin ang sakit nito pero hindi niya magawa. 

“Gagaling ka pa,” sagot ni Claire. “Pangako hahanap ako ng paraan para maoperahan ka na.”

Mahinang tumango si Bryan bago pinikit ang mata para makapagpahinga. Sa oras na makatulog ito, lumabas na si Claire para tawagan si Logan. Balak kasi ng dalagang mangutang muna kahit 10,000. Nakakahiya mang humiram sa sariling nobyo, pero wala nang ibang maisip na paraan si Claire. 

Nakailang ring ang tawag pero walang sumasagot sa kabilang linya. Inisip ng dalagang baka natutulog ito sa condo. Nakasanayan na kasing magpahinga ni Logan tuwing Sabado at Linggo. Sinubukan pa sanang tumawag ni Claire ng limang ulit pero wala talagang sumasagot. 

“Puntahan ko na lang kaya siya,” mahinang sambit niya, “malapit lang naman ang condo niya rito.”

Kabadong umalis si Claire sa ospital, di niya maipaliwanag pero may nararamdaman siyang kakaibang takot. Pagsakay niya ng tricycle, agad siyang nagmadong sa Johnson's condominium ang pupuntahan niya. Ito ang unang pagkakataon na makakatungtong siya sa mamahaling lugar. Bagama't palagi namang niyaya ni Logan si Claire, pero parati itong tumatanggi. Pakiwari kasi ng dalaga, may ibang hihingin sa kaniya ang nobyo. Malas nga lang ni Logan dahil hindi kagaya ng mga babae niya noon si Claire. Lumaki itong may prinsipyo kahit maagang naulila. 

Pagkarating niya sa condo, agad siyang nagtanong sa lobby kung saang floor at unit si Logan. 

“Saang floor at unit si Logan Pendelton?” tanong ni Claire. 

Ngumiti ang babae at napatawa nang konti. Hindi maintindihan ni Claire kung anong nakakatawa sa sinabi niya. 

“Bakit? May nasabi ba akong nakakatawa?”

Umiling lang ang receptionist pagkatapos siyang bigyan ng papel. Kalakip noon ang address na makapagtuturo kung nasaan ang nobyo niya. Di na nag-aksaya ng panahon si Claire at agad na sumakay sa elevator. Buti na lang at may kasabay siya paakyat. Hindi kasi marunong ang dalagang gumamit o pumindot dahil na rin sa bihira silang magawi sa mall ni Bryan. Ika nga ng magkapatid, mahirap pa sila sa daga. 

Pagbukas ng elevator sa palapag niya, lumabas si Claire at nagsimula nang maghanap. Matapos lang ang ilang hakbang, katapat na niya ang pintuan ng condo ni Logan. Huminga muna nang malalim si Claire bago kumatok. Handa siyang magpakumbaba at pumayag sa anumang gustuhin ni Logan sa kaniya mabuo lang ang pampaopera ni Bryan. Kagaya kanina, nakailang katok na rin si Claire pero walang sumasagot. Sinubukan niyang pihitin ang doorknob, at doon niya napagtantong bukas ang pinto. 

Pinatuloy na ng dalaga ang sarili sa loob at tumawag nang paulit-ulit kay Logan. Habang naglalakad siya papasok, umaalingasaw ang amoy ng pabangong pambabae. Kinutuban kaagad si Claire, habang mas lumalapit siya sa kwarto ni Logan, nadatnan niya ang mga damit panloob na nagkalat sa sahig. 

“Are you sure your girlfriend won't find out?” matinis na tanong ng isang babae. 

Sumagot naman kaagad si Logan. “She shouldn't be too surprised kung nagloko ako. Mas makaluma pa siya kay Maria Clara, who would want that kind of girl?“

Mapatakip na lang ng bibig si Claire at hindi na dumiretso pa. Mas masasaktan lang siya kung makikita niya ang pagkakadikit ni Logan sa babae. Sinadya niyang isarado ng malakas ang pinto palabas para marinig nila sa loob, baka sakaling habulin man lang siya ni Logan pero hindi. Mukhang masyadong nagpapakasasa ang nobyo sa pagtataksil sa kaniya. 

Umiiyak na bumaba si Claire sa hagdan. Wala na siya halos maaninag, kaya pati ilang tao, nababangga na ng dalaga. Hindi siya makapaniwalang magagawa ni Logan ang magloko. Sa oras na marating niya ang lobby, isang matigas na pigura ang humarang sa daraanan niya. Umiiyak pa rin siya hanggang ngayon at paniguradong namumula na rin ang mukha. 

Imbes na bulyawan at itaboy, naglabas ang lalaki ng panyo. 

“What happened to you, Miss?” mahinahong tanong nito. 

Bago pa makasagot si Claire, pinahid ng lalaki ang luha sa kaniyang mukha. Saka lang napagtanto ng dalaga kung gaano katipuno at gwapo ang lalaking nasa harapan niya. Matangos na ilong, mala-porselanang kutis at matikas na pangangatawan, daig pa niya ang nakakita ng isang Hollywood model. 

Nadala si Claire sa pag-iingles niya at napasagot din. “My boyfriend cheated on me.”

Tumingin ng payak ang lalaki at mabilis na tumuran ng tanong na nakapagpabagong tuluyan sa buhay ng dalaga. 

“Do you wanna get married?” alok ni Sandro.