Chapter 4: In-law Wars

Chapter 4: In-law Wars

“Pero Ma'am, Hindi ko po intensyong magpakayaman dahil sa pera ninyo. Mahirap lang po kami pero hindi ko tatanggapin ‘yan.”

May dignidad na tinanggihan ni Claire ang bulto ng perang iniharap sa kaniya ni Viola. Isinara niya pa ang brief case at itinabi iyon. 

Kinagalit ito ng biyenan niya, “You’re a proud one, huh? Just admit it, sinadya mong pakasalan ang anak ko dahil kailangan mo ng perang pampa-opera.”

Bahagyang naluha si Claire sa masakit na bintang ni Viola. Hindi niya maitatanggi na tama ito. Nagawa niyang magpakasal kay Sandro maisalba lang ang kapatid mula sa bingit ng kamatayan. 

“Babayaran ko rin po agad ang lahat ng ginastos. Hindi ko po sinasadyang galitin kayo. Kailangan ko lang po talaga ngayon ng pera.” Sinubukan pang magpaliwanag ni Claire pero taas noo lang na nagmatigas ang kaniyang biyenan. 

Malamig na tumugon si Viola, “I’ll never accept a rat like you in my family. Don't put up your hopes about your brother's recovery, you don't have the means.” 

Hindi na umalma si Claire. Wala naman siyang laban kahit makipagsagutan siya kay Viola. Kusa na lang siyang lumabas sa limousine nang kumatok si Carlo. Napansin kasi ng binata ang namumuong tensyon sa dalawa. 

“I’ll drive you to the hospital. I'm sorry for the inconvenience,” paghingi ng paumanhin ni Carlo. 

Tahimik lang na tumango si Claire sa kaniya. Basang-basa pa rin ng luha ang mukha niya at hindi na rin maiwasang humikbi. Kahit umalis na ang limousine, sariwang-sariwa pa rin ang lahat ng sinabi ni Viola. 

Buong biyahe walang nagsalita sa kanila. Hindi na rin sumama si Carlo sa loob ng ospital. Mas pinili niya ring dumistansya dahil laganap ang mga paparazzi sa paligid. 

Pagdating ni Claire sa lobby, agad niyang binayaran ang bill. “Nurse, magkano nga ulit ang gagastusin para sa operasyon ni Bryan Batumbakal?”

Naguluhan ang Nurse sa tanong niya. “Si Bryan Batumbakal po ba? Wala na siya.”

Kinakabahang lumunok si Claire. Namuo na rin ang luha sa paligid ng kaniyang mata. Ginawa niya ang lahat sa abot niyang makakaya, pero huli na. Kinailangan niya pang maikasal sa isang estranghero mabuo lang ang perang pampaopera. Nanlulumo na lang napaupo sa bench area ang dalaga habang humihikbi. 

Pinagtinginan siya ng mga taong dumadaan, kaya kumakamot ulo na lumapit ang nurse na nakausap niya kanina. 

“Ma’am, pasensya na po. Namali po yata kayo ng pagkakaintindi. Ibig ko pong sabihin, kinuha po siya rito at inilipat sa isang private hospital.” 

Napakunot-noong tanong si Claire. “Hindi ko siya nililipat ng ospital. Bakit niyo pinayagang kunin siya rito? At saka, sino ang kumuha sa kaniya?”

“Ang sabi po ng mga driver, asawa niyo raw po. Binanggit nila ang pangalan ni Mr. Sandro Escalera,” sagot ng nurse. 

Mariing napapikit si Claire. Napakabilis talaga kung kumilos ang asawa. Tumango na lang siya sa nurse at nagpaalam bago tinungo ang bagong ospital. Muntikan pa siyang magluksa kung hindi nilinaw ng attendant ang pagkakasabi. 

Pagtungtong ng dalaga sa labas ng gusali, tumunog kaagad ang kaniyang di-keypad na cellphone. Tinatawanan pa siya ng ilang dumaraan pero walang pakialam si Claire at sinagot na lang ang tawag. 

“Clareng! Si Logan pinagbabasag areng mga gamit dine!” natatarantang saad ni Paula. 

“Ha?! Papano niya nabuksan ang bahay? Tumawag na ba kayo ng kapitan?”

Napakagat-labi si Claire sa kaba. Iilan na lang kasi ang gamit nila sa bahay, at kung sisirain pa ito ni Logan paniguradong wala nang matitira. Nagtawag kaagad siya ng taxi, kailangan niyang mapigilan ang dating nobyo. 

Pagdating nito sa inuupahan, sinalubong siya kaagad ni Paula. Pati ang kaibigan hindi na mapakali dahil ayaw pa ring paawat ni Logan. Ilang tanod na ang sumubok pakalmahin siya, pero si Claire talaga ang hinahanap nito. 

“Kanina pa areng nobyo mo, Clareng. Winasak niya rin areng pinto makapasok lang,” sambit ni Paula. Litaw na litaw talaga ang pagka-probinsyana nito kapag nagkukwento.

Kilala ni Claire si Logan, at hindi ito titigil hangga't hindi niya nakukuha ang gusto. Kung talagang siya ang hinahanap ng dating nobyo, kakausapin niya ito sa huling pagkakataon. 

Hindi na rin niya pinayagang sumama si Paula sa kaniya sa loob. “Dito ka na lang, ako na ang bahalang kumausap sa kaniya,” utos ni Claire. Bago siya umalis nag-iwan siya sa kaibigan ng isang calling card. 

Kasama pala itong iniabot ni Sandro kanina. Kahit hindi sigurado si Claire kung tutulungan ba siya ng asawa, sinenyasan niya pa rin ang kaibigan na tawagan ang numerong naro’n. 

“Clareng! Sino ba ito?” humabol pa sana ng tanong si Paula pero dire-diretso nang naglakad si Claire papunta sa loob. 

Sa bungad pa lang ng pinto, nasikalat na kaagad ang mga basag na salamin at sira-sirang gamit. Wala na rin ang pintuang plywood, matatanaw sa gilid kung paano ito winasak ni Logan makapasok lang. 

Dahil sa ginawa niya ngayon, mas lalong tumindi ang galit ni Claire. Mabuti na lang at hindi niya talaga nagawang isuko ang sarili. Buong buhay niyang pagsisisihan kung pinakasalan niya si Logan bago pa malaman ang tunay nitong ugali. 

Nang mahagip siya ng mata nito, lasing na lasing na bumati ang dating nobyo kay Claire. “Ikaw pala yan, kamusta na si Bryan? Bibisita sana ako kanina, kaso naalala kong baka nasa honeymoon ka.”

“Bakit mo ba ‘to ginagawa? Ikaw ang may kasalanan kung bakit tayo humantong sa gano’n,” madiing sagot niya kay Logan. 

Kahit hindi pa nakakapasok ng tuluyan si Claire, unti-unting nag-iba ang tingin sa kaniya ni Logan. Kulang na lang ang tanggalan siya ng saplot nito at pagpantasyahan. 

Umurong siya ng kaunti dahil sa kaba. “Logan, itigil mo na ‘to. Marami ka pang makilala maliban sa akin,” mahinang pakiusap ni Claire. 

Imbes na makinig, mas lalo niya itong kinainis. Naalala niya ang lalaking kasama ni Claire sa lobby. Alam ni Logan kung sino at gaano ka-impluwensya si Sandro. Kung labanan ng patas ang usapan, wala siyang maibubuga, pero kung mala-demonyo siyang mag-iisip, mauungusan niya ito kay Claire. 

“Bakit? Nagalaw ka na ba niya?! Sagutin mo ‘ko! Nagalaw ka na ba ni Sandro Escalera?!” 

“Hindi! Ano bang pinagsasabi mo, Logan?! Ganyan ba talaga kababa ang tingin mo sa akin? Wow ha, sino kaya sa atin ang unang nagloko. Kapag tinanong ba kita kung ginalaw mo ang babae kanina, anong isasagot mo?!” galit na galit niyang sumbat. 

Sa lahat ng sinabi ni Claire, walang tumatak sa utak ni Logan. Isa lang ang nasa isip niya, at ‘yon ang unahan si Sandro na galawin ang dating nobya. Ngumisi siya habang binubunot ang baril sa bulsa. 

Tinutok niya ito kay Claire, at nagbanta-bantang tumuran. “Pumili ka, papatayin kita at si Bryan o isusuko mo ang sarili mo sa akin? Kung hindi kita makukuha sa santong dasalan, akin ka sa santong paspasan!”