CHAPTER 2

Nickandra Nicole's POV

Isang linggo na ang lumipas simula nang makapasa ako sa interview at matanggap ako bilang personal assistant ni Greg, at hanggang ngayon ay hindi pa rin ako makapaniwala na ako ang napili ng management nila.

Sobrang dami talaga kasing nag-apply kaya nang makita ko kung gaano kami kadami ay mabilis akong nawalan ng pag-asa ngunit nagdasal pa rin ako at abot langit ang aking pasasalamat nang tawagan nila ako at sabihing sa libo-libong nag-apply ay ako ang bukod tanging napili nila upang maging P.A ni Greg.

Sa isang linggo kong pagtatrabaho kay Greg ay hindi ako nahirapan, dahil kahit sa 12 months lang na pinagsamahan at relasyon namin noon ay lubos na kaagad naming nakilala ang isa't-isa. Noon pa kasi talaga ay ako na talaga ang nag-aayos at nag-iintindi ng mga gamit niya. Kagaya ngayon, nandito ako sa kanyang penthouse habang siya ay natutulog pa rin dahil mamayang ala-una pa naman ng hapon ang lakad namin.

Pagkapasok ko pa lang kanina ay hindi na ako nagulat na nakakalat ang kanyang mga damit sa may sofa dahil noon pa man ay ganoon na talaga siya sa mga gamit niya.

Isa-isa ko iyong dinampot at inilagay sa hawak kong itim na lamugan at dinala sa kung nasaan ang washing machine at nilabhan iyon doon.

Alam kong hindi niya alam na ako ang naglalaba ng mga damit niya nitong nakaraang linggo dahil ayaw ko talagang ipaalam sa kanya dahil baka magtanong lang siya ng magtanong. Ang alam lang niya ay pinapa-laundry ko. Noon pa man din kasi ay kahit ayaw niya ay ako ang naglalaba ng mga damit namin at nagluluto para sa amin.

Napangiti ako ng mapait nang maalala ko ang magagandang mga alaala naming iyon noong magkasama pa kami.

Mararanasan at mangyayari pa kaya ulit ang mga iyon? I hope so...

Matapos kong mai-dryer at maisampay ang kanyang mga damit ay nagtungo na ako sa kusina upang magluto. Ang lulutuin ko ngayon ay ang paborito niyang Chicken Curry. Mabuti na lang talaga at kumpleto na ang mga gamit dito sa penthouse niya.

Sa sobrang sanay ko nang ipagluto si Greg ng Chicken Curry ay mabilis kaagad akong natapos. Ang ginamit kong manok ay boneless dahil tamad maghimay si Greg pagdating sa mga pagkaing may buto kaya naman ako madalas ang naghihimay para sa kanya noon.

Matapos kong maghain at mailagay sa malaking bowl ang aking niluto ay umakyat na ako sa kwarto ni Greg upang gisingin siya dahil mag-aalas onse na rin ng umaga.

Balak ko sanang gisingin siya kanina upang makapag-breakfast siya ngunit nagbago rin kaagad ang isip ko dahil alam kong mas kailangan niyang magpahinga dahil sa naging project niya kagabi.

Nang nasa tapat na ako ng kanyang silid ay kumatok muna ako ng tatlong beses, at nang muli akong kumatok ng dalawa pa pero wala pa ring response ay napagdesisyunan ko nang pumasok.

Dahan-dahan pa ang ginawa kong pagbukas ng pinto upang hindi makagawa ng anumang ingay at nang tuluyan ko ng mabuksan iyon ay kaagad na sumalubong sa akin ang napakapamilyar na mabangong amoy ng kanyang perfume na ako pa mismo ang pumili nang mga panahong magkasama pa kami.

Madilim ang buong paligid at tanging ang lamp shade lang mula sa gilid ng kanyang kama ang nagbibigay ng liwanag sa buong silid.

Mabilis kong naaninag ang kanyang bulto sa ibabaw ng kanyang kama, at katulad ng dati ay napakarami niya pa ring unan na nakapalibot sa kanya kahit na ang iba ay hindi na niya nahihigaan o nadadantayan.

Parang may sariling buhay ang aking mga paa dahil naramdaman ko na lang na dahan-dahan na pala akong naglalakad palapit sa direksyon ng kanyang kama at nang makarating na ako roon ay hindi na ako nagsayang pa ng oras at mabilis na akong naupo.

Kakaupo ko pa lang ngunit mabilis ko kaagad naramdaman ang paglabo ng aking mga mata at pagbara ng aking lalamunan.

Pinagmamasdan ko lang ang kanyang mukha habang mahimbing siyang natutulog. Paminsan-minsan pang nangungunot ang kanyang noo kaya mas lalo siyang nagmumukhang masungit. Maging sa pagtulog niya talaga ay dala-dala niya ang aura niyang ganito.

Makalipas ang ilang minuto ay napagdesisyunan kong iangat ang aking kanang kamay ng dahan-dahan, at pagkalapat na pagkalapat pa lang ng aking kamay sa kanyang pisngi ay napapikit ako at mas lalo pang nangilid ang aking mga luha.

Pagkamulat na pagkamulat ng aking mga mata ay siya ring pagbuhos ng aking mga luha. Mas lalo pang nagbara ang aking lalamunan at kasabay niyon ang pagkirot ng aking puso na parang paulit-ulit akong sinasaksak mula doon. Halos abot langit ang pagpipigil ko sa aking paghikbi upang hindi makagawa ng anumang ingay dahil baka magising na lang siya bigla.

Ilang sandali pa ay hindi ko na rin napigilan pa ang aking sarili nang unti-unti ko na lang ilapit ang aking mukha papalapit sa kanya upang mahalikan ko siya mula sa kanyang labi at nang maglapat ang mga ito ay dinama at ninamnam ko muna dahil it's been two years since I got to hold him, kiss him, and be with him this close.

I missed you, Greg. I missed you so much, my husband... and it hurts like hell knowing that I can reach you but you still seem to be far away because you can't still remember who I am in your life...

I am Nickandra, Greg... your wife. Please, remember me...

Habang magkalapat ang aming mga labi ay walang tigil pa rin sa pagbuhos ang aking mga luha na animo'y gripo ang aking mga mata habang paulit-ulit kong pinagdadasal na sana maalala mo na ako.

Kung kaya ko lang talagang patigilin ang oras para lang mas mahawakan at makasama ko siya ng mas matagal ay gagawin ko ng walang pagdadalawang isip.

Pinaghiwalay ko muna sandali ang aming mga labi upang humagilap ng hangin at makalipas lang ang ilang segundo ay akmang muli kong ilalapat ang akin sa kanya ang bigla na lang magmulat ang kanyang mga mata at bigla siyang magsalita na nakapagpagulat at nakapagpabato sa akin mula sa aking kinauupuan.

"What the hell are you doing?!"