Chapter 3

Pero kahit alam na niyang gagawin iyon ni Jared ay umasa pa rin siya na uunahin siya ni Jared. Na bago niya puntahan kung sino man iyon ay iuuwi muna siya sa bahay nito. Masakit para kay Hannah ang katotohanan na iyon.

“Ano bang nangyari?” tanong ni Hannah, rinig ang lungkot sa boses niya.

Hindi man lang sumagot si Jared sa tanong niya. Ni hindi na nga siya tiningnan nito.

“Bumaba ka na at sumakay ng taxi. Malinaw ba iyon?” matapang na sabi ni Jared kay Hannah.

Wala nang nagawa si Hannah kung hindi ang bumaba. Alam niya kasi na kapag pinilit niya pa si Jared ay mapapahiya lang siya. Ano pa bang magagawa niya e mukha namang nakapagdesisyon na si Jared?

“Tawagan o i-text mo na lang ako kung nakauwi ka na, ha?” pagkasabi ni Jared noon ay handa na agad siyang umalis. Hawak ni Hannah ang kanyang bag pagkatapos ay bumaba na siya ng kotse.

Hindi naman sa nangingialam siya kay Jared pero sa pinapakita nito sa kanya ay para talagang may kakaiba. Hindi naman na nagawang magtanong pa ulit ni Hannah dahil alam niyang wala siyang makukuhang sagot.

Bago pa man tuluyang umalis si Jared ay sinabihan niya si Hannah. Lumilipad kasi talaga ang isip nito, hindi man lang tingnan ang kanyang dinadaanan.

“Ano ba? Hindi ka man lang ba titingin sa dinadaanan mo? Mag-ingat ka nga!” sigaw ni Jared at tuluyan nang umalis.

Naiwan na lang si Hannah sa daan. Parang nawawalang bata. Iniisip pa rin kung sino ba ‘yong nakausap ni Jared sa cellphone. Naiiyak na siya noon. Habang umiiyak ay bigla namang nag-ring ang cellphone ni Hannah. Agad niya itong sinagot dahil tawag iyon mula sa bestfriend niya, si Liane.

“Hannah, nasaan ka ngayon? Gusto mo bang lumabas? Tara, dinner tayo,” yaya ni Liane sa kanyang bestfriend.

Si Liane ay isang doktor.  Bata pa siya at walang nobyo pero kilalang-kilala bilang isang doktor. Sa katunayan niyan ay marami naman talaga ang may gusto sa kanya, pero mas inuuna niya lang ang ibang tao kaysa sa sarili niya.

“Okay, wala namang problema sa akin,” maikling sagot ni Hannah.

Napahiyaw na lang si Liane dahil pumayag si Hannah sa pagyaya niyang kumain sa labas. Madalas kasi, hindi ang sagot nito sa tuwing nagyayaya siya.

“Aba, anong meron at biglang pumayag ka? Siguro, ang saya-saya mo ngayon, ano? Sige, sabihin mo nga sa akin kung bakit ka masaya. Gusto kong marinig ‘yan,” sabi ni Liane na lalong nagpalungkot kay Hannah.

Naisip ni Hannah na sa sampung taon na magkarelasyon sila ay lagi siyang nagpapaalam kay Jared kung saan siya pupunta at kung sino ang mga kasama niya para kung sakali na mawala siya ay alam agad ni Jared kung saan siya hahanapin.

Pero dahil sa nangyari, alam niya na pagod na si Jared sa kanya kahit na hindi ito magsalita. Pakiramdam niya, isa na siyang pabigat kay Jared kaya ganoon na lang ang trato nito sa kanya.

“Nasa ospital ka ba o nasa bahay?” hindi sinagot ni Hannah ang mga tanong ni Liane pero nagtanong siya pabalik sa kaibigan.

Binigyan na lang ng address ni Liane si Hannah at sinabihan siyang pumunta kung nasaan man siya.

“Anong nangyari? Nag-away ba kayo ni Jared? Halika rito, sabihin mo sa akin ang totoo,” sabi agad ni Liane kahit na wala pang kinikwento si Hannah sa kanya.

Isa si Liane sa bestfriend ni Hannah kaya hindi niya kayang itago rito ang kanyang problema kay Jared. Pinagalitan agad siya nito nang malaman ang nangyari.

“Ang mga lalaking ‘yan talaga, mga walang kwenta! Ang boring nila! Kung itrato ka niya, parang wala lang, ah. Kasama mo naman siya matulog gabi-gabi!!” inis na sabi ni Liane.

Dahil sa sinabi ni Liane ay tuluyan nang nahiya si Hannah. Napagtanto niya na magkasama lang talaga sila sa bahay pero kahit kailan ay hindi sila nagkaroon ng relasyon. ‘Yong totoong relasyon na matatawag.

Lagi naman niya kasing sinusubukan na may mangyari sa kanila pero ayaw talaga ni Jared sa kanya. Ilang beses na niya itong sinubukan na lasingin pero iniiwan lang naman siya nito sa kwarto pagkatapos.

Akala ni Hannah, kaya ganoon si Jared sa kanya ay dahil sobra ang respeto nito sa mga babae at ayaw niyang may mangyari sa kanila habang lasing si Hannah. Pero, iyon pala ay hindi talaga interesado si Jared sa kanya.

Sabi ng iba, kapag mahal ng lalaki ang babae ay sisiping ito sa kanya pero iba si Jared. Wala siyang kahit na anong nararamdaman para kay Hannah.

“Liane, gusto ko na siyang hiwalayan,” derektang sabi ni Hannah.

Sa huli ay nagkaroon na siya ng sagot. Kailangan niya na talagang bitawan si Jared kahit na masakit ‘yon para sa kanya.

“Okay, sige. Susuportahan kita kung iyan ang alam mong makakabuti para sa’yo. Ang dami namang lalaki dyan, hindi lang si Jared. Tumingin ka pa sa iba,” sagot ni Liane sa kanyang kaibigan.

Dahil sa sinabi ng kanyang kaibigan ay lumakas ang loob ni Hannah. Naisip niya, oo nga naman. Lagi siyang panalo noon sa mga contest. Lahat halos ng lalaki ay siya ang gusto. Kung saan-saan siya nanalong pageant. Kung hindi nga lang siya pinigilan ni Jared, baka kilalang model na siya.

Pero kahit ganoon, si Jared pa rin ang gusto niya. Maiiyak na si Hannah noon kaya tumakbo agad siya sa banyo. Ayaw kasi niyang makita ng kaibigan niya ang kanyang pag-iyak. Dahil sa pagmamadali ay may nakasalubong siyang tao, hihingi pa lang siya ng tawad ay may nasabi na agad ito sa kanya.

“Malaswa. Hindi ka ba tumitingin sa dinadaanan mo? Umayos ka nga!”

Nagulat na lang si Hannah nang makita na nasa ibabaw na siya noong batang lalaki na nabangga niya. Dahil sa nangyari ay sinampahan siya ng kaso noong batang lalaki. Pinipilit noong lalaki na may masamang intensyon talaga si Hannah sa kanya. Labing pitong gulang pa lang ito.

“Saan ka niya hinawakan?” tanong ng pulis doon sa batang lalaki.

Ang pangalan noong bata ay Erick. Tumingin siya kay Hannah pagkatapos ay tinuro ang kanyang dibdib hanggang baywang.

“Dito hanggang dito ang hinawakan niya, Sir. Hinawakan niya po lahat eh,” sagot ni Erick na sobrang kinainis ni Hannah.