Chapter Eleven

KINABUKASAN ay maagang nagising si Cherry. Masayang-masaya pa rin ang dalaga habang tinitingnan ang singsing na bigay sa kanya ng nobyo. Kay sarap sa pakiramdam na sa kabila ng mga pinagdaanan niya sa buhay ay may taong nangangako na mamahalin siya habambuhay. Akala niya noon ay hindi na siya makapag-aasawa dahil sa kanyang pagiging single mother. Sadyang kaybuti ng Panginoon. Pagkatapos maligo ay bumaba siya upang mag-almusal kasama ang mga magulang. Sabik siyang ibalita sa mga ito ang marriage proposal ni Marvin. Sigurado siyang katulad niya ay masaya ang mga ito sa panibagong kabanata ng kanyang buhay. Dahil nga hindi madalas makasamang kumain ang mga magulang kung kaya't bawat sandaling nakakasalo niya ang ama't ina ay espesyal para kay Cherry. Madalas din kasi magbyahe ang dalawa. Dalawang beses sa isang taon kung mag-out of the country ang mga ito, kadalasan naman ay nasa Cebu at Davao kung saan nakatira ang kani-kanilang mga kamag-anak. Kaya siguro hindi halata ang pagiging sen