Capitulo Doce

Tinignan niya ang kabuohan ng mansyon. Wala na naman siyang kawala–iniisip niya talaga kung paano makakalayo sa pamilyang Leviste. Kapag namalagi siya sa lungsod ay gagamitan lang siya ng pera para mapasunod siya pero wala namang silbi ang pera nila nang makulong siya.

“Ma’am, pumasok na ‘ho tayo. Naghihintay na po si Sir,” ani ni Lance.

“Alam ba ng Mommy ni Hendrix?” kabadong tanong niya pa.

“Hindi ko po alam, Ma’am. Bumaba na po kayo,” pag-uulit nito.

“Kuya naman!” ungot niya pa.

Ayaw niya talagang sumama. Mas gusto niya tuloy na magtrabaho na lang. Kahit pa akuin niya ang shift ng mga katrabaho niya! Ayaw niya na talagang umuwi kay Hendrix. Gulat nga siya’t discharge na pala ang asawa niya. Isang araw palang ang lumipas nang layasan niya ito noong huli silang mag-usap.

Napakamot sa leeg si Lance, “Ma’am pasensya na napag-utusan lang ni Sir.”

Gusto niyang magpapadyak sa inis. Hindi pa ba malinaw sa utak ni Hendrix na ayaw na niya–she wants to be out of the damn hopeless marriage.