Chapter Five

Buong magdamag akong hindi makatulog, paulit-ulit na nagtalikod at nagpagulong-gulong sa kama. Tuwing naaalala ko 'yung nangyari, parang hindi ko mapigilang hawakan ang labi ko. Hindi ako makapaniwala na si Kuya Miguel ang nakakuha ng unang halik ko, lalo na't may boyfriend na ako, at alam kong hindi niya ako magugustuhan ng ganoon.

Bumalik ang atensyon ko sa teacher namin na nagsasalita sa harap. Sobrang naboboring na ako. Hindi ko na mahintay na matapos ang klase. Sobrang excited na akong makita si Kaiser. "Class dismissed," anunsyo ng teacher namin. Naghiyawan ang buong klase.

Parang tumalon ako mula sa upuan ko, parang tumigil ang tibok ng puso ko sandali. Nakita ko si Kaiser na nakasandal sa pader, nakasukbit ang mga kamay niya sa bulsa niya, at agad na nag-ipon ang ngiti ko. Ang gwapo niya talaga.

Ang tangkad at ang balingkinitang katawan, ang malapad n'yang balikat, perpektong pang-high school student. I could smell his cologne, a mix of fresh laundry and wood, as I walked towards him.

Kumaway ako nang makita ko siya, at gumanti rin siya ng ngiti. Parang nagliwanag ang mukha niya. Lumapit siya sa akin at biglang nag-uunahan ang mga paru-paro sa tiyan ko.

“Love, namiss kita,” bulong niya, at hinila ako para yakapin.

“Namiss din kita, love,” sagot ko, namumula ang pisngi ko.

Hinalikan niya ako sa noo. “Love, ipapakilala pala kita sa uncle ko,” sabi niya, at inilagay ang braso niya sa balikat ko.

“Uncle? ‘Yon ba ‘yong sinasabi mong nagpalaki sa’yo?” tanong ko.

“Lolo ko ‘yong nagpalaki sa akin,” paliwanag niya. “Ang anak niya ang ipapakilala ko sa’yo, kasi super close ko sa kanya, and he’s around your Uncle’s age.”

Naramdaman ko ang kaba sa dibdib ko, pero alam kong seryoso si Kaiser sa akin dahil ipapakilala niya ako sa uncle niya. Parang isang malaking hakbang ‘to sa relasyon namin.

Naglakad kami papunta sa isang cozy coffee shop, ang bango ng kape at pastry ang sumalubong sa amin. Masyadong maingay ang shop, maraming tao at nagkukuwentuhan, nagkakabangga ang mga tasa, masigla ang atmosphere. Parang ang sarap mag-stay sa ganitong lugar, pero nakaramdam ako ng kaunting kaba dahil makikilala ko na ang uncle ni Kaiser.

“Iyon pala si uncle,” sabi ni Kaiser, at tinuro ang isang lalaki na nakatalikod sa amin.

Lumapit kami sa mesa. Tinawag siya ni Kaiser, at lumingon ang lalaki.

““Uncle!” sigaw ni Kaiser.

Napaawang ang bibig ko. Parang na-freeze ako sa kinatatayuan ko. Parang drum solo ang lakas ng tibok ng puso ko. Hinawakan ni Kaiser ang kamay ko at hinila ako palapit sa uncle niya.

“Uncle, mabuti naman at pumayag kang makilala ang girlfriend ko,” sabi ni Kaiser, masigla ang boses niya nang umupo kami.

Pero hindi ngumiti si Miguel at bakas rin ang pagkabigla nang makita ako. Nakatitig lang siya sa akin, parang may gustong sabihin ang mga mata niya, pero hindi ko maintindihan.

“Actually, I know her, I know her very well,” sabi niya. Nagulat si Kaiser sa sinabi niya.

“Really? Wow, what a small world?” Kaiser said, his voice laced with curiosity. Pero halata sa boses niya na nagtataka siya.

“Yeah, what a small world. Parang kagabi lang magkasama kami sa iisang kwarto,” sabi ni Miguel, sabay kibit-balikat. Parang may ibig sabihin ang ngiti niya, pero hindi ko mawari.

Nanlaki ang mga mata ko, at naawang ang bibig ko sa gulat. Muling tumingin ako kay Kaiser, at nakita kong nag-iba ang mukha niya. Lumiit ang mga mata niya, at nagtiim ang mga labi niya. Parang nagsimula nang mag-init ang dugo niya.

Parang sasabog ang dibdib ko sa kaba, at nanlamig ang buong katawan ko. Kailangan kong gumawa ng paraan, kailangang magsalita ako.