CHAPTER 129: They Fight Again

MAS TUMINDI ANG pag-aalala ni Celine nang hindi na naman nakauwi ang asawa niya. Dalawang araw na iyong nakalipas dahil sinusubukan nito ang lahat ng makakaya upang maisalba pa ang kumpanya. Ngunit kahit yata makakita man sila ng isang investors ay hindi iyon magiging madali lalo pa’t wala na sa kanilang nagtitiwala dahil sa paninirang ginawa niya sa mga Salvantez.

Nangatngat ni Celine ang kanyang kuko dahil sa kanyang pag-alala. Inuusig na siya ng konsensya dahil sa ibinigay na problema sa asawa. Hindi itong mangyayaring lahat kung sa simula pa lamang ay hindi na siya nakinig sa panunuhol ni Olga. Ito ang dahilan kung bakit umabot sila sa ganitong punto.

Tahimik naman ang buhay nilang mag-asawa dati. Nagagawa niya ang lahat ng naisin dahil sa perang walang pagdadalawang-isip na ibinibigay nito sa kanya. Ngunit nang magsimula ng makilala niya si Olga ay natuto na siyang gumawa ng bagay na hindi naman dating ginagawa. Nasasangkot na rin siya sa mga away na nagiging problema ng asawa.