CHAPTER 5

Isang araw, habang naglilinis ng gamit ni Wilfred ay nakita ni Grace ang isang picture sa wallet ng kanyang minamahal. Isang magandang babae pero alam ni Grace na mas bata siya rito.

  Ang sakit ng puso ni Grace noon dahil sa nakita. Gusto na niyang kausapin si Wilfred noon pero hindi niya magawa. Takot siyang malaman ang totoo.

  'Baka naman Ate niya lang ito o pinsan. Oo nga, Grace. Baka ganoon lang.'

  Agad na nabitawan ni Grace ang wallet nang marinig niya na bumababa na si Wilfred mula sa kanilang kwarto. Inayos pa niya nang mabuti 'yong wallet para hindi mag-isip si Wilfred na ginalaw niya ito.

  "Ah, Grace. Pasensya ka na ha? Aalis ulit ako. Kapag may kailangan ka ay nandyan naman si Ate Miding. Magsabi ka na lang sa kanya ha?" paalam ni Wilfred.

  "Ha? Aalis ka na naman? Kauuwi mo lang kanina, ah. Saan ka na naman pupunta?" iritang tanong ni Grace.

  "Naku, si Sir Danilo kasi. Pinapatawag ako sa opisina. Biglaan. May meeting daw kami dahil may kailangang ayusin tungkol sa supply ng mga sabon doon sa kumpanya. Kaya, kailangan kong pumunta. Pasensya ka na sa akin, busy talaga ako ngayon," paliwanag ni Wilfred.

  Bago umalis ay humalik muna ito sa noo ni Grace.

  Noong mga oras na iyon ay hindi na naniniwala si Grace. Pakiramdam niya ay palabas na lang ni Wilfred ito pero ang totoo ay may tinatago ito sa kanya.

  Ayaw man niyang pinag-iisipan ng masama si Wilfred dahil naging mabuti naman ito sa kanya ay no choice na siya noong mga oras na iyon. Kailangan niya ng mapayapang isip, lalo pa at buntis siya.

  Lihim niya itong sinundan. Nagbayad siya ng malaki sa isang taxi driver para manmanan ang kilos ni Wilfred.

  Nagbantay sila sa isang kilalang restaurant. Kitang-kita noong taxi driver na may babae itong kausap. 

  "Siya po ba 'yon, Ma'am? E may kasamang babae. Parang nobya po niya iyon o asawa," sabi noong taxi driver habang nakasilip kaya nainis si Grace.

  "Asawa? Kuya, ako ang asawa niya 'no. Buntis nga po ako eh. Tapos, asawa niya 'yong babae? Naku, silipin niyo pong mabuti," sagot ni Grace.

  "Naku, Ma'am! Kumpirmado! Kabit niya nga po iyon. Hinalikan niya po eh," sagot noong taxi driver kaya nagmadali siyang silipin kung totoo nga iyon.

  Nanlaki ang mga mata niya at napatakip na lang sa kanyang bibig nang makita na totoo nga ang sinabi noong taxi driver sa kanya. Kitang-kita niya na naghahalikan ang dalawa at mukhang gustong-gusto pa ni Wilfred iyon.

  'Manloloko! Sabi mo pa sa akin ay si Sir Dan ang kikitain mo tapos babae mo pala? Humanda ka sa akin!'

  "Kuya, sige. Makakaalis ka na, may kailangan lang akong linawin sa dalawang ito. Maraming salamat," sabi ni Grace pagkatapos ay bumaba sa taxi.

  "Ingat po kayo, Ma'am. Mukhang mapapasabak po kayo dyan. Alalahanin niyo po, buntis kayo. Salamat po, Ma'am ha?" sagot naman noong taxi driver pagkatapos ay umalis na.

  Sa totoo lang ay kabadong-kabado si Grace noong pumasok siya sa restaurant. Hindi niya alam kung tama ba ang kanyang gagawin pero nang maisip niyang may anak sila ni Wilfred ay lumakas ang loob niya.

  Nang papalapit na siya nang papalapit doon sa pwesto kung nasaan sina Wilfred at 'yong babae ay naging malinaw na sa kanya ang lahat. Ang babaeng kausap ni Wilfred ngayon ay ang babae sa wallet ng pinakamamahal niya.

  "Talaga ba, Wilfred? Siya ang pinalit mo sa akin? Bakit? Dahil buntis ako at hindi mo ako magamit? E di hamak na mas maganda naman ako sa babaeng iyan, ah! Ang tanda na nga ng itsura niya!" sigaw ni Grace.

  Nagulat 'yong dalawa pati na rin ang ibang tao sa restaurant. 

  "Excuse me, what? Anong sinabi mo? Matanda na ang itsura ko? Saka, pakiulit mo nga 'yong sinabi mo kanina? Buntis ka?" sagot noong babae.

  "Oo! Buntis ako at si Wilfred ang ama! Kaya kung ako sa iyo ay layuan mo na siya!" sagot ni Grace pagkatapos ay agad niyang sinabunutan 'yong babae.

  "Aray! Shit! Shit! Wilfred, can you do something? Ano? Hindi mo man lang ba ipagtanggol ang asawa mo?!" sigaw noong babae kaya napatigil si Grace sa pananabunot sa kanya.

  "H-Ha? Anong sinasabi mo? Asawa ka ni Wilfred? nauutal na tanong ni Grace.

  "Oo! Kaya kung may dapat mang umalis dito ay ikaw 'yon! O, baka naman hindi ka pa maniwala. Kita mo itong mga suot naming singsing? Ito ang tanda na kasal na kami!" sigaw noong babae.

  Nagulat si Grace dahil sa nalaman. Isa pa, nagtataka siya kung bakit ni minsan ay hindi niya nakita ang singsing na iyon na suot ni Wilfred.

  "Hindi, hindi totoo iyan! Ni minsan ay hindi ko iyan nakita na suot niya!" paglaban pa niya.

  "Miss, ano ba? Hindi ka ba nahihiya? Nakatingin na ang napakaraming tao sa atin, o! Ano ba 'yong sinasabi mo na ako ang ama ng dinadala mo? E hindi nga kita kilala," sagot ni Wilfred.

  Parang binuhusan ng malamig na tubig si Grace noon dahil sa kanyang narinig. Ang lalaking nagbigay sa kanya ng lahat ay nagkunwaring hindi siya kilala.

  Ang lalaking pinagkatiwalaan, pinagsilbihan at minahal ay lolokohin lang pala siya. Pero, hindi pa rin siya sumuko noon. Pinilit niya pa rin kung anong alam niyang tama.

  "Wilfred, huwag mo namang gawin sa akin ito. Hindi ganyan ang pagkakakilala ko sa iyo. Mahal na mahal mo ako, 'di ba? May anak tayo, Wilfred. Huwag mo naman sanang ipagkait sa kanya na magkaroon siya ng isang ama," sabi ni Grace.

  "Mahal kita? Miss, nababaliw ka na yata. Aba, kahit kailan ay hindi na ako magmamahal pa ng iba dahil may asawa na ako! Naiintindihan mo ba iyon? Kung ako sa iyo, umalis ka na rito!" 

  Dahil sa sinabi ni Wilfred ay tuluyan na ngang umalis si Grace. Malas pa niya dahil biglang umulan. Buti na lang at may pera pa siya kaya nakabalik pa siya roon sa bahay na tinutuluyan nila ni Wilfred.

  Iyak siya nang iyak habang inaayos niya ang mga gamit niya. Bukod kasi sa niloko na siya ay hindi pa niya alam ngayon kung saang bahay siya titira.

  Simula kasi noong naging sila na ni Wilfred ay tinakwil na siya ng kanyang mga magulang. Oras na bumalik siya roon ay malaki ang tsansa na hindi na siya tanggapin ng mga ito.