CHAPTER 1

Tahimik lang na babae si Grace pero pagdating sa kanyang mga malapit na kaibigan ay sobrang ingay niya. Madalas pa nga, siya ang joker sa kanilang magba-barkada.

“Sige na, inom na tayo, o!” pilit ni Grace sa kanyang mga kaibigan.

“Naku, Grace. Alam mo naman na hindi ako nainom! Hanggang pulutan lang ako!” sagot naman ni Sarah.

“Ay, naku! Ang KJ mo talaga, ano? Sige na nga, Belle! Ikaw na lang ang uminom nito.

Ayaw man ni Belle na tumagay pero wala na siyang magawa dahil alam niyang maiinis na kanya si Grace kung pati siya ay hindi uminom.

“Iyan! Buti pa ‘tong si Belle, kayang-kaya uminom! Sige, inom pa tayo!” yaya ni Grace sa kanila.

Nagkatinginan na lang ang dalawa dahil alam nila na heart broken ang kanilang kaibigan dahil sa cheater nitong ex-boyfriend.

“Nagpapaloko pa kasi siya, tapos pag-iyakan na, kailangan kasama tayo,” bulong ni Sarah.

“Eh hayaan mo na, tayo-tayo rin lang naman ang magdadamayan. Ikaw, ‘di ba kapag may problema ka ay nasasandalan mo rin naman siya? Ganoon lang din tayo ngayon,” sagot naman ni Belle.

Napailing na lang si Sarah noon dahil sa sobrang maintindihin ng kaibigan niya. Sa kanilang tatlo, si Belle ang pinaka may mahabang pasensya. Kaya, idolo niya ito pagdating doon.

Dahil gusto pa uminom ni Grace ay pumunta siya sa counter ng bar at humingi pa ng ladies drink sa bartender.

“Vodka with Watermelon Punch nga!” utos niya roon sa bartender at agad namang ginawa ng lalaki ang drink na iyon para sa kanya.

Nag-iinom pa si Grace noon, wala nang pakialam kung nakailang shot na siya. Umiikot na nga ang kanyang paningin sa sobrang dami ng nainom niya.

Hanggang sa may nakita siyang lalaki, sobrang gwapo pero halata na mas maedad ito kaysa sa kanya. Papalapit ito nang papalapit kay Grace. At noong nakatabi na niya ito ay agad na ngumiti ang lalaki sa kanya.

“Miss, ang lakas na ng amoy noong alak sa iyo. Sigurado ka bang kaya mo pa? Isa pa, mukhang bata ka pa. Pwede ka na ba talagang uminom?” sabi noong lalaki sa kanya.

“Oo naman! P-Pwede na akong uminom! Twenty five na kaya ako!” pagsisinungaling ni Grace dahil ang totoo niyan ay bente pa lang siya.

“Twenty five? Are you sure?” tanong ng lalaki pagkatapos ay tiningnan si Grace mula ulo hanggang paa.

“O-Oo! Kaya pwede na akong uminom!” proud pa na sabi ni Grace.

“Alright, Miss. Kung totoong twenty five years old ka na nga, can I have your ID?” matapang na paghingi noong lalaki sa kanya.

“E, nakalimutan kong dalhin. Pero, promise! Twenty five na talaga ako!” pilit na pagsisinungaling ni Grace roon sa lalaki.

“Really, huh? Sa pagkakaalam ko kasi, you need to present your ID sa bar na ito para papasukin ka ng guard, ‘di ba?”

Dahil sa sinabi ng lalaki ay nainis si Grace sa kanya. Wala nang nagawa si Grace kung hindi ang tumango at ipakita sa lalaki ang tunay niyang ID.

“I see. You’re a liar,” seryosong sabi noong lalaki pagkatapos ay binalik na kay Grace ang ID niya.

“P-Pero, nasa tamang edad na ako! Hindi na ako minor de edad!” pagtatanggol naman ni Grace sa kanyang sarili.

Tumingin lang ang lalaki sa kanya pagkatapos ay naglakad na palayo.

Dahil sa kanyang inis ay lumapit na ulit siya kina Sarah at Belle para isumbong sa kanila ‘yong sinabi ng lalaki.

“Hay, naku! Nakakainis ‘yong lalaking iyon! Sana ay hindi ko na siya makita kahit kailan!” inis na umupo si Grace sa tabi nila pagkatapos ay binalibag sa couch ang kanyang bag.

“Grace, sino ‘yong kausap mo? Kilala mo ba ‘yon? Parang ang gwapo ah,” hirit ni Sarah.

“Gwapo ka dyan?! Nakakainis nga dahil kinuha ba naman ‘yong ID ko para tingnan ‘yong edad ko!” sigaw ni Grace.

“Bakit? Nagsinungaling ka ba tungkol sa edad mo?” tanong naman ni Belle.

Tumango lang si Grace kaya napasapo na lang si Belle sa kanyang noo.

“Ikaw talaga, bakit mo naman kasi ginawa iyon? Hindi mo na lang sinabi ‘yong totoong edad mo e hindi ka na minor, ah,” sagot ni Belle.

“Malay ko bang hihingin niya ‘yong ID ko? Sinabi ko tuloy, twenty five years old na ako!” sagot ni Grace, halatang lasing na siya dahil kahit nakaupo ay pagewang-gewang na.

“Ewan ko sa iyo. Alam mo, uuwi na lang kami ni Sarah. Baka mamaya ay kung ano pang gawin mo rito sa bar. Ayaw kong madamay,” sagot ni Sarah.

Nagulat naman si Belle dahil wala naman sa isip niya na iiwanan niya ang kaibigan. Agad siyang umalma kay Sarah.

"Ha? Iiwanan na lang natin 'to rito? Aba, baka may mang-rape dyan! Hindi mo ba naisip iyon? Saka, tingnan mo nga, lasing na lasing na siya, o," sagot naman ni Belle.

"Ay, naku! Bahala ka kung magpapaiwan ka. Basta ako, uuwi na. Marami pa akong gagawin bukas," sagot ni Sarah pagkatapos ay tumayo na at umalis.

"Ay, naku! Thank you, Belle! Buti ka pa, kapatid ang tingin mo sa akin. Samantalang 'yong babaeng iyon, parang laging mainit ang ulo sa akin! Wala naman akong ginagawang masama!" sabi ni Grace, amoy na amoy ni Belle ang alak kaya halos mapalayo siya kay Grace.

"Ano ka ba? Mahal ka rin noon at nag-aalala rin siya sa iyo. Lagi ka nga niyang pinagbabawalan 'di ba? Ikaw kasi ang bunso sa ating tatlo," sagot ni Belle.

Ang hindi niya alam ay tulog na pala 'yong kausap niya. Napailing na lang siya at natawa dahil humihilik pa si Grace sa couch.

"Ay, naku! Sana pala talaga ay sumabay na tayo sa pag-alis ni Sarah," sabi niya kahit na alam niyang wala nang makakarinig sa kanya.

Nakita siya noong lalaking kausap ni Grace at nag-offer ito ng tulong. Noong una ay ayaw pa ni Belle pero dahil pagod na rin siya at sa tingin naman niya ay mabait 'yong lalaki ay pumayag na siya.

Sinabi na lang ni Belle kung anong address ni Grace at nangako naman sa kanya ang lalaki na ihahatid niya ito nang matiwasay sa bahay nila.