CHAPTER 247

DAHAN-DAHANG pinasok ni Arlyn ang mansion ng kanyang biyenan nang matiyak na natutulog na ang lahat.  Kinabisado niyang talaga ang lahat ng pasikot-sikot dito.  Dumaan siya sa kusina para makapasok sa loob.  Alam kasi niyang hindi nagdo-double lock ang mga katulong kung kaya’t madali lamang mabuksan iyon.  Mula duon ay tahimik niyang inakyat ang silid ng kanyang Mama Amanda.

            Itinutok niya ang kutsilyo sa leeg nito saka dahan-dahan itong ginising.  Sisigaw saka ito pagkakita sa kanya ngunit mabilis niyang natakpan ang bibig nito.

            “Kapag sumigaw ka, hindi ako mangingiming isaksak sa leeg mo ang kutsilyong ito,” nanlalaki ang mga matang banta niya dito.

            Napangisi siya nang makita ang takot sa mga mata nito.