Chapter Eleven

Nagpababa ako sa nadaanan naming karinderya. Nagrereklamo na ang tiyan ko sa gutom, hindi ko na pinababa ang sarili ko sa apartment na tinutuluyan ko dahil wala pa naman akong stocks ng pagkain don para ipagluto ang sarili ko.

Nagbayad ako bago bumaba. Mabuti ay may bukas pang karinderya ng mga ganitong oras.

Um-order ako ng dalawang magkaibang pares na ulam at tatlong kanin.

"Ate, pakidamihan po ng sabaw." Umupo ako sa dulong bahagi at hinawakan ang ulo kong kung pumintig ay akala mo sasabog na. Good thing hindi ako nagsu-suka kapag nakakainom.

Kinuha ko ang phone ko habang naghihintay ng order. Tinext ko si Alfredo tungkol doon sa impormasyong nalaman ko. Hindi iyon masyadong makakatulong pero ayos na rin kahit papano. Ang kailangan ko kasing impormasyon ay detalyado at 'yung makakatulong sa plano namin ni Alfredo, hindi iyong ganon lang. Oo nga't nasa labas sya ng bansa, ang tanong... Ano ang ginagawa nya roon at saan sya naroon.

Alam ko namang hindi rin sasabihin ni Zack iyon kung sakali dahil sa mga kalaban ng kanyang Lolo at isa na kami roon. Hindi nya pwedeng sabihin agad na, "Nasa U.S ang Lolo ko at nakikipag negosasyon tungkol sa illegal na droga at illegal na armas na kanyang ginagawa."

'Di ba? Ang weird naman kung ganon bigla ang sinabi nya.

Tinanggal ko ang leather jacket, cap, salamin at mustache, ibinaba ko ito sa katabi kong upuan. Binuhaghag ko rin ang buhok kong nakatali. Nagulat pa nga 'yung tindera nang makita ako habang inilalapag ang order ko.

"Lintek! Babae ka pala?" Hindi makapaniwalang tanong nya. Nakalimutan ko bang sabihin na beki sya? Ngayon alam nyo na.

"Sayang 'teh! Ba't 'di ka na lang naging lalaki?" tumatawang sabi nya.

"Kasalanan ko bang babae ako pinanganak?" biro ko naman.

"Akala ko may malalandi ako ngayong gabi eh," pumapadyak na sabi nya.

"Nilagyan ko pa 'yan ng gayuma, teka mare palitan ko." Natigil sa ere ang paghigop ko sa sabaw dahil sinabi nya.

Tinignan ko sya nang hindi makapaniwala.

"Charott lang! Sige kain ka na." Tinalikuran na nya ako habang tumatawa sya.

Sira ulo 'yun ah? Natawa na lang ako at napa-iling. Kumain na rin ako dahil sa labis na gutom. Matapos ko ay nagbayad ako sa tindera na nagpakilalang Teodoro ang pangalan. 'Yung baklang nagserve ng pagkain ko kanina lang. Sabi nyang tawagin ko na lang syang Ate Sexy dahil masyado raw pang kargador ang pangalan nya. Natawa nga ako dahil kahit mataba sya ay tawagin ko raw syang ganoon.

Bitbit ang leather jacket at props sa kanang kamay ay naglakad ako papunta sa apartment ko. 'Yung karinderya kasi na iyon ay 'yung nakaraang kinainan ko rin. Hindi ko nga lang napansin si Ate Sexy non.

Kahit paano ay nawala ang tama ng alak sa katawan ko. Wala nang masyadong dumadaan dahil gabi na nga at madilim pa sa parteng ito. Well, hindi naman ganon kadilim dahil may street light naman. Nakakita ako ng barkadang tambay sa gawi kung saan ako dadaan. Kitang kita ko ang usok ng mga sigarilyo nila at ang mga angas na kanilang ipinapakita.

"H-hindi na po mauulit b-boss, heto na po ang p-pera." Narinig ko ang pagmamakaawa ng isang lalaki kasabay ng pag iyak ng isang babae.

Nakapalibot ang mga lalaking mukang adik sa dalawa. May hawak na baseball bat ang iba at nagtatawanan pa. Animo'y tuwang tuwa sa ginagawang pagmamakaawa nung lalaking kulang na lang ay maihi sa pantalon nya.

Isinuot ko ang leather jacket, salamin at mustache, itinali ko ulit ang buhok ko at isinuot ang cap nang bahagya pa akong lumapit sa kanila.

"Please po, gusto ko nang umuwi," sabi ng babae.

Nagtawanan 'yung mga mukang adik na lalaki.

"Abaa! Maganda itong syota mo bata ah?" Lumapit 'yung parang leader ng mga lalaki at inamoy 'yung babae. "Mabango pa!" Nagtawanan ulit silang lahat.

"Boss paalisin nyo na po g-girlfriend ko, eto na po 'yung perang hinihingi nyo oh," sabi pa nung lalaki.

"Tarantado! Sa susunod na lang 'yang pera mo, etong syota mo na lang ngayon ang bayad." Marahas na hinablot ng lalaki ang braso ng babae kaya sumubsob ito sa dibdib nya. Umiiyak na ito at nagmamakaawa.

"Alis na!" Itinulak nila ang kawawang lalaki at sumubsob pa ito sa simento pero hindi ito nagpapigil.

"Gerald!" Tatakbo sana 'yung girlfriend ni Gerald pero hindi hinayaan ng lalaking mukang adik.

"Parang awa mo na boss! 'Wag si Phine," nagmamakaawang ani Gerald.

"Tang ina mo! Ayaw mo pang umalis?" Tinulak ng lalaki si Phine dahilan para saluhin ito ng mga kasamahan nya. Kung hindi nila ginawa iyon ay malamang susubsob din ito sa simento.

Kinuha ng lalaki ang baseball bat ng isa nyang kasama at akmang ihahambalos ito kay Gerald. Hindi na ako nagdalawang isip na makialam pa at pigilan sya sa kanyang gagawin.

"Hoy!" Malakas at malaking boses na sigaw ko.

Tinuro ko sya at lumapit ako nang matigil sa ere ang baseball bat dahil napatingin silang lahat sa akin.

"Hahaha, aba't nagtawag ka pa pala ng back up eh muka namang isang hampas ko lang sa kanya ay tutumba na sya." Sinipa ng tinatawag nyang boss si Gerald.

"Kung magyabang ka akala mo may ibubuga ka ah?" Lumapit ako kay Gerald at tinulungan syang tumayo.

"Bakit? Kakasa ka ba?" Natatawang tanong nya sa nang iinsultong tono.

"Pakawalan mo 'yung babae at magsubukan tayo," hamon ko.

"Matapang mga pare!" Tinawanan lang nila 'yung sinabi ko.

"Sige pakawalan nyo 'yung babae. Kapag nalumpo ka, sa amin na 'yung babae." Ngumisi sya dahilan para makita ko ang itim nyang gilagid.

Tingin nya naman talaga ay magagawa nya sa akin 'yun?

Ibinigay kay Gerald si Phine. Nag flying kiss pa talaga itong tinatawag nilang boss sa kanya at kumindat pa. Napangiwi ako dahil sa ginawa nya. Kadiri naman 'to.

"Dyan lang kayo. Manood kayo kung paano namin lalampasuhin itong feeling gwapo na 'to," natatawang sabi ng feeling boss nila.

"Boss Itlog! Nagfe-feeling super hero amputa." Nagtawanan sila at maski ako ay nakisabay sa tawa nila dahil sa binanggit na pangalan ng kasamahan nyang mukang adik.

"Putah hahahaha! Itlog pangalan mo? Bagay sa 'yo," pang aasar ko.

"Anong nakakatawa roon?" Maangas nyang tanong sa akin.

"‘Yung mismong pangalan mo."

"Tarantado 'to ah?" Itinuro ako ng isa nyang kasama.

"Bunog, Itek, Balot. Lumpuhin nyo na 'yan," utos nya sa mga kasama.

Gusto ko pa sana ulit matawa pero nagsilapit na sila. Hinanda ko na ang sarili ko sa gagawin nilang atake.

'Yung dalawang mag jowa ay nakagilid na. Binabantayan sila nung Itlog na boss nila.

Kung hindi ako nagkaka-mali ay nasa sampo sila. Unang lumapit sa akin ay lima, 'yung tatlo ay may hawak na baseball bat habang 'yung dalawa ay suntok lang ang pang laban.

Sabay sabay silang sumugod. Eksperto akong umilag sa bawat pag hambalos nila ng bat. Malakas kong sinipa sa tiyan ang isang aamba ulit ng bat, napahiga sya sa simento at hindi ko na masyadong pinagkaabalahan ng tingin dahil pasugod na naman ang apat. Nasalo ng kamay ko ang isang bat, balak kong kunin ito mula sa kamay nya pero dalawang kamay ang nakahawak dito at napaka higpit. Wala akong sinayang na oras dahil sinuntok ko ang bibig nya dahilan para lumuwag ang pagkakahawak nya.

Dumura sya ng dugo at sinalo ang limang ngiping natanggal sa bibig nya.

Humarap ako sa tatlo pang lalaki at marahas na pinaghahampas ang kanilang mga binti. Namilipit sila sa sakit at napahiga sa simento. Bumangon ang isang sinipa ko kanina. Nasangga ng hawak kong bat ang kanyang bat, mas mabilis ang naging galaw ko sa kanya dahil hindi man lang sya nakakurap nang ni-flying kick ko sya.

Nakatulog sya sa malamig na sahig ng kalsada, 'yung apat naman ay iniinda pa rin ang sakit na natamo mula sa akin.

Tinignan ko si Itlog na nakakunot ang noo. Sinenyasan nya ang apat pang natira na puntiryahin ako.

"Putang ina! Ano pa'ng hinihintay nyo, pasko? Sugurin nyo na!" Sigaw ni Itlog sa apat na nag aalangang sugurin ako.

"Eh b-boss," nanginginig ang boses na sabi ng isa.

"Ano na? Naghihintay ako." Inip na reklamo ko habang pinaglalaruan ang baseball bat sa kamay ko.

"Sibat na ako boss, b-baka sunog na 'yung kanin na sinaing ko." Saka sya kumaripas ng takbo.

Natahimik ang paligid dahil nakatingin lang kaming lahat sa nawalang bulto ng lalaking tumakbo kanina. Kulang na lang ay makarinig kami ng huni ng ibon. Twit... Twit... Twit...

Unti unting lumingon sa akin ang tatlong natira, napalunok pa sila saka nag aalangang lumapit. Kinapitan nila ng mahigpit ang mga baseball bat nila.

Dahil sa bagal nilang sumugod ay ako na ang nag adjust, wala pang tatlong minuto ay napatumba ko na sila. Tulog ang tatlo ngayon sa malamig na simento. Ngayon naman ay bumaling ako kay Itlog, sa boss nila.

Napalunok sya at bahagyang napaatras. Nilabas nya mula sa likod ang kutsilyo at itinutok sa akin.

"Subukan mong lumapit," banta nya sa nanginginig na tono.

"Kayong dalawa, makaka-uwi na kayo." Tinuro ko ng bat si Gerald at si Phine.

Labis ang tuwa sa kanilang mga labi, tumango sila at nagpasalamat bago kumaripas ng takbo.