Chapter 9: Simula ng Pagdududa

MALALIM NA ANG gabi at sa wakas ay humupa na rin ang ulan. Nakatayo muli si Vivienne sa harap ng bintana habang titig na titig sa screen ng kaniyang cellphone. At mayamaya pa ay sumilay agad ang ngiti sa mga labi niya nang makitang nagkaroon na ng signal. Dali-dali niyang tinawagan ang numero nito. Ilang segundo iyong nag-ring bago ito sumagot.

“Kairos, where are you no—”

Biglang namatay ang tawag. Pero hindi sumuko si Vivienne, muli niya itong tinawagan pero sa pagkakataong iyon ay unattended na ito. Bumakas ang gulat sa mukha niya at nanghihinang umupo sa kama.

Nagbaba siya ng tingin sa palad niya kung saan nakapatong doon ang singsing ni Kairos. Ayaw niyang isipin ang gustong ipahiwatig ni Rogue kanina subalit hindi niya mapigilan. Paano kung… paano kung niloloko nga siya nito? Kung hindi pa pumunta si Rogue sa basement, hindi pa nito makikita ang wedding ring ni Kairos.

Isang marahas na paghinga ang pinakawalan ni Vivienne sa kaniyang lalamunan bago ibinagsak ang sarili sa kama. P