Chapter 25

Ang sakit ng katawan ko paggising. Para akong lalagnatin!

Pero pinilit ko pa ring bumangon dahil bigla akong nagutom. Malapit na palang magtanghali. Nandito pa rin ang crib ni Demi kaya siguradong hindi pa umaalis sina Kuya. Dito na siguro sila natulog.

Nang makalabas ako sa kwarto ay naabutan ko sila sa kusina habang nagkukwentuhan. Pero natutok kina Nanay Flor at Ate Sab ang tingin ko dahil nakabihis ang mga ito nang lumabas sa kwarto nila at may dalang mga bagahe.

“Saan po kayo pupunta?” tanong ko nang makababa.

“Ah, oo pala, hija. Hindi pa namin nasasabi sa ‘yo. Nasa US ka pa kasi nang magpaalam ako kay Aries para umuwi muna sa amin. Nagkasakit kasi ang asawa ko at walang makakasama sa bahay para mag-alaga.”

“Gano’n po ba? Kasama po ba si Ate Sab?”

“Oo, e. Nagpumilit. Ako na lang sana ang maiiwan pero sinabi ni Aries na sumama na raw ako. Hinintay lang namin ang pag-uwi n’yo para kahit papaano ay may nagbabantay pa rin dito