Chapter 6

“Malakas na ang ulan, hindi pa bumabalik si Anastacia,” ani Kaya, ang isa sa kasamahan ni Anastacia sa silid. Tinitingnan niya sa babasaging bintana ang daanan sa mansion kung may naglalakad roon, baka sakaling si Anastacia na ‘yon pero hindi.

“Ihahatid naman siya ng isa sa mga butler kung sakali. Magpahinga ka na at kababalik mo lang,” ani Estella sa kasama. “Ginawa mo ng anak si Anastacia.”

“Nag-aalala talaga ‘ko dahil nasa edad na ‘to na siya. Lalaki rin ang Young Master,” ani Kaya nang makaupo sa gilid ng kama. Siya ang nasa gitnang bahagi ng tatlong kama. Si Anastacia ang malapit sa bintana, at sa pintuan naman si Estella na kaedaran niya.

Nang dumating si Anastacia ay twenty na siya at ito naman ay siyam. Labing-isa ang tanda niya rito. Nasa dalawampu’t pito na siya ngayon at tama si Estella, imbis na kapatid ay tinitingnan niyang parang anak si Anastacia.

“Wala kang magagawa kung magkaroon sila ng relasyon. Isa pa, kahit naman sinasabi nilang bawal ang pagkakaroon ng relasyon sa pagitan ng personal maid servant at sa isang master ay isa lamang ‘yong pangungusap. Dahil kapag nagustuhan tayo ng Master natin, puwede nila tayong tawagin at sipingan kahit ilang ulit nila gusto. Tingnan mo nga at pinapayagan lamang nila tayong mag-asawa kung tatlumpu’t lima na ang edad natin.”

Katulad naman ng madalas ang pananalita ni Estella. Nagtitiklop ‘to ng mga kasuotan nila. Silang tatlo ay may toka sa paglilinis at paglalaba.

“Alam ko naman ‘yon,” tila may pagsukong sagot ni Kaya.

“Ang problema iyong alaga natin ay nagkakagusto sa Young Master, tama ba?”

Palagi naman ‘yon ang napag-uusapan nila.

“Pinapakitaan siya ng pagpapahalaga ng Young Master. Siguro gusto siya nito ngayon, pero hindi pa rin ako mapalagay. Vampire ang Young Master, titigil ang pagtanda niya at makakakita ng iba pang mga babae lalo kapag malaki na ang lugar na ginagalawan niya.”

Tumango-tango naman si Estella sa sinabi ni Kaya dahil sumasangayon siya.

“Kaya, iyon ang dapat mong ipaliwanag kay Anastacia. Ang Young Master ay pumapasok sa mga maliliit na eskuwelahan dahil malaki siyang problema. Dahil doon limitado ang mga nakikita niyang bampira na maaaring magustuhan. Aminado rin naman akong maganda talaga si Anastacia natin. Pero ngayon na napapalapit na ang Young Master sa pagpasok sa Vampire University, malaki na ang lugar na ‘yon. Marami na siyang babaeng makikita at kung umaasa siya ng fairytale sa pagitan nila ng Young Master, tigilan niya na. Sisipingan lang siya at iiwanan din kaya ‘wag niyang masyadong gamitin ang kanyang puso.”

Napabuntong-hininga muli si Kaya.

Marami na talagang babae sa kanila ang naging babae ng kanilang Master, marami rin ang umasa sa mga babaeng ‘yon sa fairytale na buhay pero lahat ay nauwi sa wala. Ang iba ay tumanda katulad ni Marie. Ang iba naman ay ipinagpalit sa ibang alipin mula sa ibang pamilya ng mga Royal Blood ng kanilang among babae dahil sa nagbibigay ‘yon ng hindi kakomportablehan dito. Pero ang mga bampirang babae ay tanggap na nagkakaroon ng relasyon ang mga asawa nitong lalaki sa mga alipin dahil ayon nga sa mga ito ay pag-aari sila ng mga ito. Ang hindi lang mapapayagan ay ang relasyon sa kapwa bampira o sa aliping hindi naman alipin ng mga ito.

Hindi gusto ni Kaya na maranasan ni Anastacia ‘yon kay King.

Maaaring may pagtingin ngayon si King dito pero magbabago ‘yon.

Hindi naman niya gustong pigilan si Anastacia, ang gusto niya lamang ay maging masaya ‘to at magtira para sa sarili para makabangon ‘to sakaling masira ang inaasahan nitong magandang relasyon sa kanilang Young Master.

“Alam din ng mag-asawang ‘yon ang namamagitan sa anak nila at kay Anastacia. Imposibleng hindi nila alam. Alam na alam nilang hahantong sa kama ang anak nila at ang alipin nito. Isipin mo nga, bakit humanap pa sila ng batang babae na babayaran nila sa malaking halaga samantalang marami namang batang kaedad si Master King na alipin sa pamilya na nagsisilbi sa kanila? Iyon ay dahil sa hitsura ni Anastacia. Kung sakaling mabuntis si Anastacia ay inaasahan nilang may maganda kaagad ‘yong hitsura dahil ang hitsura nila ang pinakamahalaga sa kanila.”

Natigilan si Kaya. Hindi niya inaasahan na iyon ang maaaring dahilan.

“Pero tao at bampira—”

“Kaya, marami na sa kanila ang may dugong tao. Napakahirap sa mga bampirang magkaroon ng anak kaya kahit half-half pa ‘yan ay tatanggapin nila. Iyon lamang, kawawa ang batang ‘yon dahil marami siyang panghuhusgang pagdaraanan. Kaya ang ibilin mo kay Anastacia na huwag magpapabuntis sa Young Master, kawawa ang bata, at maging siya dahil hindi siya ipakikilala sa batang ‘yon.”

Siya ang palaging pinapakausap ni Estella kay Anastacia dahil  simula no’ng pinagsabihan nito si Anastacia noong labing-apat ‘to ay natakot na ito kay Estella. Masyado kasing mabagsik at walang preno ang bibig ni Estella. Siya naman ay kalmado at pinapanatiling nakikinig sa mga sagot ni Anastacia.

**

Sa patio nanatili ang mag-asawang Bezarius habang nagsasalo sa blood wine na si Calixto ang nagdudulot. Wala na si Apostola dahil naroon na ang mga tagasilbi sa bahay ng mga ‘to. Sa gabi ang tagasilbi nila ay mga Butlers na o ang kanilang mga manservant.

“Sa tingin ko walang interes si King kay Nymfa. Tama ba ‘ko, Calixto?” tanong ni Rossana sa butler.

“Sa palagay ko ay wala, Mistress.” Mabilis namang sagot ni Calixto.

“Mukhang malaki ang interes niya sa kanyang maid servant. Hindi ko akalain na matatagalan din ng babaeng ‘yon si King,” muling nagsalita si Rosanna. “Kinuha ko siya dahil sa hitsura niya at pilit nang pilit ang anak natin na magkaroon siya ng servant. Inisip ko rin na kung maganda ang makukuha natin ay matutuwa siya at tama naman ako sa parteng ‘yon. At sa parte naman na baka magkaroon sila ng intimate relationship paglaki ay mukhang nagaganap na nga.” Halos umikot ang mata ni Rossana.

Natawa naman nang malakas si Ezekiel sa mga sinabi ng asawa.

“Magtatapos din ang interes niya sa kanyang maid servant lalo kapag nasa Vampire University na si King. Isa pa, nakuha naman natin ang halagang binayad natin kay Anastacia dahil naging mabuting impluwensiya siya kay King. Malaki na rin ang ipinagbago niya kahit minsan nakikipagtalo pa rin siya at nakakapanakit ng iba.”

Alam naman ni Rosanna na tama ang sinabi ng kanyang asawa. Lahat ng posibilidad bago sila kumuha ng maid servant ni King ay naisip na nila at napag-usapan. Sa loob nga ng siyam na taon ay paulit-ulit na lang ang kanilang usapan tungkol doon.

“Nagpapahinga na ba si King?” tanong ni Rossana kay Butler Calixto.

“Mistress, magkasama pa silang dalawa no’ng kumuha ako ng blood wine.”

Umangat ang kilay ni Rosanna.

“Malalim na ang gabi, bakit hindi pa bumabalik sa kuwarto niya si Anastacia?”

“Mistress, tumawag ako sa kanila pero walang sumagot. Marahil nakatulog na naman silang dalawa.” Nakangiting sagot ni Butler Calixto.

“Sa tingin ko dapat ay padalasin natin si Nymfa rito para may ibang nakakausap si King,” suhestiyon ni Rossana sa asawa.

Natawa naman ang asawa sa sinabi niya na lalong uminis kay Rossana.

“Bakit hindi mo pabayaan ang anak mo? Alipin niya ‘yon, lahat ng gusto niya puwede niyang gawin kay Anastacia. Hindi imposibleng mawili si King kay Anastacia lalo sa hitsura nito. Pero asahan mo na katulad ko ay mawawala rin ang interes niya. Sadya lang na nagsisimula pa lang ang anak mo, kapag nakatikim na ‘yan.

**

“Bakit hindi mo sinagot si Butler Calixto?” tanong ni Anastacia kay King.

“Dahil pababalikin ka niya sa silid mo kapag gano’n,” natatawang sagot ni King.

Nakaupo si Anastacia sa kama at nakasandal sa headboard habang nakaunan naman si King sa kanyang hita at kumakain ng chips. Hinahaplos ng dalaga ang buhok nito.

“Kapag nakalabas na ‘ko sa Vampire University, aalis na tayo rito.”

“Totoo ba?” hindi mapigil ni Anastacia na itanong ‘yon.

Nagtama ang mga mata nila ni King. Nasalamin marahil ni King ang alalahanin n iya.

“Paano ka mabubuhay sa lugar ng mga tao? Mapanganib do’n, maraming Vampire Hunter—”

“Hindi naman ako mabubuhay na parang kriminal do’n. Bakit nila ‘ko sasaktan kung wala naman akong sinasaktang iba?” muli ay ngumuya ‘to ng chips. “Marami ring bampira sa lugar na ‘yon, hindi sila gumagawa ng perwisyo kaya nagtatagal sila ng ‘di nalalaman na bampira sila. Gano’n ang buhay na gagawin ko ro’n.”

“Pero iyong buhay mo ro’n, magiging malayo sa buhay mo rito na lahat idinudulot sa ‘yo—”

“Kasama naman kita,” ani King na ngumiti.

Hindi mapigil ni Anastacia na mangiti. Palagi nitong pinagagaan ang kanyang loob.

“Matagal ko ng gustong mabuhay na tayo lang dalawa. Iyong walang magbabawal sa ‘tin. Gusto ko ng pamilya kasama ka dahil ikaw lang naman ang mas nakakaintindi at nakakikilala sa ‘kin.”

Nag-iinit ang mukha ni Anastacia.

“Pero tatanda ako—”

“Luma na ‘yang sinasabi mo,” natawa si King. “Sasamahan kita hanggang huli. Bakit kailangan mo ring problemahin ang malayo pang mangyari? Kung aalalahanin mo palagi ang matagal pa, hindi ka magiging masaya nang husto niyan.”

Bumangon si King at inilagay ang chips sa side table sa gilid ng kama.

Nang balikan niya si Anastacia ay ngumunguya na siya ng mint candy. Inihiga niya ‘to ng marahan sa kama sa pamamagitan ng pagtulak ng marahan sa balikat nito. Hindi naman pinahirapan ni Anastacia si King at sumunod na lamang ito.

Nang mailapat ni Anastacia ang katawan sa kama ay naramdaman niya ang bahagyang bigat ni King.

Hinalikan siya nito ng makapugtong-hininga.

Tumugon si Anastacia dahil iyon ang halik na tila nagpapawala sa kanyang katinuan.

Nang lumalim ang halik ay napaungol si Anastacia.

Pilit nilang pinipigilan ang mga sarili. Hangga’t maaari ay walang dugong mamamagitan sa kanila dahil iniiwasan nga nilang magkaroon na ng pagbabago kay King, iyon ay ang maging uhaw na ‘to sa dugo.  

Marami sa kaedad ni King na matagal ng umiinom ng dugo, para ‘yong alak sa mga ito na nakatutukso. Pero iniwasan ni King ‘yon para sa kanya, dahil ayaw nitong saktan siya. Hinihintay na lang nito ang panahon na talagang hindi na nito kakayanin ang pangangailangan.

Nagkatitigan silang dalawa at unang ngumiti si King.

“Iniisip nilang makahahanap ako ng iba, hindi ba nila alam na ikaw ang pinakamaganda sa paningin ko? Lahat ng babae ay mga pangkaraniwan na lamang tuwing titingnan ko dahil napako na ang mga mata ko sa kagandahan mo.”

Kaagad namula si Anastacia. Napupuno ng kasiyahan at kiliti ang kanyang damdamin sa sinabi nito.

“Ikaw? Gusto mo lang ba ‘ko dahil ako ang master mo?” tanong ni King.

“Hindi!” mabilis na sagot ni Anastacia. “Gusto kita, mahal kita, at nagpapasalamat akong nakilala kita. Sa tuwing nakikita kita hindi ko mapigilang hindi ngumiti. Palagi kitang inaabangang dumating. Ikaw ang laman ng mga pangarap ko, maging ang pangako mo na sa lugar ng mga tao na tayo maninirahan. Lahat ng sinasabi mo, pinasasaya ako no’n, mahal.”

Natigilan si King, kasunod ang pagngiti nito nang husto.

“Narinig ko uli sa ‘yo ang tawagan natin.”

Namumula si Anastacia at nahihiya.

“Natatakot akong makasanayan dahil baka magkamali ako isang beses sa harapan ng iba.” Pinagkatitigan ni Anastacia si King. “Pero kapag nasa lugar na tayo ng mga tao at malaya na ‘kong sabihin lahat sa ‘yo, maya’t maya kitang tatawaging mahal, dahil mahal na mahal kita.” Nahihiya man ay nilakasan lang ni Anastacia ang loob na sabihin ‘yon.

"Ang cute-cute mo talaga," pinupog ng halik ni King si Anastacia sa mukha kaya natawa si Anastacia sa inakto nito.

"I love you so much, Anastacia." 

Nakagat ni Anastacia ang ibabang labi. Pulang-pula na siya. Hindi pa rin niya 'to makasanayan lalo kapag ganoon na titig na titig 'to sa kanya. Bakit ba niya 'to pinaghihinalaan? Kailangan niyang magtiwala rito. Tama 'to, lumaki na silang magkasama at marami na silang ugali at pinagsamahan na masasabi nilang lamang nila sa kung paano sila nakikilala ng iba. Dito, totoong-totoo sila sa isa't isa. 

Darating ang oras na aalis sila at magkakaroon ng pamilya.

Itatatak niya sa isipan 'yon at araw-araw mananalangin sa kaganapan no'n sa pagitan nilang dalawa.