Kabanata 6

Napayuko na lang si Sapphire dahil labis na ang hiya na kanyang nararamdaman. Ang kagustuhan niyang hindi makaagaw ng atensyon ay ginagawa naman ni Fiona. Magsasalita pa sana si Fiona pero dumating naman ang kanilang daddy.

“Fiona, kanina ka pa hinahanap ng mommy mo,” pagdadahilan ng daddy nila pero halata naman na galit ang tingin nito kay Fiona.

“Daddy, kinakausap ko pa ang kapatid ko at kinikilala ko lang ang naging asawa niya, right Sapphire?” tanong ni Fiona pero mas lalo siyang nainis sa kanyang kapatid dahil hindi ito sumagot.

“Hayaan na lang muna natin sila, Fiona sa isang araw naman ay sa atin sila bibisita gaya ng napag-usapan. Mauna ka na sa lamesa natin,” bulong nito kay Fiona habang nakatingin kay Kaiden na nakaupo sa wheelchair nito. Walang nagawa si Fiona sa sinabi ng kanilang daddy pero bago siya umalis ay may ibinibulong pa siya kay Sapphire pero rinig naman ni Hunter dahil magkatabi sila.

“Tandaan mo ito, hindi ka magiging masaya. Babawiin ko ang dapat na sa akin,” galit na bulong ni Fiona saka siya padabog na bumalik sa kanilang pwesto kung saan naghihintay sa kanya ang kanyang mommy.

“Ayos ka lang ba hija?” tanong ng kanyang daddy sa kanya at tumango naman ito ng walang kabuhay-buhay.

“Mabuti naman, pagkatapos ng party ay dito ka na titira kaya naman sana alagaan mo ang sarili mo at maging ang asawa mo,” napangiti naman ang daddy ni Sapphire sabay tingin kay Kaiden.

"Pupunta lang po akong garden," biglang sabi ni Sapphire sabay lakad agad at hindi na niya hinintay ang sagot ng kanyang ama.

“Susundan ko lang po siya. Fred, tara," magalang na sabi ni Kaiden dahil hindi niya inaasahan na mag-wawalkout si Sapphire at isa pa ay may parte sa kanya na nag-aalala sa kanyang asawa.

“Hijo, may pakiusap lang sana ako sa ‘yo. Sana alagaan mo ang anak ko,” nagulat man si Kaiden sa pakiusap ng ama ni Sapphire ay agad naman siyang sumagot at bukal iyon sa kanyang loob at hindi naman niya iyon namalayan na nasabi na pala niya ang mga katagang iyon.

“Makakaasa po kayo Sir,” sagot ni Kaiden.

“Daddy, simula ngayon iyon na ang itatawag mo sa akin dahil iisang pamilya na tayo.”

“Ako na po ang bahala mag-alaga simula ngayon kay Sapphire, daddy.”

“Mayaman pala kayo pero bakit kinakailangan mong gawin ang bagay na iyon? Sa tingin ko ay walang alam ang pamilya mo na pinasok mo ang ganong trabaho,” hindi nagulat si Sapphire sa sinabi ni Kaiden pero mas nagulat siya na sinundan siya nito sa may garden. Gusto muna kasi niyang makahinga dahil habang nandon siya ay pakiramdam niya ay nalulunod siya at bumibigat ang kanyang pakiramdam. Iniisip niya rin ang kanyang ina nasa kritikal na kalagayan.

“Sila lang ang mayaman at hindi ako. Isa pa may dahilan ako bakit ko nagawang pumasok sa club na iyon. Tama ako hindi ba? Ikaw yung naghagis sa akin ng bungkos ng pera ng gabing iyon? Kung madumi ang tingin mo sa akin hindi kita pipigilan na ibunyag iyon," walang ganang sabi ni Sapphire dahil pagod na pagod na siya sa mga oras na iyon.

“May tinatago ka pa lang katapangan pero bakit hindi mo iyan inilabas kanina sa iyong kapatid?” curious na tanong ni Kaiden sa kanya na hindi naman siya agad nakasagot. Sa mga oras na ito ay malaya silang nakakapag-usap na dalawa dahil iniwaman sila ni Fred doon.

“Ayoko lang talaga na patulan siya dahil nakakahiya sa inyong pamilya. Ayokong masira ang gabing ito. Isa pa ay alam ko naman na ang kakampihan nila ay ang kapatid ko. Lagi namang gano’n ang nangyayari,” hindi pa nga tapos magsalita si Sapphire ay nagulat siya dahil biglang inabot ni Kaiden ang kanyang kamay, senyales na hinahanap siya nito.

Dahil sobrang lapit lang naman nila sa isa't isa ay kahit bulag si Kaiden ay noong nasanggi niya ang kamay ni Sapphire ay agad niya itong hinawakan at hinila niya ito sabay yakap na siyang ikinagulat ng todo ni Sapphire. Pakiramdam ni Sapphire ay tumigil ang oras dahil sa bilis ng tibok ng kanyang puso. Hindi niya inaasahan na yayakapin siya ni Kaiden dahil alam naman niya na galit ito sa kanya dahil sa kasal nila kaya naman malaking windang ang naganap sa kanya lalo na sa sumunod na sinabi ni Kaiden sa kanya.

“Simula ngayon ako na ang magiging kakampi mo,” masuyong pagkakasabi ni Kaiden sa kanya.

Maging si Kaiden ay hindi niya maintindihan ang kanyang nararamdaman para kay Sapphire. Si Hunter na din ang kumalas sa kanyang pagkakayakap kay Sapphire pero nakahawak pa ito sa kanyang pisngi. Bakas na bakas pa din kay Sapphire ang labis na pagkagulat at sa bilis na din ng tibok ng kanyang puso sa mga oras na ito lalo na at nakita ni Sapphire na papalapit na ang mukha ni Kaiden sa kanya. Ngunit naudlot ang dapat na halikan nila ng may biglang sumigaw dahil doon ay bumalik sa kanyang wisyo si Kaiden.

"Wow naman, mabuhay ang bagong kasal!" sigaw ni Daniel na pinsan ni Kaiden.

"Daniel, mukhang marami ka na nainom," sabi ni Kaiden.

Pumunta naman si Sapphire sa likod ng wheelchair ni Kaiden dahil namumukhaan niya si Daniel at natatakot siya dito. Naramdaman naman ni Kaiden ang pagkilos ni Sapphire at ang pagkapit nito sa kanyang braso.

"Gusto ko lang naman kausapin ang asawa mo, pwe!" galit pa rin kasi si Daniel kay Sapphire dahil sa pagsampal nito sa kanya kagabi pagkatapos ay malalaman niyang ito ang magiging bagong parte ng pamilya nila. Lumapit si Daniel kay Sapphire at bumulong.

"Diba sabi ko sa 'yo huwag mong hayaang magkrus ang landas natin?" galit na sabi ni Daniel kaya naman mas lalong humigpit ang pagkakahawak ni Sapphire sa balikat ni Kaiden.

"Huwag mo nga takutin si Sapphire!" may halong pagbabanta sa boses ni Kaiden.

"Bakit kuya Kaiden? Ano ba ang gagawin mo sa akin kung takutin ko siya? Diba wala kasi nakapako ka na dyan sa wheelchair mo!" pang-aasar ni Daniel sa kanyang pinsan.

Alam ni Kaiden na nakainom ito ngunit labis na ang pangmamaliit nito sa kanya simula noong maaksidente siya. Nagulat na lang si Kaiden noong narinig niyang may lumagatok na parang may sinampal. Doon na niya nakumpirma ang kanyang hinala noong nagsalita si Sapphire.

"Wala kang modo! Pati ang kuya mo ay binabastos mo! Ang alak ay dapat sa tiyan ang tuloy hindi sa utak mo!"