Kabanata 5

"Ipinagkasundo tayo ng ating magulang kaya naman hindi ko alam kung ano ang sinasabi mo," diretsong sagot ni Sapphire kay Kaiden kahit na nasaktan ito sa tanong nito kanina.

"Paano ako maniniwala sa isang kagaya mo?" masungit na sagot ni Kaiden. Natatandaan niya kasi si Sapphire noong nasa bar ito at sumasayaw.

"Ganyan ba talaga kayo? Ang dali niyo naman husgahan ang kagaya ko," sagot ni Sapphire.

Bahagyang natigilan naman si Kaiden nang marinig niya ang bakas na nasaktan si Sapphire dahil sa kanyang sinabi pero agad ding nawala ang pag-aalala niya para sa dalaga na ngayon ay asawa na niya. Hindi na nakasagot si Kaiden kay Sapphire dahil narinig nila ang hiyawan ng mga bisita.

""Mabuhay ang bagong kasal!" isang pekeng ngiti naman ang namutawi sa labi nina Kaiden at Sapphire nang batiin sila ng mga bisita nila habang papalabas na sila sa labas ng simbahan.

Parehas silang ayaw na mapahiya ang kanilang pamilya kaya naman nagkukunwari sila na masaya. Habang si Fiona ay hindi makapaniwala na ang pinakasalan ng kanyang step-sister ay gwapo at bata pa hindi katulad ng kanyang naririnig at inaasahan. Mas lalo namang tumindi ang inggit ni Fiona sa kanyang kakambal na si Sapphire dahil alam niyang siya dapat ang ipapakasal dito pero tumanggi siya dahil nga sa balitang kanyang naririnig tungkol kay Kaiden. Hindi naman ito makakapayag na malamangan siya ng kanyang kapatid sa labas.

Kahit sabihin ni Fiona na bulag at lumpo si Kaiden ay talaga namang hindi maipagkakaila na maipapagmalaki niya pala ang angking kagwapuhan nito. Nalaman din kasi ni Fiona na isa ito sa mga batang bachelor na naging bilyonaryo sa Pilipinas at mayroong mga kumpanya na patuloy na umaangat sa industriya. Nangyari lamang ang aksidente kaya siya naging lumpo at bulag.

Pagkatapos magpasalamat nina Kaiden at Sapphire sa kanilang pamilya at bisita ay dumiretso na sila sa reception. Sa hotel na rin na iyon ginanap ang reception ng kanilang kasal.

Habang nagkakasiyahan at kumakain ang mga bisita ay hindi maiwasan ni Sapphire na malungkot habang nakayuko din. Iniisip niya na mukhang pati sa buhay may asawa niya ay magiging mahirap din sa kanya kagaya na lang sa paghihirap niya sa buhay niya bago siya ikasal. Inaalala niya din ang kalagayan ng kanyang ina na nasa hospital pa rin.

Habang si Kaiden naman ay pinapakiramdaman niya si Sapphire sa kanyang tabi. Mula noong nabulag siya ay napansin niyang lumakas ang kanyang pakiramdam. Sinabi rin kasi ng assistant niyang si Fred kanina na bagay kay Sapphire ang gown at napakaganda nito. Pero ang paghanga na kanyang nararamdaman ay agad na pinapatay ni Kaiden dahil hindi niya alam kung ano ba ang pakay ni Sapphire sa kanya. Isa pa ay pinapangunahan din siya ng pagiging pagkalalake niya lalo na at labag din sa loob niya na magpakasal lalo na sa babaeng hindi naman niya lubos na kakilala.

"Sinabi sa akin ni Fred na nakatulala ka lang daw dyan. Umayos ka at baka isipin nila ay nagkaroon ako ng isang baliw na asawa," napapitlag naman si Sapphire sa sinabi ni Kaiden.

"A-asawa?" hindi alam ni Sapphire pero kapag sinasabi iyon ni Kaiden ay masarap pakinggan sa tenga.

“Huwag mong bigyan ng malisya ang sinabi ko, kaya ko lang sinabi iyon ay dahil ayaw kong mapahiya ang pamilya namin,” Pakiramdam naman ni Sapphire ay gusto na lang niyang umatras dito pero alam din niyang mahirap iyong gawin. “Mas mabuti pa na sabihin ko na ito sa iyo ng maaga.” huminto muna si Kaiden sa kanyang pagsasalita bago muling nagsalita na siyang mas lalong nagpakasakit sa puso ni Sapphire.

“Tandaan mo ito ng maigi dahil minsan ko lang ito sasabihin sa ‘yo. Kasal nga tayo pero para sa akin sa papel lang tayo kasal at kahit kailan ay hindi kita mamahalin.”

"Kukuha lang ako ng juice," sabi ni Sapphire saka tumayo kahit na mayroon pa namang laman ang baso nila. Gusto niya lang makahinga sa mga pinagsasabi ni Kaiden sa kanya.

“Akala mo magiging masaya ka dahil sa napangasawa mo?” biglang sabi ni Fiona kay Sapphire at napakunot na lang ang noo niya ng magulat siya dahil sa biglaang pagsulpot ng kanyang stepsister.

"Boss Kaiden, mukhang may umaaway sa asawa niyo," agad na sabi ni Fred kay Kaiden na napakunot na agad ang kanyang noo.

"Itulak mo ang wheelchair at pumunta tayo doon," utos ni Kaiden kay Fred na sinunod nito.

“Ano ba ang pinagsasabi mo Fiona? Kung nandito ka lang para muli akong awayin, wala akong panahon,” diretsong sabi ni Sapphire sa kanyang kapatid na si Fiona.

Isa pa ay ayaw na niyang bigyan ng sakit ng ulo ang kanyang ama dahil madaming tao dito saka isa pa ay nakakahiya sa pamilya ni Kaiden, iyon ang iniisip ni Sapphire kaya naman habang maaga pa ay hindi na niya pinapatulan si Fiona sa kung ano man ang ipinuputok ng kanyang butchi.

“Halata naman sa mukha ng napangasawa mo na hindi siya masaya na ikaw ang napangasawa niya. Alam mo naman ang katotohanan na substitute lang kita dahil ako pa rin ang original na dapat na papakasalan niya,” napailing na lang talaga si Sapphire sa kanyang kapatid dahil kung anu-ano nanaman ang kanyang sinasabi pero mas pinili niyang hindi na siya sagutin pero si Fiona ay hindi pa din tumigil sa kakasabi sa kanya ng masama. “Kung ako sa ‘yo habang maaga pa ay iwanan mo na ang asawa mo dahil concern lang naman ako sa ‘yo.”

“Paano mo nalaman na hindi ako masaya? Nasayo ba ang pakiramdam ko? At kung ikaw naman pala ang naunang napili para pakasalan ako bakit hindi mo tinanggap ang alok?” nagitla naman si Fiona sa baritonong boses ni Kaiden na nakarating na pala sa pwesto nila.

Napalingon naman sa kanya si Fiona at sa isip-isip niya ay mas gwapo pa pala ito sa malapitan, walang-wala ang itsura ng kanyang nobyo kay Kaiden. Iyan ang mga lumalarong salita kay Fiona sa mga oras na ito.

"Ah alam ko na! Marahil ay nakarating sa 'yo ang balitang matandang hukluban na ako. Worst bulag na nga ay lumpo pa. In short walang silbi. Tama ba?" pang-uuyam ni Kaiden kay Fiona na nagpapanic na ngayon.

"Hindi iyan totoo, sadyang inagaw ka lang talaga sa akin ni Sapphire, isa siyang ahas!" pagbibintang ni Fiona sa kanyang kapatid at napalakas na ang boses nito na nakaagaw na ng atensyon ng ibang bisita. Dahil sa hiya ni Sapphire ay napayuko na lang siya ng ulo. "Sige Sapphire, sabihin mo sa kanya kung paano mo ginawa ang pang-aagaw na dapat ay sa akin."

Mas lalong kumunot ang noo ni Kaiden dahil sa kanyang narinig.

"Sapphire, sumagot ka anong pang-aagaw ang sinasabi niya?"