Kabanata 1

Kabanata 1

"Ate Sapphire, si nanay hinimatay po! T-tulong po ate!" Rinig na sigaw ng kapatid ni Sapphire mula sa kanilang kusina.

"Bakit anong nangyari? Nay!" tawag ni Sapphire sa kanilang ina ngunit hindi ito sumasagot. Agad niyang dinaluhan ang kanyang ina at muling tinawag. "Nay!"

Kakauwi lang ni Sapphire galing job interview pero sa kasawiang palad ay hindi siya natanggap. Pagkatapos ay ito pa ang madadatnan niya sa kanilang bahay. Sa totoo lang ay hindi pa siya nagtatanghalian kaya naman nakakaramdam na siya ng hilo at sakit ng ulo.

"Nagluluto lang kami ni inay pagkatapos ay bumili lang po ako ng mantika. Pagbalik ko ay nadatnan ko na po siyang walang malay dito. A-ate ano po ang gagawin natin?" natataranta at mangiyak-ngiyak na sabi ni Adelia.

"Halika, isugod na natin si inay sa ospital. Magmadali na tayo." Kalmado man magsalita si Sapphire ay sa loob niya ay natataranta na siya pero hindi niya ito pwede ipakita kay Adelia. Siyam na taong gulang palamang ito at alam niyang kapag nagpanic siya ay magpapanic na rin ang kanyang kapatid.

Walang inaksayang oras si Sapphire, pinunasan muna niya ang kanyang luha bago pinilit na makaya na buhatin ang kanyang ina. Si Adelia naman ay mabilisang kinuha ang maliit na alkansyang itinago sa aparador. Iniisip ng bata na makakatulong ito sa kanila. Habang buhat-buhat ni Sapphire ang kanyang ina ay matindi ang kaba na kanyang nararamdaman. Mataimtim din itong nagdasal na sana ay walang mangyaring masama sa kanilang ina.

"Huwag kang lalayo sa tabi ni ate ha?" matinding paalala ni Sapphire sa kapatid bago sila bumaba ng tricyle para maipasok na sa loob ng ospital ang kanilang ina. Agad namang tumango ang bata sabay nag-aalalang tumingin sa kanilang ina na ngayon ay inaasikaso na ng nurse.

"Tatapatin na kita Sapphire, kailangan na maoperahan sa puso ng inyong inay. Malubha na ang kalagayan nito at nangangailangan ng heart transplant," halos matumba si Sapphire mula sa pagkakatayo nang marinig ang sinabi ng doktor.

"Diyos ko po, ang inay," babagsak na sana ang luha ni Sapphire ngunit naramdaman niya ang paghigpit ng hawak ng kanyang kapatid sa kanya. Agad niyang pinigilan ito. "Sa tingin niyo po dok, m-magkano po ang magagastos doon?"

"Humigit kumulang tatlong milyon. At ipinapayo ko na sa Maynila mo ipaopera ang iyong ina. Walang sapat na kapasalidad ang aming hospital para gawin ang ganoong operasyon. Sa lalong madaling panahon sana Sapphire kung nais niyong makasama pa ang inyong ina, hindi sa tinatakot ko kayo ha nagsasabi lang ako ng totoo." Mahabang paliwanag ng doktor kay Sapphire at tumango-tango naman ang dalaga ngunit hindi niya alam kung saan siya kukuha ng ganong kalaking halaga.

"Hindi ko ho alam kung saan ako kukuha ng ganong kalaking halaga dok. Pero para sa aming ina ay gagawa ako ng paraan," napatango naman ang doktor kay Sapphire saka ito nagpaalam na aalis na.

"Ate, gigising pa naman po si inay diba?" napapikit si Sapphire sa tanong ng kapatid at doon na bumagsak ang kanyang luha. Niyakap niya si Adelia habang tahimik na umiiyak at nakatingin sa transparent window ng ICU kung saan nandoon ang kanilang ina at madaming tubo ang nakakabit sa kanya.

"Oo naman Adelia, gigising at makakasama pa natin si inay ng matagal. Gagawa ng paraan si Ate para matupad iyon."

"Sapphire, sigurado ka ba? Buo na ang desisyon mo? Alam ko naman na inosente ka pa sa bagay na ito eh," sunod-sunod na tanong sa kanya ng kaibigan niyang si Olivia.

"Oo, para sa nanay ko. Saka sabi mo nga ay malaki ang sweldo dito at kung sweswertehin ako ay baka mabigyan pa ako ng tip ng guest, hindi ba?" pilit na ngiti ni Sapphire pero sa totoo ay nahihiya siya at kinakabahan. "Saka alam mo naman na mahal ko ang pagsasayaw."

"Alam ko naman iyon pero club ito Sapphire. Saka iba ang style ng pagsasayaw dito. Pwede kang mabastos. Inaalala lang naman kita," muling paalala ni Olivia kay Sapphire.

"Dalawang milyon ang kailangan ko O-Olivia, wala na ako sapat na panahon para mag-inarte," maluha-luhang sagot ni Sapphire.

Nilapitan kasi ni Sapphire si Olivia dahil ito lang naman ang tunay niyang kaibigan. Nabanggit ni Sapphire ang kanilang sitwasyon at sakto na alam ni Olivia na may opening job sa club kung saan siya nagtratrabaho. Ang kaso dancer pala ang hinahanap ng manager ni Olivia. Sinabi ni Sapphire na nais niyang mag-apply at dahil sa angking kagandahan at kaseksihan ni Sapphire ay agad siyang kinuha ng manager ng club. Nag-aalala lang si Olivia dahil alam niyang wala pang karanasan si Sapphire sa ganitong kamunduhan.

"Girls, tama na ang chikahan. Nandyan na ang mga parokyano natin. Aba, kilos-kilos din!" sigaw ng bakla nilang manager sabay palakpak pa. "Oh Sapphire bakit hindi ka pa bihis ha? Huwag mong sabihin na umaatras ka na?"

"Naku hindi po, madam," agad na sabi ni Sapphire saka kinuha ang damit na kanyang susuotin. Ngunit noong nakita niya ang dress na ibinigay sa kanya ay halos manlaki ang kanyang mata. Halos kita na ang kanyang kaluluwa kung susuotin niya ito.

"Ano pa ang tinutunganga mo? Bilisan mo na at may mga guest na sa private room!"

"Sapphire, kung gusto mo pang magback-out matutulungan kita," bulong ni Olivia sa kanya pero naisip ni Sapphire ang kalagayan ng kanyang ina.

"Buo na ang desisyon ko." Matapang na sagot ni Sapphire.

"Sapphire, galingan mo ha mga VIP ang mga guest na nasa loob ng kwartong yan. Huwag ka mag-aalala kung magbibigay sila ng tip ay buong-buo ko iyon ibibigay sayo para makatulong sa inay mo," nakangiting sabi ng manager nila kay Sapphire.

"Maraming salamat po," magalang na sagot ni Sapphire.

"Maiwanan na kita dyan, do your best okay?" kinakabahan man ay tumango si Sapphire.

Sumasayaw naman talaga si Sapphire pero naisip niya na tama nga ang kaibigan niyang si Olivia na iba ang pagsasayaw sa club na ito. Lalo pa't VIP ang sasayawan niya ngayon. Pero hindi na siya pwede pang umatras ngayon.

"Nandito na pala ang hinihintay natin eh," rinig niyang sabi ng isang lalake na nakaupo sa couch nang buksan niya ang pintuan ng VIP room. "Sige na, simulan mo na para naman mag-enjoy kami dito."

Napapikit ng kaunti si Sapphire dahil medyo may kadiliman ang kwarto. May ilaw naman pero naka-dim at paiba-iba pa iyon ng kulay. Napansin naman niya na biglang nagkaroon ng spotlight sa bandang gitna at nakita ang mini stage doon. Naisip ni Sapphire na baka doon siya magsasayaw kaya naman pumunta siya doon. Narinig niya ang hiyawan ng mga lalake pero hindi niya eksaktong alam kung ilan ang nanunuod sa kanya.

"Kaya mo 'to Sapphire, isipin mo na lang na para ka lang nagsasayaw sa dance contest," sabi ni Sapphire sa kanyang isipan.

Nagsimula na nga tumugtog ang kanta at sinabayan iyon ni Sapphire, isa siyang dancer kaya hindi na problema sa kanya ang makaisip ng step na babagay sa isang sexy song. Bawat indayog at giling ng kanyang katawan ay mas lalong tumitindi ang hiyawan ng mga VIP guest. Naisip ni Sapphire na hangga't naeentertain niya ang mga ito ay matatapos niya ang kanyang trabaho ng maayos at walang aberya. Pero akala lang iyon ni Sapphire dahil biglang huminto ang kanta at halos nawindang si Sapphire sa kanyang narinig.

"Ang boring naman, ganito na ba kacheap ang mga dancer sa club na 'to? Anong klaseng pagsasayaw yan? Anong tingin mo sa amin? Judge sa isang cheap na dance competition? Ulitin mo! Entertain us! Maghubad ka!"