Kabanata 4

"Anong kaguluhan 'to?" tanong ng ama nila sa kanilang dalawa.

"Pa, si Sapphire kasi nahuli kong tatakas!" hindi makapaniwala si Sapphire sa sinabi ng kanyang kapatid na si Fiona. Hindi na talaga ito nagbago.

"Totoo ba ang sinabi ng kapatid mo Sapphire?" tanong ng ama ni Sapphire at nagmadaling bumaba ng hagdanan saka siya hinawakan ng mahigpit sa braso.

"Pa, nasasaktan ako," pilit inaalis ni Sapphire ang kamay ng kanyang ama pero mas lalo lang itong humigpit at nakita niya ang nanlilisik na tingin ng kanyang ama sa kanya.

"Sagutin mo ako!"

"Hindi po, pupuntahan ko lang naman si lolo para sabihin sa kanya na ikakasal na ako. Pa, masama na po bang dalawin ang puntod ni lolo?" pinipigilan ni Sapphire ang huwag umiyak dahil natatakot siya sa kanyang ama.

Hindi naman ito ganoon sa kanya dati. Nang marinig ng ama nila ang paliwanag ni Sapphire ay bigla itong natauhan at binitiwan siya.

"P-pasensya ka na anak. Marami lang talaga iniisip ang papa ngayon. Hindi ko naman intensyon na saktan ka," kita naman ni Sapphire sa mata nito ang pagsisisi sa nagawa sa kanya.

"Okay lang po," sabi ni Sapphire habang hawak ang namumulang parte ng kanyang braso na mahigpit na hinawakan ng kanyang ama. "Alis na po ako, huwag po kayo mag-alala dahil babalik po ako agad." 

Naglakad na paalis si Sapphire upang pumunta sa puntod ng kanyang lolo. Habang ang ama ay napahilot sa kanyang sintido dahil sa nagawa niya sa kanyang anak. Pagkatapos ay tinignan niya ng masama si Fiona at napailing. Dahil doon ay padabog na umalis si Fiona, inis na inis ito kay Sapphire.

"Hi lolo, kumusta po?" bungad na bati ni Sapphire sa kanyang lolo at lapag ng bulaklak sa puntod nito saka nagsindi ng kandila.

"Ikakasal na po ako mamaya kaso hindi ko po alam kung anong klase siya ng tao eh," kwento ni Sapphire habang hinihimas nito ang puntod ng kanyang lolo. "Sana nandito pa po kayo lolo e 'di sana may kakampi pa po ako."

Dito na nga bumagsak ang luha ni Sapphire at napayuko ito habang ang isang kamay ay nakatakip sa kanyang mata. Inaalala niya ang masasayang araw na kasama niya ang kanyang lolo. Ang lolo niya ang laging nagproprotekta sa kanya kahit na ang totoo ay si Fiona lang naman talaga ang totoo nitong apo. Ama kasi ito ni Leida pero kahit gano'n ay itinuring siyang totoong apo ng kanyang lolo. Kaya gano'n na lang kasakit kay Sapphire ang pagkawala nito dahil sa isang aksidente. 

Nang maramdaman ni Sapphire na parang may dumaan sa kanyang tabi ay agad niyang pinunasan ang kanyang mata. Pero isang panyo na kulay navy blue ang kanyang nakita sa tabi niya at narinig niya ang pag-start ng makina ng kotse na siyang paglingon niya ay papaalis na.

"Kanino kaya ito?" nagtatakang tanong niya saka niya nakita na may initials ang nakaburda sa panyo kaya naman binasa niya iyon. "K.P, sino naman kaya yun? H-hindi kaya nakita niya akong umiiyak?"

Alas-dos na ng hapon kaya nagmamadali na ang mga stylist na ayusan si Sapphire dahil mamayang alas-tres gaganapin ang kasal. Nasa isang mamahaling hotel sila sa Tagaytay at garden wedding ito kaya naman naisip ng mga stylist na ayusan si Sapphire na parang isang diyosa ng mga diwata na ikakasal na. Habang inaayusan si Sapphire ay hindi tumigil ang kaba sa kanyang dibdib.

"Ang ganda-ganda mo anak," puri ng ama niya sa kanya kaya napangiti siya ng kaunti.

"Sana ay nandito si inay," may himig na lungkot na sabi ni Sapphire.

"Huwag ka mag-alala dahil pagkatapos nito ay asikasuhin natin ang inay mo," sabi ng kanyang ama kaya naman kahit papaano ay naging panatag ang kanyang loob. "Ikakasal ka na. Pasensya ka na talaga Sapphire, anak."

"Pa, napag-usapan na po natin ito okay?" niyakap siya ng ama niya kaya niyakap niya din ito ng mahigpit.

"Tama ang drama niyong mag-ama. Bilisan niyo na kumilos diyan para matapos na ito!" singhal sa kanila ni Leida kaya naman nagkatinginan na lang sina Sapphire at ang ama nito.

Huminga ng malalim si Sapphire dahil mas lalo siyang kinakabahan dahil naririnig na niya ang tugtog. Kapag hinawi na ng mga staff ang puting kurtina na tumatakip sa glass door ay makikita na niya kung sino ang kanyang papakasalan.

Ilang sandali nga ay hinawakan na ng mga staff ang kurtina saka nila ito binuksan upang makadaan sina Sapphire at ama nito na maghahatid sa kanya sa dulo. Napapikit ng kaunti si Sapphire dahil nasilaw siya sa liwanag na nagmumula sa araw. Nang makabawi siya ay nagsimula na silang maglakad patungo sa altar. Namangha naman ang mga guest dahil sa angking kagandahan ni Sapphire. 

Pakiramdam ni Sapphire ay nagslowmo ang kanyang paligid nang makita niya ang isang lalakeng nakaupo sa wheelchair para itong pamilyar sa kanya. Natitiyak niyang ito ang kanyang papakasalan dahil sinabi sa kanya ni Fiona na isa itong lumpo at bulag. Pero nagtataka si Sapphire dahil pakiramdamdam niya ay nakatingin sa kanya ang lalake, kita ni Sapphire ang pagkislap ng mata nito. Nagkatitigan pa nga silang dalawa eh. Namalayan na lang ni Sapphire na nakarating na sila sa harap.

"Sapphire, siya si Kaiden ang mapapangasawa mo," pakilala ng ama ni Sapphire kay Kaiden at kahit na alam ni Sapphire na bulag ito ay naiilang siya kapag nagtatama ang kanilang paningin.

"Bilisan niyo na para matapos ito," masungit na sabi ni Kaiden at nahalata ni Sapphire na hindi ito masaya na magpakasal sa kanya. Pati ang boses nito ay pamilyar sa kanya.

Buong seremonya ay wala sa sarili si Sapphire. Pakiramdam niya ay nakalutang lang siya sa ulap. Pilit pa rin niyang inaalala kung saan niya nakita si Kaiden kaya naman hindi niya namalayan na tapos na pala ang seremonya kung hindi pa nagsalita ang pari na nagkasal sa kanilang dalawa.

"I now pronounce you husband and wife. You may kiss the bride," sabi ng pari kaya naman naalarma si Sapphire dahil tapos na talaga ang sermonya.

"Ipapahiya mo ba ako?" rinig niyang sabi ni Kaiden na ngayon ay nakaharap na sa kanya ang inuupuang wheelchair. "Alam mo naman siguro ang kalagayan ko diba?"

"S-sorry," tanging nasabi na lang ni Sapphire at siya na mismo ang nagtanggal ng kanyang suot na veil. Yumuko ng kaunti si Sapphire at nilagay niya ang kamay ni Kaiden sa kanyang pisngi para iyon ang maging gabay ni Kaiden.

Ito nanaman ang pakiramdam ng pagkailang dahil nagtama nanaman ang paningin nilang dalawa. Unti-unti lumapit si Kaiden kay Sapphire para mahalikan ito at hindi alam ni Sapphire kung bakit siya pumikit. Pero imbes na halik ang igawad ni Kaiden ay isang masakit na mga salita ang ibinigay nito sa kanya.

"Magkano ang ibinayad sa 'yo ng daddy para mapapayag sa walang kwentang kasal na ito?"