CHAPTER 4

Gener Torquero ang pakilala ng lalaki sa grupo ng mga empleyado. Matangkad ito at maputi. Ang mga mata nito at ang kay Jade ay malaki ang pagkakahawig. Hindi mukhang masamang tao ang lalaki kaya hinarap siya ng mayor. 

Si Jade na nasindak ay kinakausap ni Sean. Hindi man umiyak ang dalaga ay batid naman sa kilos niya ang sobrang takot habang nakatanaw sa lalaking kausap ng mayor. Ilang saglit pa ay ipinatawag siya ng ama ng kasintahan. 

Hawak ni Sean ang kamay ni Jade kaya nakokontrol ng dalaga ang panginginig noon. Sinulyapan niya rin ang mga katrabaho na sa sobrang gulat ay nanatili lang na nakatayo at tila mga estatwa na itinulos sa kinatatayuan.

"Do you know him, Jade?" tanong ng mayabang na mayor ngunit parang ama na nakatingin sa dalagang nakayuko. 

"Hindi po," sagot ni Jade habang sinusulyapan ang lalaking nagpakilalang uncle niya. 

"Hindi n'ya talaga ako maaalala, mayor. Five years old siya nang dinala ko sa nga Fabian. Tipen was her yaya before kaya kilala kami at alam ng mag-asawang Fabian ang tungkol sa pamilya namin," singit ng lalaki. 

"Pasensya na po kayo, sir. Aayusin ko na lang po muna ito. Kung papayagan n'yo po ako ay uuwi na po ako para personal kong makausap ang mga magulang ko," sabi ni Jade. 

Sumang-ayon ang ama ni Sean. Ngunit ang lalaking nagpakilalang uncle ng dalaga ay hindi pinasakay sa sasakyan ni Sean. Ayos lang naman iyon sa lalaki dahil may sarili pala itong sasakyan. 

Habang nagmamaneho pabalik ng Tagkawayan ay panay ang sulyap ni Sean sa kasintahan. Nakikita kasi ng binata kung paanong natetensyon ang dalaga sa mga nagaganap. 

Si Gener Torquero naman sa loob ng kaniyang sasakyan ay nagagalit at hindi mapakali. Pagkalipas kasi ng maraming taon ay makakaharap n'yang muli ang mga taong pinagkatiwalaan n'ya sa kan'yang pamangkin.

Mahigpit ang hawak ng lalaki sa kan'yang manibela dahil sa isip n'ya ay bumabalik ang mga alaala na kaniyang pinagdaanan para mahanap muli ang tagapagmana ng mga Torquero. 

Pagdating sa bahay nina Jade ay agad silang sinalubong ng mag-asawang Liloy at Tipen. Ngunit biglang nabitawan ni Aling Tipen amg hawak niyang babasagin na kapehan. Si Mang Liloy naman ay halos hindi makakilos nang nakita niya si Gener na bumaba sa sasakyan nito. 

Alam ni Jade na sa ikinilos ng mga magulang niya ay may mali. Hindi man siya magtanong ay tiyak niyang nagsasabi ng totoo ang nagpakilalang uncle niya. Tiningnan niya ang mukha ni Gener kaya hindi nakaligtas sa kan'ya ang masamang tingin na ipinukol ng lalaki sa mga kinilala niyang mga magulang. 

Bumaba ng sasakyan si Sean at nagbigay galang sa mag-asawang noon ay nakabawi na ng kanilang pagkabigla. Ang mag-asawa ay nagbigay galang din kay Gener. Ang hindi inaasahang bisita ay parang hari na pumasok sa bahay ng mga Fabian kahit hindi inimbitahan. 

"So, this is where my niece lived all those years. Ano ang nangyari at itinago n'yo siya? Bakit hindi n'yo ako kinontak sa loob ng mahabang panahon?"

"Umupo po muna kayo, sir," mahinahong sabi ni Aling Tipen. 

Si Jade na noon ay nakikinig at nag-oobserba lang ay nauna nang umupo sa upuan na kawayan. Gusto niyang marinig ang lahat ng sasabihin ng pamilya niya at ng lalaking nagngangalang Gener. 

"Jade, anak, pumunta ka na muna sa kusina at maghanda ka ng makakain," utos ni Mang Liloy sa dalaga. 

"No! She should know everything! Ikaw," baling ni Gener kay Sean. "Umuwi ka na muna at huwag kang makialam o makinig sa usapan namin." 

Nabastos si Jade sa tila pagiging boss ng bisita nila. Hindi niya gusto na tratuhin ng sinuman sa ganoong paraan ang nobyo niya. Tumayo siya at hinarap ang lalaking nananatiling nakatayo at nakataas ang noo. 

"Sino po ba kayo? Wala ka pong karapatan na pakialam, lalo na ang itaboy ang importanteng tao sa buhay ko!" galit na sabi ng dalaga. 

"Hindi mo gugustuhin ang magalit ako. Kahit pamangkin kita ay hindi ako magdadalawang isip na parusahan ka," galit na sabi ng lalaki. 

Agad sinaway ni Aling Tipen ang galit rin na si Jade. Kinausap naman ni Mang Liloy ang kasintahan ng dalaga. Ilang saglit pa ay nagpaalam muna si Sean at nangakong babalik na lang. Ang ibang mga kapatid ng dalaga ay pinapasok ng mga magulang nila sa loob ng maliit na silid. Saka hinarap nina Mang Liloy at Aling Tipen ang galit na bisita nila. Si Jade ay muling umupo sa kinauupuan niya kanina. 

"S-sir, paumanhin po kung umalis kami sa dating lugar namin. Naging mapanganib po kasi para sa aming mag-anak ang pananatili roon," sabi ni Aling Tipen. 

"Sana ay nagsabi kayo sa akin. Hindi n'yo ba alam kung ilan taon ko kayong hinanap?" galit na turan ni Gener Torquero. 

"Teka lang ho, hindi naman sa lahat ng oras ay kailangang i-update kayo ng mga magulang ko," sabi ng galit din na dalaga. 

"They have to! Iyon ang nakalagay sa kontrata. Nilabang nila ang kontrata!" pasigaw na sabi ng lalaki. 

"Pasensya na po talaga, sir," si Mang Liloy naman ang nagsalita. 

"Pasensya, pasensya… Ang sabihin n'yo, sinadya n'yong ilayo ang pamangkin ko! Hanap na ako ng hanap sa kan'ya ngunit hindi ko siya makita. Anong gusto n'yong maging reaksyon ko?" galit na tanong ni Gener. 

"Kamag-anak ko ba talaga siya, tatay, nanay?" singit ng dalaga.

Mabilis sumenyas ang mag-asawa kay Jade na noon ay nagtataka pa rin. Pinatatahimik nila ang dalaga. Ngunit hindi inasahan ni Jade ang pagluhod ng mga magulang niya sa harapan ni Gener Torquero. Napatayo siya at mabilis na lumapit sa mga ito.  

"Patawad po, sir. Kaligtasan din po ni Kryzell ang inisip namin. Akala po kasi namin ay patay na rin kayo at wala nang magpo-protekta sa batang ito," umiiyak na sabi ni Aling Tipen. 

"Tumayo kayo. Bibigyan ko kayo ng isang linggo para ihanda si Kryzell sa pagbabalik niya sa tunay niyang ama. Ayusin ang mga dapat ayusin," utos ng lalaki. 

Inalok ng pagkain ng mga Fabian si Gener pero tumanggi ito. Nag-iwan ang lalaki ng calling card bago umalis. Sinabi niya rin na babalikan niya si Jade sa loob ng isang linggo dahil ibabalik niya na ito sa tunay nitong pamilya. 

Nang mapagsolo ang buong mag-anak ay napa-antada si Aling Tipen. Niyakap din si Jade ng kan'yang ama. Ang mga kapatid ng dalaga ay lumabas ng silid at lahat ay nagtatanong. Pinaupo ng mag-asawa ang mga ito saka kinausap ng masinsinan. 

"Isang linggo na lang ang itatagal sa atin ni Jade. Hindi natin pwedeng pigilan ang pagbalik niya sa kan'yang tunay na pamilya," mahinahong sabi ni Mang Liloy. 

"A-am-pon po ba talaga ako?" Hindi makapaniwalang tanong ng dalaga na noon ay nagsimula nang umiyak dahil nag-iiyakan na rin ang mga kapatid niya. 

"Kailangan mong sumama sa uncle mo, Jade. Iyang balat mo sa kanang braso, malapit sa balikat mo ay palatandaan nila sa iyo. Ang uncle mo ay member ng isang kilalang international mafia group. Kaligtasan ng buong pamilya ang nakasalalay dito," paliwanag ni Aling Tipen. 

"Ipamimigay n'yo ba talaga ako?" iyak ni Jade.

"Jade, hindi ka namin ipamimigay. Pwede mo naman kaming dalaw-dalawin. Isusuli ka lang namin sa tunay mong pamilya," si Mang Liloy..

"Sabi n'yo ay hindi ako ampon. Ngayon, sinasabi n'yo sa akin na ibabalik n'yo na ako sa tunay kong pamilya. Wala akong pakialam sa mafia, mafia na iyan," iyak ng dalaga. 

"Jade, hindi mo alam ang sinasabi mo. Mga mamamatay tao sila. Mga wala silang awa. Mahal ka namin pero matitiis mo ba kung may mangyaring masama sa pamilya natin?" sabad ng kuya ni Jade. 

Nag-iyakan ang buong mag-anak. Ang mag-asawa ay iniwan ang mga anak nila at pumunta sa kusina. Doon ay magkayakap na kapwa nila pinapawi ang sakit at lungkot dahil sa nalalapit na pag-alis ng kanilang pangalawang anak. 

Ang magkakapatid na nasa balkon ng bahay ay hindi halos mapaghiwalay. Hanggang sa may naisip ang dalaga. Hindi siya sasama sa nagpakilalang tiyuhin niya kung walang kapalit. 

Agad na lumapit ang dalaga sa mga magulang n'ya. Hinanap niya sa mga ito ang calling card na iniwan ni Gener. Nang bumalik si Sean kinagabihan ay kinausap ni Jade ng masinsinan ang kan'yang nobyo. 

"Sigurado ka ba, Jade, sa mga plano mo?" nag-aalala na tanong ni Sean. "Ang uncle mo ay mukhang masamang tao. Kung totoo ang sinabi mo na member siya ng isang mafia organization ay mapanganib siya."

"Kung totoo rin na uncle ko nga siya ay hindi n'ya ako tatanggihan," matatag na sagot ng dalaga. 

Nagkasundo ang magkasintahan. Bukas ay maagang susunduin ni Sean ang girlfriend niya dahil pupuntahan nila ang ibinigay na address ni Gener Torquero. Maraming tanong ang dalaga at gusto n'yang sa bibig mismo ng lalaki manggaling ang mga kasagutan doon. 

Nang gabing iyon ay natulog si Jade na puno ng agam-agam ang puso. Natatakot siya sa hinaharap pero handa siyang magsakripisyo kapalit ang kaligtasan ng buong pamilya niya.

Katulad ng napagkasunduan ay maagang gumising si Jade. Ilang minuto lang ang lumipas ay dumating naman si Sean. Ang paalam ng magkasintahan kina Mang Liloy at Aling Tipen ay magsisimba lamang siya. Ngunit tumawid sila sa boundary ng probinsya ng Quezon at Camarines Sur. 

Sa isang luma at magandang bahay sila dinala ng kanilang paghahanap kay Gener Torquero. Ngunit hindi madali ang lahat. Mga armadong lalaki ang unang humarap sa magkasintahan. Halos maihi sa pantalon niya si Sean pero walang takot si Jade na pumasok sa bahay na iyon kahit may nakatutok na baril sa kaniya. 

"Drop your gun! She's my niece!" malakas na sigaw ni Gener Torquero sa mga nag-escort sa magkasintahan. Mabilis din na ibinaba ng mga lalaki ang kanilang mga baril at yumuko kay Jade. Ang takot na si Sean ay biglang lumiyad ang dibdib. Inis na binatukan niya ang lalaking tumutok rin sa kan'ya ng baril. 

"Pumunta po ako rito dahil sa…" panimula ni Jade. 

"Hold on!" putol ni Gener sa sasabihin ni Jade. "Ilabas n'yo ang kasamang lalaki ni Kryzell. Lumabas rin kayong lahat!" 

Tututol pa sana si Jade ngunit mabilis nang kinaladkad ng mga lalaki si Sean. Agad din nilang isinara ang silid na nasa ilalim ng lupa. Kahit silang dalawa na lang sa loob ng silid ng lalaking kahapon niya lang nakilala ay malakas ang loob ni Jade. 

"So, what brought you here?" tanong ng lalaki pagkatapos paupuin ang dalaga. 

"Uncle ko po ba talaga kayo? Paano kayong nakakasiguro na kamag-anak n'yo nga ako," balik tanong ng dalaga. 

"Simply because you are a Torquero sa simpleng tingin pa lang sa iyo. Hindi kita pwedeng makalimutan at lalong impossible na hindi kita makilala. Iyang balat mo sa kanang braso ay kapareho ng balat ko at ng sa daddy mo." 

Namangha si Jade ng ipakita ni Gener Torquero ang balat nito na nasa kaliwang braso. Mas malaki lang iyon ng kaunti sa balat na nasa katawan naman ng dalaga. 

"Bakit n'yo po ako ibinigay sa mga Fabian? Nasaan ang mga magulang ko?"

"Nasa Bulacan ang daddy mo at patay na ang mommy mo. May bagong asawa ang ama mo at bilang tagapagmana, kailangan mong bumalik bago pa makuha ng iba ang yaman ng Torquero." 

"Ano po ang tunay kong pangalan?" 

"Kryzell Torquero. Ikaw, ako at ang daddy mo na lang ang natitirang malapit na Torquero. May mga kamag-anak pa tayo pero hindi na sila close relatives. Nasa second at third degree na sila."

"Alam po ba ng daddy ko na buhay pa ako?"

"Hindi. Nang mamatay kasi ang mommy mo ay bigla kang nawala. Itinago na kasi kita dahil hindi mo pa kayang proteksyunan noon ang sarili mo. Sa pagbabalik mo sa daddy mo ay hindi mo ako ulit makikita pero umasa kang nasa paligid mo lang ako. I will see to it na hindi ka masasaktan ng mga taong gustong mawala ka rin sa mundo."

Sa mga sinabi ni Gener ay napaniwala nito si Jade na isa siyang Torquero. Ipinakita rin kasi ng lalaki ang mga lumang larawan ng dalaga. Nakilala niya ang sarili niya sa mga larawang iyon dahil sa mga Fabian ay may photo album din noong maliit pa siya pero wala siyang picture sa mga Fabian noong baby pa siya. Ang katwiran ng mag-asawa ay naanod daw iyon ng baha noong unang panahon. Ngunit nagtaka ang dalaga dahil sa larawan ng isang babae. Iyon ang babae sa mga panaginip niya.

"Siya! Siya ang babae sa mga panaginip ko!" bulalas ni Jade. 

"Panaginip? Baka alaala mo, Kryzell. Naaalala mo ang mommy mo pero inakala mong panaginip lang ang lahat."

"Pero may mga panaginip akong umiiyak siya habang kumakaway sa akin," mahinang sabi ng dalaga.

"Iyon ay totoong naganap, Kryzell. The last time you saw your mom was during that time. Mabuti at bago kayo inataki ng pumatay sa mommy mo ay naitago ka niya at nang dumating ako ay ibinilin ka niya sa akin bago siya nalagutan ng hininga," sabi ni Gener. 

Hindi alam ni Jade pero kusang tumulo ang mga luha n'ya. Sa isip niya ay naglalaro ang mga katagang, "Kaya pala sobrang sakit kapag napapanaginipan ko iyon. Totoong nangyari pala iyon."

Naglakas loob si Jade na sabihin ang talagang pakay niya sa paglapit niya kay Gener Torquero. Nagulat man si Gener ngunit mabilis itong lumapit sa isang volt at kumuha ng malaking halaga ng pera. 

"Take it. Mas mabuti rin na may maiiwan ka sa mga Fabian lalo at hindi ka na makakatulong sa pamilya mo sa mga susunod na araw," sabi ni Gener. 

"Sigurado po kayo? Sobrang dami nito. One hundred thousand lang po ang hinihingi ko," nahihiyang sabi ng dalaga. 

"Fabian Family deserves a reward for taking care of you. I know you love them pero kailangan mo silang iwan. I hope you understand that you are a Torquero and will be forever Torquero." 

Napatango-tango ang dalaga. Alam niyang mabait na tao ang kaharap. Malayo sa unang impression n'ya rito. Tumayo si Gener at lumapit sa pamangkin niya. Tumayo rin si Jade at sa isang iglap ay nagyakap ang magkamag-anak na pinaghiwalay ng panahon. 

"Kryzell, in the next coming days your life will be tougher. Be brave, my niece. As I said, I will always be around you. Get ready. Ibabalik na kita kay kuya." 

Nang lumabas si Jade sa silid na iyon ay sigurado na siyang isa nga s'yang Torquero. Inabutan niya si Sean na napapalibutan ng mga lalaki dahil nagwawala na ito sa sobrang galit. 

Nang makita ni Sean ang kasintahan ay agad itong lumapit kay Jade at buong pagmamahal na niyakap ang girlfriend. Mula sa malayo ay nakatanaw lamang si Gener. 

Agad na umuwi ang magkasintahan. Kapwa sila nangako sa isa't-isa na walang makakalabas na ano man sa mga pinagdaanan nila. Nagpaalam na rin si Jade kay Sean na aalis siya pero kasabay noon ang pangako na gagawa siya ng paraan para muling makasama ang nobyo. Nangako rin si Sean na maghihintay siya kay Jade. 

Nang dumating sila sa bahay ng mga Fabian ay palihim na itinago ni Jade ang pera na galing kay Gener. Nasa isang milyon iyon, sapat para sa pamilyang kumupkop sa kan'ya sa mahabang panahon. 

Kinabukasan ay pumasok si Jade sa munisipyo para mag-file ng resignation. Mula sa isang bahagi ng lugar na iyon ay nakatayo si Kaizer at nakaabang upang masilayan ang babaeng buong tapang na kumalaban sa kan'ya. Siya, bilang mafia boss ay hindi makapapayag na hindi makuha ang babae na ilang araw nang ginugulo ang dati ay tahimik niyang puso.