CHAPTER 6

Isang invitation ang natanggap ni Kaizer mula kay Don Matias Torquero. May grand welcome party na gaganapin sa mansion ng mga Torquero at bilang kaibigan ay gusto ni Don Matias ang presensya ng gwapong mafia boss. 

Iiling-iling na inilapag ni Kaizer ang invitation. Ang party ay gaganapin sa loob ng dalawang linggo. Kahit malapit ang binata sa mayaman na negosyante ay hindi siya sigurado kung pupunta sapagkat ang isip niya ay ginugulo pa rin ni Jade Fabian. 

"Kumusta ang lakad mo, Mer?" tanong ni Kaizer sa kadarating pa lang na kanang kamay niya. 

"Negative, boss. Kinaibigan ko na ang kuya ni Jade pero wala silang idea kung nasaan ang kapatid niya," sabi ni Mer. 

Galit na umupo si Kaizer sa isang mamahaling upuan. Sa kamay n'ya ay ang isang kopeta ng alak. Isang linggo pa lang siya sa Bulacan pero gusto na niyang bumalik ng Quezon Province para mahanap lang ang babaeng ayaw siyang tigilan sa isip niya. 

"Sir, balita ko ay bumalik na raw ang inakalang namatay na anak ni Don Matias. Gusto n'yo po bang ipaghanda ko kayo ng susuotin sa party?" tanong ni Mer. 

"Ako na ang bahala sa susuotin ko. Ang atupagin mo ay ang ipinapahanap ko sa iyo," singhal ni Kaizer. 

"May problema pa po tayo, boss. Masyadong mainit ang Triangulo Mafia Group sa mga awtoridad kaya nahihirapan din ang mga tauhan natin na magpalabas ng mga epektos sa port," pag-uulat ni Mer.

"Nalaman n'yo na ba kung sino ang pinuno ng Triangulo?" tanong ng binata. "Masyado silang mainit at atat sa gulo. Pati mga anak kasi ng politicians ay hindi nila pinapatawad. Grabe din sila sa carnapping."

"Isang malaking palaisipan pa rin sa mga taga-underworld kung sino ang pinuno ng Triangulo," sabi ni Mer. "Ngunit umasa kayo boss na gagawin namin ang lahat para malaman kung sino ang lihim nilang pinuno."

"Ayaw ko ng puro salita! Action ang kailangan ko. Pakilusin mo ang mga tauhan natin. Masyado silang mainit at ayokong maisahan nila ang grupo natin." 

"Masusunod, boss." 

Wala na si Mer sa harapan ni Kaizer ngunit patuloy sa pag-iisip ang binata. Malaki na rin ang nagagastos niya sa paghahanap kay Jade Fabian. Nagagalit siya dahil sa hindi niya makuhang gusto. Naiinis siya dahil nawawala siya sa konsentrasyon dahil sinasakop ni Jade ang isip n'ya sa bawat oras na lumipas. 

Tatayo na sana si Kaizer nang lumapit ang isang tauhan na inutusan niya rin para hanapin si Jade. Isa ito sa pinakamatinik na miyembro ng Devil's Angel. 

"Boss, nakita ho ang babaeng pinahahanap mo sa isang mall sa Quezon City. Two weeks ago na nang namataan siya roon. Bumili siya ng mga branded na gamit," report ng lalaki. 

"Quezon City? Ibig sabihin ba ay wala na siya sa probinsya?"

"Wala na po, boss."

Nagliwanag ang mukha ng gwapong mafia boss. Nabuhay ang kan'yang dugo. Mapupunta rin sa kan'ya ang matapang na si Jade at siguraduhin iyon ng malupit na pinuno.

Nang araw na iyon ay naging masigla si Kaizer. Nagawa niyang makipagbiruan kay Mer at sa iba pang mga miyembro ng grupo nila. Excited ang binata sa muli nilang paghaharap ni Jade. 

Ngunit hindi natapos ang gabi. Isang masamang balita ang natanggap ni Kaizer. Pinatay ng Triangulo ang sampung miyembro ng kanilang grupo. Galit na ipinatawag ng binata ang mga matataas na opisyales ng kanilang samahan. 

"May nakuha akong tip na gabi-gabi ay kuma-carnap ng sasakyan ang mga members ng Triangulo sa Maynila. Magpapasok kayo ng isang tao sa grupo nila at tambangan din ninyo ang grupo nila sa isang operasyon. Magpanggap kayong mga pulis para hindi mahalata ang trabaho natin," utos ni Kaizer. 

"Masusunod po, boss," sabi ni Damian. Isa siya sa may pinakamataas na posisyon sa grupo. 

Nang mga sumunod na araw ay naging sunod-sunod ang problema ng Devil's Angel. Ang mga kalaban nilang mafia group ay lumalakas at sinabayan pa iyon ng matinding pagtutok ng mga pulis sa kanilang mga operasyon. Pakiramdam ni Kaizer ay lumiliit ang mundo ng grupo nila subalit ang ikinagagalit niya ay ang pagkawala niya sa konsentrasyon dahil sa isang Jade Fabian na hindi siya pinapatulog gabi-gabi. 

Dumating ang araw ng grand welcome party sa mansion ng mga Torquero. Masaya-masaya si Kryzell lalo at pinasundo pa ni Don Matias ang buong pamilya niya sa Quezon Province. Nasa party rin ang kaniyang nobyo na halos hindi bumibitaw sa kan'ya. 

Suot ang isang blue sexy A line gown ay lutang na lutang ang ganda ng isang Kryzell Torquero. Ang kaniyang buhok ay itinaas ng hairdresser upang mas lalong ma-intensify ang hugis ng kaniyang mukha. Ang manipis na make-up niya ay lalong pinatingkad ang dati nang magandang mukha ng dalaga. 

"Ngayong naayusan ka ng gan'yan, lumabas ang matinding pagkakahawig mo sa mommy mo," sabi ni Don Matias. Hinila niya ang anak sa isang malaking silid at mula sa drawer ay inilabas ni Don Matias ang isang lumang photo album. Ipinakita niya iyon sa dalagang labis na namangha.

"Kamukha ko nga siya!" bulalas ni Kryzell. 

"Oo, anak. Ang mga mata mo lang at ang balat mo sa braso ang nakuha mo mula sa Torquero. You're so beautiful like your mommy. Seeing you tonight makes my heart ache. I miss her," mahinang sabi ni Don Matias sabay upo. 

Niyakap ni Kryzell ang amang ilang araw pa lamang niyang nakikilala. Bakas ang matinding lungkot sa mukha ng don at hindi alam ng isang anak kung paano niya papawiin iyon. 

"Dapat pala nagpalit na lang ako ng mukha o kaya nagpa-make up ako na parang si Betty para hindi malungkot ang daddy ko," sabi ng dalaga. 

"Who is Betty?" mahinang tanong ni Don Matias.

"Iyon pong pangit at may makapal na salamin sa palabas dati sa tv. At the end ay naging isang magandang babae po siya," kwento ng dalaga. 

Ngumiti ng bahagya si Don Matias at tinapik tapik ang braso ng anak na nakapulupot sa leeg niya. Nanatili sa ganoon ang mag-ama habang inaalala nila pareho ang yumaong ina ng dalaga. 

Nang dumating ang oras na kailangan nang lumabas ni Kryzell sa mansion at harapin ang mga bisita ay halos hindi magkandaugaga si Hilda sa pagbilin kay Kryzell ng mga dapat at hindi dapat niyang gawin. Kahit hindi sanay sa mga ganoong okasyon ang dalaga ay ubod tamis siyang ngumiti sa mga taong bumabati sa kaniya. 

"Good evening, everyone," agaw atensyon ng emcee sa mga taong walang tigil sa batian at kumustahan. "Please get ready to welcome the one and only heiress of Don Matias Torquero, his long lost daughter, Kryzell Torquero!'

Isang masigabong palakpakan at malakas na hiyawan ang sumalubong kay Kryzell sa pagpasok niya sa ground kung saan ginaganap ang party. Katabi niya ang kaniyang daddy at si Hilda. Pumwesto sila sa gitna ng stage kung saan tanaw ni Kryzel ang ilang kilalang mga personalidad. Ngunit ang kabang nadarama ng dalaga ay napawi ng masulyapan niya ang kaniyang kinilalang pamilya at ang kaniyang gwapong boyfriend na nakasuot ng isang mamahaling outfit.

"God evening," bati ni Don Matias sa mga bisita. "Thank you for giving us your precious time and spending it with us tonight. It's not a secret to everyone that twenty years ago, my first wife was killed by an unknown individual or individuals. My daughter who was with her at that time was lost. I thought she's dead already since I found no trace of her. Fortunately, after two decades, a young lady came into this mansion and introduced herself as Kryzell Torquero. Based on the evidence, we have proven that my daughter was still alive. Ladies and gentlemen, meet my daughter, Kryzell Torquero," mahabang speech ni Don Matias. 

Isang masigabong palakpakan ang ibinigay ng mga tao. May mga naghihiyawan pa tanda ng kanilang labis na katuwaan. Bilang ganti ay buong galang na yumuko si Kryzel na agad namang sinaway ni Hilda. 

"You shouldn't bow to them," taas noo at nakangiting sabi ng stepmother ng dalaga. "You are a Torquero, tinitingala at hinahangaan. Sila dapat ang mag-bow sa iyo and not the other way around."

"Sorry po, tita," mahinang sagot ng dalaga. 

"Go, get the microphone and introduce yourself," utos ni Hiida. 

Agad tumalima ang dalaga dahil nabakas niya sa tinig ni Hilda ang tila pagkayamot kahit nakangiti naman ito sa kan'ya. 

"Hello everyone. I am Kryzell Torquero, the daughter of Don Matias Torquero. Thank you for coming tonight. Let's have fun. Thank you." 

Bilang host ng party ay hindi pumayag si Hilda na hindi rin siya magsasalita. Ang speech niya ay inabot ng halos thirty minutes. Nahihiya man dahil sa tagal ng speech ni Hilda ay nanatili lang na nakatayo si Kryzell sa tabi ng kaniyang ama na tila hindi alintana na boring na ang party. 

Agad na bumaba ng stage si Kryzell pagkatapos ng pagpapakilala. Niyakap niya ng ubod higpit si Sean na noon lang niya nakasama ulit simula ng umalis siya ng Quezon Province. 

"Hindi ako makapaniwala na ganito ka pala kayaman," bulong ni Sean sa kasintahan niya. 

"Sila lang ang mayaman. Ako, tulad pa rin ako ng dati. Ako pa rin si Jade Fabian na pinaibig mo ng bongga," wika ng dalaga sa nakakaaliw na tinig.

Lumapit ang mga nakilalang kapatid ni Kryzell sa magkasintahan na seryosong nag-uusap. Nakipagharutan sila sa kanilang ate habang ang kuya naman ng dalaga ay seryoso lamang na nakatayo sa isang gilid habang inoobserbahan ng mga magagandang dalaga sa party. 

Sina Mang Liloy at Aling Tipen ay kausap naman ng mag-asawang Matias Torquero. Maraming mayayaman na mga binata ang nagpaparamdam kay Kryzell ngunit ang dalaga ay nakatutok lamang sa nobyo niya. Lahat ng mga tao sa nasabing party ay masayang makilala ang nagbabalik na dalaga ng Torquero. Lahat sila ay gustong makapalagayan ng loob si Kryzell. 

Sayawan, bumabahang mga alak at maingay na tawanan, lahat iyon ay pumuno sa mansion ng mga Torquero. Ngunit sa dami ng mga dumating na inimbitahan ay may isang tao ang hindi dumating dahilan para lumayo si Matias Torquero sa karamihan upang tawagan ang isang taong malapit sa kan'ya. 

"Kaizer, bakit hindi ka nakarating, iho?" 

"Sorry, tito. Sobrang busy ko ngayon. Magulo rin ang isip ko," paliwanag ng binata. 

"Babae ba ang dahilan? May nakakuha na ba sa puso ng malupit na si Kaizer Gerzon?" biro ng don sa binata. 

"Ipapakilala ko siya sa iyo kapag nahanap ko na. Parang palos din kasi ang babaeng iyon, tito. Pangako, dadalawin kita kapag hindi na ako busy. Medyo magulo at kompilado rin kasi ngayon ang mga bagay-bagay." 

"I'll be waiting for you. Magkita tayo sa susunod." 

Pinatay ni Don Matias ang tawag at lumapit siya sa anak na sumasayaw kasama ang mga kapatid niya. Kahit malalim na ang gabi ay tila hindi napapagod si Kryzell. Pati si Mang Liloy at Kuya niya ay buong yabang niyang isinama sa dance floor. Wala siyang pakialam kahit pagtinginan pa siya ng mga tao dahil sa isip niya ay party n'ya iyon.

Si Hilda ay panay ang ikot sa mga bisita at isa-isang pinasasalamatan ang mga ito sa kanilang pagdalo. May mga pagkakataon na tinatawag niya si Kryzell upang personal na ipakilala sa lahat kahit na ipinakilala na nila ang dalaga noong nasa stage pa sila. 

Hindi napansin ni Kryzell ang pagkawala ni Sean sa grupo ng mga bisita. Sobra siyang aliw na aliw kasama ang mga kinilalang mga kapatid at magulang. Maging si Hilda ay nawala rin bigla sa party. 

Habang walang kamalay-malay ang lahat, sa isang silid ay may nagaganap na milagro. Mainit na naghahalikan sina Sean at Hilda. Hindi mapigilan ng binata ang init ng katawan na lumukob sa kaniya dahil sa mapang-akit na nilalang. 

"You're mine simula ngayon," bulong ni Hilda sa binatang sabik na sabik sa isang bagay na hindi sa kan'ya maibigay ni Kryzell.

Mahihinang ungol, mga impit na tawag sa pangalan ng isa't-isa at matatamis na salita ang maririnig sa paligid. Ang makasalanang tagpong iyon ay nagtagal ng halos kalahating oras. 

Mula sa silid ay muling lumabas sa lugar ng party ang dalawang may lihim na ginawa. Ang hindi nila alam, mula sa malayo ay matalim ang mga mata ni Samuel na nakatingin sa kanila. Nakita ng kuya ni Jade ang pag-alis nina Sean at Hilda sa party maging ang pagbalik ng dalawa. Bilang lalaki ay alam ng binata na mayroong naganap sa loob ng mansion habang ang mga tao ay masaya sa nagaganap na party. 

Dahil sa taglay na kagwapohan at kakisigan ng binatang magsasaka ay maraming mga kababaihan ang lumalapit sa kan'ya. Ngunit sadyang walang interest ang isang Samuel Fabian sa mga babaeng walang pagpapahalaga sa sarili. Tumayo siya sa kinauupuan at hinanap ang kapatid. 

Dinala niya si Kryzell sa isang lugar na medyo malayo sa karamihan. Sa lugar kung saan ay maayos silang makakapag-usap. Nagtataka naman na tinanong ni Jade ang Kuya niya kung bakit siya nito gustong makausap.

"Mag-iingat ka sa asawa ng daddy mo," walang pag-aalinlangan na sabi ni Samuel. "Bantayan mo rin ang nobyo mo."

"Kuya magkaibigan kayo ni Sean. Alam mong hindi niya ako sasaktan," sabi ng naguguluhan na dalaga.

"Hindi kami magtatagal rito. Kakausapin ko sina tatay at nanay na uuwi na kami. Kapahamakan ang magiging dulot sa pamilya natin kung pagbibigyan namin ang request mo." 

Nasaktan si Kryzell sa sinabi ng kapatid niya. Ang buong akala niya ay okay na kay Samuel ang pansamantalang pagtira ng mga Fabian sa mansion ng Torquero. Hindi inaasahan ng dalaga ang biglaang desisyon nito. 

"Kuya, ayaw n'yo na ba akong makasama?" tanong ng naluluhang si Kryzell. 

"Alam mong hindi totoo iyan, Jade. Kahit kailan ay hindi namin ikaw tatalikuran pero sana maisip mo ang mga bata pa nating kapatid. Mapanganib ang madrasta mo." 

Napayuko si Kryzell at pinunas ang mga butil ng luha na pumatak sa makinis niyang mukha. Sa loob ng ilang araw na nakasama niya si Hilda ay naging mabuti naman sa kan'ya ang kaniyang stepmom. Subalit nagtataka siya na pati si Samuel ay tulad na rin ni Gener. Marahil nga ay may mga bagay na hindi nakikita ng kaniyang mga mata ngunit nakikita ng mga taong nakapaligid sa kan'ya. 

Habang nag-uusap ang magkapatid ay nag-uusap din sina Hilda at ang isang mapagkakatiwalaan niyang tauhan sa mansion sa sulok ng bahay. Nakangiti ang babae at bakas sa mukha nito ang labis na kaligayahan. 

"Humanda ka," sabi ni Hilda. "Pagkatapos ng masayang gabi na ito ay bibigyan natin ng delubyo ang anak ni Matias para mawala siyang muli sa landas ng kaniyang ama."

"Ano ang plano mo, ate?" tanong ni Isabel. Siya ang bunsong kapatid ni Hilda ngunit sa mansion ng Torquero ay isa siyang katulong upang maitago ang tunay niyang koneksyon sa asawa ni Matias. 

"Papatayin ko si Kryzell para wala akong kaagaw sa mga ari-arian ni Matias. Ako lang ang reyna ng pamilyang ito at ako lang ang dapat makinabag sa lahat ng yaman ng pamilya. Tayo ang maghahari sa bansang ito, pagdating ng panahon." 

Masayang niyakap ni Isabel si Hilda. Para sa katuparan ng pangarap ng pamilya nila ay handang suportahan ng babae ang kapatid niya kahit madalas siyang inaapak-apakan nito. 

Lahat ng plano ng magkapatid ay malinaw na narinig ng isang nilalang na nag-aapoy sa galit ang mga mata. Nangangatog ang kaniyang katawan at halos hindi siya makalakad palayo sa tagong lugar na iyon. Sa isip niya ay naglalaro ang mga katagang, "Uunahan na kitang babae ka bago mo pa masaktan ang tagapagmana ng Torquero."