CHAPTER 7

Natapos ang party na hindi na nakita ni Kryzell ang kaniyang daddy. Si Don Matias kasi ay abala sa opisina niya kaharap ang kaniyang mga abogado. Pinag-uusapan nila ang mga pagbabago sa last will and testament ng ama ng dalaga. Lahat ng sinasabi ng don ay maayos na nire-record ng mga abogado. Mabilis ang kilos ng dalawang abogado na para bang naghahabol sila ng panahon. 

"Sigurado po ba kayo na kapag namatay ang inyong anak ay sa charity institutions n'yo ipamimigay ang yaman n'yo. Paano kayo, sir? Paano po si Miss Hilda?" 

"One hundred percent sure ako. Wala kaming conjugal property ni Hilda dahil wala kaming nabiling ari-arian sa mga panahong mag-asawa na kami. Ang lahat ng yaman na meron kami ay galing sa mga Torquero kaya kami lang ni Gener at si Kryzell ang may karapatan. Kung sakaling dumating ang panahon na kailangan n'yong ipagtanggol ang anak ko, gawin n'yo sa abot ng inyong makakaya."

Lumabas ang mga abogado sa silid na iyon na parang walang nangyari. Si Don Matias naman ay tinawagan si Kaizer Gerzon. Alam niyang busy nag binata ngunit wala siyang pwedeng hingan ng tulong kun'di ang mafia boss lamang. 

Palibhasa madaling araw, kaya hindi sinagot ni Kaizer ang tawag. Nagkunwaring walang alam ang don sa mga plano ni Hilda para sa anak niya. Nang lumabas siya ng silid at nakita ang kabiyak ay nag-usap sila ng parang normal lang. Walang galit na mababakas sa kilos ng ama ni Kryzell. Ang hindi alam ni Hilda, lahat ng mga pinag-usapan nila ni Isabel ay maliwanag na narinig ni Don Matias. 

Kinabukasan ay kinausap ni Don Matias si Mang Liloy. Lalaki sa lalaki ang usapan ng dalawang ama. Naka-lock ang opisina ni Don Matias kaya walang makakabatid na iba sa pinag-uusapan nila. 

"Mapanganib para sa inyo ang bumalik ng Quezon Province. May isang sikretong lugar akong padadalhan sa inyo upang doon muna kayo magtago habang inaayos ko ang problema dito sa mansion. Susuportahan ko kayo habang naroon kayo," sabi ni Don Matias. 

"Paano si Jade?" tanong ni Mang Liloy. 

"Bibigyan ko ng proteksyon ang dalaga natin sa abot ng aking makakaya. May naiisip na akong paraan kung paano siya maililigtas sa demonyo kong asawa," sagot ni Don Matias. 

Pagkatapos mag-usap ng dalawang lalaki ay agad na sinundo ng isang chopper ang mag-anak na Fabian. Mahigpit ang bilin ni Samuel sa kapatid niya. 

"Tandaan mo ang sinabi ko sa iyo. Huwag kang maging kampante. Kailangan ay maging alerto ka sa mga nasa paligid mo. Ang nobyo mo, pakiramdaman mo siya. Marami kang makikita kong imumulat mo ang mga mata mo," mahabang sabi ni Samuel. 

"Sige, kuya. Huwag mo akong alalahanin. Kaya ko ang sarili ko. Tama ka nga kaligtasan ng pamilya ang dapat kong unahin," sagot ng dalaga. 

Mahigpit na niyakap ni Samuel ang kapatid at saka hinalikan niya ito sa noo. Mahigpit din ang hawak ni Kryzell sa kamay ng kaniyang kuya bago ito dahan-dahang binitawan upang makasakay sa helicopter na naghihintay sa buong pamilya ng Fabian. 

Nang makalipad na ang chopper ay dahan-dahang pinunas ni Kryzell ang mga butil ng luha na nag-uunahan sa paglandas sa kaniyang magandang mukha. Pagharap niya sa may pintuan ng malaking living room ng mansion ay naroon si Sean. Nakahalukipkip ito at matalas ang tingin sa kasintahan niya. 

Kinakabahan na lumapit si Kryzell sa nobyo niya. Hindi pa uuwi si Sean dahil sa kagustuhan ni Hilda na magkaroon pa raw ng oras ang magkasintahan at upang makilala pa ito ng mag-asawang Torquero.

"Sobrang sweet n'yo naman!" singhal ni Sean ky Kryzell. 

"Galit ka ba? Alam mo namang ganoon na kami ni Kuya Samuel kahit noon pa," depensa ng dalaga. 

"Noon, okay lang kasi magkapatid pa kayo. Ngayon, iba na Jade!" sigaw ni Sean. 

Nagtataka na napatingin si Kryzell sa kasintahan niya. Ang tagal nilang hindi nagkasama kaya ang inaasahan niya ay susulitin nila ang mga panahon na ibinigay sa kanila upang bumuo ng mga magagandang memories. 

"Kung aawayin mo lang ako dahil sa Kuya Samuel ko, mas makakabuti, Sean na umuwi ka na sa inyo. Baliktarin mo man ang mundo ay magkapatid kami!" galit na sabi ni Kryzell sabay talikod kay Sean. 

"Porke't mayaman ka na, gan'yan ka na kung umasta…" pahabol ni Sean sa kasintahan. 

Naubos ang pasensya ng mabait na dalaga. Hinarap niya si Sean nang nakapamaywang at naniningkit ang mga mata. 

"Hoy, Sean! Anong kinalaman ng yaman ko sa pagiging magkapatid namin ni Kuya Samuel? Huwag mo nga akong pangungunahan sa mga desisyon ko sa buhay lalo na kung tungkol sa pamilya ko. Sa inaasal mo, feeling ko, may ginagawa kang masama kaya ibinibintang mo sa akin!"

Hindi nahuma si Sean sa tinuran ng kasintahan niya. Si Kryzell naman ay iniwan ang binata at dumiretso sa loob ng library kung saan naghihintay si Don Matias. Hindi nag-almusal ang don kaya nagbilin si Kryzell kay Isabel na hatiran ng pagkain ang ama niya. Tulog pa kasi si Hilda. 

Pagpasok sa library ay umupo si Kryzell sa harapan ng lamesa kung saan nakaharap ang kaniyang ama. Sinipat ng dalaga ang hagard na mukha ni Don Matias. Napangiti naman ang don dahil sa kakulitan ng kaniyang anak. 

"Are you happy last night?" tanong ng don. 

"Yes, daddy. Siya nga po pala, baka pwede po akong magtrabaho. Kahit sa Accounting Department lang po ng kompanya n'yo para naman may magawa ako,," request ng dalaga. 

"Mabuti at related pa rin sa business ang napili mong kurso. You will become more efficient kung mag-aaral ka muna ng business administration. But for now, gusto kong magbakasyon ka muna," sabi ng ama ng dalaga. 

Biglang bumukas ang pintuan na hindi naka-lock. Napatayo si Don Matias lalo at narinig ni Isabel ang huling sinabi ng don. Galit na sinigawan ng ama ni Kryzell ang mukhang kawawa na katulong. 

"Dad," tawag ni Kryzell sa kan'yang ama. "Baka matakot si Isabel."

"Get out, Isabel, at dalhin mo ang pagkain na iyan!" singhal ni Don Matias sa katulong na biglang napalabas ng silid

"Dad, ako ang nag-utos kay Isabel na maghatid ng pagkain dito dahil hindi ka pa nag-a-almusal. Masyado ka rin napagod sa party ka-gabi kaya siguro hindi na kita nakita after the party." 

"Nevermind about my breakfast. Listen carefully, don't trust anyone in this house. Aalisin kita rito para sa sarili mong kapakanan. Habang nag-aaral ka ay patitirahin muna kita sa bahay ng kakilala ko. Kaizer ang pangalan n'ya."

Sa pag-aakalang babae ang Kaizer na binanggit ng ama kaya mabilis na pumayag si Kryzell. Excited ang dalaga na makilala ang sinabing tao ng kaniyang daddy dahil sa mga kwento na rin ni Don Matias. 

Nang lumabas si Kryzell sa library ay muling tinawagan ng don si Kaizer. Subalit katulad kaninang madaling araw ay hindi sinagot ng binata ang tawag dahil nagagalit siya sa kaniyang mga tauhan. Inagaw kasi ng Triangulo ang ilegal na droga na sana ay ide-deliver ng Angel's Devil sa mga customers nito. Nakailang tawag na ang matandang Torquero ngunit walang planong sagutin iyon ni Kaizer na abala sa pag sermon sa kaniyang mga tauhan. 

"I will be sending my daughter, Kryzell, to your house. Please, I need your help. Hilda is trying to kill my daughter. Contact me if you read this message," sabi ni Don Matias sa isang text. 

Ngunit hindi nakita ng binata ang text na iyon. Sa sobrang galit niya dahil sa ginagawa ng Triangulo kaya ang kaniyang cellphone ay naihagis niya sa harap ng kaniyang mga tauhan. Nabasag ito at nagkapira-piraso kaya hindi na mapapakinabangan pa. 

Isang malaking labanan ang naisip ni Kaizer. Hindi siya papayag na palaging naiisahan ng Triangulo kaya kahit ginugulo ang utak niya ni Jade Fabian ay nagsimulang magplano ang matalinong binata. 

Isang linggo ang lumipas. Kasama ang magigiting na mandirigma ng Devil's Angel Mafia Organization ay makikita si Kaizer sa loob ng isang mamahaling sasakyan na patapik-tapik ang daliri sa hawak niyang baril. Naghihintay lamang siya ng pagkakataon upang kumilos ang mga miyembro ng kalaban nilang grupo. 

Ilang saglit pa ay bumaba si Kaizer ng sasakyan at pumasok sa isang convenient store. Agaw atensyon ang binata dahil sa taglay niyang karisma. Nakalimutan ng guard na kapkapan si Kaizer kaya naipasok niya ang baril at sa halip ay sumaludo pa ito sa kan'ya. 

Sa labas ay nakakalat na ang mga tauhan ng binata. Ipatitikim niya ngayong gabi ang bangis ng Devil's Angel sa kalabang grupo. Ayon sa nagbibigay ng tip kay Kaizer ay sa harap mismo ng convenient store magaganap ang kidnapping sa anak ng isang politician. Iyon ang sasamantalahin ng grupo nila. 

Ilang saglit pa ay mabilis na hinarangan ng isang itim na SUV ang puti, mamahalin at bagong-bago na kotse. Mabilis na bumababa ang mga sakay ng itim na sasakyan at tinutukan ng limang nakamaskara at armadong lalaki ang sasakyang hinarang nila. Pinabababa ng mga humarang ang mga biktima sa loob. 

Bago pa man bumaba ang mga sakay ng puting kotse ay agad na rin nagpaputok ang mga tauhan ni Kaizer. Ang binata na noon ay nasa convenient store ay mabilis na lumabas at pinaputukan sa hita ang isa sa miyembro ng Triangulo. Pinaputukan din niya ang kamay ng lalaki na may hawak na baril. 

Mabilis ang naging kilos ng bawat miyembro ng Devil's Angel. Agad nilang kinalampag ang sasakyan na kulay puti upang lumabas ang mga teenager na sakay nito. Papunta sana ang mga dalaga sa isang bar kung saan madalas nilang tambayan. Mga anak ang mga ito ng mga politicians ng bansa. 

Si Kaizer ay may iniwang sulat sa bulsa ng nakahandusay na lalaking binaril niya kanina. Naglalaman iyon ng mensahe at pagbabanta sa Triangulo na kung hindi titigilan ang pakikialam sa Devil's Angel ay uubusin nila ang mga ito at ibabalik sa dating estado nito na gang lamang ng isang lugar. 

Bago pa dumating ang mga pulis ay mabilis na nakasibad ang grupo at isa lang ang iniwan nilang buhay sa Triangulo upang magsumbong sa pinuno nito. 

Sa hideout ng Devil's Angel ay nag-iiyakan ang apat na dalaga. Nagmamakaawa sila kay Mer para sa kaligtasan ng buhay nila. Habang si Kaizer ay masayang nakaupo sa isang malambot at mamahaling upuan sa isang bakanteng silid na natatanglawan lamang ng kakarampot na liwanag mula sa poste ng ilaw sa labas. 

Gamit ang radyo ay tinawagan ng binata si Mer at sinabihan na ihanda ang mga bihag para sa isang transaksyon. Ipinahanda rin niya ang chopper na kanilang gagamitin sa pag-alis. Sa Aklan muna siya mamamalagi habang nagpapalamig sa mga pulis. Ang mga babaeng bihag nila ay gagamitin ng binata upang mapaikot ang mga corrupt na politiko. Tiyak ni Kaizer na kaya pinag-initan ng Triangulo ang mga dalaga ay dahil sa proteksyon ng grupo nila bukod sa pera. 

"Hello, sir," tawag ni Kaizer sa ama ng isa sa mga bihag nila. "Hawak ko ang anak mo."

"Who are you and what do you want?" malakas na tanong ng senador na kausap ng binata. 

"I want twenty-five percent of your assets?"

"What? T-twen-ty-five percent? Are you f*cking crazy, man?"

"No," mabilis na sagot ni Kaizer. "I'll call you again and dapat by that time ay ready na ang pera or else... bang! I'm gonna kill your pr*stitute daughter." 

Walang nagawa ang senador kun'di pumayag sa kahilingan ni Kaizer. Cash ang gusto ng binata at wala siyang balak makipagnegosyon pa. Pagkatapos ng bayaran ay agad na lumipad ang binata papunta sa Aklan kung saan matatagpuan ang private resort ng binata. 

Samantala, sa mansion ng mga Torquero ay hindi mapakali ang ama ni Kryzell. Nagpapalakad-lakad siya sa veranda na na matatagpuan sa second floor. Hindi na kasi makontak ni Don Matias si Kaizer kaya labis ang kan'yang kaba para sa kaligtasan ng anak niya. Gabi na at madilim ang paligid ngunit ang isip ng isang ama ay gising na gising pa at naghihintay ng kahit kaunting pag-asa. 

Subalit lumipas na ang ilang oras ay walang tawag o text na natatanggap si Don Matias mula sa mafia boss. Nagdesisyon ang don na bumaba ng bahay upang ihanda ang sasakyan na gagamitin niya para maitakas ang anak sa mala-demonyo niyang asawa. 

Ngunit nang nasa hagdanan na si Don Matias ay naramdaman niya ang isang pares ng kamay na tumulak sa kan'ya hanggang sa nawalan siya ng balanse at tuluyang magpagulong-gulong pababa ng hagdan.