PART 85 - STRUGGLES

May mga text si Winston na hindi nya binasa, hinahanap din sya ng jowa nya. May text din si Ahya pati na ang isa nyang TL sa pinagtatrabahuan.

“May pasok ka ba dapat ngayon?” tanong ko sa kanya.

“Mayroon, mamaya. Actually after nito, papasok na ‘ko. Dumaan lang ako rito saglit para makita kita... Blooming ka, beks! Ganda ng cheeks, parang naka-blushon!” tudyo nya sa akin. Kinurot nya po ako nang bahagya sa pisngi.

Alam na nyang nadiligan talaga akong nang bonggang-bongga kaya para akong masamyong bulaklak na namumukadkad ngayon. Napabungisngis ako pero agad ko ‘yon binawi. Inangilan ko sya, sabay irap ko nang pagkalagkit-lagkit sa kanya.

“Oo nga. Glowing si Shobe ngayon, nag-date siguro kayo ng nanliligaw sa ‘yo kanina,” natatawang sinusugan naman sya ni Atsi.

“Hindi po ah! Si Atsi naman…” tugon ko na napapakamot sa pisngi ko na kinurot ni Orlie. “Magagalit po si Mama.” Si Master Seiji ang pinatutungkulan nya, pero hindi sya ang dahilan kung bakit flushing ang beauty ko ngayon.