Chapter 60

Pagkatapos mabasa ni Ali ang mensahe ni Eros na walang susundo sa kanya rito sa unibersidad ay ibinalik niya sa bag ang kanyang cellphone. Nasanay na siyang may naghahatid sundo sa kanya kaya nanibago siya. Nadismaya rin siya dahil kaninang pumasok siya ay nangako ang binata na ito ang susundo sa kanya.

Ayaw kasi niyang pumasok kanina kaya iyon ang sinabi nito. Pagkatapos ay ito pala at magpapadala ng mensahe na hindi ito darating?

Napasimangot siya at nagpatuloy sa pababa ng hagdan. Pag-uwi niya ay isusumbat talaga niya rito na hindi tinupad ng binata ang sariling pangako nito.

Nang lumabas siya ng gusali ay napatingala siya sa dumidilim na kalangitan. Hindi agad sila pinalabas ng kanilang guro kanina. Sa halip na 5:30 ang dismisal nila ay naging alas sais. Mas lalo tuloy siyang nakaramdam ng pagkainis.

Kaya naman lumabas siya ng unibersidad na hindi maipinta ang kanyang mukha. Inignora niya ang mga nakakasabay niyang naglalakad sa sidewalk. Hindi talaga niya mapigilan ang magtampo.