Chapter 205

Nakahanda na ang lahat para sa pansamantalang paglipat nila sa private island na pagmamay-ari mismo ni Alejandro sa Palawan. Walang maiiwan sa villa. Gusto ni Klaire na sama-sama silang ligtas habang patuloy ang paghahanap ng mga awtoridad kay Lander De Guzman.

Bago tuluyang magtungo sa lugar kung saan nakaabang ang dalawang chopper na maghahatid sa kanila sa isla ay naisipan niyang pumunta sa presinto kung saan nakakulong si Sophia. Sa huling pagkakataon ay gusto niyang makausap ang babae.

Nakaupo si Klaire sa visiting station at tahimik na hinihintay si Sophia. Mayamaya pa ay bumukas ang pinto at pumasok si Sophia na nakasuot ng kulay kahel na t-shirt. Nakaposas ang mapuputing kamay nito. Kumpara sa sopistikadang Sophia na tumatak sa utak niya noon, ibang-iba ang Sophia na kaharap niya ngayon. Isang Sophia na kriminal at hindi makikitaan ng pagsisisi ang mga mata.

Padabog na naupo si Sophia sa puting monobloc sa kaniyang harapan habang isang pulis naman ang nakabantay sa pintuan.