Chapter 3

Parang sinasakal ang pakiramdam ni Thea habang nakasalampak siya sa damuhan at nakatingala kay Neil na madilim pa sa bagyo ang anyo dahil sa matinding galit sa kanya.

"Paano mo ito nagawa sa akin, Thea? Iginalang kita dahil akala ko ay isa kang matinong babae ngunit nagkamali pala ako. Isa ka pa lang masamang babae na hindi nararapat na pag-alayan ko ng aking pangalan," galit na sigaw ni Neil habang dinuduro si Thea.

Umiiyak na tumayo si Thea at muling nilapitan si Neil. "Hindi ko sinasadya ang nangyari, Neil. Hindi ko alam kong paano nangyari na may lalaking pumasok sa kuwartong pinagdalhan sa akin ni Joyce," umiiyak na paliwanag ni Thea. 

"Kung ganoon ay totoo talaga na nangyari ang mga nasa larawan," komento ng tita ni Thea na si Venice at ina naman ni Veronica. "Nakakahiya ang anak mo, Aura! Nakikipagrelasyon pala siya sa ibang lalaki at may nangyari na pala sa kanila habang naghahanda siya sa nalalapit nilang kasal ni Neil. Ipinagmamalaki niyo pa namang mag-asawa ang napakabait at masunurin ninyong anak. Iyon pala ay santa-santita. Nasa loob pala ang kulo niya," nakaismid na dugtong pa nito. Halatado sa mukha nito na natutuws ito sa nangyari kay Thea na matagal na nitong kinaiinisan. Gusto kasi ni Venice na ang dalawang anak niyang babae na sina Veronica at Veron lamang ang mas nakakaangat sa lahat ng magpipinsan.

Agad na hinarap naman ni Thea ang kanyang ina para pabulaanan ang sinabi ng tiyahin nito ngunit isang malakas na sampal ang pinadapo ng ina niya pagharap niya rito. Gayunpaman ay sinubukan pa rin niyang magpaliwanag sa ina. "Mama, maniwala po kayo sa akin. Hindi totoo ang mga sinabi ni Tita Venice. Ay saka hindi ko kilala ang lalaking nasa larawan," nakahawak ang kamay sa nasaktang pisngi na saad ni Thea.

"Nakakahiya kang anak! Hindi kita pinalaki para maging imoral!" namumula ang mukha sa galit na sigaw ni Aura sa anak.

"Mama, maniwala kayo sa akin," pagpupumilit ni Thea. Nilapitan niya ang ina at akmang hahawakan sa kamay ngunit mabilis siyang itinulak nito palayo rito. 

"Lumayo ka sa akin! Hindi kita anak!" nanggagalaiting sigaw ng kanyang mama. "Magmula ngayon ay hindi ka na namin anak! Wala kaming anak na isang kagaya mo!"

Napahagulhol si Thea na muling napasalampak sa damuhan nang itinulak siya kanina ng sariling ina. Hindi siya makapaniwala na maririnig sa bibig ng kanyang ina ang mga katagang iyon na halos pumunit sa kanyang dibdib. Tumayo siya at nilapitan ang pinsan niyang si Joyce na siyang nagdala sa kanya sa silid na iyon.

"Joyce, tulungan mo ako. Ikaw ang nagdala sa akin sa silid na iyon at ang sabi mo ay iyon ang silid ng kaibigan mo. Nakita mo naman na walang lalaki pagpasok natin sa loob hindi ba?" nagmamakaawa ang mukha na sabi ni Thea kay Joyce na biglang umatras palayo sa kanya.

"I'm sorry, Thea. Pero hindi iyon ang silid ng kaibigan ko na pinagdalhan sa'yo. Iyon ang katabing unit ng unit naman ng kaibigan ko," malungkot na sagot ni Joyce habang napapailing.

"So ibig sabihin ay lumabas ka sa silid na pinagdalhan sa'yo ni Joyce para makipagtalik sa lalaki mo! Nakakadiri kang babae!" singhal ni Neil kay Thea. Nasa mukha nito ang pandidiri sa kanya.

Napahagulhol lalo si Thea. Sobrang sakit marinig ang masasakit at masasamang salita na iyon mula sa bibig ng lalaking minamahal niya. Hilam sa luha ang mukha na inilibot niya ang kanyang paningin sa mga taong nakapalibot sa kanya. Lhat sila ay galit at nanghuhusga ang mga tingin na ipinupukol nila sa kanya. Pakiramdam niya ay pinagkakaisahan siya ng lahat. Wala siyang kakampi. Ang mga magulang na dapat ay naniniwala at nagtatanggol sa kanya ay kinukutya rin siya at hinuhusgahan. Ang matalik na kaibigan naman niya na palaging kumakampi sa kanya maging tama o mali man siya ay biglang nagbago. Para na itong ibang tao na hindi niya kilala katulad ni Neil na bigla ring nag-iba ng pag-uugali.

"Tita Helen, Tito Troy, Daddy. Maniwala naman po kayo sa akin. Wala kaming relasyon ng lalaking iyan sa picture. At hindi ko rin alam kung paano siya nakapasok sa kuwarto na pinagdalhan sa akin ni Joyce," pakiusap naman ni Thea sa mga magulang ni Neil at pati na rin sa kanyang ama na mula kanina ay hindi pa niya naririnig magsalita. Galit na nakatingin lamang ito sa kanya.

Hindi naniniwala si Thea sa sinabi ni Joyce na hindi iyon ang silid na pinagdalhan nito sa kanya. Dahil kahit nahihilo at hindi maganda ang pakiramdam niya ay nasisiguro niya na hindi siya bumangon sa kama at lumabas ng unit kagaya ng ibinibentang ni Neil sa kanya. Hindi niya alam kung bakit sinabi iyon ni Joyce ngunit naisip niya baka natatakot lamang ito na masisi sa nangyari sa kanya kaya ito nagsinungaling. Dahil siya naman talaga ang nagdala sa kanya sa unit na iyon kaya nangyari sa kanya ang kasumpa-sumpang bagay na ito.

"Nasa harapan ng mga mata namin ang ebidensiya ng panlolokong ginawa mo sa anak namin kaya ano pa ang dapat naming paniwalaan, Thea? Huwag mo naman kaming gawing tanga at bobo! Sayang dahil sinira mo lamang tiwala at pagmamahal na ibinigay namin sa'yo. Kaya wala nang kasalan na matutuloy pa. Dahil hindi ko matatanggap ang isang manugang na marumi kagaya mo," galit na sagot ng ina ni Neil kay Thea pagkatapos ay binalingan ang anak. "Tayo na at umuwi na tayo, Neil. Huwag natin sayangin ang ating oras sa babaeng iyan na hindi karapat-dapat sa'yo."

Agad namang tumalima si Neil. Sumunod ito sa mga magulang na nauna nang naglakad palabas ng gate ng bahay nila. Isa-isa namang nagsipag-alisan ang mga kamag-anak at malalapit na kaibigan ng kanilang pamilya matapos siyang muling tapunan ng nanghuhusgang tingin. Ang natira na lamang sa paligid ay ang kanyang mga magulang walang ipinagkaiba sa mga nagsipag-alisan nilang mga bisita ang mga tinging ipinupukol nila sa kanya.

"Ma, Pa. Nakikiusap ako sa inyo. Pakinggan niyo naman ang mga paliwanag ko. Kahit kayong mga magulang ko man lang ay maniwala sa akin," paos ang tinig na pakiusap niya sa mga magulang niya. Napaos na siya sa kakaiyak sa masaklap na sinapit ng kanyang kapalaran.

"At ano ang mga sasabihin mo sa amin, Althea? Ang mga paliwanag mo na puro kasinungalingan?" galit na sagot ng kanyang ina. "Magpapa-book ako ngayon ng ticket papuntang Amerika. At gusto kong ngayon din ay umalis ka na rito sa pamamahay namin. Doon ka na sa Amerika manatili at huwag na huwag ka nang babalik pa rito kahit na kailan. Isipin mo na lamabg na patay na ang mga magulang mo," mariin ang boses na dugtong ng ina ni Thea bago siya tinalikuran at pumasok sa loob ng kanilang bahay. Naiwan ang kanyang ama na umiiling habang nakatingin sa kanya.

"Pa, kausapin mo si Mama. Ayokong umalis dito sa Pilipinas. Ayokong malayo sa inyo," halos maglumuhod sa harapan ng kanyang ama si Althea. Iniisip pa lamang niya na malalayo siya sa kanyang mga magulang at hindi niya sila makikita araw-araw ay parang pinipiga na ang kanyang dibdib sa sobrang sakit.

"Narinig mo naman ang mga sinabi ng mama mo sa'yo, Thea. Makabubuting umalis ka na lamang dito sa bahay at mangibang bansa. Huwag mo nang dagdagan pa ang kahihiyan na ibinigay mo sa amin ng mama mo. Ituring mo na lamang kaming patay at ituturing ka na rin namin na isang patay," malamig ang boses na wika ng ama ni Thea bago sumunod sa asawa nito papasok sa loob ng bahay.

Walang nagawa si Thea kundi ang mapahagulhol. Sa isang iglap, ang kanyang masaya at makulay na mundo ay biglang dumilim at ngayon ay iisa na lamang ang kulay. Ito ay ang kulay itim. 

Hindi tumayo mula sa pagkakaupo sa damuhan si Thea kahit na unti-unting bumubuhis ang ulan. Para bang dinadamayan siya ng ulan sa pighating nararamdaman niya ngayon. Mabuti pa ang ulan dinadamayan siya samantalang ang mga taong dapat sana ay karamay niya ngayon ay itinakwil siya. Kahit basang-basa na ng ulan ang buong katawan niya ay hindi pa rin niya makuhang bumangon. Pakiramdam niya ay wala siyang lakas para tumayo. Nahiling niya na sana ay lamunin na lamang siya ng lupa para hindi na niya maramdaman ang sakit na dulot ng pagkawala ng lalaking minamahal niya, nang pagtatakwil sa kanya ng mga magulang niya at ang pagkawala ng pinakaiingatan niyang pagkababae. Ngunit maging ang lupa ay bingi rin. Dahil hindi nito pinagbigyan ang kanyang kahilingan. Sa sobrang pagdadalamhati ay bigla na lamang hinimatay si Thea kaya napahiga na lamang siya sa damuhan.

Nang pagbalikan ng kanyang malay si Thea ay natuklasan. iyang nasa bakuran pa rin siya at nakahiga sa damuhan. Bigla siyang napabangon nang makita niya ang kanyang ina na naglalakad palapit sa kanya dala ang kanyang maleta na malamang ay mga damit niya ang laman. Nang makalapit na ito sa kanya ay itinulak nito papunta sa kanya ang maleta niya.

"Nandiyan na ang mga damit mo pati na rin ang iyong passport at visa. Nakapagpa-book na rin ako ng ticket mo kaya magbihis ka at umalis ka na dahil mamaya na ang flight mo," malamig ang boses na kausap kay Thea ng kanyang ina pagkatapos ay basta na lamang siyang tinalikuran. Ni hindi man lang nito hinintay na makapagsalita siya. 

Umiyak na lamang si Thea at sinundan ng tingin ang likuran ng naglalakad niyang ina. Kilala niya ang kanyang mama. Matigas ang puso nito. Gagawin nito ang anumang sinabi nito at hindi nito iyon babawiin pa kaya hindi na siya nakiusap pang muli. Sarado ang puso nito kaya kahit anong gawin at sabihin niya ay hindi siya nito pakikinggan. Nanginginig ang mga kamay na hinawakan niya ang kanyang maleta at tumayo. Mabigat ang dibdib at mga paa na naglakad siya palabas sa gate nila. Pagdating sa kalsada ay pumara siya ng taxi at nagpahatid sa condo ni Joyce. Kailangan niya itong makausap. Hihingi siya ng tulong sa kaibigan niya para malinis ang kanyang pangalan. Baka sakali kapag nagkaroon siya ng ebidensiya na magpapatunay na totoo ang mga sinasabi niya ay hindi na siya itakwil ng kanyang mga magulang. At si Joyce lamang ang makakatulong sa kanya na makakalap ng mga ebidensiya dahil siya naman ang nag-alok na sa unit ng kaibigan nito siya magpahinga. May kasalanan din ito sa nangyari kaya dapat siyang tulungan nito para malinis ang pangalan niya.

Nang makarating na si Thea sa tapat ng condo ni Joyce ay agad na siyang bumaba ng taxi matapos itong bigyan ng pamasahe. Mabuti na lamang at may pera na iniwan ang kanyang ina sa loob ng maleta kaya may magagastos siya sakaling matuloy siya sa pag-alis papuntang Amerika. Ngunit ang pera na inilakip ng kanyang ina sa kanyang damitan ay sasapat lamang na panggastos niya sa loob ng tatlong buwan. 

Nang makababa na siya ay hinila niya papasok sa building ang kanyang maleta. Hindi siya sinita ng guard dahil halos araw-araw naman siyang nagpupunta sa condo unit ng kaibigan niya kaya kilala na siya nito. Sinundan na lamang siya ng nagtatakang tingin ng guwardiya at kahit ang mga taong nakakakita sa kanyang hitsura na parang basang sisiw ay hindi rin maiwasang magtaka kung ano ang nangyari sa kanya. Deadma na lamang siya sa kanilang mga tingin. Ang mahalaga sa kanya ay makausap niya ang pinsan niya.

Nang makarating na siya sa tapat ng unit ni Joyce ay umangat ang kamay niya para kumatok ngunit nang mapansin niya na bahagyang nakaawang ang pintuan na tila hindi masyadong nailapat ng mabuti ay hindi na siya kumatok. Basta na lamabg niyang itinulak ang pintuan at pumasok sa loob. Pagkapasok niya sa unit ni Joyce ay agad niyang narinig ang malakas na pagtawa nito at ng lalaking kasama nito. Natuklasan kong nasa loob pala ng banyo ang pinsan niya kasama ang isang lalaki at sabay na naliligo. Hindi niya alam kung bakit may nagbubulong sa kanya na lumapit ngunit huwag gumawa ng ingay. Sinunod niya ang bulong sa loob ng kanyang utak. Dahan-dahan nga siyang lumapit sa banyo na hindi naman nakasarado. Nanlaki ang mga mata niya nang makita niya si Joyce na nasa loob ng bathtub at nakasandig habang may hawak na kopitang may laman na alak at kasama ang taong hindi niya inaasahang makikita rito. Ito ay walang iba kundi si Neil na katulad ni Joyce ay n*******d din at nasandig sa gilid ng bathtub at nakaharap sa pinsan niya. May hawak din itong kopitan na may laman na alak at larawan sa mukha nito ang isang tagumpay.

"Ngayon ay wala na tayong problema. Tiyak na itatakwil si Thea ng mga magulang niya dahil sa kahihiyang ibinigay niya sa kanila. Poor, Althea. Wala siyang kamalay-malay na sinadya natin ang lahat para hindi matuloy ang kasal ninyo at masira siya sa mata ng mga magulang mo at magulang din niya nang sa ganoon ay hindi matuloy ang pag-merge ng kompanya ninyo sa kompanya nila sa halip ay ang kompanya ni Daddy ang makikipag-merge sa kompanya ninyo," wika ni Joyce pagkatapos ay humalakhak ng malakas.

"Ang galing mo talagang magplano, Joyce. Tiyak na lalago ang negosyo namin dahil sa angkin mong talino at pagiging tuso. Imagine? Nagawa mong traydurin ang pinsan na siya ring matalik mong kaibigan para lamang maagaw sa kanya ang lalaking minamahal niya at para hindi matuloy ang pag-merge ng kompanya ng mga magulang namin. Bilib talaga ako sa tibay ng loob mo," nakangising sagot naman ni Neil kay Joyce. Nilapitan nito ang babae matapos ilapag ng hawak na kopita at mariing hinalikan sa mga labi. "Saan mo nga pala nakita ang lalaking nakipagtalik kay Thea? Baka ibuko niya tayo," tanong ni Neil matapos pakawalan ang mga labi ng dalaga.

"Don't worry, my love. Isang lalaking bayaran at nagtatrabaho sa isang gay bar ang binayaran ko ng malaking halaga para makipagtalik kay Thea. Malaki ang ibinayad ko sa kanya at saka hindi naman nakita ang buong mukha niya sa picture kaya hindi siya makikila ng kahit na sino, so, walang dahilan para ipagkanulo niya tayo. Ang malas lamang ni Thea. Bobo na nga siya ay isang lalaking bayaran pa ang naka-virginized sa kanya. Pero I'm sure na nag-enjoy naman siya dahil maliban sa magaling daw sa kama ang lalaking iyon ay hinaluan ko pa ng aphrodisiac ang alak na ininom niya kaya tiyak na ganadong-ganado siyang nakipagtalik sa lalaking iyon. Tiyak na naglaho ang pagiging Maria Clara niya," mahabang pagkukuwento ni Joyce kay Neil na sinundan nito ng malakas na halakhak. Sinabayan naman ni Neil ang malakas na pagtawa ng nobya pagkatapos ay muling inangkin ang mga labi nito. Ilang saglit pa ay tumahimik na si Joyce dahil abala na ito sa pakikipagniig sa ex-fiance ng kanyang pinsan.

Nanginginig naman sa galit ang buong katawan ni Thea matapos marinig ang usapan ng dalawa. Gusto niyang sugurin sila at pagbuhulin ngunit alam niyang siya lamang ang magiging dehado. Sirang-sira na siya kaya natitiyak niya na walang maniniwala sa kanya kahit pa magsumbong siya sa mga magulang niya at maging sa mga magulang ni Neil. Hindi na siya umiyak nang matuklasan niya ang ginawa nila sa kanya. Ubos na ang kanyang luha. At hindi rin naman makakatulong kung mag-iiyak siya. Nagtatagis ang mga ngipin at nakakuyom ang mga kamay na naglakad siya palabas ng unit ni Joyce. Susundin niya ang kagustuhan ng mga magulang niya. Aalis siya patungong Amerika. Magpapagaling siya sa kanyang sugat sa puso at magpapayaman pagkatapos ay magbabalik siya para paghigantihan ang tatlong taong kinamumuhian niya. Sila ay walang iba kundi si Joyce, si Neil at ang lalaking binayaran nang una para sirain ang kanyang kainosetihan. Hahanapin niya ito kahit saan man ito magpunta at gagawa siya ng paraan para makilala niya ito. Magbabalik siya para maningil. At sa kanyang pagbabalik ay titiyakin niya na ibang Althea Alcantara na ang makakakaharap nila. Matapang, palaban at higit sa lahat ay hindi na basta-basta magtitiwala at iibig sa isang lalaki.