Kabanata 2 Sinubukan Niyang Kunin Ang Aking Asawa

Kinaumagahan...

"Bihisan mo ng magandang damit si Walter, ilalabas namin siya ni Mariana mamaya." Ang malalim na baritonong boses ni Woodley ay maririnig ni Alicia habang nagbibihis kay Walter.

Matapos ang buong gabing hindi siya natulog sa bahay, bumalik si Woodley kasama si Mariana na ngayon ay naghihintay sa unang palapag.

"Okay. Hapon na ba kayo uuwi mamaya?" tanong ni Alicia.

Habang nagsusuot ng kanyang itim na tuxedo, sumagot si Woodley, "Oo, para magkaroon ng mahabang oras si Mariana na makasama si Walter."

Saglit na natahimik si Alicia, pakiramdam niya ay mas magiging stressful ang mga paparating na mga araw. Bukod sa pagliit ng oras kasama ang asawa, mas magiging madalas ang kalungkutan ni Alicia dahil madalas ding makakasama ni Walter si Mariana.

"Mommy? Saan ba tayo pupunta ngayon? Bakit ako nagpalit ng clothes?"

Napangiti si Alicia na marinig ang maliit na boses ni Walter na nakakunot pa ang noo.

"Sasama ikaw kay Daddy mo ngayon, darling. Tandaan mo, iwasang maging makulit, huwag iyak nang iyak, at hindi magsisigaw-sigaw. Understand?" Mahinang sabi ni Alicia habang inilalahad ang kanyang hinliliit.

"Promise magiging good boy si Walter?"

Lumiwanag ang mukha ni Walter na iniugnay ang kanyang kalingkingan kay Alicia. "Promise!"

Maayos na ang hitsura ni Walter, nakabihis na ito ng bagong damit, ang paborito niyang pulang sapatos at beret na sumbrero kaya sobrang cute nitong tingnan.

"Okay, halika ka na, ihahatid ka na ni Mommy. Bumaba na tayo, okay?" sabi ni Alicia sabay halik sa pisngi ni Walter at binitbit ito.

Tumawa ng mahina si Walter, nakikiliti. "Okay, Mommy."

Naglakad silang dalawa papalabas ng kwarto. Mula sa hallway sa ikalawang palapag, makikita ni Alicia si Mariana na naghihintay mula sa ibaba.

Nagkaroon ng bigat sa dibdib ni Alicia nang makita niya ang babae, ngunit mabilis niyang inalis iyon. Kung tutuusin, si Mariana ang biological mother ni Walter. Walang karapatan si Alicia na hadlangan ang kanilang pagsasama.

"Mommy? Bakit siya nandito?! Huh? Ayaw ko sa kanya!" sigaw agad ng bata na nagtatampo nang makarating sila sa unang palapag.

Bahagyang napangiti ng mapait si Alicia  habang hinihimas ang likod ng bata. "Baby, hindi mo siya tita, kundi Mommy mo si Mariana."

Agad namang lumapit si Mariana kay Alicia. Hinaplos niya ng marahan ang buhok ni Walter.

"Walter, samahan mo na si Mommy, please? Ako ang tunay mong ina, ang nagsilang sa iyo, anak." Pangungumbinsi ni Mariana sa bata.

"Ayoko! Huwag mo akong pilitin, hmp!" sigaw pa nito, patuloy na tinatanggihan ang paanyaya ni Mariana. Mas humigpit din ang pagkakahawak ng bata sa leeg ni Alicia.

Nahirapan siyang kumbinsihin ang sariling anak kaya walang nagawa si Mariana kung hindi hayaan muna si Alicia na pakalmahin si Walter.

"Pasensya na, Mariana, pakakalmahin ko muna si Walter. Nahihirapan kasi siyang makisalamuha sa ibang tao," ani ni Alicia, sinusubukang magpaliwanag para hindi sumama ang loob ni Mariana.

"Ngunit ako ang kanyang ina, ang kanyang tunay na ina!" Pagkaklaro ni Mariana, hindi siya sumasang-ayon sa sinabi ni Alicia. "Ibigay mo siya sa akin, Alicia! Wala kang karapatan na pigilan akong makasama si Walter!"

Nagmatigas si Mariana at biglang kinuha si Walter sa braso ni Alicia, hinila niya ito papalayo sa kanya.

Umalingawngaw ang iyak ni Walter nang subukan buhatin ni Mariana ang bata. Itinitulak nito ang mukha ni Mariana gamit ang maliliit nitong kamay.

"No! Ayaw kitang makasama, Auntie! Mas gusto kong makasama si Mommy!" Marahas na pumiglas si Walter sa mga bisig ni Mariana.

"Walter, ako ang tunay mong ina. Hindi siya!" galit na sigaw ni Mariana, naiinip na siya rito at hindi talaga siya sanay na mag-alaga ng maliit na bata.

"Mommy! Mommy! Don't leave me!" Mas lalong lumakas ang pag-iyak ni Walter.

Hindi kinaya ni Alicia na marinig na umiiyak si Walter na ganoon kalakas kaya hinawakan niya ang maliit na katawan ni Walter mula sa mga braso ni Mariana para agawin.

Sa mahigpit na yakap ni Alicia, dumaloy ang mga luha ni Walter habang kumakapit sa kanyang puting damit.

"Don't worry, darling, nandito lang si Mommy,” bulong ni Alicia para pakalmahin si Walter.

Humihikbi pa rin ang bata, at mayamaya, nagsimula itong kumalma ng dahan-dahan. Napalingon si Alicia kay Mariana na ngayon ay nag-iigting ang panga sa inis.

"Medyo mahirap kumbinsihin si Walter, kailangan mong dahan-dahanin para hindi siya magalit," payo ni Alicia para maunawaan ni Mariana.

Malungkot ang ekspresyon ng mukha ni Mariana, inis na makitang mas gusto ng anak si Alicia kaysa sa kanya.

"Stepmother ka lang niya, Alicia. Huwag mong isipin na dahil ikaw ang nag-aalaga sa kanya, akala mo makukuha mo na siya sa akin!" Napasigaw si Mariana, kasabay ng pagsulpot ni Woodley.

"Hindi naman sa ganun, Mariana. Pero—"

"What's happening?"

Napalingon si Alicia sa malakas na boses mula sa likuran. Gayunpaman, mabilis na sumugod si Mariana kay Woodley at humawak sa braso ni Woodley na bakas ang pagkalito sa mukha.

"Pinagbawalan ako ni Alicia na makasama ang anak natin, Woody," umiiyak na sabi ni Mariana. "Kahit ako ang biological mother ni Walter, hindi niya ako gustong makasama, pero bakit mas pinipili niya pa si Alicia?" reklamo ni Mariana habang napapahikbi.

Samanatala, nanlaki ang mga mata ni Alicia na tumingin kay Mariana dahil hindi niya inaasahan na gagawa ito ng drama.

"Alicia!" hirit ni Woodley, at matalim siyang tinitigan.

Mabilis na umiling si Alicia bilang pagtanggi. "H-hindi sa ganun, Woody! Umiiyak si Walter at ayaw niyang sumama kay Mariana. Pinipilit ko lang na pakalmahin ang bata, hindi ko naman siya pinagbabawalan."

"Sinungaling! Halatang pinagsabihan mo ang bata na huwag sumama sa akin kaya niya ako tinatanggihan!" pag-aakusa ni Mariana, "Ano bang kasalanan ko sayo Alicia para ipagkait mo sa akin ang anak ko?"

Naipit si Alicia sa ginawang kadramahan ni Mariana, kahit wala talagang katotohanan ang kanyang mga sinabi.

Ang mga mapungay na mata ni Woodley ay nabahiran ng galit, kaagad niyang inagaw si Walter sa mga braso ni Alicia na kumukulo na rin ang dugo.

Pinigilan ni Alicia ang kamay ng asawa. "Woodley, hindi ko ginawa ang sinasabi ni Mariana!" Depensa niya sa sarili.

"You have no rights whatsoever regarding to my child, Alicia! So, stop this nonsense!" Bulyaw ni Woodley, sabay bitaw sa kamay ni Alicia.

"Pero Woody—"

Napalunok na lang ng laway si Alicia na iniwasan ng tingin ng asawa, pinagmasdan niya nalang ito na binuhat si Walter at idinala papalabas ng pinto. Habang naiwan si Alicia kasama si Mariana sa salas.

Isang pilyong ngiti ang sumilay sa mga labi ni Mariana at pinagtaasan ng kilay si Alicia na walang emosyon ang mukha.

"Pasensya na Alicia, pero mukhang malapit nang matanggal ang posisyon mo bilang asawa ni Woodley," tahimik at malinaw na bulong ni Mariana.

"Maghanda ka ng magligpit dahil babalik ako at mapapasakin ulit si Woodley at Walter!"

Natahimik si Alicia na may namumuong luha sa mga mata. Walang ng ibang sinabi si Mariana, kung hindi tumalikod at kinawayan si Alicia, "Bye, Alicia!" aniya at may panunukso sa kanyang boses.

Nang sumara ang pinto ng bahay, naiinis si Alicia sa ginawa ni Mariana na ipinaglaban pa ni Woodley. Kahit sinubukan niyang magpaliwanag, ni hindi siya pinaniwalaan ng asawa.

Napaupo nalang si Alicia sa sofa at napahilamos ng mukha. Nalulungkot siya na nagsisimula ng umatake si Mariana sa kanya para mapaalis siya sa kanilang tahanan.

Tinapik-tapik ni Alicia ang kanyang masikip na dibdib, hanggang sa biglang may naramdaman siyang mainit na dumadaloy mula sa kanyang ilong.

"D-dugo," marahang pinunasan ito ni Alicia  at naramdaman din ang pagdaloy ng kanyang mga luha. "W-why?"

Isang matinding sakit ng ulo ang biglang tumama kay Alicia at hindi tumigil ang dugo na umagos sa kanyang ilong.

Dahan-dahang bumangon si Alicia sa kanyang kinauupuan, nanginginig din ang mga binti niya at paa, hindi makalakad ng maayos sa matinding pagkahilo.

"Tulong!" Napasigaw si Alicia, sinusubukang tumawag ng katulong sa loob ng bahay.

Nagpasuray-suray siya papalapit sa dingding bago nandilim ang kanyang paningin at ang kanyang katawan ay parang nawalan ng lakas kaya siya natumba sa sahig,

Napasigaw ang isang katulong na kalalabas lang mula sa kusina nang makita niya si Alicia na nakahandusay sa malamig na sahig.

"Madame Alicia!"