Chapter 3

"OKAY ka na ba talaga, Amelie?"

Nakasunod sa akin si Sunny, pero hindi ko siya pinapansin. Kanina pa siya tanong nang tanong kung ayos lang ako.

"Oo, ayos lang ako. Puwede ba, Sunny? Umuwi ka na nga!" Binuksan niya ang pinto ng bahay ng lola niya na hindi nililingon si Sunny.

"I-I'm sorry—"

"Tss! Umuwi ka na, puwede?" Inis niyang hinarap si Sunny dahil napipikon na siya.

Bakit ba kinukulit siya nito at hindi na lang umuwi? Sinabi na nga niyang okay na siya, nangungulit pa rin.

Napayuko si Sunny dahil sa pagsinghal niya. Bigla naman siyang nakonsensiya dahil sa nagawa, pero pinigil niya ang sarili na lapitan ito at aluin. Naiinis kasi siya. Naiinis siya na nakikita itong nagiging malapit kay Tristan. Nakararamdam siya ng takot. Maganda si Sunny, 'di hamak na mas maganda sa kaniya at nakikita niyang nakikita iyon ni Tristan.

Kinagat niya na lang ang pang-ibabang labi niya at tuluyan nang pumasok sa loob ng bahay ng lola niya na hindi man lang inaaya sa loob si Sunny.

"Oh, Amelie? Parang narinig ko 'yong kapatid mo, hindi mo man lang pinapasok muna?" salubong ng lola niya sa kaniya.

"E-Eh, uuwi na raw po siya, 'La. T-in-ext na kasi siya ni Daddy," pagsisinungaling niya.

Ang dami na niya ng kasinungalingan ngayong araw.

"Ganoon ba? Oh, kumain ka na rito," aya nito sa kaniya.

"Busog pa po ako, 'La, aakyat na lang ako sa taas," aniya at nagtatakbo na papunta sa silid niya.

Agad siyang nag-dive sa kama niya at tumihaya ng higa paharap sa kisame. Inaalala niya ang lahat ng nangyari. 'Yong kilig na naramdaman niya nang kausapin at magpasalamat sa kaniya si Tristan. Hinila niya ang unan niya at niyakap iyon habang ini-imagine na si Tristan ang kayakap niya.

Natigil lang siya sa pagpapantasya nang maalala ang half sister, mapasimangot na lang siya. Ipinikit niya ang mga mata para muling pangarapin si Tristan.

Madilim na nang magising siya. Naroroon na rin ang mommy niya nang bumaba siya. Humalik siya rito at sumalo sa mga ito sa hapag.

"Si Lolo po?' tanong niya sa lola niya.

"Nanonood. Mamaya na raw siya kakain."

Napansin niyang napasimangot ang mommy niya. Alam niya na kung bakit. Hindi kasi gusto ng lolo niya na mag-asawang muli ang mommy niya kaya hanggang ngayon ay hindi pa rin nagkakabati ang mga ito.

Hindi na lang siya umimik at tahimik na lang siyang kumain. Nang makatapos ay umakyat siya ulit sa kuwarto niya. Naglaro na lang siya sa cellphone niya dahil wala namang ibang magagawa sa bahay ng lola niya.

"Nag-half bath ka na ba?" ani ng mommy niya nang sumungaw sa pintuan ng kuwarto niya.

"Hindi pa," sagot niya na ang mga mata ay nasa gadget pa rin.

Bumuntonghininga ito. "Dalaga ka na, Amelie, pero kung hindi kita sasabihan ay hindi ka makakaisip maghugas ng katawan mo bago ka humilata riyan sa kama mo. Ang laki-laki mo na, pero lahat na lang ba kailangan pang ipaalala sa 'yo? Why don't you act like, Sunny? 'Yong kapatid mo na 'yon kung kumilos parang dalagang-dalaga na."

May kirot siyang naramdaman. Sunny na naman. Lagi na lang si Sunny ang napupuri ng lahat.

"Ano? Hindi ka pa rin kikilos?" sermon pa rin ng mommy niya.

Nakalabing tumayo na lang siya at kinuha ang tuwalya saka pumasok sa banyo, hindi na niya pinansin ang panenermon ng mommy niya. Kabisado naman na niya ang lintanya ng mommy niya. Puri papuri at pagkukumpara ang lalabas sa bibig nito. Siya ang mas matanda kay Sunny, pero si Sunny ang role model para sa mommy niya.

Bakit kaya hindi na lang sila naging 100% na magkapatid ni Sunny? Siguro kung nagkataon kasing ganda rin siya ni Sunny, kasing graceful din nito kumilos, kasing talino.

Siguro marami ring magkakainteres na makipagkaibigan sa kaniya.

MAAGA siyang nagising kinabukasan, pagkatapos niyang mag-almusal ay tumawid ulit siya sa kabilang bahay. Nakita niya si Kuya Travis na nagbubunot ng damo sa lawn.

"Hoy, ang aga mo na naman!" sigaw nito sa kaniya at sinenyasan siyang lumapit dito.

Naglakad naman siya palapit kay Kuya Travis. Wala itong t-shirt at boxer lang ang suot-suot nito sa lumang salakot. Mukha itong magsasaka, guwapong magsasaka. Napangisi siya, kung si Tristan lang naabutan niyang ganito ang ayos ay buong-buo na ang umaga niya.

"Bakit?" tanong niya kay Kuya Travis nang makalapit siya rito.

"Ikaw!" Duro nito sa kaniya na naniningkit ang mga mata.

Nagulat naman siya kaya napaatras siya.

"'Di ka nagsasabi ng totoo kahapon. Pinanood ko 'yong CCTV, kitang-kita kong sinadya ni Drake na mahulog ka sa pool," galit na anito sa kaniya.

Namilog naman ang mga mata niya sa sinabi nito.

"CCTV?"

"Oo. Masyado kang die hard sa kapatid ko." Nagyuko ito ng ulo. "Kahit napapahamak ka na," anito na ikinapula ng mukha niya.

Napalabi siya at hindi nakasagot. Totoo naman kasi 'yon, totoong patay na patay siya kay Tristan. Bata pa lang siya ay malaki na ang pagkakagusto niya rito at kahit teenager pa lang siya ay alam niyang mahal na niya ito.

"Umiwas ka na kay Tristan, Amelie," pagkuwan ay narinig niyang ani Kuya Travis, nakatutok ang mga mata nito sa binubunot na damo. Ngayon niya lang ito nakita na ganito kaseryoso kaya naman hindi niya alam kung ano'ng isasagot niya. "Masasaktan ka lang."

Natawa siya at napakamot na lang sa gilid ng noo niya. Alam niya na 'yon, matagal na. Tanggap niya naman na imposible siyang magustuhan ni Tristan, pero ano'ng magagawa niya? E, sa batang puso niya ito ang sinisigaw.

"Big girl na ako," aniya na ikinalingon ni Kuya Travis. Ngumiti siya at ikiniling ang ulo. "And big girls don't wait to be loved. They make way to be loved, Kuya Travis," aniya at nakangiting tinalikuran ito.

Pumasok siya sa bahay at agad na hinanap si Tita Bianca, nangako kasi ito na tuturuan siyang mag-bake. Alam niya naman na kapag linggo ay wala si Tristan at naroon sa mga kabarkada nito. Gusto niya lang talaga na tumambay sa bahay ng mga ito. Feel na feel niya kapag umuuwi si Tristan at naroon siya. Feeling niya mag-asawa sila ni Tristan and she's waiting for him for dinner. She loved imagining it.

"UY, si Tristan!"

"Saan?" Nagtaas siya ng tingin mula sa ginagawa at lumingon-lingon.

Narinig niya naman ang paghagikgik ni Tere sa tabi niya na kumakain ng Piattos at may hawak na Zesto. Nasa bench sila malapit sa quadrangle kung saan pinipilit niyang tapusin ang project niya sa Science dahil mamaya na ang pasahan. Nakalimutan niya kasing gawin iyon dahil nalibang siya sa panonood ng Vampire's diaries sa N*****x.

"Para kang tanga!" Inis na inirapan niya ang kaibigan, imbis kasi na tulungan siya nito ay pinagti-trip-an pa siya, parang tanga lang. Hindi na nga niya nagawang mag-lunch.

"'Andiyan naman talaga! Ayun, oh! Tingin ka sa kaliwa mo."

Tumingin naman siya sa kaliwa niya, namilog ang mga mata niya nang makita niya nga si Tristan. Kasama nito sina Bench, Drake, Justin, Carlo, Eve at . . . si Sunny na naman.

Naghaharutan ang mga kaibigan ni Tristan habang kaagapay naman nito sa paglalakad ang kapatid niya. Maraming estudyante ang napapatingin sa mga ito. Sikat kasi ang grupo nina Tristan sa school.

Nawala ang pamimilog ng mga mata niya, naningkit iyon habang nakatingin kina Tristan at Sunny na sweet na nag-uusap.

"Sila na ba ng sissy mo?" tanong ni Tere sabay subo ng Piattos. Nakatingin din ito kina Tristan na naupo sa waiting shed na malapit sa kinaroroonan nila. Kita niya pa kung paano inalalayan ni Tristan si Sunny para makaupo.

"Ewan." Nag-iwas siya ng tingin at binalingan ang Science project niya. May munting kirot siyang nararamdaman at inggit.

Hanggang sa mag-bell ay hindi na niya nilingon ang puwesto nina Tristan at Sunny. Nawala na rin siya sa mood gumawa ng project kaya hindi niya na rin natapos. Ang bigat ng pakiramdam niya.

Wala sa klase ang atensiyon niya kaya ilang beses siyang napagalitan ng teacher nila. Sa Math subject ay halos thirty minutes siyang nakatayo sa likod dahil hindi niya nasagot ang recitation.

"Besh, ang lungkot-lungkot mo, dahil ba nakita mo sina Tristan at Sunny na magkasama?" tanong sa kaniya ni Tere nang lumabas sila ng room.

Hindi naman siya umimik.

"Grabe ka, besh, ano ang feeling ng pinagtaksilan?" nandudumilat na tanong nito sa kaniya.

Hindi siya umimik. Binilisan niya na lang ang lakad para maiwan ito. Tatawa-tawa naman itong sumunod sa kaniya.

"Hoy, Amelie!" tawag sa kaniya ni Tere.

Naiinis siya. Bakit ba ang manhid ng best friend niya? Kung puwede lang mamili ng best friend kaso hindi puwede dahil silang dalawa lang naman ang nagkakasundo sa lahat ng bagay.

"May pinagtutulungang Grade 9 sa likod ng gym!"

Sabi ng isang estudyante. Nabunggo pa siya ng mga ito sa pagmamadali.

"Ang pikon mo talaga!" hinihingal na reklamo ni Tere nang maabutan siya nito.

"May nagsasabunutan daw sa gym," imporma niya rito. "Punta tayo," aya niya. Hindi niya na ito hinayaan na makatanggi dahil hinila niya na ito at nakitakbo na sila papunta sa likod ng gym.

Marami ng mga estudiyanteng miron ang naroroon nang makarating sila. Nakipagsiksikan siya kahit ang iba ay minumura na siya dahil sa paghawi niya sa mga ito. Nakarating sila sa unahan. May tatlong Grade 12 na pinagtutulungan ang isang babaeng estudiyante na halos mahubaran na ng uniform na nakahiga sa sahig.

"Si Sunny!" tili ni Tere. "Si Sunny 'yong pinagtutulungan!"

"Ha?" Gulat na sinipat niya ang mukha ng babaeng nakahiga at nanlaki ang mga mata niya nang makitang si Sunny nga ang binubugbog ng tatlong Grade 12.

"Hoy! Kapatid ko 'yan!" sigaw niya sabay takbo palapit sa mga ito. Bumuwelo siya at malakas na inihampas ang bagpack niya sa babaeng nakakubabaw sa kapatid niya.

Napasubsob naman ang isa. Hinila niya ang buhok ng isang babae na nakadagan kay Sunny para ilayo sa kapatid niya. Hinarap naman siya nito at galit na nakipagsabunutan sa kaniya. Napasigaw siya nang may humila ng buhok niya mula sa likuran. 'Yong babaeng hinampas niya ng bag. Kahit pakiramdam niya mabubunot na ang ulo niya ay hindi niya binitiwan ang buhok ng babaeng nasa harapan niya.

Lumapit naman sa kanila si Tere at sinabunutan ang babaeng na sa likuran niya, pare-pareho silang natumba sa sahig at nagpagulong-gulong hanggang sa may mga nakaisip nang umawat sa kanila.

Itinayo siya ng lalaking umawat sa kaniya. Yakap-yakap siya nito.

"Easy, easy, awat na, Amelie," anito sa kaniya.

Hinihingal na nilingon niya ito. Nagulat siya nang makita ang nakangising si Drake. Agad na humiwalay siya rito at pinulot ang bag niya sa sahig. Nilapitan niya si Tere na nakaupo sa sahig at tinulungang makatayo. Nilibot niya ang paningin. Awat ng ilang kalalakihan ang mga nakaaway nila. Habang pinalilibutan naman nina Tristan si Sunny. Kita niya ang galit at pag-aaalala sa mukha ni Tristan habang hinuhubad nito ang jacket at isinuot sa kapatid niya.

Nakita niya ang ilang kalmot sa mukha at leeg ng kapatid niya. Muli na naman siyang nakaramdam ng galit sa mga nakaaway nito.

"Tara na," aya niya kay Tere.

Pero bago pa sila makaalis ay inakbayan na sila ni Drake. "Sumabay na kayo sa amin," anito.

Nangunot ang noo niya. "Bakit naman kami sasabay sa inyo?" aniya at pilit inaalis ang braso nito sa balikat niya.

"Kasi po baka abangan kayo ng grupo nina Melody sa labas," ani Drake at ininguso ang Grade 12 student na nakaaway nila. Masama ang tingin ng mga ito sa kanila. Hindi na siya umimik at hindi na rin siya tumutol.

"Ayos ka lang, Amelie?" tanong ni Sunny sa kaniya nang makalapit sila sa mga ito.

"Bakit ka nakikipag-away?" nakakunot ang noong tanong niya rito habang inaayos ang butones ng blouse niya na nasira. "May pardible ka ba?" Bumaling siya kay Tere.

Agad namang nagkalkal sa bag nito si Tere kahit hindi pa nito naaayos ang gulo-gulo nitong buhok. Natawa siya sa itsura ni Tere, mukha kasing pugad ng ibon ang buhok nito.

"Mukha kang ni-rape!" aniya sabay tawa.

Sinimangutan naman siya nito habang nagkakalkal sa bag at naghahanap ng pardible.

"Ikaw mukha kang nasilya elektrika!" anito at natawa na rin.

"Ayos, ah? Tuwang-tuwa pa kayong dalawa," nakataas ang kilay na puna sa kanila ni Bench.

Sabay silang napalingon dito. Nakatingin pala ang lahat sa kanila at nawiwirdohan sa kanilang dalawang magkaibigan. Natigilan siya at bahagyang napahiya lalo na nang makitang nakatingin sa kaniya si Tristan.

"Wala akong pardible, besh," ani Tere.

Hinubad ni Drake ang suot niyang jacket at iniabot sa kaniya. "Isuot mo na lang 'to," anito.

Nahihiyang kinuha niya naman iyon at isinuot.