Chapter 5

"ANG ganda mo, Amelie," papuri sa kaniya ni Sunny. Hindi siya umimik at tinitigan lang ang sarili sa salamin.

Naka-messy bun ang buhok niya at may mga hiblang nakakawala sa kaniyang tainga. Manipis lang ang makeup niya, pero dark na red lipstick ang pinalagay niya. Gumanda nga siya, ang kaso . . . mas maganda pa rin ang kapatid niya. Pareho sila ng gown na suot. Isang tube cocktail dress. Kulay itim na maraming sequins ang sa kaniya samantalang baby pink naman ang kay Sunny.

Nagmukha itong dalaga, bumagay sa kulay ng gown ang kutis ng balat nito. Malambot at mala-sutla.

"Maganda ka rin, Miss Sunny," ani ng baklang kumare ng stepmother niya na nag-ayos sa kanilang dalawa. Mayuming ngumiti ang kapatid niya. Maski ang pagngiti nito ay nakahahalina. Lihim siyang napabuntonghininga at isinuot na ang black na three-inches heels niya.

"Tulungan na kita," ani Sunny at yumuko sa harap niya. Nakaupo kasi siya sa harap ng dresser. Hindi niya na ito nasaway dahil inagaw na nito sa kaniya ang sapatos niya. Isa pa nahihiya siya dahil baka masabihan siyang maldita ng mga taong kasama nila.

"Ang gaganda naman ng mga anak ko!"

Sabay-sabay silang napalingon sa pintuan. Naroroon ang daddy niya at nakangiting pinagmamasdan sila ni Sunny.

"But no boyfriends ha?" istriktong bilin nito sa kanila. "Magtapos muna ng pag-aaral."

Napansin niyang hindi makatingin nang diretso si Sunny sa daddy nila. Alam niya kung bakit pero ayaw niyang tanggapin. Hangga't hindi pa nagiging official ang mga ito ay hindi siya maniniwala kahit sinasampal na sa mukha niya na may namamagitan na sa kapatid niya at kay Tristan.

Usap-usapan na iyon sa school simula noong nangyaring gulo sa pagitan ni Sunny at ng mga senior, pero wala namang sinasabi ang mga ito kung sila na ba talaga.

"Ako muna dapat ang magbo-boyfriend!" sabat niya na umani ng matalim na tingin sa daddy niya. "Kasi mas matanda ako kay Sunny, Daddy, kaya dapat ako muna ang magkaka-boyfriend bago siya!" katwiran niya pa.

Napailing na lang ang daddy niya. "Basta no boyfriend before graduation," anito.

"Okay two years na lang puwede na 'ko!" Napapalakpak pa siya.

"Ng college, Amelie!" Galit na muling baling ng daddy niya. Nagtawanan naman ang mga kasama nila. Nagkibit naman siya ng balikat.

Bumaba na sila ng hagdanan dahil kanina pa raw naghihintay ang sundo nila. Bumilis ang tibok ng puso niya nang makita ang isang lalaki na naka-tuxedo at nakatalikod sa kanila. Matikas ang tindig nito at kahit hindi ito humarap ay kilalang-kilala niya kung sino ito, si Tristan.

Muntik nang tumalon ang puso niya nang humarap sa kanila si Tristan. Napakaguwapo nito. Nakaayos ang buhok ni Tristan, naka-wax at naka-brush up pa. May hawak si Tristan na bulaklak na may ribbon. Iyon ang isinusuot ng mga valentino sa mga ka-valentina nila. Isa lang ang hawak ni Tristan at nakadama siya ng lungkot dahil alam niya namang hindi para sa kaniya ang dala nito.

"Good evening," bati ni Tristan sa kanilang lahat. Nakangiti ito sa kanilang lahat. Lumabas tuloy ang mapuputi nitong ngipin.

Unang nakalapit kay Tristan ay ang daddy niya. Agad na inakbayan ng daddy nila si Tristan at binubulungan, seryoso namang tumango-tango si Tristan.

Sabay pa silang nakalapit ni Sunny sa mga ito. Nabaling ang atensiyon ni Tristan sa kanilang magkapatid, sumulyap ito sa kaniya at ngumiti, pagkatapos ay lumipad na kay Sunny ang mga mata nito. Kitang-kita niya ang paghanga nito para sa kapatid niya. Napayuko na lang siya. Lalo na nang mag-umpisang lumakad si Tristan palapit sa kanila.

Parang gusto na niyang maiyak dahil nasisiguro—Napatingala siya at natigil ang pag-iisip niya nang huminto sa harapan niya si Tristan. Nag-angat siya ng mukha at nasalubong niya ang mga mata ni Trista.

"Ang kamay mo," anito.

Parang wala naman sa sariling iniabot niya rito ang mga kamay niya. Kinuha iyon ni Tristan at itinali sa kamay niya ang ribbon na may bulaklak.

Nanginginig ang kamay niya, hindi niya mapigilan dahil ito ang unang beses na sobrang lapit ni Tristan sa kaniya at hawak-hawak pa ang kamay niya. Hindi siya makapaniwala sa nangyayari. Ang buong akala niya talaga ay kay Sunny ito lalapit.

"Ang ganda mo," sabi ni Tristan pero hindi sa kaniya nakatingin kundi sa kapatid niya.

Napabuntonghininga na lang siya.

"Tutuloy na po kami, Tito," paalam ni Tristan sa daddy niya.

"Oh, sige, ingatan mo ang mga dalaga ko ha?" habilin pa ng daddy nila. Humalik sila sa pisngi nito pero humirit pa ng picture taking ang stepmother niya. Pi-ni-cture-an sila ni Sunny ng solo-solo, ng magkasama sila, silang tatlo ng daddy niya at si Sunny, pagkatapos ay kasama si Tristan.

"Kami naman po ni Tristan!" hirit niya na ikinatingin ng lahat sa kaniya. Kinapalan niya na ang mukha niya tutal naririto naman na.

"Ay, oo nga naman, kayo nga naman ang magkapareha. Sige magtabi kayong dalawa," ani ng stepmother niya.

Lumapit naman si Tristan sa kaniya at tumabi.

"Say cheese!" ani ng stepmother niya sabay click ng camera. Ngumiti naman siya, 'yong pinakamagandang ngiti niya. Ito kasi ang unang picture nila ni Tristan.

Sa labas naroon ang sedan na pag-aari ng daddy ni Tristan. Nakatayo sa tabi niyon si Kuya Travis na nakasuot din ng formal.

"Kuya!" bati niya rito. Tumakbo siya palapit kay Travis. "Bakit nandito ka?" tanong niya. "Naka-suit ka pa!"

"Ako ang poging-poging driver niyo ngayon!" Iniliyad pa nito ang dibdib. Binuksan ni Travis ang pinto sa passenger seat ng sedan para sa kaniya. Yumukod pa ito at iminuwestra ang kamay sa pintuan ng sedan.

"Eh, kuya . . ." hindi na niya natuloy ang sasabihin niya nang makalapit sa pintuan ng backseat si Tristan at ipagbukas ng pinto si Sunny. Kitang-kita niya pa ang malagkit na tinginan ng mga ito.

"Sakay na para naman may kausap ako," bulong ni Travis sa kaniya. Hinawakan nito ang siko niya saka giniya papasok sa passenger seat. Nagkatinginan sila at nakita niya ang simpatya sa mga mata nito. Agad siyang nag-iwas ng tingin at nilunok ang namumuong bara sa lalamunan niya.

Mabilis na ring nakaikot si Travis at sumakay sa driver seat nang makaupo siya. Nakagat niya nang mariin ang pang-ibabang labi niya nang makita sa rear view mirror ang boquet ng pulang rosas na ibinibigay ni Tristan sa kapatid niya.

"Hey," pukaw sa kaniya ni Travis. Nilingon niya ito. "Ganda mo ngayon," anito at nginitian siya nang matamis.

Pero mas maganda pa rin sa akin si Sunny . . .

NASA gate na si Tere nang dumating sila sa parking lot ng school nila. Pinagbuksan siya ng pinto ni Travis habang pinagbuksan naman ni Tristan si Sunny.

Ni hindi na siya nilingon man lang ni Tristan, inalalayan na nito si Sunny papasok sa loob ng auditorium kung saan ginaganap ang prom ng senior at junior.

"Oh, sa akin ka na lang kumapit," nakangiting ani Travis saka inilahad ang braso sa kaniya.

Napayuko siya. Siguro awang-awa ito sa kaniya. Hindi rin naman kasi lihim dito ang nararamdaman niya para sa kapatid nito.

Si Travis na ang kumuha sa kamay niya at naglagay niyon sa braso nito.

"Guwapo rin naman ako, ah? Bakit parang lugi ka pa ha, Amelie?" biro nito sa kaniya na nakapagpangiti sa kaniya.

Guwapo naman talaga ang kuya ni Tristan. Marami ang mga babaeng umiiyak dahil dito at nagsusumbong kay Tita Bianca kaya madalas na kagalitan ito ng ina.

"Sige na nga, puwede ka na," biro niya rin at tumawa.

"Aray ha," anito saka sila sabay na nagtawanan.

Sinalubong naman sila ni Tere na nakatingin sa kamay niya na nakakapit sa braso ni Travis. Lumabi ang best friend niya at humalukipkip.

"An'daya! Sabi mo samahan kita 'yon pala may ka-date ka naman!" maktol nito.

Natatawang nilahad naman ni Travis ang kabilang braso kay Tere. "Oh, dito ka. Tampo ka naman kaagad."

Maluwang na napangiti si Tere at sinunggaban ang braso ni Travis. Nagtawanan sila at sabay-sabay nang pumasok sa loob ng auditorium.

Marami ng tao roon, may mga nagsasayaw na rin sa gitna. Lahat ay naggagandahan at nagguguwapuhan ngayong gabi.

Kinawayan sila nina Bench nang makita ng mga ito na kasama nila si Travis. Lumapit naman sila roon. Nandoon na rin sina Tristan at Sunny na nagbubulungan at parang walang pakialam sa paligid.

Ipinaghila sila ng upuan ni Travis. Pinanggitnaan nila ito ni Tere. Si Tere naman ay napapaindak-indak kahit nasa upuan lang at palingon-lingon sa paligid. Kasama nila sa mesa sina Bench at Carlo.

Mayamaya ay narinig niyang kinukulit na ni Tere si Travis na isayaw siya nito. Napapakamot naman sa ulong tumayo si Travis nang hilahin siya ni Tere.

"Saglit naman, excited much ka, 'te?" reklamo ni Travis dahil halos kaladkarin na ito ni Tere. Sayaw na sayaw na 'ata ang best friend niya.

Nang muling bumaling ang mga mata niya kina Tristan at Sunny patayo na rin ang mga ito para sumayaw. Umalis na rin sina Carlo at Bench, naghanap ng mga isasayaw. Naiwan siyang mag-isa sa lamesa.

Malungkot na napabuntonghininga siya at nangalumbaba na lang sa lamesa.

Nagulat pa siya nang may maglahad ng kamay sa harapan. Nag-angat siya ng tingin para alamin kung kanino ang kamay na iyon. Malakas siyang napasinghap nang makita si Tristan na nakatayo sa harapan niya at naghihintay na abutin niya ang kamay nito.

"Can I have a dance with you, Amelie?" tanong nito at parang gusto niya iyong i-record at pakinggan nang paulit-ulit bago siya matulog sa gabi.

Lalaking-laki ang boses ni Tristan. Malamig at tila nakakakiliti.

"Can I?" muling tanong ni Tristan.

Sunod-sunod siyang napatango. Ramdam niya ang panginginig ng palad niya nang iabot niya ang kamay kay Tristan.

Napakalambot ng kamay niya. Bigla tuloy siyang nakaramdam ng hiya dahil medyo magaspang ang kamay niya. Kasalanan iyon ng mommy niya dahil ipinanukala nito sa daddy niya na dapat siya na ang naglalaba ng uniform niya. Kaya naman araw-araw pagkagaling niya sa school nilalab'han na niya ang uniform niya.

Iginiya siya nito sa gitna ng bulwagan. Nakita niya roon si Tere na halos nakasubsob na ang mukha sa dibdib ni Travis at mukhang hindi naman alintana iyon ng huli. Natanawan niya rin si Drake na nakatingin sa kaniya at bahagyang nakanganga ang bibig. Kasayaw ito ni Sunny na nakangiti sa kaniya.

"H-Hindi ako marunong sumayaw . . ." mahinang bulong niya. Ngayon niya pinagsisihan kung bakit hindi siya pumayag noon na mag-aral ng waltz nang i-enroll siya ng mommy niya sa summer camp ng isang dance studio. Mas gusto niya kasing tumambay sa bahay nina Tristan at magpaturo kay Tita Bianca na magluto at mag-bake—at para na rin masilayan si Tristan tuwing bakasyon. Nanghihina kasi siya kapag hindi niya ito nakikita.

"It's okay. I don't know how too." Ngumiti ito sa kaniya.

Nginitian siya ni Tristan! My God! Kung puwede niya lang sanang picture-an ang ngiti nito sa kaniya ginawa niya na.

Namula ang mukha niya nang kunin ni Tristan ang kamay niya at ipatong aito sa balikat nito. Napapiksi rin siya nang hawakan siya sa baywang ni Tristan. Para siyang posteng nanigas sa kinatatayuan niya.

"Relax," natatawang anito.

Namula naman ang mukha niya at napayuko. Hindi niya masalubong ang mga mata nito dahil sa hiya.

Marahang gumalaw si Tristan. Nagulat siya, marunong sumayaw si Tristan! Nadadala rin siya nito kaya dalawang beses niya lang natapakan ang paa nito sa buong kanta at nagawa na niyang i-enjoy.

Masayang-masaya siya sa mga nangyayari. Sulit naman pala kahit ginamit lang siya nito para makasama ang kapatid niya. Satisfied siya dahil napakaraming bagay ang na-experience niya. Inaya siya ni Tristan na sumayaw, nahawakan niya kamay nito, naging malapit dito sa loob ng tatlong minuto, at isa pa naisayaw siya nito na noon niya pang pinapangarap.

Hindi na nga niya napansin na tapos na pala ang kanta kung hindi pa tumikhim si Tristan. Inihatid siya nito pabalik sa lamesa saka bumalik kay Sunny.

Hindi na siya masyadong bitter. Sobrang saya niya at naranasan niyang makasayaw si Tristan. Ganoon pala ang feeling. Para siyang nakalutang sa ulap.

"Abot langit ang ngiti natin, besh, ah?" tudyo sa kaniya ni Tere.

Kagat-labing inalog-alog niya ang balikat nito, kilig na kilig siya.