Chapter 6

NANG sumunod na pasukan ay nalungkot siya. Wala na kasi si Tristan sa school nila. Tapos sa Manila pa ito nag-aral ng college. Do'n na rin ito magbo-board dahil hussle kung uuwi pa ito araw-araw.

Ang nagbibigay lakas na lang sa kaniya ay ang araw ng Sabado at Linggo kung saan uuwi si Tristan.

Doon niya na lang ito nakikita. Madalas sa nakakasabay niya ito sa agahan. Pero madalas itong wala. Lagi nitong kasama si Sunny. Sa tingin niya may relasyon na ang dalawa pero hindi lang umaamin.

Mas okay na rin na hindi pa umaamin ang dalawa dahil alam niyang masasaktan lang siya nang sobra kapag nalaman niya ang totoo. Mas madaling magpanggap at paniwalain ang sarili sa bagay na gusto niyang paniwalaan kaysa harapin ang katotohanan na may ugnayan na ang kapatid niya at ang lalaking mahal niya.

"Amy, puwede mo bang gisingin si Tristan? Ang alam ko kasi may lakad siya ngayon at nagpapagising nang maaga, hindi ko naman maiwan itong whini-whisk ko dahil baka 'di ko makuha ang consistency na gusto ko," ani sa kaniya ni Tita Bianca.

Muntik na niyang mabitiwan ang hawak na spatula dahil sa narinig.

"A-Ako po?" tanong niya.

"Oo, please, hija. Pakigising mo na ang bunso ko na 'yon," nakangiting ulit nito.

Kung sinasadya man iyon ni Tita Bianca o hindi, wala na siyang pake. Dali-dali na siyang nagtanggal ng apron dahil baka biglang pumasok si Ate Melba at ito pa ang mautusan.

Malakas ang kabog ng dibdib niya habang naglalakad patungo sa kuwarto ni Tristan. Wala sina Tito Henry at Kuya Travis ngayon dahil sinamahan ni Tito Henry si Kuya Travis na mag-submit ng candedacy for SK Chairman.

Huminga muna siya ng ilang ulit at inayos ang buhok at damit bago kinatok ang pinto ni Tristan. Nakailang katok na siya at tawag dito pero hindi ito sumasagot. Kaya naman nagpasya na siyang buksan na lang ang pinto. Bumukas naman agad nang pinihit niya ang seradura.

Sumalubong sa kaniyda ang lamig ng aircon mula sa kuwarto ni Tristan. Medyo madilim dahil nakasarado ang makakapal na kurtina sa nag-iisang bintana.

Aninag niya naman ang kama kung saan padapang nakahiga roon si Tristan. Namula ang mga pisngi niya habang nakatingin sa hubad nitong likuran. Malapad at makinis ang likod ni Tristan. Napansin niya na mas lumalapad ang katawan ni Tristan simula nang mag-aral ito sa Manila. Mas tumangkad din ito. Nagbago rin ang pananamit nito. Mas naging maporma kaya mas lalong pinagkakaguluhan si Tristan ng mga kababayan nila kapag umuuwi ito.

Lumapit pa siya sa kama. Pinagmasdan niya muna si Tristan nang matagal. Pinagsawa niya ang mga mata sa maamo nitong mukha. Para itong baby na napakainosente habang natutulog. Bahagyang nakatagiid ang mukha nito paharap sa kaniya kaya medyo naka-pout ang labi ni Tristan. Para talagang baby. Natural na mapula ang labi ni Tristan, makakapal din ang pilikmata nito at matangos ang ilong. Daig pa nito ang isang artista sa kinis ng mukha, ni parang walang pores.

Nahaplos niya tuloy nang wala sa oras ang mukha niya, napangiwi siya dahil oily na siya.

Muli niya sanang tatapikin si Tristan nang bigla itong gumalaw. Sa sobrang taranta niya ay dumapa siya sa ibaba ng kama. Nang maramdaman niyang mas lumundo pa ang kama ay nagsumiksik siya sa ilalim ng kama. Takot na baka mahuli siya ni Tristan na nasa loob siya ng kuwarto nito.

Naduling siya nang tumapat sa kaniya ang mga paa ni Tristan. Inis na nasabunutan niya na lang ang ulo. Bakit ba kasi nagtago-tago pa siya? E, may dahilan naman siya kaya siya nasa kuwarto ni Tristan, pero dahil sa pagkataranta niya ay sumuot siya sa ilalim ng kama nito at inilagay ang sarili sa alanganin. Paano siya ngayon lalabas sa kinaroroonan niya at ipaliliwanag kung bakit siya nagsumiksik dito nang hindi siya napag-iisipang freak ni Tristan?

Napatakip siya sa bibig niya nang malaglag sa mga paa ni Tristan ang pajama nito. Napanganga siya nang maglakad si Tristan papunta sa closet nito at kumuha ng tuwalya. Kitang-kita mula sa kinaroroonan niya ang matambok na pang-upo nito. Nang haharap si Tristan ay agad siyang pumikit. Hindi pa siya handang makita ang lahat-lahat kay Tristan. Isinubsob niya ang mukha sa sahig at pinakinggan ang mga yabang ni Tristan. Narinig niyang bumukas ang pinto ng banyo, kasunod niyon ay ang lagaslas ng shower.

Naliligo na si Tristan. Kinuha niya naman ang pagkakataon na iyon para umalis sa ilalim ng kama at dahan-dahang lumabas ng kuwarto ni Tristan. Napasandal siya sa likod ng pintuan ni Tristan habang hawak ang kaniyang kaliwang dibdib. Ang lakas ng kabog ng dibdib niya. Nagwawala iyon at gustong kumawala sa ribs niya.

"Oh, Amelie? Bakit pawis na pawis ka? Saka bakit nandiyan ka sa labas ng kuwarto ni Tristan?" takang tanong ni Ate Melba, galing ito sa kuwarto ni Kuya Travis bitbit ang mga maruruming damit.

Napalunok siya dahil nanunuyo ang lalamunan niya. Pinunasan niya rin ang pawis niya. "G-Ginising ko si Tristan, Ate Melba, inutusan a-ako ni Tita," nabubulol na sagot niya sa tanong nito.

Nagdududa naman siyang tiningnan nito, pero hindi na nagtanong. Tumalikod na ito. Siya naman ay nanginginig ang mga tuhod na bumalik sa kusina. Nililigpit na ni Tita Bianca ang ilang pinaggamitan nila sa pagbe-bake. Itinuloy na rin nito ang ginagawa niya kanina na paglalagay ng icing sa cake.

"Oh, Amelie, gising na ba si Tris—Okay ka lang ba, hija?" nag-aalalang tanong nito. Binitiwan ni Tita Bianca ang ginagawa at nilapitan siya. Sinalat nito ang noo niya. "Ang lamig ng pawis mo," anito.

Hindi naman siya makaimik. Shock pa rin kasi siya sa nakita. Ayaw ng mawala sa balintataw niya ang . . . omg, nagiging pervert na siya!

"S-Sinisikmura po 'ata ako, Tita," pagpapalusot niya.

"Naku, maupo ka muna at ipagtitimpla kita ng gatas para mainitan 'yang sikmura mo."

Inakay pa siya nito paupo sa high stool at pinaupo siya roon. Ipinagtimpla siya nito ng gatas. Nakonsensiya naman siya dahil nag-alala pa ito sa kaniya dahil sa kalokohan niya.

"Here, inumin mo muna 'yan." Inilapag ni Tita Bianca ang isang basong gatas sa mesa.

Kahit tuloy hindi siya mahilig sa gatas ay napainom siya.

NAGING madalang na ang pag-uwi ni Tristan dahil mas naging busy na ito sa pag-aaral. Ang noon na linggo-linggong uwi nito ay naging buwanan na, hanggang sa kada semester na lang ito umuuwi.

Lungkot na lungkot siya dahil miss na miss niya na ito pero wala siyang magawa. Tinutukan niya na lang ang pag-aaral para naman makakuha siya ng mataas na grade at payagan siyang sa Manila na rin mag-aral kung saan nag-aaral si Tristan.

Ang kaso hindi siya pinayagan ng mommy niya. Bakit pa raw siya lalayo kung may university naman sa bayan nila? Iniyakan niya iyon. Asang-asa kasi siya na kapag gr-um-aduate siya ng senior high ay makakasama na ulit niya si Tristan sa isang eskuwelahan.

Mas lalo pa siyang naiyak nang makalipas ang isang taon ay si Sunny naman ang naka-graduate at napayagang makapag-aral sa university kung saan nag-aaral si Tristan.

Masama ang loob niya. Iniisip niya pa lang na magkakasama sina Sunny at Tristan ay selos na selos na siya. Araw-araw nang magkikita ang dalawa, paniguradong mas lalalim ang ugnayan ng mga ito na ikinatatakot niya.

Dumating ang graduation ni Tristan, may hinandang party para dito. Muling nagkakulay ang mundo niya. Darating si Tristan at muli na naman niyang makikita nang personal. Tanging sa social media na lang kasi niya ito nakikita, doon na lang din siya nakikibalita at paminsan-minsan ay kay Tita Bianca.

Tumulong siya para sa graduation party ni Tristan. Mamayang gabi ang dating nito kasama ang mga magulang. Hindi nito alam na may inihanda para ditto, ang alam lang nito ay may munting salo-salo.

Excited na excited siya. Nang matapos niyang gawin ang cake na para kay Tristan ay nagmadali siyang pumunta sa parlor para magpa-hot oil, magpa-pedi, at mani. Gusto niyang magandang-maganda siya kapag nakita siya ulit ni Tristan.

"NANDIYAN na sila!" impit na tili ni Ate Melba.

Nakapatay ang mga ilaw at nagsama-sama sila sa isang sulok sa sala para magtago. Kumpleto ang mga barkada ni Tristan. Narito rin si Tere at ilang classmate ni Tristan noong senior high.

Narinig niya ang pagbukas ng pinto. Inayos-ayos niya ang buhok. Pumuwesto siya sa unahan para siya ang unang makikita ni Tristan pagpasok nito. Hawak niya ang party popper. Nang bumukas ang ilaw at bumaha ang liwanag ay dalawa sila ni Tristan na nagulat. Hindi niya tuloy napaputok ang party popper. Natulala siya sa babaeng kasama ni Tristan. Si Sunny.

Mas lalong gumanda at mas naging sopistikada. Gaya ni Tristan, hindi niya na rin masyadong nakikita ang kapatid. Ni hindi niya nga ito ina-accept sa f******k. Insecure na kung insecure, pero ayaw niyang nakikita ang mga litrato ng kapatid sa social media dahil kinakain siya ng insecurities niya.

Sikat ang kapatid niya dahil may sarili itong vlog at rumarampa rin ito para sa ilang kilalang brand dito sa Pilipinas. Ang layo-layo ni Sunny kumpara sa kaniya—at ngayong nakikita niya ito katabi si Tristan, kumikirot kasi ang puso niya dahil bagay na bagay ang dalawa.

"Uy, Amelie, natulala ka na riyan?" bulong sa kaniya ni Kuya Travis na kaakbay si Tere na ngayon ay kasintahan na nito. Siniko pa siya ni Kuya Travis. Napakurap-kurap naman siya. Ngayon niya lang napansin na nasa kaniya na pala ang atensyon ng ibang tao roon. Dahil sino ba sa mga naroroon ang hindi nakakaalam kung gaano siya kabaliw kay Tristan? Malamang na natatawa ang mga ito sa kaniya.

"Yey!" aniya. Walang buhay at saka pinaputok ang party popper kahit tapos na. Binuntutan niya iyon ng tawang wala ring buhay.

Naramdaman niya namang may umakbay sa kaniya at nang tingalain niya iyon ay ang nakangiting mukha ni Drake ang sumalubong sa kaniya.

"Lutang na naman 'tong si Amelie. Gutom ka na, 'no?" anito. "Kainan na!" sigaw nito saka siya giniya papunta sa buffet na inihanda nila. Dahil naman doon ay nawala na sa kaniya ang atensiyon ng mga tao.

"Official na ba ang kapatid mo at si Tristan?" bulong sa kaniya ni Tere na kasama niyang kumukuha ng pagkain. Si Kuya Travis kasi ay nakikipag-usap sa ibang mga kakilala nitong dumating.

"Ewan," sagot niya. Ngayon niya pinagsisisihan kung bakit hindi niya ini-stalk ang kapatid.

"Mukhang sila na pero ayaw lang umamin. Tingnan mo, oh, kung magtinginan ang lagkit-lagkit."

Tiningnan niya rin sina Tristan at Sunny na magkatabi sa isang mesa kasama ang ibang barkada ng mga ito. Dikit na dikit ang mga ito na halos wala ng espasyo sa gitna. Halos subuan din ito ni Tristan ng pagkain.

"Siguro natatakot siyang umamin dahil mananagot siya kay Daddy," aniya kay Tere. Mahigpit kasing bilin ng daddy nila na hindi sila puwedeng mag-boyfriend hangga't hindi sila nakaka-graduate ng college. At dahil pareho sila ni Sunny na Daddy's girl ay sinusunod nila iyon.

"Baka nga. Maiba pala ako, nanliligaw ba sa 'yo si Drake?"

Nangunot naman ang noo niya sa tanong ni Tere. "Nanliligaw? Si Drake? Sa akin?"

Tumango lang ito dahil hindi makapagsalita. Ngumunguya na ito ng lumpia.

"Hindi, ah!" natatawang tanggi niya. May mga ilan na ngang nagtatanong kung nanliligaw ba sa kaniya si Drake. Sa iisang university kasi sila nag-aaral ni Drake. Ito lang 'ata sa mga magbabarkada ang nanatili rito sa bayan nila at hindi nag-aral sa Manila. "May jowa 'yon! 'Yong taga PolSci," aniya. Natatawa. Hindi niya kasi ma-imagine na magkakagusto sa kaniya si Drake.

Oo nga at hindi na sila parang aso at pusa, medyo naging close na rin sila, pero katulad ng nararamdaman niya kay Kuya Travis ay parang isang nakatatandang kapatid lang ang turing niya kay Drake at sa tingin niya naman ay ganoon din ito sa kaniya.

Nagkibit-balikat naman si Tere. "Sabi mo, e," anito.

Naiiling na hindi na lang din siya nakipagtalo kahit pa gusto niyang ipagpilitan na hinding-hindi siya liligawan ni Drake. Ang gaganda kaya ng mga nali-link kay Drake. Noon kasi asar siya kay Drake kaya hindi niya naa-appreciate na guwapo naman din ito katulad ni Tristan, hindi rin papahuli kung physical na aspeto ang pag-uusapan. At ang mga kagaya niya ay hinding-hindi papatusin ni Drake. Mahilig iyon sa mga sosyal kagaya ng mga kapatid niya. Ang alam niya nga, ang bagong girlfriend ni Drake ay isang modelo na taga kabilang bayan.

Sinalubong sila ni Kuya Travis, kinuha nito ang hawak ni Tere at inalalayan pa ang kaibigan niya sa paglalakad. Minsan naiinggit siya sa kaibigan niya, kitang-kita niya kung gaano ito kamahal ni Kuya Travis. Hatid-sundo pa ni Kuya Travis si Tere sa school, minsan nagseselos na siya kasi madalas nang makasama ni Tere si Kuya Travis, pero iniisip niya na lang na siguro kung magiging sila ni Tristan baka ganoon din ang mangyari—baka mas marami siyang oras para kay Tristan.

Malapit sa puwesto nina Tristan sila naupo. Nagpasalamat na lang siya na hindi sa mismong lamesa ng mga ito sila dinala ni Kuya Travis.

"Okay ka lang ba, Amy?" tanong sa kaniya ni Kuya Travis.

Ngumiti siya rito at tumango. "Oo naman. Ahmm, mag-CR lang ako," paalam niya sa mga ito.

Tumayo siya at nagtungo sa loob ng bahay, pero hindi siya pumasok sa banyo. Dumaan siya sa backdoor kung saan may daan patungo sa garden, doon siya nagtungo.

Natigil lang siya sa paghakbang at dali-daling nagkubli nang makita niya sina Sunny at Tristan na nasa 'di kalayuan at magkayakap.

"Kailan mo ba ipapaalam sa mga magulang natin na tayo?" tanong ni Tristan kay Sunny.

Daig niya pa ang nasampal sa narinig. Masakit pala talaga ang katotohanan. Pakiramdam niya kasi parang nilalamukos ang puso niya.

"'Di ba napag-usapan na natin 'to? After college puwede na nating sabihin sa lahat."

"And it's two years from now."

"Just, just two year. Mabilis lang naman lumipas ang mga araw."

Narinig niya ang pagbuntonghininga ni Tristan. "Pero tuloy pa rin naman ang paglipat mo sa condo ko, hindi ba?"

"Of course . . ."

Napatakip siya sa bibig niya. Kung ganoon maybalak nang magsama ang dalawa? Nakaramdam siya ng galit. Hindi siya papayag.