Chapter 4

Alas nuebe na ng gabi nang makauwi ng villa sina Benedict at anak na si Lilia. Kinuha ni Benedict ang mga pinamiling damit para kay Lilia mula sa sasakyan at saka bumaba ng sasakyan. Dahil alam ni Lilia na naroon ang kaniyang ina ay wala itong kagana-ganang umuwi. Ni ayaw na nga nitong umuwi kung tutuusin pero dahil sinabihan siya ni Aireen na umuwi ang kaniyang ina para lang makasama silang dalawa ng kaniyang daddy. Dagdag pa ni Aireen sa kaniya na malulungkot ang kaniyang ina sa oras na hindi siya umuwi. Sinabi rin ni Benedict na kapag hindi sila umuwi tiyak na yayayain sila ng kaniyang ina para magpunta sa beach kinabukasan. Wala siyang pagpipilian kaya mas pinili na lang niyang umuwi kaysa mangyari ang mga iyon. Pero kahit ganoon ay nag-aalala pa rin siya kaya tinanong niya na ang kaniyang ama, “Daddy, anong gagawin natin kapag pinilit pa rin tayo ni mommy na lumabas bukas?”

“I would say no,” tugon naman ni Benedict para mapanatag ang anak. “Okay na ba ‘yon, baby?”

Sa ilang taong ng kanilang kasal, lagging gumagawa ng paraan si Mikaela para magkaroon sila ng oras bilang isang buong pamilya. Paminsan ay niyayaya niya ang kaniyang mag-ama na kumain sa labas o hindi naman kaya ay mamasyal sa mga amusement parks pero ni minsan ay hindi pumayag si Benedict sa mga gusto niyang mangyari.

Naniniwala naman si Benedict na basta gusto ng kanilang anak, tiyak na susundin niya ito kahit na labag ito sa kalooban ng kaniyang asawa.

Nakahinga ng maluwag si Lilia dahil sa naging tugon sa kaniya ng kaniyang ama. Dahil doon ay mabilis napalitan ang mood niya at kuminang ang mga mata, “okay, daddy. I love you.”

“I love you too, baby,” tugon ni Benedict sa anak. Gusto niya ring maibigay sa anak ang kaligayahang nais nito at kung ang kagustuhan nito ay tuluyang lumayo kay Mikaela, ay walang pagdadalawang isip niyang pagbibigyan ang anak lalo pa at iyon din ang gusto niyang mangyari.

Kaagad namang lumapit si Lilia sa yaya nitong si Ester at sinabing gusto niya nang maligo.

“Okay, okay,” tugon naman ni Ester sa bata.

Sakto namang lumapit ang mayordomang si Cora kay Benedict nang maalala ang bilin sa kaniya ni Mikaela. Kaagad niyang inabot kay Benedict ang isang brown envelope nang hindi sinisilip man lang ang laman nito. Alam din kasi ni Cora na kapag pribadong bagay ay dapat na manatiling pribado lalo na kung tungkol sa mag-asawa. “Sir, pinabibigay po ni Madam. Bilin niya po na iabot ko agad sa inyo sa oras na makauwi na kayo.”

Inabot naman ito ni Benedict bago nagtanong, “nasaan siya?”

“Umalis na po si Madam dala ang maleta niya kaninang after lunch po, hindi n’yo po ba alam?” nagtatakang tanong ni Cora.

Napahinto sa pag-akyat si Benedict nang marinig iyon at mabilis na nilingon ang mayordoma, “bumalik na siya sa Pilipinas?”

“Siguro po, Sir. Wala naman po siyang nasabi.”

Mula nang bumalik si Mikaela sa Amerika ay hindi man lang binigyan ni Benedict ng pagkakaton ang asawa na makasama sila at makapagsalita man lang ng mga nais nitong sabihin sa kaniya. Pero kahit ganoon ay wala naman din siyang pakialam sa nararamdaman nito sa kaniya. Hindi niya dinidibdib ang ano mang nais nito at maging ang nararamdaman nito.

Samantala, nalulungkot naman si Lilia nang malamang umalis na ang kaniyang ina. Kahit pa ganoon ang naging pagtrato niya sa ina ay gusto niya pa rin itong makatabi sa pagtulog sa kama sa gabing iyon. Hindi naging madali sa kaniya ang paggawa ng flower necklace at gusto niya sana na tulungan siya ng kaniyang ina sa paggawa noon.

Matagal na hindi nagkita sina Benedict at Mikaela at nang makabalik si Mikaela sa Amerika ay hindi rin naman sila nagkitang dalawa. Alam niya na kaagad na nakabusangot ang mukha nito nang umalis. Sakto namang nagsalita si Cora sa kaniya.

“Sir, bago umalis si Madam, napansin ko pong parang galit siya. Nag-away po ba kayo?”

Hindi sa nangingialam si Cora sa mag-asawa. Nag-aalala lamang siya sa maaaring maging epekto nito kay Lilia.

Noong una akala pa ni Cora, kaya bumalik si Mikaela sa Pilipinas ay dahil may importante itong gagawin doon ngunit nang malaman niyang walang alam si Benedict sa mga nangyayari ay nagtaka na siya. Batid niya kaagad na may mali at kakaiba. Nagtaka rin siya nang makita ang galit na ekspresyon sa mukha ni Mikaela lalo pa at alam niyang mahinahon at pasensyosa ito lalo na pagdating kay Benedict at sa anak nito. Hindi niya akalaing nakakaramdam din pala ito ng galit na sadyang bago sa kaniya.

Napangiti na lang si Benedict sa kaniya at saka itinuloy ang pag-akyat sa taas.

Nang tuluyang makapasok sa silid, akmang bubuksan niya na sana ang brown envelope na iniwan sa kaniya ni Mikaela nang biglang magring ang kaniyang cellphone at si Aireen ang tumatawag. Kaagad niya iyong sinagot at inihagis na lang ang brown envelope at nagsimulang lumabas ulit ng kwarto.

Hindi niya alam na nalaglag ang brown envelope sa sahig sa tabi ng kaniyang kama.

Hindi rin siya umuwi nang gabing iyon.

Kinabukasan, pumasok si Cora sa loob ng silid ni Benedict para maglinis nang mapansin niya ang brown envelope na nakakalat sa sahig. Nakilala niya agad ito dahil nakatitiyak siyang ito ang ipinagbilin sa kaniya ng kaniyang madam na si Mikaela. Sa pag-aakalang nakita na ito ni Benedict ay kinuha niya ito at inilagay sa cabinet sa loob ng silid.

***

Nang makabalik si Mikaela ng Pilipinas ay kaagad niyang kinuha ang kaniyang bagahe at umuwi baon ang masakit na ala-ala sa America.