Chapter 50

“Let’s start with our first game!” sigaw ni Linda matapos ang mahigit isang oras na pahinga at kuwentuhan namin habang nakaupo sa ibaba ng mga matatas na puno at buhanginan.

Nagsitayuan naman ang lahat at naghiyawan na halatang excited.

“So, ako lang ang hindi kasali sa larong ito, tapos kayong lahat ay kailangang mag-patticipate,” aniya at ngumisi pa.

“Anong laro?” tanong naman ni Rose.

“Mga larong pambata lang tayo,” aniya. “Chill at good vibes lang. Nakaka-miss kasi ang kabataan natin kung saan naglalaro tayo kasama ang mga kaibigan natin sa kalsada, sa panahon ngayon puro smartphone na, tayo naman, hindi na magawa ang mga iyon kasi bukod sa may edad na tayo ay abala tayo sa trabaho,” mahabang paliwanag pa niya.

“I’m excited!” may halong harot na wika naman ni Veronica.

“Alright, ang first game natin ay ang ‘the boat is sinking’…” aniya at ngumisi sa amin. “Alright, let’s get ready!” sigaw pa niya.