Kabanata 02

Gamit ang kaniyang natitirang lakas ay pilit na kumawala si Adrian mula sa kamay ng ama ni Clarissa. Tumakbo siya sa kinaroroonan ng asawa at binuhat ang walang malay na asawa. Nanginginig siya sa takot at galit dahil sa nangyari sa asawa niya.

"Dadalhin kita sa ospital, Clary. Kumapit ka lang dahil hindi ko hahayaan na may mangyaring masama sa iyo," aniya habang naluluha. Bago pa man tuluyang umalis si Adrian ay hinarap niya ang pamilyang Ortiz na ngayon ay natitigilan dahil sa nangyari kay Clarissa.

Nanginginig ang buong katawan ni Adrian habang sinasabi ang mga salitang, "Kapag may masamang mangyari sa asawa ko, magdasal na kayo dahil pagbabayarin ko kayo ng mahal!"

Walang sino man ang nagtangkang magsalita sa kanila kaya hindi na hinintay ni Adrian na makapagsalita pa ang mga ito. Karga-karga niya ang wala pa ring malay na asawa hanggang sa makahanap na siya ng sasakyan kaya dali-dali niya itong sinugod sa malapit na ospital. Habang sila ay patungo roon, walang pagsisidlan ang poot na nararamdaman niya sa mga oras na ito sa kamay ng kaniyang biyenan.

Simula nang maging parte siya ng pamilyang Ortiz ay wala na siyang ibang ginawa kung hindi lunukin ang mga masasakit na salitang binabato nila sa kaniya. Hindi siya gusto ng mga ito para sa asawa dahil isang hamak lamang siyang gardenero ng pamilyang Ortiz na nahulog sa isa sa mga anak nila.

"Bossing, ayos lang po ba kayo?"

Napalingon naman si Adrian sa taxi driver nang magtanong ito tungkol sa kaniyang kalagayan kaya ngumiti siya nang pilit.

"Ayos lang po ako. Pakibilisan na lang po dahil ayokong may masamang mangyari sa asawa ko," aniya kaya naman itinango na lamang ng driver ang kaniyang ulo bilang tugon sa kaniya.

Makalipas ang ilang minuto ay nakarating naman kaagad siya sa ospital at dali-daling pinasok ang asawa sa loob. Sinalubong naman siya ng mga doctor at nurse saka dinala ang asawa sa ER para tignan ang kaniyang kalagayan. Nais niya sanang sundan ito sa loob subalit hindi na siya pinasama ng mga doctor.

Nanghihina na lamang naupo sa sahig si Adrian habang ginugulo ang kaniyang buhok. Hindi alintana sa kaniya ang sugat na natamo mula sa pagkakasuntok ng ama ni Clarissa dahil ang iniisip niya sa mga oras na ito ay ang asawa. Hindi siya makakapayag na may masamang mangyari sa asawa niya.

Makalipas lamang ang ilang minuto ay may biglang dumating kaya naman ay tumayo siya sa pagkakaupo at tinignan ang mga taong dumating.

Pak!

Isang malutong na sampal ang kaniyang natanggap mula sa ina ni Clarissa na ngayon ay galit na galit na sa kaniya.

"Hinding-hindi kita mapapatawad kapag may masamang mangyari sa anak ko. Nagkakaganyan siya dahil sa iyo. May sakit sa puso si Clarissa, alam mo ba iyon!"

Nanlumo naman siya nang marinig ang mga salitang iyon mula sa bibig ng babaeng biyenan.

"I am so sorry. Hindi ko intensiyon na mangyari ang lahat ng ito. Mahal na mahal ko si Clarissa at—"

Pak!

Isa na namang sampal ang kaniyang natanggap mula sa kapatid ni Clarissa kaya naman ay napakagat na lamang siya sa kaniyang ibabang labi.

"Wala kayong makukuhang tulong mula sa amin. You should pay her bills dahil kasalanan mo rin kung ano ang nangyari kay Clarissa. Wala kang perang makukuha sa amin at kailan man ay wala nang makukuha pa si Clarissa na yaman mula sa amin simula noong pinili ka niya kaya kahit na isa siyang Ortiz ay hindi namin siya tutulungan!"

Hindi naman makapaniwala sa narinig si Adrian nang sabihin iyon ng kapatid ni Clarissa na si Dorothy. Hindi niya inaakala na ganoon na lamang sila kasama para abandunahin ang asawa na sarili nilang kadugo.

"Just make sure my daughter will survive, Adrian. Dahil kapag hindi mo nagawan ng paraan na maipagamot siya, kukuhanin namin siya mula sa iyo at asahan mong hindi na siya babalik pa. Hinding-hindi mo na siya makukuha pa!" sambit naman ni Ginang Valerie kaya napaiyak si Adrian.

"Wala akong pera para maipagamot si Clarissa. Nagmamakaawa ako sa inyo na kahit sa pagkakataong ito ay magtulungan tayo para sa kaniya—"

"Hindi na kami magsasayang ng oras pa sa iyo, Adrian. Tandaan mo ang sinabi namin," sambit naman ni Dorothy at kaagad na silang tumalikod para umalis. Nagmamakaawa pa si Adrian at wala na siyang pakialam pa kung magmumukha pa siyang tanga dahil ginagawa niya ang lahat nang ito para sa asawa subalit hindi na nakinig ang mga ito at tuluyan na ring umalis.

Isang oras ang nakalipas at nakasalampak pa rin siya sa sahig hanggang sa magbukas ang pinto at lumabas ang doctor mula sa kinaroroonan ng asawa niya. 

"Kailangan ng pasyente na magamot kaagad hangga't hindi pa lumalala ang kaniyang sitwasyon subalit nais ko lamang na ipaalala sa iyo na nangangailangan tayo ng malaking pera para sa kaniyang gamot," 

Halos naman manlumo si Adrian nang marinig ang mga salitang iyon mula sa doctor. Hindi niya alam kung saan siya makakahanap nang malaking pera para sa gamot ni Clarissa pero kailangan niyang gumawa nang paraan lalo na ngayon at wala siyang maaasahang tulong mula sa pamilyang Ortiz.

"Please save my wife's life, Doc. Gagawan ko nang paraan makanahap ng pera basta gawin niyo lahat para makabalik siya sa akin," aniya sa doctor at tumango ito saka bumalik sa loob. Tuluyan na ngang napahikbi si Adrian dahil sa problemang kinahaharap niya sa panahon na ito.

Masyado nang mahirap ang kaniyang pinagdaraan mula sa malulupit na kamay ng pamilyang Ortiz at ngayon dumagdag naman itong kalagayan ng asawa niya. Wala nang maisip na ibang paraan si Adrian kung hindi magmakaawa kay Lady Esmeralda para tulungan ang kaniyang apo. Nakahanda na si Adrian na harapin ang matanda kahit pa ang maging kapalit nito ay mga masasakit na salita ngunit kailangan niyang gawin lahat para rito.

Pinahid ni Adrian ang luha sa kaniyang mga mata at tumayo mula sa pagkakaupo sa sahig para umalis. Wala na siyang ibang malalapitan pa kung hindi ang Lady Esmeralda. Sakto namang tumayo si Adrian ay may biglang magsalita sa likuran niya.

"Mr. Adrian Lewis may nagpapabigay po sa inyo,"

Kaagad namang hinarap ni Adrian ang lalaki at napakunot ang kaniyang noo nang makita ang isang lalaking matangkad na nakasuot ng itim na tuxedo at may hawak na isang itim na brief case.

"S-Sino?" 

Kinukutuban na si Adrian kung sino ang nag-utos sa lalaking ito ngunit hindi naman siya puwedeng mangarap na tama ang kaniyang hinala.

"Si Don Albert Lewis at pinabibigay niya ang isang milyon na ito para sa iyo."